Katonda Ali mu Buli Kintu?

Ekizibu ekinene ekiziyiza okubeera n’obulamu obw’okwewaayo okujjuvu, kwe kuba nti kizibu okulaba Katonda mu buli kintu.

Abantu bagamba nti, “Nsobola okugondera ebintu ebiva eri Katonda. Naye siyinza kugondera muntu. “Ebigezo byange ebisinga obungi biyita mu bantu.” Oba nti, “Kirungi okwogera ku kwesiga. Naye bwe nkwasa Katonda ensonga, omuntu talema kuyingira n’agyonoona. Nsobola okwesiga Katonda, naye ndaba ebizibu eby’amaanyi mu kwesiga abantu.””

Kino si kizibu kya kulowoozebwa bulowoozebwa. Kikulu nnyo ddala. Bwe kitaggibwako kyakuddamu, kifuula okukkiriza endowooza ey’ekirooto etasobola kutuukirira. Kumpi buli kintu mu bulamu kitutuukako nga kiyita mu bantu. Ebigezo byaffe ebisinga obungi biva mu kulemererwa kw’omuntu omu, oba mu butamanya bwe, mu bulagajjavu bwe, oba mu kibi kye. Tumanyi nti Katonda tayinza kuba nsibuko ya bintu ebyo. Naye bw’aba nga si ye abikola, tuyinza tutya okumugamba nti, “By’oyagala bikolebwe”? Ate era, kigasa ki okukwasa Katonda ensonga zaffe, ng’omuntu asobola okuyingira n’azitabulatabula? Era, tuyinza tutya okubeera mu bulamu obw’okukkiriza nga tetuyinza kwesiga bantu? Banaaba n’obuyinza bungi nnyo ku bulamu bwaffe.

Ekirala, ebintu bye tulabamu omukono gwa Katonda bulijjo biba n’obuwoomi obubudaabuda ne bwe biba nga bitulumya. Naye ebigezo ebiva eri omuntu bijjudde obukaawu. N’olwekyo, tulina okulaba Katonda mu buli kintu. Tulina okutwala ebintu byonna ng’ebirabo bye ebiva gy’ali butereevu, awatali bivaako eby’okubiri. Tulina okutuusibwa ku kino. Olwo lwokka lwe tuyinza okumanya, mu bumanyirivu obw’olubeerera, okwewaayo okujjuvu n’okwesiga okutuukiridde. Okwewaayo kwaffe kulina kuba eri Katonda, so si eri omuntu, n’okwesiga kwaffe kulina kuba mu ye, so si mu omukono ogw’omubiri gwonna, oba si ekyo tujja kulemererwa ku kigezo ekisooka.

Ekibuuzo kiri nti, “Katonda ali mu buli kintu? “Tulina ekyawandiikibwa ekituwa okutwala buli kintu ng’ekiva gy’ali? Kyaleetebwa ebirala.”” Nziramu, awatali kulonzalonza, nti yee. Eri abaana ba Katonda, byonna biva mu mukono gwa Kitaabwe. Tekikyali kikulu ani eyalabika ng’abikoze. Gye bali tewali “bivaako eby’okubiri”. Okuyigiriza kwonna okwa Bayibuli kino kukyogera era kukitegeeza. Ku bikwata ku nkazaluggya kyawandiikibwa nti, “tewali n’emu ku zo eyinza okuttibwa nga Kitammwe tamanyi.” Buli luviiri oluli ku mitwe gyaffe lwabalibwa. Tetulina kweraliikirira kintu na kimu, kubanga Kitaffe atufaako. Tetulina kuwalana ggwanga, kubanga Kitaffe yeetisse obuvunaanyizibwa bw’okutulwanirira.

Tetulina kutya, kubanga Mukama ali ku ludda lwaffe. Tewali n’omu ayinza kutulwanyisa, kubanga ali ku lwaffe. Tetuliiko kye tunaabulwa, kubanga ye Musumba waffe. Bwe tunaayitanga mu migga, tegiritusaanyaawo. Bwe tunaayitanga mu muliro, tegutwokyenga. Anaabeeranga naffe. Aziba emimwa gy’empologoma ziremenga okutukolako akabi. Awonya era alokola. Akyusa ebiseera n’ebiro; aggyawo bakabaka era assaawo bakabaka. Omutima gw’omuntu guli mu mukono gwe, era ng’amazzi agakulukuta, agukyusiza gy’ayagala yonna.” “Afuga obwakabaka bwonna obw’amawanga. Obuyinza n’amaanyi biri mu mukono gwe. Tewali n’omu ayinza okuyimirira mu maaso ge.”

Afuga amalala g’ennyanja; amayengo gaayo bwe geekuluumulula agakkakkanya. Mukama asansulula enteekateeka y’amawanga; alemesa abantu okutuukiriza bye bagenderera. Mukama kyonna ky’asiima ky’akola, mu ggulu ne ku nsi; mu nnyanja ne mu buziba bwayo. Bw’olabanga omwavu ng’anyigirizibwa n’obwenkanya nga bukyamizibwa, teweewuunyanga. Kubanga waliwo asinga oyo asinga obukulu. Alaba byonna. Naye nga bino katundu butundu ku bye yakola. Nga kye tumuwulirako katundu butundu ku ekyo ky’ali! Ani ayinza okutegeera okubwatuka kw’obuyinza bwe?”

“Tonnamanya? Tonnawulira? Mukama, ye Katonda ataliggwaawo. Omutonzi w’enkomerero y’ensi. Tazirika so takoowa era n’amagezi ge tewali n’omu ayinza kugapima.

Era Katonda ono kye kiddukiro kyaffe, era ge maanyi gaffe; omubeezi ddala atabulawo mu kulaba ennaku. Kyetunaavanga tulema okutya, ensi ne bw’eneeyuuguumanga, ensozi ne bwe zinaasiguulukukanga ne zigwa mu buziba bw’ennyanja; amazzi g’ennyanja ne bwe ganaayiranga ne gabimba ejjovu.

Ensozi ne bwe zinaakankananga olw’okwetabula kwago. Nnaayogeranga ku Mukama nti, Oli kiddukiro kyange era ekigo kyange; ggwe Katonda wange gwe nneesiga. Ddala ddala y’anaakuwonyanga omutego gw’omuyizzi, ne kawumpuli azikiriza. Alikubikka n’ebyoya bye, era mu biwaawaatiro bye mw’onoddukiranga; obwesigwa bwe bunaabanga ngabo yo okukukuumanga. Tootyenga ntiisa ya kiro, wadde akasaale akalasibwa emisana; newaakubadde olumbe olusoobasooba mu kizikiza, wadde kawumpuli azikiriza mu ttuntu.

“Abantu olukumi balifiira ku lusegere lwo, n’omutwalo ne bafiira ku mukono gwo ogwa ddyo, naye olumbe terulikutuukako. Olitunuulira butunuulizi n’amaaso go; n’olaba ekibonerezo ky’omukozi w’ebibi. Kubanga bw’olifuula Mukama ekiddukiro kyo; Ali Waggulu Ennyo n’omufuula ekifo kyo mw’obeera, tewali kabi kalikutuukako, so tewali kibonoobono kirisemberera nnyumba yo. Kubanga Mukama aliragira bamalayika be bakukuume mu makubo go gonna.”

Zabbuli 91:7-11 Ebyawandiikibwa bino, n’ebirala ebiri nga bino, bimalawo omulundi gumu ogw’enkomerero ekibuuzo ky’ebivaako eby’okubiri mu bulamu bw’abaana ba Katonda. Ebintu ebyo byonna biri wansi w’obuyinza bwa Kitaffe. Tewali kiyinza kututuukako wabula ng’amanyi era ng’akkirizza. Ekibi ky’omuntu kiyinza okuleeta ekikolwa ekyo. Bwe kityo, tekiyinza kuyitibwa kwagala kwa Katonda. Naye we kitutuukira, kiba kwagala kwa Katonda. Tulina okukitwala ng’ekiva butereevu mu mikono gye.

Tewali muntu wadde ekibinja, tewali buyinza ku nsi wadde mu ggulu, buyinza kukwata ku mwoyo ogubeera mu Kristo. Bisooka kuyita mu ye ne bifuna olukusa lwe. Katonda bw’abeera ku lwaffe, tekikyali kikulu ani ayinza okutulwanyisa; tewali kiyinza kututabulatabula wadde okutukola akabi, okuggyako ng’alabye nti kye kisinga obulungi gye tuli, n’adda ebbali okukireka okuyitawo. Okulabirira kw’omuzadde ow’oku nsi eri omwana we atayinza kwerwanako kyakulabirako kinafu nnyo ku kino. Omwana bw’aba mu mikono gya kitaawe, tewali kiyinza kumukwatako nga kitaawe tannakkiriza, okuggyako nga kitaawe munafu nnyo okukiziyiza.

Era ne bwe kiba bwe kityo, asooka kubonyaabonyezebwa ye yennyini, ng’akabi tekannatuuka ku mwana we. Omuzadde ow’oku nsi bw’ayinza okulabirira bw’atyo omwana we atayinza kwerwanako, kale Kitaffe ow’omu ggulu alisingawo nnyo okutulabirira! Okwagala kwe tekuliiko kkomo. Amaanyi ge n’amagezi ge tebiggwaawo.

Abamu, ne mu baana ba Katonda, babuusabuusa okwagala kwe n’okulabirira kwe. Mu kyama bamunenya olw’obulagajjavu bwe batandigumiikirizza. Naye okulabirira kwe kusinga nnyo okw’abantu. Abala enviiri ez’oku mitwe gyaffe era amanya enkazaluggya bw’egwa. Alabirira buli kantu akatono akakwata ku bulamu bw’abaana be. Byonna abifuga ng’okwagala kwe bwe kuli, ne bwe biba nga bivudde wa.

Ebyokulabirako ku kino tebibalika. Lowooza ku Yusufu. Kiki ekyandirabise ng’ekiva mu kibi okusinga okutundibwa kwe mu buddu? Kyali kikontana ddala n’okwagala kwa Katonda. Naye Yusufu, bwe yali ayogera ku kyo, yagamba nti, “Mwagenderera okunnumya, naye Katonda n’akifuula ekirungi, n’akikozesa abantu baleme okufa.” Olubereberye 50:20. Naye kaakano temuggwaamu mwoyo, oba temwekubagiza olw’okuntunda wano. “Katonda yantuma mbasookeyo nsobole okuwonya obulamu.” Mu ndaba ey’omubiri, mazima baganda ba Yusufu ababi be baamusindika e Misiri.

Naye, olw’okukkiriza, Yusufu yasobola okugamba nti, “Katonda yantuma.” Baganda be baali bayonoonye. Naye we kyatuukira ku Yusufu, kyali kwagala kwa Katonda. Era, wadde nga ku ntandikwa tekyalabika bwe kityo, kye kyali omukisa ogusinga obunene mu bulamu bwe. Bwe tutyo tulaba Mukama bw’ayinza okufuula n’obusungu bw’omuntu okumutendereza. Era tulaba nti ebintu byonna, n’ebibi by’abalala, bibatuukako olw’obulungi abo abaagala Katonda.

Eky’okuyiga kino nakiyiga mu bulamu bwange obwa bulijjo era mu bumanyirivu, nga wakyali wala nnyo nga sinnamanya kyawandiikibwa kyakyo. Nnali mu lukuŋŋaana olw’okusaba olw’obutukuvu obwesigamiziddwa ku Byawandiikibwa. Omukyala gwe nnali simanyi n’ayimirira okwogera. Ne nneebuuza nti ani oyo, nga simanyi nti yali agenda kunjigiriza eky’okuyiga eky’amaanyi. Yagamba nti yalina obuzibu bungi mu kubeera mu bulamu obw’okukkiriza. Ekyabuleeta bye bivaako eby’okubiri ebyalabikanga ng’ebifuga buli kimu ekimukwatako. Okutabulwa kwe ne kweyongera. N’atandika okusaba Katonda amuyigirize amazima. Ddala Katonda yali mu buli kintu, oba nedda?

Bwe yamala ennaku ntono ng’asaba bw’atyo, n’afuna ekyo kye yayita okwolesebwa. Yalowooza nti ali mu kifo eky’ekizikiza. Awo ekitangaala ekinene ne kiva wala ne kijja gy’ali. Mpolampola ne kimwetooloola ne kimubikka, ye n’ebintu byonna ebyali bimwetoolodde. Bwe kyali kisembera, eddoboozi ne liringa erigamba nti, “Kuno kwe kubeerawo kwa Katonda; kuno kwe kubeerawo kwa Katonda.” Okubeerawo kuno ne kumulaga ebintu byonna ebinene era eby’entiisa mu bulamu.

Yalaba amagye nga galwana, abantu ababi, ensolo enkambwe, kibuyaga, ne kawumpuli. Yalaba buli ngeri y’ekibi n’okubonaabona. Mu kusooka, n’addirira emabega olw’entiisa. Naye amangu ddala n’alaba nti okubeerawo kwa Katonda kwali kwetoolodde era nga kubisse buli kimu ku ebyo. Tewali mpologoma yayinza kugolola kigere kyayo, wadde essasi okubuuka mu bbanga, okuggyako ng’okubeerawo kwe kwesegudde okukikkiriza.

Yamanya nti, ne bwe wandibaddewo olubikka olusinga obugonvu olw’okubeerawo kuno okw’ekitiibwa wakati we n’obukambwe obw’entiisa, tewali kyandisobodde kumukwatako. Tewali luviiri na lumu ku mutwe gwe olwandikyusiddwa.

Naye okubeerawo okwo kwalina okusooka okwesegula okuleka obubi okuyitawo. Awo ebintu byonna ebitono ebinyiiza mu bulamu ne bimweyolekera mu kaseera katono. N’alaba nti nabyo byali bizingiddwa nnyo mu kubeerawo kwa Katonda, ne kiba nti tewali kyandimukutteko. Tewali ndabika ya busungu, wadde ekigambo ekikakali, wadde ekigezo ekitono, ekyandimutuuseeko okuggyako ng’abiganyizza okuyitawo.

Obuzibu bwe ne bubula. Ekibuuzo kye ne kifuna eky’okuddamu emirembe gyonna. Katonda yali mu buli kintu, era okuva olwo gy’ali tewaali bivaako eby’okubiri. N’alaba nti obulamu bwe bwamutuukangako, buli lunaku era buli ssaawa, nga buva mu mukono gwe. Tekyali kikulu kiki ekyalabikanga ng’ekibufuga. Era, teyaddamu kulaba nga kizibu okwesiga okulabirira kwe. Naye bwe tussa amaaso ku bintu ebirabika, tetujja kutegeera kyama kino. Abaana ba Katonda balina “obutatunuulira bintu ebirabika, kubanga ebintu ebirabika bya kiseera buseera, naye ebyo ebitalabika bya mirembe na mirembe.” Singa tusobola okulaba amaanyi ge agatalabika agatwetoolodde, twandiwulidde nga tuli mirembe. Twanditambudde mu nsi eno nga tuli mu kigo ekitayinza kumenyebwa. Kubanga “Malayika wa Mukama yeebungulula abo abatya Mukama, n’abawonya.”

Kino tukirabira ku kyakulabirako ekyewuunyisa mu byafaayo bya Erisa. Kabaka wa Busuuli yali alwana ne Isirayiri.

Enteekateeka ze embi zaalemesebwa nnabbi. Bw’atyo, n’asindika eggye lye mu kibuga kya nnabbi okumukwata. Tusoma nti, “Amangwago n’asindika embalaasi, n’amagaali, n’eggye ery’amaanyi, ne bajja mu kiro ne bazingiza ekibuga.” Kino kye kyali ekirabika. Omuweereza wa nnabbi, eyali tannazibulwa maaso kulaba bitalabika, n’atya. Tusoma nti, “Omuweereza ow’omusajja wa Katonda bwe yazuukuka ku makya n’afuluma ebweru, laba, eggye eririna embalaasi, n’amagaali nga lyetoolodde ekibuga.” Omuweereza we n’agamba nti, “Ayi mukama wange tunaakola tutya?” Naye mukama we yali asobola okulaba ebitalabika, n’addamu nti, “Totya kubanga abali naffe bangi okusinga abali nabo.” Awo n’asaba ng’agamba nti, “Ayi Mukama, zibula amaaso ge asobole okulaba.

Mukama n’azibula amaaso ag’omuweereza, n’alaba. Olusozi lwali lujjudde embalaasi n’amagaali ag’omuliro nga geetoolodde Erisa. Okubeerawo kwa Katonda kye kigo ky’abantu be. Tewali kiyinza kukuyimirira mu maaso. Mu maaso ge ababi bazikirira. Ensi ekankana. Ensozi zisaanuuka ng’envumbo. Ebibuga bigwa ne bisaanawo. “Eggulu ne lifukumula enkuba mu maaso ga Katonda; n’olusozi Sinaayi ne lukankana awali Katonda.” Mu kyama kino, yasuubiza okukweka abantu be mu malala g’abantu ne mu nnyombo z’ennimi. “Nnaagendanga naawe,” bw’agamba, “era nnaakuwummuzanga.” Nandyagadde buli Mukristaayo alabe amazima gano nga bwe ngalaba obulungi. Ge kisumuluzo kyokka eky’obulamu obujjudde ekiwummulo. Tewali kirala kiyinza kusobozesa mwoyo kubeera mu kaseera ka kaakano kokka, nga bwe twalagirwa. Tetulina kweraliikirira bya nkya.

Tewali kirala kiyinza kuggya bulabe bwonna mu mutima gw’Omukristaayo. Tewali kirala kiyinza kumusobozesa kugamba nti, “Ddala ddala obulungi n’okwagala okutaggwaawo binaagendanga nange ennaku zonna ez’obulamu bwange.” Bwe tubeera mu kubeerawo kwa Katonda, tetuliiko kabi ke tutya. Omwoyo ogwo guyinza okugamba nti: “Simanyi kye kitegeeza okubuusabuusa. Omutima gwange bulijjo gusanyuka. “Siriiko kabi ke ntya, kubanga, ka kijje kiki, Katonda bulijjo akola nga bw’ayagala.” Lumu nawulira ku mukazi omuddugavu. Yafunanga eky’okulya ekitali kya nkalakkalira mu mulimu gw’olunaku ku lunaku. Naye yali Mukristaayo ajjudde essanyu era omuwanguzi.

“Ah!”Nancy,” bwe yamugamba lumu omukyala Omukristaayo eyali omunakuwavu. Kumpi yali tasiima kusanyuka kwe okw’olubeerera, naye nga n’akukwatirwa obuggya.

“Ah!” Nancy, kirungi okusanyuka kaakano, naye nandirowoozezza nti okulowooza ku biseera byo eby’omu maaso kwandikukkakkanyizza. Kale teebereza, ng’ekyokulabirako, nti olwadde n’oba toyinza kukola. Oba, teebereza nti abakukozesa basenguse, ate ne watabaawo mulala akuwa mulimu. Oba teebereza — “Komya!” Nancy bwe yaleekaana, “Nze siteeberezangako.

Mukama ye Musumba wange, era mmanyi nti seetaagenga. Era, muganzi wange,” bwe yayongerako ng’agamba mukwano gwe omunakuwavu, “mmanyi nti ebintu ebyo byonna ebiteeberezebwa bye bikunakuwaza bw’otyo. Osaanidde okubireka byonna weesige Mukama yekka.” Ekyawandiikibwa kimu kiyinza okumalawo “okuteebereza” kw’omukkiriza. Kasita kitwalibwa era ne kikolerwako n’okukkiriza okw’omwana omuto. Kiri mu Abaebbulaniya 3:5-6 “Musa yali muweereza mwesigwa mu nnyumba ya Katonda yonna, eyayogera eby’obunnabbi ku bintu ebyali bigenda okwogerwa mu biro eby’omu maaso. Naye ate Kristo ye Mwana omwesigwa, akulira ennyumba ya Katonda; ate ffe tuli nnyumba y’oyo bwe tunywera ne tuba bavumu ne twenyumiririza mu ssuubi lye tunywezezza.” Bye olina bikumalenga. Kubanga yagamba nti, “Mwewalenga omululu, bye mulina bibamalenga. Kubanga Katonda yagamba nti, ‘Sirikuleka era sirikwabulira n’akatono.” Kyetuva twogera n’obuvumu nti, Mukama ye mubeezi wange, siityenga, omuntu ayinza kunkola ki?” Abaebbulaniya 13:5-6 Kale singa obulabe bukutiisa okuva ku buli ludda? Kale singa ettima ly’abantu, obusirusiru bwabwe, oba obutamanya bwabwe byegatta okukukola akabi?

Oyinza okwolekera buli kiyinza okubaawo ng’olina ebigambo bino: “Mukama ye mubeezi wange, siityenga, omuntu ayinza kunkola ki?”

Mukama bw’aba nga ye mubeezi wo, oyinza otya okutya omuntu ky’ayinza okukukola? Tewali muntu, wadde ekibiina ky’abantu kyonna, kiyinza kukukwatako. Okuggyako, kya lwatu, nga Katonda wo, gw’oyesiga, akikkirizza. “Taliganya kigere kyo kusagaasagana; oyo akukuuma taabongootenga. Laba, oyo akuuma Isirayiri taabongootenga so teyeebakenga. Mukama ye mukuumi wo; Mukama y’akusiikiriza ku mukono gwo ogwa ddyo; emisana enjuba teekwokyenga, wadde omwezi ekiro. Mukama anaakukuumanga mu buli kabi; anaalabiriranga obulamu bwo. Mukama anaakukumanga amagenda go n’amadda, okuva leero n’okutuusa emirembe gyonna.” (Zabbuli 121:3-8) Okulaba Katonda mu buli kintu kwokka kwe kujja okutufuula ab’okwagala era abagumiikiriza eri abo abatunyiiza.

Banaaba bikozesebwa byokka mu kutuukiriza ebigendererwa bye eby’amagezi era eby’ekisa. Tujja kumaliriza nga tubeebaza olw’emikisa gye batuleetera. Tewali kirala kijja kumalirawo ddala okwemulugunya kwonna oba ebirowoozo eby’obujeemu.

Abakristaayo emirundi mingi beewulira nga ba ddembe okwemulugunyiza abantu, so nga tebandyetantadde kwemulugunyiza Katonda. Naye engeri eno ey’okutwala ebintu yandifudde kitasoboka n’akatono okwemulugunya. Kitaffe bw’akkiriza ekigezo, kiteekwa okuba nga kye kisinga obulungi gye tuli. Tulina okukitwala n’okwebaza ng’ekiva mu mukono gwe ogw’okwagala.

Ekigezo kyennyini kiyinza okuba ekizibu eri omubiri n’omusaayi, era sitegeeza nti tuyinza okwagala oba okunyumirwa okubonaabona kwakyo. Naye tuyinza era tulina okwagala ekyo Katonda ky’ayagala mu kigezo, kubanga ky’ayagala bulijjo kiwooma, ka kibe mu ssanyu oba mu nnaku. Ebigezo byaffe biyinza okuba amagaali gaffe. Twegomba okuwangula ekibi n’okwerowoozaako, era tusaba Katonda atuwe obuwanguzi obwo.

Okuddamu kwe kujja mu ngeri y’ekigezo, ky’agenderera okuba eggaali erinaatutwala eri obuwanguzi bwe twegomba. Tuyinza okukireka ne kituyitako ne kitubetenta ng’amaanyi agatayinza kuziyizibwa. Oba tuyinza okulinnya mu kyo ne tweyongerayo mu maaso nga tuli bawanguzi. Amagaali ga Yusufu agaamusitula okutuuka mu kitiibwa, byali bigezo bye. Kwali kutundibwa mu buddu n’okusibibwa mu kkomera nga talina musango.

Amagaali gaffe gayinza okuba amatono ku ago. Gayinza okuba abantu obuntu abatunyiiza oba embeera enzibu. Naye ka gabe gatya, Katonda agagenderera okuba amaanyi gaffe ag’obuwanguzi.

Galitutwala eri obuwanguzi bwe twasabira. Bwe tuba nga tetulina bugumiikiriza ate nga twegomba okubufuna, eggaali lyaffe liyinza okuba omuntu atugezesa. Empisa ze oba ebigambo bye bijja kugezesa emyoyo gyaffe ddala. Bwe tukkiriza ekigezo ng’ekiva eri Katonda ne tukigondera, kiriba okukangavvulwa okusinga obulungi. Kirituwa obugumiikiriza bwe tunoonya.

Katonda tateekateeka kintu kikyamu. Naye akikozesa okutuwa omukisa. Kino yakikola n’obukambwe bwa baganda ba Yusufu ababi. Era, n’ebigambo eby’obulimba mukyala wa Falaawo bye yamuwaayiriza. Kino kifuula obulamu okwebaza okutaggwaawo. Kituwa emirembe egy’omunda ennyo n’essanyu eritayinza kwogerwa. Omuntu omu agamba nti, “Okwagala kwa Katonda ku nsi bulijjo ssanyu, bulijjo mirembe.” Ateekwa okukola nga bw’ayagala n’abaana be. Omwoyo oguyiga ekyama kino gusanga eddundiro ly’omuddo omuto n’amazzi amateefu. Biwa ekiwummulo n’amaanyi amaggya.

Okwagala kwa Katonda bwe kuba nga kwe kwagala kwaffe, era bw’aba nga bulijjo akola nga bw’ayagala, olwo naffe bulijjo tukola nga bwe twagala, era tufugira mu bwakabaka obutaggwaawo. Oyo ayimirira ku ludda lwa Katonda aliwangula buli mulundi. Ka kibe ki ekivaamu, tuyinza okwegatta ku kireekaana ky’obuwanguzi eky’omutume: “Naye ebirowoozo byabwe byakkakkanyizibwa kubanga n’okutuusa leero ekibikka ku maaso ekyo kikyali kye kimu kye beebikkanga nga basoma endagaano enkadde, kye bakyebikako nga bagisoma, tekyababikkulirwa, kubanga kiggyibwawo mu Kristo.”

(2 Abakkolinso 2:14)