Abasinza ab’Amazima

‘Naye ekiseera kijja, era kituuse, abo abasinziza mu mazima bwe banaasinzizanga Kitaffe mu mwoyo ne mu mazima. Kubanga Kitaffe anoonya abo abamusinza era n’abo abamusinza kibagwanira okumusinzanga mu mwoyo ne mu mazima. Kubanga Katonda Mwoyo n’abo abamusinza kibagwanira okumusinza mu mwoyo ne mu mazima.’—Yokaana 4:23-24.

EBIGAMBO bino Yesu bye yagamba omukazi Omusamaliya kwe kuyigiriza kwe okusooka okuwandiikiddwa ku nsonga y’okusaba. Bituwa okulengera okusooka okw’ekitalo mu nsi y’okusaba. Kitaffe anoonya abamusinza: okusinza kwaffe kumatiza omutima gwe ogujjudde okwagala, era kumusanyusa. Anoonya abasinza ab’amazima, naye asanga bangi abatali nga bw’ayagala babeere. Okusinza okw’amazima kwe kwo okuli mu mwoyo ne mu mazima. Omwana azze okuggulawo ekkubo ly’okusinza kuno mu mwoyo ne mu mazima, n’okukutuyigiriza. Noolwekyo erimu ku masomo gaffe agasooka mu ssomero ly’okusaba liteekwa okuba okutegeera kye kitegeeza okusaba mu mwoyo ne mu mazima, n’okumanya engeri gye tuyinza okukutuukako.

Mukama waffe yayogera n’omukazi Omusamaliya ku kusinza okw’engeri ssatu. Ekisooka, waliwo okusinza okw’obutamanya okw’Abasamaliya: ‘Mmwe musinza kye mutamanyi.’ Eky’okubiri, okusinza okw’amagezi okw’Omuyudaaya, alina okumanya okw’amazima okwa Katonda: ‘Ffe tusinza kye tumanyi kubanga obulokozi buva mu Buyudaaya.’ N’eky’okusatu, okusinza okuggya, okw’omwoyo, Ye yennyini kw’azze okuleeta: ‘Naye ekiseera kijja, era kituuse, abo abasinziza mu mazima bwe banaasinzizanga Kitaffe mu mwoyo ne mu mazima.’ Okusinziira ku byogerwako, kyeyoleka nti ebigambo ‘mu mwoyo ne mu mazima’ tebitegeeza, nga bwe kitera okulowoozebwa, n’obunyiikivu, okuva ku mutima, mu bwesimbu. Abasamaliya baalina ebitabo bya Musa ebitaano n’okumanya Katonda okumu; awatali kubuusabuusa mu bo mwalimu abasukka mu omu abaanoonya Katonda mu kusaba mu bwesimbu ne mu bunyiikivu. Abayudaaya baalina okubikkulirwa okw’amazima era okujjuvu okwa Katonda mu kigambo kye, okwali kuweereddwa okutuusa olwo; mu bo mwalimu abantu abatya Katonda, abaakoowoolanga Katonda n’omutima gwabwe gwonna. Naye si ‘mu mwoyo ne mu mazima,’ mu makulu amajjuvu ag’ebigambo ebyo. Yesu agamba nti, ‘Ekiseera kijja, era kituuse;’ mu Ye yekka era nga kuyita mu Ye, okusinza Katonda we kunaabeerera mu mwoyo ne mu mazima.

Ne mu Bakristaayo tukyasangamu ebibinja ebyo ebisatu eby’abasinza. Abamu, olw’obutamanya bwabwe, tebamanyi bulungi kye basaba: basaba n’obunyiikivu, naye ne bafuna kitono. Abalala balina okumanya okusingako obutuufu, bagezaako okusaba n’amagezi gaabwe gonna n’omutima gwabwe gwonna, era emirundi mingi basaba n’obunyiikivu bungi nnyo, naye ne batatuuka ku mukisa omujjuvu ogw’okusinza mu mwoyo ne mu mazima. Mu kibinja eky’okusatu mwe tuteekwa okusaba Mukama waffe Yesu atuyingize; tuteekwa okuyigirizibwa Ye engeri y’okusinza mu mwoyo ne mu mazima. Kuno kwokka kwe kusinza okw’omwoyo; kuno kwe kutufuula abasinza nga Kitaffe b’anoonya. Mu kusaba, buli kimu kinaasinziiranga ku kutegeera bulungi n’okutambuliza mu nkola okusinza mu mwoyo ne mu mazima.

‘Katonda Mwoyo n’abo abamusinza kibagwanira okumusinza mu mwoyo ne mu mazima.’ Ekirowoozo ekisooka Omusomesa ky’aleeta wano kiri nti wateekwa okubaawo okukwatagana wakati wa Katonda n’abamusinza; nga Katonda bw’ali, n’okusinza kwe bwe kuteekwa okuba. Kino kituukana n’etteeka erifuga obutonde bwonna: tunoonya okukwatagana wakati w’ekintu n’ekitundu ky’omubiri kye kyeyolekera oba kye kyewaayo. Eriiso lyakolebwa munda okutuukagana n’omusana, n’okutu n’eddoboozi. Omuntu ayagala okusinza Katonda mu mazima, okuzuula Katonda, okumumanya, okuba naye n’okumusanyukira, ateekwa okukwatagana naye, ateekwa okuba n’obusobozi okumusembeza. Kubanga Katonda Mwoyo, tuteekwa okusinza mu mwoyo. Nga Katonda bw’ali, n’amusinza bw’atyo.

Kino kitegeeza ki? Omukazi yali abuuzizza Mukama waffe oba Samaliya oba Yerusaalemi kye kifo ekituufu eky’okusinzizangamu. Amuddamu nti okuva kaakano okusinza tekukyakugirwa ku kifo kimu: ‘Mukazi wattu nzikiriza, kubanga ekiseera kijja kye mutalisinzizangamu Kitaffe ku lusozi luno wadde mu Yerusaalemi.’ Nga Katonda bw’ali Mwoyo, atasibibwa kifo wadde biseera, naye mu butuukirivu bwe obutaliiko kkomo bulijjo era buli wantu nga y’oyo omu, bw’atyo n’okusinza kwe okuva kaakano tekwandibadde nate kukugirwa kifo wadde enkola, wabula kwandibadde kwa mwoyo nga Katonda yennyini bw’ali ow’omwoyo. Lino ssomo lya mugaso munene nnyo. Obukristaayo bwaffe nga bufiirwa nnyo olw’okukugirwa ku biseera n’ebifo ebimu. Omuntu agezaako okusaba n’obunyiikivu mu kkanisa oba mu kisenge kye eky’ekyama, amala ekitundu ekisinga obunene ekya wiiki oba ekya lunaku mu mwoyo ogwawukana ddala n’ogwo gwe yasabiramu. Okusinza kwe kwali mulimu gwa kifo kigere oba ssaawa entongole, so si gwa bulamu bwe bwonna. Katonda Mwoyo: Ye Ataggwaawo era Atakyukakyuka; ky’ali, ky’ali bulijjo era mu mazima. N’okusinza kwaffe bwe kutyo kuteekwa okuba mu mwoyo ne mu mazima: okumusinza kuteekwa okuba omwoyo gw’obulamu bwaffe; obulamu bwaffe buteekwa okuba okusinza mu mwoyo, nga Katonda bw’ali Mwoyo.

‘Katonda Mwoyo n’abo abamusinza kibagwanira okumusinza mu mwoyo ne mu mazima.’ Ekirowoozo eky’okubiri ekitujjira kiri nti okusinza mu mwoyo kuteekwa okuva eri Katonda yennyini. Katonda Mwoyo: Ye yekka y’alina Omwoyo ow’okugaba. Kyeyava atuma Omwana we, okututeekateeka olw’okusinza okw’omwoyo okw’engeri eyo, ng’atuwa Omwoyo Omutukuvu. Yesu ayogera ku mulimu gwe ye yennyini bw’agamba emirundi ebiri nti, ‘Ekiseera kijja,’ n’alyoka ayongerako nti, ‘era kituuse.’ Yajja okubatiza n’Omwoyo Omutukuvu; Omwoyo yali tayinza kukulukuta okutuusa Ye lwe yandigulumiziddwa (Yokaana 1:33; 7:37-38; 16:7). Bwe yamala okukomya ekibi, n’ayingira mu Watukuvu w’Awatukuvu n’omusaayi gwe, n’eyo ku lwaffe n’aweebwa Omwoyo Omutukuvu (Ebikolwa by’Abatume 2:33), olwo n’alyoka asobola okumutuweereza ng’Omwoyo wa Kitaffe. Kristo bwe yamala okutununula, ffe ne tufuna mu Ye ekifo ky’abaana, Kitaffe n’alyoka atuma Omwoyo w’Omwana we mu mitima gyaffe okukoowoola nti, ‘Aba, Kitaffe.’ Okusinza mu mwoyo kwe kusinza Kitaffe mu Mwoyo wa Kristo, Omwoyo ow’obwana.

Eno y’ensonga lwaki Yesu wano akozesa erinnya erya Kitaffe. Tetulaba n’omu ku batukuvu b’Endagaano Enkadde eyeetwalira erinnya ly’omwana, oba eyayita Katonda nti Kitange. Okusinza Kitaffe kusoboka eri abo bokka abaweereddwa Omwoyo w’Omwana. Okusinza mu mwoyo kusoboka eri abo bokka Omwana be yabikkulira Kitaffe, era abaafuna omwoyo ow’obwana. Kristo yekka y’aggulawo ekkubo era y’ayigiriza okusinza mu mwoyo.

Era mu mazima. Kino tekitegeeza kyokka mu bwesimbu. So tekitegeeza kyokka okutuukagana n’amazima g’Ekigambo kya Katonda. Ekigambo kino kirina amakulu ag’omunda era aga Katonda. Yesu ye ‘oyo omu yekka eyava eri kitaffe ng’ajjudde ekisa n’amazima.’ ‘Amateeka gaatuweebwa nga gayita mu Musa, naye Yesu Kristo ye yaaleeta ekisa n’amazima.’ Yesu agamba nti, ‘Nze amazima n’obulamu.’ Mu Ndagaano Enkadde byonna byali kisiikirize na kisuubizo; Yesu yaleeta era awa ekituufu, ekintu kyennyini, eky’ebyo bye tusuubira. Mu Ye emikisa n’amaanyi g’obulamu obutaggwaawo bifuuka byaffe ddala, era tubirabira ddala mu bulamu bwaffe. Yesu ajjudde ekisa n’amazima; Omwoyo Omutukuvu ye Mwoyo ow’Amazima; ku bw’Oyo ekisa ekiri mu Yesu kiba kyaffe mu bikolwa ne mu mazima, nga kino kye kirabo ekituufu ekiva mu bulamu bwa Katonda. Bwe kityo okusinza mu mwoyo kwe kusinza mu mazima; okussa ekimu okwa ddala era okulamu ne Katonda, okukwatagana okwa ddala wakati wa Kitaffe, ali Mwoyo, n’omwana asaba mu mwoyo.

Ebyo Yesu bye yagamba omukazi Omusamaliya, teyasobola kubitegeerera mangwago. Pentekoote yali yeetaagisa okubikkula amakulu gaabyo amajjuvu. Naffe nga twakayingira mu ssomero ly’okusaba, tetunnaba kweteekateeka kutegeera kuyigiriza ng’okwo. Tujja kukutegeera bulungi oluvannyuma. Ka tutandike butandisi, tukwate essomo nga bw’alituwa. Tuli ba mubiri, era tetusobola kuleetera Katonda kusinza kw’anoonya. Naye Yesu yajja okugaba Omwoyo: era atumuwadde. Embeera y’omutima gye tusabiramu ebeerenga nga ebigambo bya Kristo bwe bituyigirizza. Wabeewo okwatula okw’omunda nti tetusobola kuleetera Katonda kusinza okumusanyusa; obuwombeefu bw’omwana obulindirira Ye okutuyigiriza; n’okukkiriza okwangu okwewaayo eri okussa kw’Omwoyo. Okusinga byonna, ka tunywerere ku mazima gano ag’omukisa—tujja kulaba nga Mukama alina bingi by’alituddamu okutugamba ku go—nti okumanya Katonda nga Kitaffe, okubikkulirwa mu mitima gyaffe obwakitaffe bwe obutaliiko kkomo, okukkiriza okwagala okutaliiko kkomo okutuwa Omwana we n’Omwoyo we okutufuula abaana, ddala kye kyama ky’okusaba mu mwoyo ne mu mazima. Lino lye ekkubo eriggya era eddamu Kristo lye yatuggulirawo. Okuba ne Kristo Omwana, n’Omwoyo w’Omwana, nga babeera munda mu ffe era nga batubikkulira Kitaffe, kino kye kitufuula abasinza ab’amazima, ab’omwoyo.

‘MUKAMA, TUYIGIRIZE OKUSABA.’

Mukama Omutendereze! Nsinza okwagala kwe wayigirizaamu omukazi, eyali akugaanyi ekikopo ky’amazzi, okusinza Katonda bwe kuteekwa okuba. Nsanyuka nga nkakasa nti ne kaakano tolirema kuyigiriza muyigirizwa wo ajja gy’oli n’omutima ogwegomba okusaba mu mwoyo ne mu mazima. Ayi Musomesa wange Omutukuvu! Nkwegayiridde, njigiriza ekyama kino eky’omukisa.

Njigiriza nti okusinza mu mwoyo ne mu mazima tekuva mu muntu, wabula kuva gy’oli wekka; nti si kintu kya biseera na nnaku byokka, wabula kwe kukulukuta okuva mu bulamu obuli mu Ggwe. Njigiriza okusemberera Katonda mu kusaba nga ntegeera nnyo obutamanya bwange n’obutaba na kintu kyonna mu nze kye nnyinza kumuwa, era mu kiseera kye kimu nga ntegeera n’ebyo by’ontegekera, Ggwe Omulokozi wange, olw’okussa kw’Omwoyo mu kunaanaagira kwange okw’omwana omuto. Nkutendereza kubanga mu Ggwe ndi mwana, era nnina eddembe ly’omwana okusembera; nti mu Ggwe nnina omwoyo ow’obwana n’ow’okusinza mu mazima. Okusinga byonna, Ggwe Omwana wa Kitaffe Omutendereze, njigiriza engeri okubikkulirwa kwa Kitaffe gye kuwa obuvumu mu kusaba; era obwakitaffe obutaliiko kkomo obw’Omutima gwa Katonda bubeere essanyu lyange n’amaanyi gange olw’obulamu obw’okusaba n’obw’okusinza. Amiina.