Omwoyo Omutukuvu n’Okusaba

‘Mu kiseera ekyo nga temukyansaba kintu na kimu. Ddala ddala mbagamba nti, Buli kye munaasabanga Kitange mu linnya lyange anaakibawanga. Okutuusa kaakano temunnasaba kintu mu linnya lyange: musabe, mujja kuweebwa ekyo kye musaba, essanyu lyammwe liryoke lituukirire. Mu kiseera ekyo mulisaba mu linnya lyange, so si Nze okubasabira eri Kitange, kubanga Kitange yennyini abaagala nnyo.’—Yokaana 16:23-26.

‘Nga musaba mu Mwoyo Mutukuvu, mwekuumire mu kwagala kwa Katonda.’—Yuda 1:20-21.

EBIGAMBO Yokaana by’agamba (1 Yokaana 2:12-14) abaana abaagalwa, abavubuka, n’abakulu, bituleetera ekirowoozo nti mu bulamu bw’Omukristaayo emirundi mingi mubaamu emitendera esatu eminene egy’obumanyirivu. Ogusooka, ogw’omwana nga yaakazaalibwa, ng’alina obukakafu n’essanyu ery’okusonyiyibwa. Ogwokubiri, omutendera ogw’okusomoka, ogw’okulwana n’okukula mu kumanya ne mu maanyi: abavubuka nga bakula mu maanyi, ekigambo kya Katonda nga kikola omulimu gwakyo mu bo era nga kibawa obuwanguzi ku mubi. Ate n’omutendera ogw’enkomerero ogw’okukula n’okweyengera: abakulu, abaayingira ennyo mu kumanya Oyo Ataggwaawo ne mu kussa ekimu naye.

Mu kuyigiriza kwa Kristo ku kusaba nakwo mulabikamu emitendera esatu mu bulamu bw’okusaba, egifaananamu n’egyo. Mu Kubuulira okw’Oku Lusozi tulabamu omutendera ogusooka: okuyigiriza kwe kwonna kuzingirwa mu kigambo kimu, Kitaffe. Musabe Kitammwe; Kitammwe alaba, awulira, amanyi, era alibasasula: talisinga nnyo kitaawe yenna ow’oku nsi! Kyokka mubeere ng’abaana abato era abeesiga. Oluvannyuma ne wajjawo ekifaanana ng’omutendera ogw’okusomoka, ogw’okulwana n’okuwangula, mu bigambo nga bino: ‘Ow’engeri eno tagobeka awatali kusaba na kusiiba;’ ‘Katonda talisingawo nnyo kulamula abantu be, be yeerondera, abamukaabirira emisana n’ekiro?’ Ate mu bigambo bye eby’okusiibula tulabamu omutendera ogusingako obugulumivu. Abaana bafuuse bakulu: kaakano be mikwano gy’Omusomesa, b’atakisa kyama kyonna, b’agamba nti, ‘Mbategeezezza byonna Kitange bye yaŋŋamba;’ era b’akwasa ebisumuluzo by’obwakabaka mu ‘buli kye munaasabanga,’ ky’addiŋŋana emirundi mingi. Kaakano ekiseera kituuse amaanyi g’okusaba mu Linnya lye gakakasibwe.

Enjawulo wakati w’omutendera guno ogw’enkomerero n’egyo egyasooka egy’okuteekateeka, Omulokozi waffe agiraga kaati ddala mu bigambo bye tugenda okufumiitirizaako: ‘Okutuusa kaakano temunnasaba kintu mu linnya lyange;’ ‘Mu kiseera ekyo mulisaba mu linnya lyange. ‘ Tumanyi ‘mu kiseera ekyo’ kye kitegeeza. Kye kiseera Omwoyo Omutukuvu mw’ayiwibwa. Omulimu omunene Kristo gwe yali agenda okukola ku musaalaba, amaanyi amangi n’obuwanguzi obujjuvu ebyali bigenda okweyoleka mu kuzuukira kwe ne mu kulinnya kwe mu ggulu, byali bya kuvaamu okukka okuva mu ggulu, nga bwe kitabangawo, okw’ekitiibwa kya Katonda okubeera mu bantu. Omwoyo wa Yesu eyagulumizibwa yali wa kujja abeere obulamu bw’abayigirizwa be. Era kimu ku bubonero bw’enteekateeka eyo ey’ekitalo ey’Omwoyo kyali kya kuba amaanyi mu kusaba agaali gatannamanyibwa—okusaba mu Linnya lya Yesu, okusaba n’okufuna buli kye baagala, kwe kunaaba okweyoleka kw’amazima g’Omwoyo okubeera mu bo.

Okutegeera engeri okujja kw’Omwoyo Omutukuvu gye kwali ddala kugenda okutandika omulembe omuggya mu nsi y’okusaba, tuteekwa okujjukira nti ye ani, omulimu gwe gwe guluwa, n’amakulu agali mu kuba nti teyaweebwa okutuusa Yesu lwe yagulumizibwa. Mu Mwoyo Katonda mw’abeerera, kubanga Katonda Mwoyo. Mu Mwoyo Omwana mwe yazaalirwa Kitaffe: mu kussa ekimu okw’Omwoyo Kitaffe n’Omwana mwe bali obumu. Okuwa okw’emirembe n’emirembe okutakoma Kitaffe kw’awa Omwana, nga bwe buyinza bwa Kitaffe, n’okusaba n’okufuna okw’emirembe n’emirembe, nga lye ddembe n’essanyu ly’Omwana—mu Mwoyo okussa ekimu kuno okw’obulamu n’okwagala mwe kukuumirwa. Bwe kityo bwe kibadde okuva emirembe gyonna. Era bwe kiri naddala kaakano, Omwana nga Omutabaganya ng’abeera mulamu ennaku zonna okusaba. Omulimu omunene Yesu gwe yatandika ku nsi ogw’okutabaganya Katonda n’omuntu mu mubiri gwe, agugenderamu mu maaso mu ggulu. Okugutuukiriza yatwala mu bubwe olutalo wakati w’obutuukirivu bwa Katonda n’ekibi kyaffe. Ku musaalaba yakomya olutalo omulundi gumu ogw’olubeerera mu mubiri gwe. Oluvannyuma n’alinnya mu ggulu, alyoke okuva eyo atuukirize mu buli kitundu ky’omubiri gwe okununulibwa, era alage obuwanguzi bwe yali afunye. Kino kye kimuleetera okubeera omulamu ennaku zonna okusaba; mu kwegayiririra kwe okutakoma yeeteeka mu kussa ekimu okulamu n’okusaba okutakoma okw’abanunule be. Oba okusingawo, kwe kwegayiririra kwe okutakoma okweyoleka mu kusaba kwabwe, ne kukuwa amaanyi ge kutaabanga nago.

Era kino akikola ng’ayita mu Mwoyo Omutukuvu. Omwoyo Omutukuvu, Omwoyo wa Yesu eyagulumizibwa, yali tannabaawo (Yokaana 7:39), era yali tayinza kubaawo, okutuusa Yesu lwe yali amaze okugulumizibwa. Ekirabo kino ekya Kitaffe kyali kiggya ddala, kya njawulo ddala ku ekyo abatukuvu b’Endagaano Enkadde kye baali bamanyi. Omulimu omusaayi gwe gwakola mu ggulu, Kristo bwe yayingira munda w’eggigi, gwali gwa mazima era muggya nnyo; okununulibwa kw’obuntu bwaffe okuyingira mu kussa ekimu n’amaanyi g’okuzuukira kwe n’ekitiibwa ky’okugulumizibwa kwe kwali kwa ddala nnyo; okutwalibwa kw’obuntu bwaffe mu Kristo okuyingira mu bulamu bwa Katonda Omu mu Basatu kyali kintu kya makulu agatategeerekeka, ne kiba nti Omwoyo Omutukuvu, eyalina okuva mu buntu bwa Kristo obugulumiziddwa okujulira mu mitima gyaffe ku ebyo Kristo bye yatuukiriza, ddala teyali nate ekyo kyokka kye yali mu Ndagaano Enkadde. Kyali kya mazima ddala ng’ekigambo bwe kiri nti ‘Omwoyo Omutukuvu yali tannabaawo, kubanga Yesu yali tannaba kugulumizibwa.’ Kaakano yajja omulundi ogusooka nga Omwoyo wa Yesu eyagulumizibwa. Nga Omwana, eyali Katonda okuva emirembe gyonna, bwe yayingira mu bulamu obuggya ng’omuntu, n’addayo mu ggulu n’ekyo kye yali talina mu kusooka, bw’atyo Omwoyo Omutendereze, Omwana gwe yaweebwa Kitaffe bwe yalinnya mu ggulu (Ebikolwa by’Abatume 2:33) okuyingira mu buntu bwe obugulumiziddwa, yajja gye tuli n’obulamu obuggya, bwe yali talina kugaba mu kusooka. Mu Ndagaano Enkadde yakoowoolwanga nga Omwoyo wa Katonda: ku Pentekoote n’akka nga Omwoyo wa Yesu eyagulumizibwa, ng’atuleetera era ng’atugabira ekibala kyonna n’amaanyi ag’okununulibwa okwatuukirizibwa.

Mu kwegayiririra kwa Kristo okununulibwa kwe mwe kukuumirwa okweyongera okukola n’okutuukirizibwa mu bantu. Era olw’Omwoyo Omutukuvu akka okuva ewa Kristo gye tuli, tusikibwa ne tuyingira mu mugga omunene ogw’okusaba kwe okulinnya bulijjo. Omwoyo atusabira awatali bigambo: mu buziba bw’omutima, ne birowoozo gye bitera okubulwa enkula, Omwoyo atusitula n’atuyingiza mu kukulukuta okw’ekitalo okw’obulamu bwa Katonda Omu mu Basatu. Ku bw’Omwoyo, okusaba kwa Kristo kufuuka kwaffe, n’okwaffe ne kufuulibwa kwe: tusaba kye twagala, ne tukiweebwa. Olwo tutegeera mu bumanyirivu nti, ‘Okutuusa kaakano temunnasaba mu linnya lyange. Mu kiseera ekyo mulisaba mu linnya lyange.’

Ow’oluganda! kye twetaaga okusobola okusaba mu Linnya lya Kristo, okusaba tulyoke tufune, essanyu lyaffe liryoke lituukirire, kwe kubatizibwa mu Mwoyo ono Omutukuvu. Kino kisinga Omwoyo wa Katonda nga bwe yali mu Ndagaano Enkadde. Kino kisinga Omwoyo ow’okukyuka n’okuzaalibwa obuggya abayigirizwa gwe baalina nga Pentekoote tennatuuka. Kino kisinga Omwoyo ng’alina ekigero ekimu eky’okukwata kwe n’okukola kwe. Ono ye Mwoyo Omutukuvu, Omwoyo wa Yesu eyagulumizibwa mu maanyi g’okugulumizibwa kwe, ng’ajja ku ffe nga Omwoyo wa Yesu abeera mu ffe, ng’abikkula Omwana ne Kitaffe munda mu ffe. (Yokaana 14:16-23.) Omwoyo ono bw’aba Omwoyo, si wa biseera byaffe eby’okusaba byokka, wabula ow’obulamu bwaffe bwonna n’entambula yaffe, Omwoyo ono bw’agulumiza Yesu mu ffe ng’abikkula obujjuvu bw’omulimu gwe, era ng’atufuula omu naye ddala era abamufaanana, olwo lwe tusobola okusaba mu Linnya lye, kubanga ddala tuli omu naye. Olwo lwe tufuna okutuuka eri Kitaffe butereevu, Yesu kw’ayogerako nti, ‘So si Nze okubasabira eri Kitange.’ Ayi! twetaaga okutegeera n’okukkiriza nti okujjuzibwa Omwoyo ono, Omwoyo w’Oyo eyagulumizibwa, kye kyetaago kimu kyokka eky’abantu ba Katonda abakkiriza. Olwo tulitegeera kye kitegeeza, ‘nga musabiririranga mu ssaala zonna nga mwegayiririranga mu mwoyo buli kiseera,’ era kye kitegeeza, ‘nga musaba mu Mwoyo Mutukuvu, okwekuumira mu kwagala kwa Katonda.’ ‘Mu kiseera ekyo mulisaba mu linnya lyange.’

Bwe kityo essomo lijja nate: Okusaba kwaffe kye kugasa kwesigamye ku kye tuli ne ku bulamu bwaffe bwe buli. Obulamu obubeera mu Linnya lya Kristo kye kyama ky’okusaba mu Linnya lya Kristo; obulamu obubeera mu Mwoyo bwe butusobozesa okusaba mu Mwoyo. Okubeera mu Kristo kwe kutuwa eddembe n’amaanyi okusaba kye twagala: obunene bw’okubeera mu ye kye kigero kyennyini eky’amaanyi mu kusaba. Omwoyo abeera munda mu ffe y’asaba, si mu bigambo na birowoozo bulijjo, wabula mu kussa omukka ne mu kubeerawo okusinga ebigambo obuziba. Ng’Omwoyo wa Kristo bw’akoma okuba mu ffe, n’okusaba okw’amazima bwe kukoma awo. Obulamu bwaffe, obulamu bwaffe, Ayi obulamu bwaffe bujjule Kristo, bujjule Omwoyo we, era ebisuubizo ebitaliiko kkomo eby’ekitalo eri okusaba kwaffe tebiriddayo kulabika ng’ebyewuunyisa. ‘Okutuusa kaakano temunnasaba kintu mu linnya lyange. Musabe, mujja kuweebwa ekyo kye musaba, essanyu lyammwe liryoke lituukirire. Mu kiseera ekyo mulisaba mu linnya lyange. Ddala ddala mbagamba nti, Buli kye munaasabanga Kitange mu linnya lyange anaakibawanga.’

‘MUKAMA, TUYIGIRIZE OKUSABA.’

Ayi Katonda wange! mu kutya okutukuvu nfukamira mu maaso go, Ggwe Omu mu Basatu. Nate ndabye nti ekyama ky’okusaba kye kyama ky’Obusatu Obutukuvu. Nsinza Kitaffe awulira bulijjo, n’Omwana abeera omulamu ennaku zonna okusaba, n’Omwoyo Omutukuvu, ava eri Kitaffe n’Omwana, okutusitula okutuyingiza mu kussa ekimu okwo okw’okusaba n’okufuna okw’omukisa ennaku zonna, okutakoma. Nfukamira, Katonda wange, mu kusinza, mu maaso g’okwetoowaza okutaliiko kkomo okututwala bwe kutyo, nga kuyita mu Mwoyo Omutukuvu, ffe n’okusaba kwaffe, okutuyingiza mu Bulamu bwa Katonda, ne mu kussa ekimu kwabwo okw’okwagala.

Ayi Mukama wange Yesu Omutendereze! Njigiriza okutegeera essomo lyo, nti Omwoyo abeera mu ffe, akulukuta okuva gy’oli, era atugatta naawe, ye Mwoyo ow’okusaba. Njigiriza kye kitegeeza, ng’ekibya ekyereere era ekyawongebwa ddala, okwewaayo gy’ali abeere obulamu bwange. Njigiriza okumussaamu ekitiibwa n’okumwesiga, nga Omuntu omulamu, okukulembera obulamu bwange n’okusaba kwange. Njigiriza naddala mu kusaba okulindirira mu kasirise akatukuvu, n’okumuwa ekifo okussa munda mu nze okwegayirira kwe okutayogerekeka. Era njigiriza nti ku bw’Omwoyo kisoboka okusaba obutayosa, n’okusaba obutalemwa, kubanga ansobozesa okugabana ku kwegayiririra okutakoma era okutalemwa, Ggwe Omwana kw’olabikiramu mu maaso ga Kitaffe. Weewaawo, Mukama, tuukiriza mu nze ekisuubizo kyo, Mu kiseera ekyo mulisaba mu linnya lyange. Ddala ddala mbagamba nti, Buli kye munaasabanga Kitange mu linnya lyange anaakibawanga.’ Amiina.

———0——-

EKYONGEREZO.

Okusaba kutera okugeraageranyizibwa n’okussa omukka: twetaaga kumala kugoberera okugeraageranya kuno okutuuka ku nkomerero okulaba ekifo Omwoyo Omutukuvu ky’alina bwe kiri eky’ekitalo. Buli lwe tussa omukka tufulumya empewo embi eyanditusse mangu, ne tuyingiza nate empewo empya gye tubeerako abalamu. Bwe tutyo bwe tufulumya okuva mu ffe, mu kwatula, ebibi, ne mu kusaba, ebyetaago n’okwegomba kw’omutima gwaffe. Ate bwe tuyingiza nate omukka, tuyingiza empewo empya ey’ebisuubizo, n’okwagala, n’obulamu bwa Katonda mu Kristo. Kino tukikola ku bw’Omwoyo Omutukuvu, ye mukka gw’obulamu bwaffe.

Era ekyo ky’ali kubanga ye mukka gwa Katonda. Kitaffe amussa mu ffe, alyoke yeegatte n’obulamu bwaffe. Era nga buli lwe tufulumya omukka bwe wagoberawo nate okuyingiza omukka, bw’atyo Katonda bw’assa nate omukka gwe munda, Omwoyo n’addayo gy’ali nga yeetisse okwegomba n’ebyetaago by’emitima gyaffe. Bwe kityo Omwoyo Omutukuvu ye mukka gw’obulamu bwa Katonda, era ye mukka gw’obulamu obuggya mu ffe. Nga Katonda bw’amufulumya, tumufuna ng’okuddibwamu kw’okusaba; nga bwe tumuzzaayo, alinnya eri Katonda ng’ajjudde okwegayirira kwaffe. Nga Omwoyo wa Katonda, Kitaffe n’Omwana mw’ali omu, era okwegayiririra kw’Omwana mwe kutuukira eri Kitaffe, gye tuli ye Mwoyo ow’okusaba. Okusaba okw’amazima kwe kumanya mu bulamu amazima g’Obusatu Obutukuvu. Okussa omukka kw’Omwoyo, okwegayiririra kw’Omwana, n’ebyo Kitaffe by’ayagala, ebisatu bino bifuuka kimu mu ffe.