Ekigambo n’Okusaba

‘Naye bwe munywerera mu Nze ne munyweza ebigambo byange, buli kye munaasabanga kinaabakolerwanga.’—Yokaana 15:7.

ENKOLAGANA enkulu wakati w’ekigambo n’okusaba lye limu ku masomo agasinga obwangu era agasooka mu bulamu bw’Omukristaayo. Nga omukaafiiri oli eyali yaakakyuka bwe yakyogera: Bwe nsaba—njogera ne Kitange; bwe nsoma—Kitange ayogera nange. Nga sinnasaba, ekigambo kya Katonda kye kinteekateeka nga kimbikkulira Kitaffe by’andagidde okusaba. Mu kusaba, ekigambo kya Katonda kye kinnyweza nga kiwa okukkiriza kwange obuyinza bwakwo n’ensonga yaakwo ey’okwegayirira. Era oluvannyuma lw’okusaba, ekigambo kya Katonda kye kindeetera okuddibwamu bwe mmala okusaba, kubanga mu kyo Omwoyo ampa okuwulira eddoboozi lya Kitaffe. Okusaba si kwogera kwa muntu omu yekka, wabula kwogeraganya; eddoboozi lya Katonda nga liddamu erirange kye kitundu kyakwo ekisinga obukulu. Okuwuliriza eddoboozi lya Katonda kye kyama ky’obukakafu nti naye aliwuliriza erirange. ‘Otege okutu kwo owulire;’ ‘Ontegere okutu;’ Wulira eddoboozi lyange;’ bigambo Katonda by’agamba omuntu, era n’omuntu by’agamba Katonda. Okuwuliriza kwe kunaasinziira ku kwaffe; ebigambo bye bwe binaayingira mu nze, ekyo kye kinaaba ekipimo ky’amaanyi g’ebigambo byange gy’ali. Ebigambo bya Katonda kye biri gye ndi, kye kigezo ky’ekyo Ye yennyini ky’ali gye ndi, era bwe kityo eky’obugolokofu bw’okwegomba kwange gy’ali mu kusaba.

Enkolagana eno wakati w’ekigambo kye n’okusaba kwaffe Yesu gy’alaga bw’agamba nti, ‘Naye bwe munywerera mu Nze ne munyweza ebigambo byange, buli kye munaasabanga kinaabakolerwanga.’ Obukulu obw’amaanyi obw’amazima gano bweyoleka bwe tutunuulira ekigambo ekirala kino kye kyadda mu kifo kyakyo. Emirundi egisoba mu gumu Yesu yali agambye nti, “Mubeere mu Nze era nange mbeere mu mmwe.’ Okubeera kwe mu ffe kwe kwali okumaliriza n’engule y’okubeera kwaffe mu Ye. Naye wano, mu kifo kya ‘Mmwe mu Nze nange mu mmwe,’ agamba nti, ‘Mmwe mu Nze n’ebigambo byange mu mmwe.’ Ebigambo bye okubeera mu ffe kye kimu n’Oyo yennyini okubeera mu ffe.

Nga kino kitubikkulira bulungi ekifo ebigambo bya Katonda mu Kristo kye birina okuba nakyo mu bulamu bwaffe obw’omwoyo, naddala mu kusaba kwaffe. Mu bigambo bye, omuntu yeebikkula yennyini. Mu bisuubizo bye yeewaayo yennyini, yeesiba eri oyo akkiriza ekisuubizo kye. Mu biragiro bye alaga by’ayagala, anoonya okwefuula mukama w’oyo gw’ayagala amuwulire, amukulembere era amukozese ng’ali kitundu ku ye yennyini. Mu bigambo byaffe omwoyo mwe gussiza ekimu n’omwoyo, omwoyo gw’omuntu omu mwe guyita ne gwesenza mu mulala. Mu bigambo by’omuntu, ebiwuliddwa ne bikkirizibwa, ne binywezebwa ne bigonderwa, mw’asobola okwewa omulala. Naye bino byonna biri mu ngeri ya kigero era ekkomeddwa ennyo.

Naye Katonda, Oyo ataliiko kkomo, mu ye buli kintu mwe kiri obulamu n’amaanyi, omwoyo n’amazima, mu makulu ag’ebigambo ago agasinga obuziba,—Katonda bw’ayogera nga yeeyoleka mu bigambo bye, ddala awaayo YE YENNYINI, Okwagala kwe n’Obulamu bwe, Ebyo by’ayagala n’Amaanyi ge, eri abo abakkiriza ebigambo bino, mu ngeri ya ddala esukkulumye ku kutegeera. Mu buli kisuubizo yeeteeka Ye yennyini mu buyinza bwaffe tumukwate tumufune; mu buli kiragiro yeeteeka Ye yennyini mu buyinza bwaffe tugabane naye by’ayagala, Obutukuvu bwe, n’Obujjuvu bwe obutaliiko kamogo. Mu Kigambo kya Katonda, Katonda atuwa YE YENNYINI; Ekigambo kye si kirala wabula Omwana Ataggwaawo, Kristo Yesu. Bwe kityo ebigambo byonna ebya Kristo bigambo bya Katonda, ebijjudde obulamu n’amaanyi ga Katonda ebizuukiza. ‘Ebigambo bye njogedde gye muli gwe mwoyo era bwe bulamu.’

Abo abeekeneenyezza bakiggala ne bakasiru batubuulira nti obusobozi bw’okwogera businziira nnyo ku bw’okuwulira, era nti abaana bwe bafiirwa okuwulira, n’okwogera nakwo kubaggwaako. Kino kya mazima ne mu ngeri engazi: nga bwe tuwulira, bwe tutyo bwe twogera. Kya mazima mu ngeri esinga obugulumivu mu nkolagana yaffe ne Katonda. Okusaba essaala—okwogera ebyo bye twagala n’okwesigama ku bisuubizo ebimu—kintu kyangu, era kiyinza okuyigirwa ku bantu mu magezi g’abantu. Naye okusaba mu Mwoyo, okwogera ebigambo ebituuka ku Katonda ne bimukwatako, ebikola ku buyinza bw’ensi etalabika ne bibukyusa,—okusaba okw’engeri eyo, okwogera okw’engeri eyo, kusinziira ddala ku kuwulira kwaffe eddoboozi lya Katonda. Nga bwe tuwuliriza eddoboozi n’olulimi Katonda lw’ayogera, ne mu bigambo bya Katonda ne tusembeza mu mutima gwaffe ebirowoozo bye, endowooza ye, n’obulamu bwe, bwe tutyo bwe tuliyiga okwogera mu ddoboozi ne mu lulimi Katonda lw’awulira. Okutu kw’omuyigirizwa, okuzuukusibwa buli nkya, buli nkya, kwe kuteekateeka olulimi lw’abayigirizibwa, okwogera ne Katonda era n’abantu nga bwe kisaanidde (Isaaya 50:4).

Okuwulira kuno eddoboozi lya Katonda kisinga okusoma Ekigambo n’okufumiitiriza. Wayinza okubaawo okusoma n’okumanya Ekigambo, naye nga mulimu okussa ekimu okwa ddala okutono ennyo ne Katonda omulamu. Naye era waliwo okusoma Ekigambo mu maaso ddala ga Kitaffe, nga Omwoyo y’atukulembera, Ekigambo mwe kitujjira n’amaanyi amalamu okuva eri Katonda yennyini; kiba gye tuli ddoboozi ddala lya Kitaffe, okussa ekimu okwa ddala naye ku bubwe. Lye ddoboozi lya Katonda eriramu eriyingira mu mutima, ne lireeta omukisa n’amaanyi, ne lizuukusa okuddamu kw’okukkiriza okulamu okutuuka nate ku mutima gwa Katonda.

Ku kuwulira kuno eddoboozi amaanyi ag’okugondera n’ag’okukkiriza kwe gasinziira. Ekikulu si kumanya kiki Katonda ky’agambye kye tulina okukola, wabula nti Katonda yennyini ye akitugamba. Si mateeka, si kitabo, si kumanya kituufu, ebireeta obuwulize, wabula Katonda yennyini ng’atukwatako era ng’assa ekimu naffe mu bulamu. Era bwe kityo si kumanya kiki Katonda ky’asuubizza, wabula okubeerawo kwa Katonda yennyini ng’Omusuubiza, okuzuukusa okukkiriza n’okwesiga mu kusaba. Mu maaso ga Katonda mu bujjuvu bwonna mwokka obujeemu n’obutakkiriza mwe bitasobokera.

‘Naye bwe munywerera mu Nze ne munyweza ebigambo byange, buli kye munaasabanga kinaabakolerwanga.’ Tulaba kye kitegeeza. Mu bigambo Omulokozi yeewaayo yennyini. Tulina okuba n’ebigambo mu ffe, nga bitwaliddwa mu bye twagala ne mu bulamu bwaffe, nga birabikira mu mbeera yaffe ne mu nneeyisa yaffe. Tulina okuba nabyo nga bibeera mu ffe: obulamu bwaffe bwonna nga kunnyonnyola okutakoma okw’ebigambo ebiri munda, ebitujjuza; ebigambo nga bibikkula Kristo munda, n’obulamu bwaffe nga bumulaga ebweru. Ebigambo bya Kristo bwe biyingira ddala mu mutima gwaffe, ne bifuuka obulamu bwaffe ne bibukwatako, olwo ebigambo byaffe ne biyingira mu mutima gwe ne bimukwatako. Okusaba kwange kujja kusinziira ku bulamu bwange; ebigambo bya Katonda kye biri gye ndi ne mu nze, n’ebigambo byange kye binaaba eri Katonda ne mu Katonda. Bwe nkola Katonda ky’agamba, Katonda ajja kukola kye ngamba.

Abatukuvu b’Endagaano Enkadde nga baategeera bulungi enkolagana eno wakati w’ebigambo bya Katonda n’ebyaffe, era okusaba gye bali nga kwali ddala kuddamu kwa kwagala eri ebyo bye baawulira Katonda ng’ayogera! Ekigambo bwe kyabanga kisuubizo, baasuubiranga Katonda okukola nga bwe yayogera. ‘Okole nga bwe wasuubiza;’ ‘Kubanga ggwe Ayi Mukama oyogedde;’ ‘Nga bwe wasuubiza;’ ‘Ng’ekigambo kyo bwe kiri;’ mu bigambo ng’ebyo baalaga nti Katonda kye yayogera mu kisuubizo kye kyali ekikolo n’obulamu bw’ebyo bye baayogera mu kusaba. Ekigambo bwe kyabanga kiragiro, baakolanga bukozi nga Mukama bwe yayogera: ‘Bw’atyo Ibulaamu n’agenda nga Mukama bwe yamugamba.’ Obulamu bwabwe bwali kussa kimu ne Katonda, okuwanyisiganya ebigambo n’ebirowoozo. Katonda kye yayogeranga baakiwuliranga ne bakikola; bo kye baayogeranga Katonda yakiwuliranga n’akikola. Mu buli kigambo ky’atugamba, Kristo yenna yeewaayo okukituukiriza ku lwaffe. Era ku buli kigambo atusaba, mu ngeri y’emu, okuwaayo omuntu yenna okukwata ekigambo ekyo, n’okufuna okutuukirizibwa kwakyo.

‘Bwe munyweza ebigambo byange;’ obukwakkulizo bwangu era bweyolefu. Mu bigambo bye mwe mubikkulirwa by’ayagala. Ebigambo bwe bibeera mu nze, okwagala kwe kunfuga; okwagala kwange ne kufuuka ekibya ekyereere okwagala kwe kwe kujjuza, ekikozesebwa ekyeteefuteefu okwagala kwe kwe kukozesa; Ye ajjuza omuntu wange ow’omunda. Mu kukozesa obuwulize n’okukkiriza, okwagala kwange kweyongera okuba n’amaanyi, ne kuleetebwa mu kukwatagana okw’omunda okusingawo obuziba naye. Asobola okukwesiga ddala nti tekuliyagala kirala wabula ky’ayagala; tatya kuwa kisuubizo nti, ‘Bwe munyweza ebigambo byange, buli kye munaasabanga kinaabakolerwanga.’ Eri bonna abakikkiriza ne bakikolerako, alikituukiriza ddala nga bwe kiri.

Mmwe abayigirizwa ba Kristo! Tekyeyongera kututangaalira nti bwe tubadde twewolereza olw’okusaba kwaffe okutaddibwamu, n’obunafu bwaffe mu kusaba, nga twefuula abeewaayo eri amagezi ga Katonda n’ebyo by’ayagala, ensonga entuufu ebadde nti obulamu bwaffe obunafu bwe buleeseewo okusaba kwaffe okunafu? Tewali kiyinza kufuula bantu ba maanyi okuggyako ekigambo ekitujjira nga kiva mu kamwa ka Katonda: ekyo kye tulina okubeerako abalamu. Kye kigambo kya Kristo, nga kyagalibwa, nga tukibeeramu, nga kibeera mu ffe, nga kifuuka mu buwulize ne mu bikolwa ekitundu ku ffe, ekitufuula omu ne Kristo, ekitusaanyiza mu mwoyo okukwatako, n’okunyweza Katonda. Ensi n’okwegomba kwayo byonna biggwaawo, naye buli akola Katonda by’ayagala abeerera emirembe gyonna. Ayi, ka tuwaayo omutima n’obulamu eri ebigambo bya Kristo, ebigambo mw’awaayo bulijjo YE YENNYINI, Omulokozi omulamu ow’omuntu ku bubwe, era ekisuubizo kye kinaaba ekyaffe mu bungi: ‘Naye bwe munywerera mu Nze ne munyweza ebigambo byange, buli kye munaasabanga kinaabakolerwanga.’

‘MUKAMA, TUYIGIRIZE OKUSABA!’

——0———

Mukama Omutendereze! Essomo lyo olwa leero lyongedde okundaga obusirusiru bwange. Ndaba ensonga lwaki okusaba kwange tekubadde kwa kukkiriza n’obuwanguzi okusingawo. Nnali neemalidde nnyo ku kwogera kwange gy’oli okusinga ku kwogera kwo gye ndi. Saategeera nti ekyama ky’okukkiriza kye kino: okukkiriza kuyinza okubaawo kwokka nga bwe kwenkana Ekigambo Ekiramu ekibeera mu mmeeme.

Ate ekigambo kyo kyali kinjigirizza bulungi nnyo: Buli muntu abeerenga mwangu wa kuwulira, kyokka alemenga kubuguutana kwogera; omutima gwo gulemenga okwanguyiriza okwogera ekigambo mu maaso ga Katonda. Mukama, njigiriza nti ekigambo kyo bwe kitwalibwa mu bulamu bwange, olwo lwokka ebigambo byange lwe biyinza okutwalibwa mu mutima gwo; nti ekigambo kyo, bwe kiba amaanyi amalamu munda mu nze, kijja kuba maanyi malamu gy’oli; ky’oyogera n’akamwa ko, okituukiriza n’omukono gwo.

Mukama! Mponya okutu okutali kukomole. Mpa okutu okuggule okw’omuyigirizwa, okuzuukusibwa buli nkya, buli nkya okuwulira eddoboozi lya Kitaffe. Nga ggwe bwe wayogeranga ebyo byokka bye wawuliranga, okwogera kwange kubeere ddoboozi eriddamu okwogera kwo gye ndi. ‘Awo Musa bwe yayingira mu Weema ey’Okukuŋŋaanirangamu okwogera ne Mukama, n’awulira eddoboozi nga lyogera gy’ali nga liva waggulu w’entebe ey’okusaasira.’ Mukama, kibeere bwe kityo nange. Obulamu n’empisa ebiriko akabonero kamu kokka, nti ebigambo byo bibeeramu era birabikiramu, bibe okweteekateeka olw’omukisa ogujjuvu: ‘Buli kye munaasabanga kinaabakolerwanga.’ Amiina.