Okusaba Okukwatagana ne Katonda bw’Ali

‘Kitange nkwebaza olw’okumpulira. Mmanyi nti bulijjo ompulira.’—Yokaana 11:41-42.

‘Ggwe oli Mwana wange, olwa leero nfuuse kitaawo. Nsaba, nange ndikuwa.’—Zabbuli 2:7-8.

MU Ndagaano Empya tusangamu enjawulo wakati w’okukkiriza n’okumanya. ‘Omu Omwoyo amuwa okwogera ekigambo eky’amagezi, omulala Omwoyo oyo omu n’amuwa okuyiga n’ategeera. Omulala Omwoyo y’omu n’amuwa okukkiriza.’ Mu mwana oba mu Mukristaayo ow’omutima omwangu wayinza okubaamu okukkiriza kungi n’okumanya kutono. Obwangu obw’omwana bukkiriza amazima awatali kuzibuwalirwa, era emirundi mingi tebufaayo kwewa wadde okuwa abalala ensonga yonna ey’okukkiriza kwabwo okuggyako eno: Katonda yayogera. Naye Katonda ayagala tumwagale era tumuweereze, si na mutima gwonna gwokka, naye era n’amagezi gaffe gonna; tukule tutuuke ku kutegeera amagezi n’obulungi bwa Katonda obuli mu makubo ge gonna, mu bigambo bye ne mu bikolwa bye. Mu ngeri eyo yokka omukkiriza mw’anaasobolera okusemberera ddala n’okusinza mu butuufu ekitiibwa ky’ekisa kya Katonda; era mu ngeri eyo yokka omutima gwaffe mwe guyinza okutegeera obulungi obugagga bw’amagezi n’okumanya ebiri mu kununulibwa, ne gwetegekera okwegatta mu bujjuvu mu ddoboozi erisingayo waggulu ery’oluyimba olulinnya mu maaso g’entebe: ‘Kale nga Katonda wa kitalo, ng’amagezi ge mangi n’okutegeera kwe kungi era n’obugagga bungi!’

Mu bulamu bwaffe obw’okusaba amazima gano gakola mu bujjuvu. Wadde okusaba n’okukkiriza byangu nnyo ne kiba nti omukkiriza akyakazaalibwa ayinza okusaba n’amaanyi, okumanya okw’amazima okw’Ekikristaayo kusanga mu njigiriza y’okusaba ebimu ku bizibu byakwo ebisinga obuziba. Amaanyi g’okusaba ga ddala okutuuka wa? Bwe kiba bwe kityo, Katonda ayinza atya okuwa okusaba amaanyi amangi bwe gatyo? Ekikolwa ky’okusaba kiyinza kitya okukwatagana n’okwagala kwa Katonda n’ebyo bye yasalawo? Obufuzi bwa Katonda n’okwagala kwaffe, eddembe lya Katonda n’eddembe lyaffe, biyinza bitya okutabagana?—ebibuuzo bino n’ebirala ebifaanana bwe bityo bisaanidde Abakristaayo okubifumiitirizaako n’okubinoonyerezaamu. Gye tukoma okusemberera ebyama ebyo n’obunyiikivu n’okussaamu ekitiibwa, gye tujja okukoma okuvunnama nga twewuunya, ne tutendereza Oyo eyawa omuntu amaanyi ag’ekika ekyo mu kusaba.

Ekimu ku bizibu ebyekusifu ebikwata ku kusaba,—ekimu ekitayogerwa, naye emirundi mingi ekiremesa ddala okusaba,—kiva mu butuukirivu bwa Katonda, mu kubeera kwe nga teyeesigama n’akatono ku kintu kyonna ekiri ebweru we. Ye si ye Katonda Atalina kkomo, ali bw’ali ku bubwe yekka, eyeesalirawo yekka, era ow’okwagala okw’amagezi era okutukuvu okwasalawo byonna ebigenda okubaawo? Okusaba kuyinza kutya okumukolako, oba ye okuleetebwa okusaba okukola ekyo ky’atandikoze? Ekisuubizo nti okusaba kuliddibwamu si kwetoowaza bwetoowaza okututuukako mu bunafu bwaffe? Ebyo ebyogerwa ku maanyi—amaanyi amangi ennyo—ag’okusaba, bisingawo ku kwetuukanya n’engeri yaffe ey’okulowooza, kubanga Katonda tayinza n’akatono kwesigama ku kikolwa kyonna eky’ebweru mu by’akola? Era omukisa gw’okusaba si gwe gwokka gwe kukola ku ffe fennyini?

Bwe tunoonya eky’okuddamu ku bibuuzo ng’ebyo, ekisumuluzo tukisanga mu butonde bwa Katonda bwennyini, mu kyama ky’Obusatu Obutukuvu. Singa Katonda yali Muntu omu yekka, eyeggalidde mu ye yekka, tewandibadde kirowoozo kya kumusemberera wadde okumukolako. Naye mu Katonda mulimu Abantu basatu. Mu Katonda tulina Kitaffe n’Omwana, abalina mu Mwoyo Omutukuvu omukago gwabwe omulamu ogw’obumu n’okussa ekimu. Okwagala okutaggwaawo bwe kwazaala Omwana, Kitaffe n’awa Omwana, nga Muntu ow’Okubiri, ekifo okumpi naye ng’Amwenkana era Omuwi we w’amagezi, ekkubo lyaggulwawo okusaba n’amaanyi gaakwo mu bulamu obw’omunda ennyo obwa Katonda yennyini. Nga bwe kiri ku nsi, bwe kityo ne mu ggulu enkolagana yonna wakati wa Kitaffe n’Omwana kwe kuwa n’okutwala. Era obanga okutwala okwo kulina okuba okw’okweyagalira n’okwesalirawo ng’okuwa, kiteekwa okubaawo ku ludda lw’Omwana okusaba n’okufuna. Mu kussa ekimu okutukuvu okw’Abantu ba Katonda, okusaba kuno okw’Omwana kwali kimu ku bikolwa ebikulu eby’Obulamu bwa Katonda Obutendereze Emirundi Esatu. Kye tuva tukisanga mu Zabbuli 2: ‘Olwa leero nfuuse kitaawo: nsaba, nange ndikuwa.’ Kitaffe yawa Omwana ekifo n’obuyinza okumukolako. Okusaba kw’Omwana tekwali kwefuula oba kisiikirize, wabula kyali kimu ku ntambula z’obulamu omwo okwagala kwa Kitaffe n’okw’Omwana mwe kwasisinkanira ne kujjuzagana. Kitaffe yali yasalawo nti tabeera yekka mu magezi ge: waaliwo Omwana ng’okutuukirizibwa kwago kulina okwesigama ku kusaba kwe n’okukkiriza kwe. Bwe kityo mu Butonde n’Obulamu bwa Katonda mwennyini mwalimu okusaba, okusaba ku nsi kwe kwalina okuba ekifaananyi kyakwo n’okukulukuta kwakwo. Ne kino kyalimu Yesu bwe yagamba nti, “Mmanyi nti bulijjo ompulira.’ Ng’Obwana bwa Yesu ku nsi bwe butayinza kwawulwa ku Bwana bwe mu ggulu, bwe kityo n’okusaba kwe ku nsi: kwe kweyongerayo n’ekifaananyi ky’okusaba kwe mu ggulu. Okusaba kw’omuntu Kristo Yesu ye mukago wakati w’okusaba okutaggwaawo okw’Omwana eyazaalibwa omu yekka mu kifuba kya Kitaffe n’okusaba kw’abantu ku nsi. Okusaba kusibuka era kulina ensulo yaakwo esinga obuziba mu Butonde bwa Katonda bwennyini. Mu kifuba kya Katonda tewali kikolebwa awatali kusaba—okusaba kw’Omwana n’okuwa kwa Kitaffe.

Kino kiyinza okutuyamba katono okutegeera engeri okusaba kw’omuntu, nga kuyita mu Mwana, gye kuyinza okukola ku Katonda. Ebyo Katonda bye yasalawo si nsalawo ze yakola awatali kufaayo ku Mwana, oba ku kusaba kwe, oba ku kusaba okulina okutuusibwa nga kuyita mu ye. Nedda n’akatono. Mukama Yesu ye mubereberye, Omutwe era Omusika wa byonna: ebintu byonna byatondebwa nga biyita mu ye era ku lulwe, era ebintu byonna binywezebwa mu ye. Mu magezi Kitaffe g’asala, Omwana, ng’Omukiise w’ebitonde byonna, yabeeranga n’eddoboozi; mu ebyo ebyasalibwawo mu kigendererwa ekitaggwaawo bulijjo mwalekebwamu ekifo eky’eddembe ly’Omwana ng’Omutabaganya era Omwegayirizi, era bwe kityo n’eky’okusaba kw’abo bonna abasemberera Kitaffe mu Mwana.

Era bwe kijja ekirowoozo nti eddembe lino n’obuyinza buno obw’Omwana okukola ku Kitaffe bikontana n’obutakyuka bw’ebyo Katonda bye yasalawo, tetwerabira nti eri Katonda tekiri nga bwe kiri eri omuntu, ng’alina ebyayita by’asibiddwako awatali kusumululwa. Katonda tabeera mu biseera ebirimu ebyayita n’ebigenda okujja; enjawulo z’ebiseera tezikwata ku Oyo abeera mu Butaggwaawo. Era Obutaggwaawo kye Kati ekibeerawo bulijjo, ebyayita mwe bitayitira, n’ebigenda okujja mwe bibeerera bulijjo. Okutuukana n’obunafu bwaffe obw’obuntu, Ebyawandiikibwa biteekwa okwogera ku bye yasalawo edda, n’ebiseera ebigenda okujja. Mu mazima, obutakyuka bw’amagezi ga Katonda bukwatagana bulijjo bulungi ddala n’eddembe lye ery’okukola kyonna ky’ayagala. Okusaba kw’Omwana n’okw’abantu be tekwateekebwa mu ebyo ebyasalibwawo emirembe gyonna kubeere n’amaanyi agalabika obulabisi; wabula kyakolebwa bwe kityo, omutima gwa Kitaffe gusigale nga muggule era nga gwa ddembe okuwulira buli kusaba okulinnya nga kuyita mu Mwana, era Katonda yeekkiriza ddala okusalirwawo okusaba okukola ekyo ky’atandikoze.

Okukwatagana kuno okutuukiridde n’obumu bw’Obufuzi bwa Katonda n’eddembe ly’omuntu kyama gye tuli ekitategeerekeka, kubanga Katonda nga OYO ATAGGWAAWO asinga ebirowoozo byaffe byonna. Naye kibeere okubudaabudibwa kwaffe n’amaanyi gaffe okukakasa nti mu kussa ekimu okutaggwaawo wakati wa Kitaffe n’Omwana amaanyi g’okusaba mwe gasibuka era mwe galina obukakafu bwago, era nti olw’okwegatta kwaffe n’Omwana, okusaba kwaffe kutwalibwa waggulu era kuyinza okukola mu bulamu obw’omunda obw’Obusatu Obutendereze. Ebyo Katonda bye yasalawo si kizimbe kya kyuma eddembe ly’omuntu kye lyandirwanyisizza obwereere. Nedda. Katonda yennyini kwe Kwagala Okulamu, eyayingira mu Mwana we nga muntu mu nkolagana esingayo okwagala n’ebyobuntu byonna, ayita mu Mwoyo Omutukuvu n’atwala byonna eby’obuntu mu bulamu bw’okwagala obwa Katonda, era eyeekuuma nga wa ddembe okuwa buli kusaba kw’omuntu ekifo kyakwo mu bufuzi bwe obw’ensi.

Mu kitangaala ky’emambya eky’ebirowoozo ng’ebyo, enjigiriza y’Obusatu Obutendereze tekyali kuteebereza kwa bwongo bwokka, wabula kye kulabisibwa okulamu okw’engeri omuntu gy’ayinza okutwalibwa mu kussa ekimu ne Katonda, n’okusaba kwe ne kufuuka ekintu ekikola ddala mu bufuzi bwa Katonda obw’ensi eno. Era tuyinza, nga tuli wala, okulengera ekitangaala ekiva mu nsi etaggwaawo ne kyakira ku bigambo nga bino: ‘KU BW’OYO KRISTO ffenna tuyita MU MWOYO OMU okutuuka eri KITAFFE.’

‘MUKAMA, TUYIGIRIZE OKUSABA.’

Katonda Ataggwaawo! Omu mu Basatu, Omutukuvu Emirundi Esatu! mu kussa ekitiibwa okungi nnandyagadde okusinza nga mbisse amaaso mu maaso g’ekyama ekitukuvu eky’Obwakatonda bwo. Era bw’oba osiima, Ayi Katonda ow’ekitiibwa ekingi, okubikkula ekitundu ku kyama ekyo, nnandyagadde okuvunnama n’okutya n’okukankana, nneme kukwonoona, nga bwe nfumiitiriza ku kitiibwa kyo.

Kitaffe! nkwebaza nti erinnya lino tolirina ng’oli Kitaabwe w’abaana bo abali wano ku nsi kyokka, naye nga bwe wabeerawo okuva emirembe n’emirembe ng’oli Kitaawe w’Omwana wo eyazaalibwa omu yekka. Nkwebaza nti nga Kitaffe oyinza okuwulira okusaba kwaffe, kubanga okuva emirembe n’emirembe wawa okusaba kw’Omwana wo ekifo mu magezi go. Nkwebaza nti twalaba mu ye ku nsi okussa ekimu okw’omukisa kwe yalina naawe mu ggulu; era nti okuva emirembe n’emirembe mu magezi go gonna ne mu by’osalawo mwalekebwamu ekifo eky’okusaba kwe n’okuddibwamu kwakwo. Era okusinga byonna nkwebaza nti olw’obuntu bwe obwa ddala ku ntebe yo waggulu, n’olw’Omwoyo wo Omutukuvu mu buntu bwaffe wano wansi, waggulwawo ekkubo buli kukaaba kw’omuntu mu bwetaavu mwe kuyinza okutwalibwa waggulu ne kutuuka ku Bulamu n’Okwagala kwa Katonda, ne kuddibwamu kyonna kye kunaasaba.

Yesu Omutendereze! mu ggwe ng’Omwana ekkubo ly’okusaba mwe lyaggulirwawo, era atuwa obukakafu bw’okuddibwamu, tukwegayiridde, yigiriza abantu bo okusaba. Ayi, kino kibeerenga buli lunaku akabonero k’obwana bwaffe, nti, nga ggwe, tumanyi nti Kitaffe atuwulira bulijjo. Amiina.

EBIGATTIDDWAKO.

‘“Katonda awulira okusaba.” Endowooza eno esinga obwangu ku kusaba y’etwalibwa mu Byawandiikibwa byonna. Tebimalira ku ngeri okusaba gye kukola ku mutima gwaffe n’obulamu bwaffe, newakubadde nga biraga bulungi enkolagana wakati w’okusaba ng’ekikolwa, n’okusaba ng’embeera. Wabula biteeka essira ddala ku bigendererwa ebya ddala eby’okusaba: okufuna emikisa, ebirabo, n’okununulibwa okuva eri Katonda. ‘Musabe, munaaweebwa,” Yesu bw’agamba.

‘Wadde nga kiyinza okuba eky’amazima era eky’omugaso okulowooza nti Katonda, eyalaba edda era eyateekateeka edda byonna, yalaba edda era n’ateekateeka edda n’okusaba kwaffe ng’empeta mu lujegere lw’ebigenda bibaawo, olw’ensonga n’ekivaamu, nga maanyi ga ddala, naye tukakasa nti eno si y’engeri omutima gye guyinza okufunamu emirembe ku nsonga eno enkulu, era tetulowooza nti wano we wali amaanyi agatusikiriza okusaba. Wabula tuwulira nti okulowooza okwo kukyusa amaaso gaffe ne gava ku Oyo omuva ekisinde, obulamu n’amaanyi g’okusaba. Katonda omulamu, ali naffe mu kiseera kino so si ow’emirembe n’emirembe kyokka, Omulamu, Omusaasizi, Omutukuvu, Katonda eyeeraga eri emmeeme, Katonda ng’agamba nti, “Munnoonye;” kino kye kitusikiriza nga magineti, era kino kyokka kye kiyinza okuggula omutima n’emimwa. . .

‘Mu Yesu Kristo Omwana wa Katonda tufuniramu eky’okuddamu ekijjuvu eky’obuzibu buno. Yasaba ku nsi, so si ng’omuntu yekka, naye ng’Omwana wa Katonda eyafuuka omubiri. Okusaba kwe ku nsi kwe kulabisibwa kwokka okw’okusaba kwe okuva emirembe n’emirembe, bwe yateekebwawo mu magezi ga Katonda okuba Kristo. . . . Omwana yalondebwa okuba omusika wa byonna. Okuva emirembe n’emirembe Omwana wa Katonda ye yali Ekkubo, Omutabaganya. Yali, nga tukozesa olulimi lwaffe olutatuukiridde, okuva emirembe n’emirembe ng’ayogera ne Kitaffe ku lw’ensi.’—SAPHIR, The Hidden Life, essuula 6. Laba ne The Lord’s Prayer, olupapula 12.