Okutambula mu Kukkiriza

Singa wandironze abantu abamu aba mu Baibuli okulaga ekitegeeza okutambula mu kukkiriza, wandironze ani?

Kalebu, eyali ayagala okulwana n’abawanvu ennyo newaakubadde nga yali awezezza emyaka egisukka mu kinaana? Erisa, eyayimirira ng’awakanya bannabbi ba Baali bonna?

Danyeri, eyasaba mu lujjudde ng’amanyi nti kiyinza okumuwaayo obulamu bwe? Naye kisanyusa okulaba abo Baibuli b’ekwatako ng’ebyokulabirako mu kukkiriza.

Tewali n’omu ku abo!

Omutume Pawulo awandiika ku kukkiriza mu bbaluwa ye eri Abaruumi ng’agamba nti, “kubanga tuteesa nti omuntu aweebwa obutuukirivu olw’okukkiriza awatali bikolwa bya mateeka” (Abaruumi 3:28). Awo n’akozesa essuula ey’okuna yonna okuwaayo ekyokulabirako kya jjajja Ibulayimu, gwe ‘okukkiriza kwe kwabalirwa okuba obutuukirivu.’

Omutume Yakobo naye atwala Ibulayimu ng’ekyokulabirako kye ekisinga obukulu eky’obulamu obw’okukkiriza, ng’agamba nti okukkiriza okutaliiko bikolwa kufu.

Abuuza nti, “Ibulayimu jjajjaffe teyaweebwa butuukirivu olw’ebikolwa, bwe yawaayo mutabani we Isaaka ku kyoto? Olaba ng’okukkiriza kwakolera wamu n’ebikolwa, era okukkiriza kwatuukirira olw’ebikolwa bye” (Yakobo 2:21-22).

Naye era Yakobo ayongerako ekyokulabirako ekyokubiri, ekyo kiteekwa okulabika nga kitali kya bulijjo gye tuli ffenna. Atuleetera Lakabu malaaya, eyasembeza abakessi abaatumibwa mu Yeriko. Okusinziira ku misono gy’abantu gyonna yali si muntu asaana kutenderezebwa; okwongera ku kukola omulimu ogw’ekivve, yali mulyisi era mulimba eyafaayo ku bukuumi bwe yekka. Kyokka atuumibwa ng’ekyokulabirako mu kukkiriza.

Ekisingawo okwewuunyisa kiri nti Yakobo si ye yekka amutwala bw’atyo! Omuwandiisi w’Ebbaluwa eri Abaebbulaniya naye amutuumira mu lukalala lwe oluwanvu. Mu ntegeera yange eyedda ey’okukkiriza, mazima sandimutwaliddemu, wadde abalala bangi aboogerwako mu Abaebbulaniya essuula 11! Kale, oboolyawo ntegeera yange ey’okukkiriza y’eteekwa okukyuka.

Abamu bandituumye Abaebbulaniya essuula 11 nti “Abazira ab’Okukkiriza.” Nze siraba bazira eyo. Wabula abantu aba bulijjo nga ffe wammwe abaayita mu mbeera eza buli ngeri mu kutambula okw’okukkiriza.

Abamu baawangula obwakabaka olw’okukkiriza, ate abalala battibwa olw’okukkiriza! Omutwe omulungi ogw’essuula guno gwandibadde “Ebyokulabirako by’Okukkiriza, ” kubanga ekigendererwa kyagwo kwe kutulaga nti, mu buyinza bwe obw’ekitiibwa, Katonda akulembera abasajja n’abakazi mu makubo mangi ag’enjawulo okusobola okutuukiriza by’ayagala mu bo era ng’ayita mu bo.

Gye tuli, okubonyaabonyezebwa n’okufa tebirabika kutuukagana na Katonda ky’ayagala eri omukkiriza, naye ebyafaayo bijjudde emboozi ku ngeri Ekkanisa gye yakulaakulaniramu mangu ku musaayi gw’abajulizi abaafiira okukkiriza. Kyali Katonda ky’ayagala nti bafe, basobole okuba ‘okutenderezebwa kw’ekitiibwa kye.’ Kino tekitegeeza nti tasaasira nneewulira z’abantu.

Mazima ddala asaasira, naye, mu batukuvu be, akuza abo abaliza ekitiibwa ekisingako olw’okubonaabona n’okufa kwabwe okusinga olw’obulamu bwabwe. Abo, yabakakasa ‘Okuzuukira okusingako obulungi.’

Oluusi ku lusozi enjuba w’eyakira ennyo, Katonda akulembera abaana be abaagalwa.

Oluusi mu kiwonvu, mu kiro eky’ekizikiza ekingi, Katonda akulembera abaana be abaagalwa.

Abamu mu mazzi, abamu mu mataba, Abamu mu muliro, naye bonna mu musaayi.

Abamu mu nnaku empitirivu, naye Katonda awa oluyimba, Mu kiseera eky’ekiro n’obudde bwonna obw’emisana” (G.A Young).

Mu Njiri tusomamu abantu mukaaga bokka Yesu be yatendereza olw’okukkiriza kwabwe. Bwe kuba nga abo Pawulo, Yakobo n’omuwandiisi w’Abaebbulaniya be baalonda bakwewuunyisa, lindirira olabe abo Yesu b’alonda!

Waakiri basatu ku bo tebaali na Bayudaaya, omu yali mugenge, omulala yali alwadde okumala emyaka mingi, omu yali muzibe wa maaso, basatu ne beeyita ‘abatasaanira’ era bonna baali boonoonyi.

Omuduumizi Omuruumi → Matayo 8:5-13 Omuweereza we yali agalamidde nga akoze mu maka, kyeyava asaba Mukama obanga yandimuwonyezza.

“Nnaayija naawe,” Mukama waffe bwe yagamba, naye omuduumizi n’amuddamu nti, “Mukama, sisaanidde ggwe kuyingira wansi w’akasolya kange, wabula yogera bwogezi ekigambo, omuweereza wange anaawona!”

Katutegeere kino; kirabika yalina ennyumba esinga obulungi mu kibuga, kubanga ekifo ky’omuduumizi mu ggye ery’Abaruumi kyali kya kitiibwa kinene. Obutasaanira bwe tebwava ku kifo kye, wabula kubanga yategeera nti yali mu maaso g’omuntu eyamusinga nnyo. Yeeyongera nti, “Mukama, nange ndi nga ggwe, omuntu ali wansi w’obuyinza.”

Yesu yamutwala ng’ali wansi w’buyinza ki? Yali talina buyinza bwaweebwa okuva mu bakulembeze b’Abayudaaya, era yali talina kifo ky’oyo eyayigirizibwa ku bigere bya labbi omukulu. Yali mubazzi wa wansi, naye yalina obuyinza obw’okufukibwako amafuta okwa Katonda, era omuduumizi ekyo yakiraba. Yakiraba atya? Olw’okukkiriza!

Yesu ne yeewuunya n’agamba nti, “Sirabangako kukkiriza kwenkana awo mu Isirayiri yonna!”

Okukkiriza kwali ludda wa? Omuduumizi yalina obujulizi obw’omunda nti omusajja ono, Yesu, yali muntu alina obuyinza obwa Katonda. Yagondera obujulizi obwo (obw’Omwoyo Omutukuvu) ne yeewaayo eri obuyinza obwo.

“‘Mukama, sisaanidde ggwe kuyingira wansi w’akasolya kange, wabula yogera bwogezi ekigambo, omuweereza wange anaawona’” (Matayo 8:8).

Omukazi Eyavaamu Omusaayi → Makko 5:25-34 Omukazi ono ow’ennaku yali agumiikirizza ebingi mu mikono gy’abasawo bangi nga tawona ku mbeera ye ey’ensonyi era ennakuwaza. Mazima ddala yali agenda yeeyongera bubi.

Amateeka gaamuyita ‘atali mulongoofu’ n’olwekyo teyakkirizibwa kunyumirwa bingi ku birungi eby’abantu aba bulijjo. Teyayinza kubeerawo ku mbaga z’Ennaku Enkulu, wadde okuyingira mu ssinzizo okusinza, era okusingira ddala, teyateekwa kusemberera Abafalisaayo ‘abatuukirivu’ n’‘abasajja abatukuvu.’

Yali awulidde ebya Yesu, naye obujulizi obw’omunda ne bumugamba okugolola omukono okukwata ku lukugiro lw’ekyambalo kye. Kino kyali kikontana na buli kimu kye yali ayigiriziddwa, naye n’agondera n’awona. Tewali kyafaananako kino nga kimaze okubaawo. Teyakkiriza lwa kubanga yali awulidde ku balala abaawona mu ngeri y’emu.

Yagondera busa okusindika okw’omunda.

“N’amugamba nti, ‘Muwala wange, okukkiriza kwo kukuwonyezza; genda mirembe, era wone endwadde yo’” (Makko 5:34).

Omukazi Omukanani → Matayo 15:22-28 Omutima gw’omukazi ono gwali gunyolwa ng’anoonya obuyambi olw’omwana we owoobuwala eyaliko dayimooni. Yajja eri Mukama, naye ne Mukama n’alabika ng’amwewala, n’abayigirizwa be ne bagezaako okumugoba.

Yali si Muyudaaya, naye yalaba ekyo nga tewali mulala yalaba, ne bayigirizwa okutuusa mu kiseera kino. Yamanya Yesu nga Mukama, Omwana wa Dawudi. Bino byali bigambo ebimanyiddwa nnyo okukozesebwa ku Masiya eyali ajja. Abalala baali tebannamumanya, naye omukazi Omukanani ono yamumanya. Okubikkulirwa okwenkana awo kujja kwokka olw’obujulizi obw’omunda obw’Omwoyo Omutukuvu. Okubikkulirwa kuno kwe kumu kwajjira Peetero ku Lusozi Kerumooni nga wayiseewo emyaka nga ebiri!

Yesu yagezesa okutegeera kwe, okubikkulirwa kwe, ng’amusomooza nti tekyali kirungi okusuulira embwa (Abamawanga) emmere y’abaana (obuwonyi obw’Abayudaaya). Okuddamu kwe kulaga nti yategeera bulungi, olw’okubikkulirwa, nti mazima ddala ye yali Masiya.

“Awo Yesu n’amuddamu nti, ‘Ai omukazi, okukkiriza kwo kunene! Kikukolerwe nga bw’oyagala.’ Omwana we owoobuwala n’awona mangu ago” (Matayo 15:28).

Batimaayo Omuzibe wa Maaso → Makko 10:46-52 Newaakubadde nga yali muzibe wa maaso, Batimaayo yalaba okusinga ekibiina kyonna ekinene eky’abantu abalaba abaali beetoolodde Yesu. Yabeeranga mu kibuga Yeriko ekikolimire era yali afiiriddwa amaaso ge, n’afuuka musabiriza, anyoomebwa bonna abaali bamwetoolodde. Bwe yaleekaana abantu ne bamugamba n’obukambwe okusirika, naye n’atalekera kuleekaana, kubanga ng’omukazi Omukanani, yali afunye okubikkulirwa, obujulizi obw’omunda obwa Yesu nga Masiya. “N’aleekaana… ‘Yesu, Omwana wa Dawudi, onsaasire’” (Makko 10:48).

Yesu yayita omusabiriza gy’ali n’amubuuza ekibuuzo eky’ekyewuunyo nti, “Oyagala nkukolere ki?” Batimaayo n’addamu nti, “Mukama, njagala amaaso gange gazibuke!” Yesu n’agamba nti, “Genda, okukkiriza kwo kukuwonyezza,” era amangwago amaaso ge ne gazibuka (Makko 10:51-52).

Okubikkulirwa kwakulembera okwatula, ekyavaamu buwonyi.

Omukazi mu Nnyumba ya Simooni → Lukka 7:37-50 Mu Yokaana 11:2 ne Matayo 26:6 kyogerwa nti omukazi ono yali Maliyamu, mwannyina Laazaalo. Simooni, Omufalisaayo, yatunuulira ebikolwa bye n’atandika okusalira Yesu omusango ng’abulwa okwawula, kubanga omukazi yamanyibwa nga mwonoonyi. Naye Yesu yamanya bulungi omukazi bwe yali, era n’ategeera ebikolwa bye ng’okumufukako amafuta olw’okuziikibwa. Kirabika yalina okutegeera kutono ku kino, naye, ng’agondera obujulizi obw’omunda , okusindiikiriza kw’Omwoyo Omutukuvu, era ng’akulemberwa okwagala, yali aweerezza Mukama mu ngeri ey’obunnabbi.

“[Yesu] n’agamba omukazi nti, ‘Okukkiriza kwo kukulokoseeza; genda mirembe” (Lukka 7:50).

Omugenge ow’Ekkumi → Lukka 17:11-19 Abagenge kkumi baali bazze eri Yesu nga banoonya okuwonyezebwa. Bonna baagondera ebiragiro bye okugenda eri bakabona, okuyitibwa ‘abalongoofu.’ Kino kyali kya kwetaagisa mu Ndagaano Enkadde era, newaakubadde ng’omu ku bo yali Musamaliya, naye n’agondera. Mu kkubo nga bagenda eri bakabona, bonna baawona, naye Musamaliya yekka ye yakkiriza nti okuwona kwe tekwali kya magezi ga kiragiro, wabula kwava eri Katonda, bw’atyo, ng’agwa ku bigere bya Yesu, n’atandika okugulumiza Katonda. Yali agondedde eddoboozi eriwulikika ery’Omwana wa Katonda era n’awona.

“[Yesu] n’amugamba nti, ‘Golokoka ogende; okukkiriza kwo kukuwonyezza’” (Lukka 17:19).

Mu byokulabirako byonna omukaaga, okukkiriza kwalabisibwa era ne kutuukirira mu kugondera. Singa tewaaliwo kugondera eri okumanya obuyinza, eri okubikkulirwa okw’obwakatonda, eri obujulizi obw’omunda obw’okusindiikiriza kw’Omwoyo, eri ekigambo Mukama kye yayogera, tewandibaddewo byamagero ebyawandiikibwa.

Okunnyonnyola Okukkiriza Kale tunaanyonnyola tutya okukkiriza okusobola okutuukiriza ebibuuzo byonna eby’empaka era ne kunnyonnyola abo Yesu, Pawulo, Yakobo, n’omuwandiisi eri Abaebbulaniya be baalonda?

Bwe mbuuza abantu okunnyonnyola okukkiriza, okuddamu okwa bulijjo kwe kujuliza Abaebbulaniya 11:1, “Kaakano okukkiriza kwe kwesiga ebintu bye tusuubira, obukakafu obw’ebintu bye tutalaba,” kyokka, bwe basabibwa okunnyonnyola enkuluze yaabwe, nsanga batono abalina okunnyonnyola okukakasa.

Gye ndi, omuwandiisi agamba butereevu ekyo omutume Pawulo kye yagamba awalala, nga bwe kyajulizibwa mu ssuula eyakulembera.

Kiki kye tusuubira? Barclay, omuwandiisi w’olukalala olw’amawulire ag’okusaba olw’ettutumu, Our Daily Bread, annyonnyola essuubi nga “okulindirira n’essanyu ekyo ekyasuubizibwa.” Abatume Pawulo ne Peetero bombi baawa obujulizi mu maaso g’abaabalumiriza ku ssuubi lyaffe ekkulu ery’Okuzuukira. Gye bali, essuubi lyaffe likakafu. Eri omuwandiisi w’Abaebbulaniya, liri ng’ennanga enywezeddwa munda w’eggigi ery’omu maaso ga Katonda. Tusuubira ekyo kye tunaafuna mazima.

Tunaafuna ki, okuggyako ekyo ekiva mu kisa kya Katonda; ekyo kye yasuubiza? Ekirabo kye eky’obulokozi, ekirabo kye eky’Omwoyo Omutukuvu abeera munda mu ffe; ebirabo bye ebiweebwa Omwoyo Omutukuvu: Ekirabo kye .

Nkubisa omwana omuto mu kiseera kya Sekukkulu oba ku lunaku olw’amazaalibwa. Amanyi nti anaafuna ekintu eky’enjawulo okuva eri bazadde be - ekirabo ekiva mu kwagala kwabwe. Alindirira n’essanyu olunaku olukulu. Balina essuubi eri ekyo ekigenda okujja mazima. Ku nkomerero, bafuna ekyo ekyasuubizibwa: ekirabo kyabwe. Kino kye kwesiga ekyo kye yasuubira. Okusuubira kwabwe kufuuse kya nnamaddala.

Okukkiriza kwe kwesiga ebintu bye tusuubira; kiri kirabo .

Bwe nnasooka okutuuka mu Kanada, nnatunuulira emiti egyali mu lusuku lwaffe nga nnina essuubi lingi ery’okunyumirwa ebibala byagyo mu biseera eby’oluvannyuma; kyokka, nnali simanyi miti gya ngeri ki. Siri mukugu mu by’okulima emiti, era saayinza kutegeera miti olw’amakoola gaagyo oba enkula yaagyo. Naye ebibala bwe byatandika okujja, saabuusabuusa ku buli kimu kye kyali. Nnagimanya olw’ebibala byagyo . Ebibala bye byali obukakafu bwe nnali nneetaaga.

Obuzaaliranwa bw’emiti bwali tebukyuse, empisa z’emiti zaali tezikyuse, naye bino byali bikwekeddwa okutegeera kwange, okutuusa ebibala lwe byajja. Obukakafu obw’ebintu ebitalabika bwe byali ebibala ebyali ku matabi.

Mu ngeri y’emu, obukakafu obw’obulamu obujjudde Omwoyo buli mu bibala byabwo.

Yesu yagamba nti, “Oba mufuule omuti okuba omulungi n’ekibala kyagwo okuba ekirungi, oba mufuule omuti okuba omubi n’ekibala kyagwo okuba ekibi, kubanga omuti gutegeererwa ku kibala kyagwo” (Matayo 12:33) Okukkiriza kwe bukakafu obw’ebintu ebitalabika. Kiri kibala .

Omuwandiisi w’Abaebbulaniya 11 tayogera kisukka ku ekyo Pawulo kye yagamba mu 1 Abakkolinso 12:9 ne Abaggalatiya 5:22.

Nnyonnyola okukkiriza ng’olungalo lwa Katonda mu mitima gy’abasajja n’abakazi, olubaseeka okukola by’ayagala.

Kulabisibwa mu kugondera ng’endowooza y’omutima. Si ndowooza ya magezi. Kwe kukkiriza n’okuddamu . Olungalo oluseeka lwa Katonda, okuddamu okw’okugondera kwaffe. Omulimu ogusooka era ogusinga obukulu ogw’okukkiriza omuntu gw’ayinza okukola kwe kukkiriza Mukama waffe Yesu Kristo okutuuka ku bulokozi. Okubikkulirwa kukulembera okwatula (laba Peetero ku Lusozi Kerumooni). Kulabisibwa mu kwenenya , okubatizibwa , okwatula n’ebikolwa ebirungi (ebikolwa eby’obutuukirivu). Awo bino we bitalabikira, omuntu ayinza obutuufu okubuusabuusa (nga Yakobo) obwennyini bw’okukkiriza; mu butuufu ‘kufu’ (Yakobo 2:26).

Okutambula okw’okukkiriza kwe kwewaayo okwa buli lunaku eri by’ayagala (ebibikkuddwa n’ebitannabikkulwa). Okunyweza omukono gwa Taata! Nga Peetero bwe yagamba nti, “Tunaagenda eri ani omulala?” (Yokaana 6:68). Bwe tunyweza, Kitaffe asobola okusiguukulula ensozi! Kino kiri olw’empisa ze, si lwa maanyi ga magezi gaffe oba okukkiriza kwaffe! Manya nti ne baddayimoni bakkiriza byonna Kitaffe by’asobola okukola, naye ekyo tekitwalibwa nga kukkiriza (Yakobo 2:19).