Yimirira Nga Onywevu

Bwe tumala okuyiga okutuula mu bifo eby’omu ggulu (2:6) n’okutambulira mu kwagala ne mu kitangaala (5:2, 8), tuyitibwa okubeera ab’amaanyi n’okuyimirira nga tuli banywevu (6:10,11). Omugole ow’essuula 8 ateekwa okufuuka omuwanguzi bw’aba ng’ayagala okwambala engule n’okufugira awamu ne Yesu. Bw’atyo, ayitibwa okubeera omuserikale.

Twalaba mu kitundu ekisooka eky’essuula 6 nga Pawulo yeeyongera n’omulamwa ogw’obulamu obujjudde Omwoyo nga bwe gukwata ku nkolagana wakati w’abaana n’abazadde; abakozi ne bakama baabwe. Ekirowoozo ekimu ekikulu wano kikwata ku ‘bakitaabwe’ “abanyiiza abaana baabwe ne basunguwala.” Kiyinza okuba nga be bannyaabwe, naye emirundi mingi be bakitaabwe. Kya kwewuunya nga bannassaayansi w’ebirowoozo bangi balowooza nti “obusungu” kye kibala eky’ebiwundu eby’omunda – ebiwundu eby’omwoyo ebireetebwa bakitaabwe (ne bannyaabwe) abatajjuza baana baabwe kwagala (okugwa mu kifuba, okunywegera, obwesimbu, empisa, okwessaamu ekitiibwa, obukuumi, ebiruubirirwa, n’ebirala). Kye ndowooza n’ennaku kiri nti ebiwundu bino eby’omwoyo bye byokulwanyisa ebisinga obungi Setaani by’akozesa okuwangula abakkiriza bangi.

Okunoonyereza okusanyusa kwe kulowooza ku amakulu g’okuba ‘omuwanguzi’ n’okulaba empeera ez’okuwangula okwo. Ka tuwummuleko akaseera tulowooze ku nnyiriri ssatu mu Yokaana ow’olubereberye ezoogera ku kuwangula. 1 Yokaana 2:12-14 .

Wano Yokaana ateeka abakkiriza bonna mu bibinja bisatu by’ayita, abaana abato, bakitaabwe, n’abavubuka.

Abaana abato be bali abasonyiyiddwa ebibi byabwe olw’erinnya lye (v12) era abasobola okuyita Katonda ‘Kitaffe’ (13). Kino kya mazima eri bonna abaazaalibwa omulundi ogwokubiri olw’Omwoyo. Bayinza obutamanya kintu kyonna ku by’enjigiriza ya Katonda oba ebyafaayo by’ekkanisa, naye basobola okwogera ebintu bibiri: “Ebibi byange bisonyiyiddwa era nsobola okumuyita ‘Kitaffe’.” Manya nti kino tekikwatagana na myaka gy’obukulu. Mmanyi abakkiriza bangi, abakuze mu myaka, naye eky’ennaku abatawererako kuva ku mutendera guno – basigadde ng’abaana abato!

Bakitaabwe be bali abatuuse okumanya oyo eyabaawo okuva ku lubereberye. Kuno si kumanya kwa mutwe kwokka wabula bwe buntu obw’oku lusegere kubanga Katonda yeeraze gye bali. Guno gwe muruubirirwa gw’essaala ya Pawulo mu Abaefeso 1:17.

Buno bwe bukulu obw’Ekikristaayo – okumumanya. Manya nti na kino tekikwata ku myaka gy’obukulu, wadde ku kikula. Kya ssanyu, mmanyi abavubuka n’abawala bangi abatuuse okumanya Katonda mu ngeri ey’oku lusegere ennyo – bo ‘bakitaabwe’ mu mwoyo.

Waliwo ekkubo limu lyokka mwe tuyinza okukulaakulanira okuva ku nnaku ezo ez’olubereberye ez’okuba ‘abaana abato’ okutuuka mu kifo Katonda mw’eyeeraga gye tuli nga tugenda tukula – kwe kuba “abavubuka”.

Nate, kino si myaka gy’obukulu wadde kigambo kya kikula.

Abavubuka be bali abawangudde omubi (v13); ba maanyi kubanga ekigambo kya Katonda kibeera mu bo (v14). Eri buli kyokulwanyisa kya Setaani, balina eky’okuddamu mu Kigambo kya Katonda.

Bawakanya obulimba bwe n’amazima ag’omu Baibuli. Okugeza, omulabe ayinza okusekerera okugwa kwo n’agamba nti, “Katonda takyakwagala kubanga omunyiizizza!” Obulimba buno buwakanyizibwa amazima nti “tewali kiriyinza kutwawukanya n’okwagala kwa Katonda okuli mu Kristo Yesu (Bar 8:39).”

Buli lwe tugezesebwa embeera zaffe, obulimba bwa Setaani, n’okukemebwa okuva mu nsi, Katonda atunuulira alabe engeri gye tuddamu. Ali ku mbiriizi ng’atukubiriza. Bwe tuwangula, asanyuka era n’atwongera okutwolekera engeri ye.

Kaakano ka tulabe abawanguzi ab’omu Okubikkulirwa 2, 3 – Yokaana w’alabira Kristo eyagulumizibwa n’alagirwa okuwandiikira ekkanisa omusanvu ez’e Asia Omutono. Okumaliriza buli bbaluwa, Yesu ayogera ku mpeera eweebwa “abo abawangula”.

Okubikkulirwa 2 : omuwanguzi alirya ku muti ogw’obulamu (v7); talikolwa kabi olw’okufa okwokubiri (v11); aliriira ku ‘maanu’ eyakwekebwa era aliweebwa ejjinja eryeru n’erinnya eppya (v17); aliweebwa obuyinza ku mawanga n’emmunyeenye ey’enkya (v26-8).

Okubikkulirwa 3 : omuwanguzi aliyambazibwa engoye enjeru era erinnya lye liryatulwa mu maaso ga Kitaffe ne bamalayika (v5); alifuulibwa empagi mu yeekaalu ey’olubeerera era aliweebwa akabonero ka Katonda akasatu (v12); alituula ne Yesu ku ntebe ye ey’obwakabaka – afugire awamu naye (v21).

Kkuno kwe nsonga lwaki Mukama akkiriza abakkiriza okuyita mu bigezo ebimu ebizibu awamu n’okubonaabona n’okuziyizibwa, era lwaki emirundi mingi alabika ng’asigala ebweru w’obuzibu ne bwe tumukaabirira mu ssaala. Ayagala tufuuke abawanguzi mu buzibu okusinga okutuwonya mu bwo. Atuwadde Omwoyo Omutukuvu okuba omubeezi waffe mu lutalo era atuwadde ebyokulwanyisa okwambala. Oyo ali mu ffe wa maanyi okusinga oyo ali mu nsi.

Ate era, tusaanidde okukuguka mu “kigambo” tusobole okutegeera enkwe z’omulabe, Setaani. Pawulo yali ayanguwa okusonyiwa, aleme okuwa Setaani obuyinza ‘kubanga tumanyi enkwe ze’ (2 Kol 2:11). Edda mu Abaefeso, yatukubiriza ‘obutazibya budde nga tukyasunguwadde, tuleme okuwa Setaani ebbanga’ (4:27).

Nate, Setaani aliluka ‘obusaale bwe obw’omuliro’ (6:16) – obulimba bwe tukkiriza mangu okuyingira mu birowoozo byaffe ne tubukkiriza. Peetero amwogerako ng’‘empologoma ewuluguma’ enoonya gw’eneerya (1 Peetero 5:8) – okuwuluguma okwo okukwata ku nneewulira zaffe ne kututiisa ne tuba bati mu lutalo. Jjukira nti okuwuluguma kwokka kw’asobola okukola, kubanga yafiirwa amannyo n’enjala ze!! Yesu yamwambulako ebyokulwanyisa ku musaalaba – Abakkolosaayi 2:15.

Olutalo mazima ga Mukama, naye ffe tuli ba kwambazibwa ebyokulwanyisa tulyoke tuwangule.

Kaakano ka tuddeyo mu Abaefeso essuula 6: V 11: Mwambale ebyokulwanyisa byonna ebya Katonda.

V12 – 13: Manya essira lyaffe we lisaana okubeera mu lutalo luno – si bantu balala, oba bakkiriza oba abatali bakkiriza. Wano amaanyi gaffe we gasaana okwolekezebwa. Mazima ddala tuli ba kulwanyisa omubiri (obuntu bwaffe obukadde), naye ne kino lutalo lwa mwoyo okusinga okuba olutalo olw’ebintu ebirabika. Tuteekwa okulaba omulabe okusukka ku muntu yennyini.

‘Abafuzi’ be balabirizi ab’omwoyo aba gavumenti, amawanga, n’ebirala.

‘Ab’obuyinza’ be ‘banyazi’ aba baddayimooni abakola omulimu gwa Setaani mu bitundu ebitono.

‘Abafuzi b’ekizikiza’ bakwata ku abo abakwata ku balala – abeeby’obufuzi, abasomesa, abafirosoofa, n’ebirala.

‘Emyoyo emibi’ kitegeeza abalabirizi b’eddiini, n’ebirala.

Bino bye bitundu ebyokumpi eby’ebifo eby’enjawulo ebya bamalayika (abaagwa) era byali bitegeerwa bulijjo mu biseera bya Pawulo.

V14: Amazima kye kyambalo ekikulu ebirala byonna kwe bisibibwa oba kwe biyunjibwa. Twetaaga nnyo amazima oba obwesimbu mu bikolwa byaffe byonna. Eky’omu kifuba eky’obutuukirivu kikuuma emitima gyaffe; ebigere byaffe biwewebwa okweteekateeka okw’Enjiri ey’emirembe – bulijjo tuli ku butume!

Manya nti tewali kyokulwanyisa kya mabega! Omuntu tasobola kukyuka kudduka!

V17, 18: Ebyokulwanyisa eby’okulumba y’ekitala (Ekigambo kya Katonda) n’okusaba mu Mwoyo. Olw’ebyo tuliba bawanguzi, kale kirungi tuyige okubikozesa! Nneewuunya abakkiriza bangi nga bagenda mu lutalo nga tebasabye!

Eky’enkomerero, mu 1 Abasessalonika 5:8, Pawulo yeeyongera ku byokulwanyisa bino nti, “Twambale okukkiriza n’okwagala ng’ekyomu kifuba, era tube n’essuubi ery’obulokozi nga ye nkufiira yaffe.” Nate, tulaba amayinja ga Pawulo asatu ag’omuwendo – agateeka wamu emirundi awatali kuwera musanvu mu bbaluwa ze, naye okusingira ddala mu ssuula eyo enkulu ey’okwagala – 1 Abakkolinso 13:13 – “Kaakano waliwo ebintu bisatu eby’olubeerera: okukkiriza, n’okusuubira, era n’okwagala. Naye ekisingako ku ebyo obukulu kwe kwagala.”.

Emirundi mitono nnyo lwe tutegeera obukulu bw’essuubi (ery’Ekikristaayo), nga tulyekiika ku makulu gaalyo amanafu ag’Olungereza. “Nsuubira nga enkuba tejja kutonnya leero”, – naye eyinza okutonnya!

Eri Pawulo, essuubi kyali kintu kikulu nnyo okusingawo. Mu maaso ga Kabaka Agulipa, yalangirira nti, “Abayudaaya bano bampawaabira nti njeemye, naye leero nyimiridde mu maaso gammwe olw’essuubi ery’okuzuukira! (Ebik. 26:1-8 nga bikyusibbwa mu ngeri endala). Tagamba nti, “Nsuubira nga waliwo okuzuukira era nga saava ku mulimu gwange omukulu okugoberera ekkubo lino!” Agamba nti, “Mmanyi era mmanyidde ddala nga waliwo okuzuukira gye ndi!” Alina obukakafu munda ye.

Nzansaŋŋanga essuubi nga “kabonero k’omutwe era kalabikira mu bwesige”. Kkuno kwe nsonga lwaki enkuufiira eyitibwa essuubi ery’obulokozi.

Mu ngeri y’emu, “okukkiriza kabonero k’omutima era kalabikira mu buwulize.”

Nsuubira nga essuula zino ennyimpi zibadde mukisa gye muli nga munoonya okusembera okumpi naye - nga muyiga okutuula mu ye n’okutambulira mu kwagala ne mu kitangaala. Mubeere abawanguzi Mukama b’asanyukira okwongera okwolekera engeri ye.

Ka mmalirize n’essaala ya Pawulo: (1:15-20; 3:16-19) ne mbasabira, Katonda wa Mukama waffe Yesu Kristo, Kitaffe ow’ekitiibwa, abawe Omwoyo ow’amagezi n’okubikkulirwa mweyongere okumutegeera. Nnyongera okubasabira, amaaso g’emitima gyammwe gamulisibwenga, mulyoke mumanye essuubi ly’okuyitibwa kwammwe, n’obugagga obungi bwe mulina mu ye, mmwe awamu n’abantu ba Katonda bonna. Njagala mutegeere amaanyi ge agasukkiridde agakolera mu ffe abakkiriza, ng’okukola kw’obuyinza bw’amaanyi ge bwe kuli, Nsaba Katonda oyo akola eby’ekitalo era agulumizibwa, agumyenga era anywezenga omuntu wammwe ow’omunda, olw’Omwoyo we, Kristo alyoke abeerenga mu mitima gyammwe olw’okukkiriza kwammwe. Mbasabira mubeerenga n’emirandira mu kwagala nga mukunywereddemu, mulyoke mubeerenga n’amaanyi awamu n’abatukuvu bonna, okusobola okutegeera obugazi, n’obuwanvu, n’obugulumivu n’okukka wansi ebiri mu kwagala kwa Kristo. Njagala mutegeere okwagala kwa Kristo okusukkiridde okutegeera kwonna, mulyoke musobole okutegeerera ddala Katonda bw’ali.

Agulumizibwenga mu Kkanisa!!

ENKOMERERO