Mu Ye

Ekintu eky’okubiri kye tugenda ‘okuggya ku mmeeza’ y’ebigambo nti “Mu Ye”, ebiri mu ssuula eya 2 n’eya 3 yonna. Ka tusooke kulowooza ku lugero olwa mu Ndagaano Enkadde olw’eryato lya Nuuwa (Lub 7). Katonda alaba ebibi ebiri mu nsi era amaliridde okuzikiriza abantu bonna okuggyako omuntu omu eyalaba ekisa mu maaso ge. Nuuwa alagirwa okuzimba eryato eddene, Katonda mw’anaateeka bonna b’anaawonya okuva mu kuzikirira kw’amataba amanene. Nuuwa agondera etteeka lino, wadde nga teyali ategedde ky’amataba, era nga talina yamuyamba mu maka ge wadde baliraanwa be.

Ateekwa okuba nga yalabika ng’ekintu eky’ekyewuunyo gye bali bonna! Oluvannyuma lw’emyaka mingi egy’okukola, olunaku lutuuka eryato bwe limala okuzimbibwa, Katonda n’aba yeeteeseteese okutuukiriza omusango gwe. Nuuwa, ne mukyala we, awamu ne batabani baabwe ne bakazi baabwe, balagirwa okuyingira mu ryato, nga batwala ebisolo bibiribiri byonna ebyali mu nsi gye baamanya. Awo, Katonda n’aggalawo oluggi, enkuba n’etandika okutonnya.

Lowooza ku kino: okulokolebwa kwa Nuuwa kwali kwesigamye ku kuyingira kwe mu ryato. Tewaali kuwona singa yasigala ebweru, ng’asanyukira omulimu gwe!

Nga tukozesa olugero luno ng’ekifaananyi, tewali kulokolebwa eri muntu yenna wabula ng’ayingidde mu nteekateeka ya Katonda ey’ekkubo ery’okuwona – omuntu Kristo Yesu. Wajja ekiseera lwe tuteekwa okuyingira mu Ye olw’okukkiriza – okukkiriza okulokola – kubanga omusango gujja kutuuka ddala ku abo bonna abagezaako okunoonya ekkubo eddala okusanyusa Katonda. Yesu yagamba nti, “Nze kkubo… Tewali n’omu ajja eri Kitange wabula ng’ayita mu Nze.” (Yokaana 14:6) Kaakati, Katonda bw’atutunuulira, atulaba nga tuli “mu Mwana we”. Tuyinza okusanyuka nnyo kubanga takyalowooza ku buzaaliranwa bwaffe obw’ekibi, kubanga ‘Omwana ayingira mu maaso ge’. Omusango gwaffe n’ensonyi byaffe bizingiddwa mu Ye. Omwana w’Omuntu yayiwa omusaayi gwe ogw’omuwendo ogw’obulamu okubikka ku bibi byaffe, alyoke akole ejjinja ery’omuwendo omungi ennyo (Matayo 13:46). Ffe tetwasasulira kantu; naye Ye yasasula byonna.

Ntegeera nti, mu nnaku za Bayibuli, amayinja ag’omuwendo gaali matono nnyo, era ag’ekitiibwa ennyo gaakozesebwanga ng’ekyokwewunda ekikulu ku kabaka w’Abaruumi. Bwe kityo, ‘ejjinja ery’omuwendo omungi ennyo’ kaakati lizigulwa Omwoyo Omutukuvu okufuuka ekyokwewunda kya Kabaka wa bakabaka bw’alidda okutwala omugole we, ekintu kye yeeguliddeko, gy’ali.

Bwe kityo mu Abaefeso 1 & 2 omutume Pawulo atubuulira ku bimu ku birabo ebikulu bye tulina olw’okuba nga tuli “mu Ye”. Abaefeso 1:3 kiraga nti Katonda atuwadde buli mukisa gwonna ogw’omwoyo mu bifo eby’omu ggulu mu Ye. Emikisa egyo giri ‘mu bifo eby’omu ggulu’, naye eky’ennaku, bangi ku ffe tubeera ebweru w’ensi eyo! Gyaffe gyokka nga tubeera mu Ye. Kisoboka okuba “mu Kristo” naye nga tobeera mu Ye. Bangi ku ffe tudda emabega n’omu maaso wakati w’okubeera n’obulamu “mu Kristo” n’okubeera “mu nsi”. Emirundi mingi, Yesu yayogera n’abagoberezi be ebigambo bino nti, “Bwe mubeera mu Nze…” Kino kiri ng’okuba n’ensimbi nnyingi ennyo eziteekeddwa mu bbanka yaffe naye nga tetuzikozesa, nga tubeera ng’omwavu!

Ka tulowooze ku bimu ku mikisa gino: Abaefeso 1:4: Mu Ye twalondebwa tulyoke tubeere abatukuvu era abataliiko kya kunenyezebwa mu maaso ge.

Kino kituwa omukisa okusemberera Katonda. Tetwalondebwa lwa birungi bye twakola ffe, wabula okulondebwa kwaffe kuli ‘mu Ye’. Tewali kulokolebwa ebweru we. Ekigendererwa kye eky’okuba n’abantu “mu Kristo” kwe kuba nti tubeere abantu abaayawulibwa, ab’enjawulo eri ensi etwetoolodde era abajulizi gy’eri.

Abaefeso 1:5: Mu kwagala, twateekerwateekerwa okufuuka ‘abaana’ – abasika awamu ne Yesu ku bugagga bwa Kitaffe. Ayagala okutufuula nga Ye yennyini tulyoke tubeere ‘eby’okutendereza ekitiibwa kye.’ Mu buwangwa bw’Abayudaaya, waaliwo enkola nnene ey’okuyisa omuntu okuba omwana, naye ng’amaze okuyisibwa, omwana oyo yalina eddembe n’ebirabo byonna eby’omwana ow’omusaayi. Ka twogere n’okusingawo! Kitaawe yasobolanga bulijjo okwegaana omwana we ow’omusaayi, n’okutuusa okumutta, naye teyasobolanga kwegaana wadde okuleka omwana gwe yayisa!

Njagala ekigambo ekyo! Nsanyuka nti, wadde nga ndi mwonoonyi, nnokoleddwa lwa kisa; nfunye omukisa okuba omuweereza we, nga nsanyukira okumuweereza; naye okusinga emikisa gyonna, nsanyuka nnyo okuba omwana we alina omukisa okusemberera Kitange! Asaanira obulamu bwaffe.

Ky’obeererawo kisaanira Kristo okukifiirira? Enjigiriza ey’ekyensi egamba nti omuntu abeerawo olw’okugasa omuntu; Obukristaayo obw’ekyensi bugamba nti Katonda abeerawo olw’okugasa omuntu; naye Obukristaayo obw’amazima bugamba nti omuntu abeerawo olw’okugasa Katonda! (1 Abakkolinso 8:6) – tulyoke tubeere ‘eby’okutendereza ekitiibwa kye!’

“Omwana gw’Endiga eyattibwa aweebwe empeera ey’okubonaabona kwe” – lukoyo lw’Abamoraviya.

Abaefeso 1:6: Atuwadde ekisa – “mu Ye”, omwagalwa. GRACE – Obugagga bwa Katonda ku Bbeeyi ya Kristo (God’s Riches At Christ’s Expense)!

Abaefeso 1:7: Mu Ye tulina okununulibwa – twagulibwa okuva mu buddu; okusonyiyibwa kutuukiridde era kwa buwa. Kino kiri olw’ekisa kye kye yatuyiwako mu bungi.

Abaefeso 1:9-10: Ekyama – ekitegeerekeka kyokka olw’okubikkulirwa – nti ku nkomerero y’ebiseera byonna (dispensations), Katonda alikuŋŋaanya ebintu byonna mu Kristo – ebiri mu ggulu n’ebiri ku nsi. Ebitonde byonna, bamalayika ne bamalayika abaagwa, abanunule n’abatanunulwa, byonna biriba wansi we.

Omuntu obuntu tasobola kufuna kubikkulirwa okufaanana ng’okwo – gy’ali busirusiru. (1 Abakkolinso 2:14) Abaefeso 1:11: Twaweebwa obusika mu Ye. Si lwa kukikola oba ng’empeera! Bwaffe olw’okuba nga tuli ‘mu Ye’ era Katonda ng’asanyukira okutuwa omukisa. Obusika ddembe erivaamu mu nkolagana. Mu mbeera eno, eddembe lya baana ba Katonda kubanga okumanyibwa kwabwe ng’abaana ba Katonda olw’okukkiriza mu Mwana wa Katonda ataggwaawo kunywezebbwa era kuli mu bitabo eby’omu ggulu! Omutume yayogera ku ffe nti: “Abasajja n’abakazi tebasobola kulowooza wadde okuloota ebintu byonna Katonda bye yategekera abo abamwagala!” (Tozer). Kino kyonna kikolebwa tulyoke tuddemu ‘okutendereza ekitiibwa kye.’ Abaefeso 1:13: Mu Ye twateekebwako ‘envumbo’ eya Mwoyo Omutukuvu ow’Okusuubiza. Nnaakyongera okukyanjula mu Ssuula eya 3.

Ka nziremu okukiddamu: Obugagga buno bwonna bwaffe “mu Kristo” – naye tuteekwa okubwetwalira ffe bennyini!

Bino bituufu bya kuyigiriza kwa Katonda, naye eky’ennaku, eri abakkiriza bangi, si bituufu bye baamanyako. Kiri ng’okuba n’obugagga bungi mu bbanka naye nga tubeera ng’abaavu kubanga tetuggya ku bugagga bwaffe.

Yesu yagamba nti “bwe tubeera mu Ye…” ng’alaga nti kisoboka nnyo obutabeera – obutasanyukira bugagga bwe tulina.

Pawulo asanyusibwa nnyo endowooza eno n’akaaba essaala ye ey’ekitalo ku lwaffe nti tulyoke tumanye (tugezeko) obugagga buno kaakati. Kino kitandika oluyimba olulala olw’okutendereza nga lwogera ku kitiibwa ekigulumizibwa ekya Yesu (olunyiriri 20-23) n’ekifo kyaffe mu Ye.

Okwegatta ne Kristo (okuba ‘mu Ye’) y’ensonga enkulu ennyo eri Pawulo. Tubalibwa okuba nga twafiira ‘mu Ye’ era ne tuzuukirira ‘mu Ye’ (Abaruumi 6:11). Ekyo kibalirwa gye tuli Kitaffe alyoke atulabe ‘mu Ye’ kyokka. Talaba kibi kyaffe, kubanga OMWANA ayingidde mu maaso ge!! Twagattibwa ne Adamu ng’“omukulembeze waffe”, ne tufuuka aboonoonyi olw’ekibi kye eky’obujeemu.

Naye, ‘Adamu’ ow’okubiri yajja okuba omukulembeze w’eggwanga eppya ery’abantu – abo b’anunudde olw’omusaayi gwe gwe yayiwa n’okuzuukira kwe. (Laba Abaruumi 5). Endowooza eno ey’okwegatta ya bulijjo mu ndowooza y’Abayudaaya, ng’eyawukana ku bwetwaze bwaffe.

Essuula 1:20-23: Katonda agulumizza Yesu okusukka ennyo obufuzi n’obuyinza bwonna – gano ge mannya ga bamalayika abamanyiddwa, abalungi n’ababi. Ali waggulu waabwe bonna era tayinza kuwangulwa baabwe. Baawangulirwa ku musaalaba emyaka enkumi bbiri emabega, bwe yabaswaza mu lwatu.

Abakkolosaayi 2:15.

Essuula 2:1-6: Bwe mbeera mu Ye, nange ntuuzibwa waggulu w’obufuzi n’obuyinza. Tebisobola kunnuma okuggyako nga nzikiriza okwekuuma kwange okuseerera, engabo yange okugwa, n’obusaale bw’omubi okuyingira mu kwekuuma kwange okunafu. Twali baafu nga tutambulira mu bintu by’ensi eno. Naye Katonda, omugagga mu kusaasira n’okwagala, atuzuukizza n’atutuuza mu bifo eby’omu ggulu mu Kristo Yesu! Kaakati!