Okusiigibwa Amafuta mu Linnya lya Mukama

“Waliwo omulwadde mu mmwe? Kirungi atumye abakulembeze b’Ekkanisa, bamusabire, era bamusiige amafuta mu linnya lya Mukama” (Yakobo 5:14).

Bamusiige amafuta mu linnya lya Mukama.” Ebigambo bino bireeseewo empaka. Abamu bagezezzaako okubiggyamu amakulu nti, wala nnyo okuba nga yalagira kweyambisa kusaba kw’okukkiriza kwokka awatali kukozesa ddagala, Yakobo Omutukuvu, okwawukana ku ekyo, yayogera ku kusiiga amafuta ng’eddagala ery’okukozesebwa, era nti okusiiga mu linnya lya Mukama tekyalina makulu malala wabula okusiiga omulwadde amafuta. Naye okuva ekiragiro kino bwe kikwata ku ngeri zonna ez’endwadde, kino kyandibadde kuwa mafuta maanyi ga kyamagero agawonya endwadde zonna. Ka tulabe Ebyawandiikibwa bye bitugamba ku kusiiga amafuta, n’amakulu ge biwa ebigambo bino ebibiri.

Bannansi b’ebuvanjuba baalina empisa ey’okwesiiga amafuta nga bavudde mu kunaaba; kyabawummuzanga nnyo mu nsi ey’ebbugumu. Tulaba era nti bonna abaayitibwanga okukola omulimu ogw’enjawulo ogwa Katonda baalina okufukibwako amafuta, ng’akabonero k’okwawulibwa kwabwe eri Katonda, n’ak’ekisa kye baali ab’okufuna okuva gy’ali okutuukiriza omulimu gwe yabayitira. Bwe kityo amafuta agaakozesebwanga okufukibwa ku bakabona ne ku weema ya Katonda gaatwalibwanga nga “matukuvu nnyo” (Okuva 30:22—32), era buli Bayibuli w’eyogerera ku kusiiga amafuta, kiba kabonero ka butukuvu n’okwawulibwa eri Katonda. Tewali wonna mu Bayibuli we tusanga bukakafu nti amafuta gaakozesebwanga ng’eddagala.

Mu butuufu omulundi gumu okusiiga amafuta kwogerwako nga kukwatagana n’obulwadde, naye awo kirabika lwatu nti kwali kukolebwa ng’omukolo gw’eddiini so si ng’eddagala. Mu Makko 6:13 tusoma nti ekkumi n’ababiri “bagoba baddayimooni bangi ku bantu, ne basiiga abalwadde amafuta ne babawonya.” Wano okuwonya abalwadde kutambulira wamu n’okugoba dayimooni: byombi biva mu maanyi ag’ekyamagero. Ogwo gwe gwali omulimu Yesu gwe yalagira abayigirizwa be bwe yabatuma babiri babiri: “abawa obuyinza okugobanga baddayimooni, n’okuwonyanga buli ndwadde n’okukozimba ebya buli ngeri” (Matayo 10:1). Bwe kityo gaali maanyi ge gamu agaabasobozesanga okugoba dayimooni oba okuwonya abalwadde.

Naye ka tufube okuzuula okusiiga amafuta okwakolebwanga ekkumi n’ababiri kye kwali kulaga. Mu Ndagaano Enkadde, amafuta gaali kabonero ka kirabo ky’Omwoyo Omutukuvu: “Omwoyo wa Mukama Katonda ali ku nze, kubanga Mukama anfuseeko amafuta,” n’ebirala (Isaaya 61:1). Mu Ndagaano Empya kyogerwa ku Mukama Yesu nti: “Yesu Omunnazaaleesi nga Katonda bwe yamufukako amafuta ne Mwoyo Mutukuvu n’amaanyi” (Ebikolwa by’Abatume 10:38), ate ku bakkiriza kyogerwa nti: “mmwe mwafukibwako amafuta [okufukibwako amafuta, R.V.] okuva eri Omutukuvu” (1 Yokaana 2:20). Oluusi omuntu awulira nga yeetaaga akabonero akalabika, akakwata ku biwulizi bye, akayinza okumuyamba okunyweza okukkiriza kwe, era n’okumusobozesa okutegeera amakulu ag’omwoyo.

Noolwekyo okusiiga amafuta kulina okulaga omulwadde ekikolwa ky’Omwoyo Omutukuvu, oyo awa okuwonyezebwa.

Kale twetaaga okusiigibwa amafuta wamu n’okusaba kw’okukkiriza? Ekigambo kya Katonda kye kukulagira, era okusobola okugoberera okuyigiriza kwakyo, abasinga obungi ku abo abasaba okuwonyezebwa basiigibwa amafuta; si lwa kuba nti bakulowooza okuba ekyetaagisa ekitayinza kulekebwa, wabula okulaga nti beetegefu okugondera Ekigambo kya Katonda mu byonna. Mu kisuubizo ekisembayo Mukama Yesu kye yawa, alagira okussa emikono ku balwadde, so si kusiiga mafuta, okuwerekera okugabibwa kw’amaanyi agawonya (Makko 16:18). Pawulo bwe yakomola Timoseewo, era bwe yeetikka obweyamo obw’enjawulo, kyali kukakasa nti teyalina kye yawakanya mu kukwata ebiragiro by’Endagaano Enkadde, kasita eddembe ly’Enjiri teryafiirwa olw’ekyo. Mu ngeri y’emu, Yakobo, omukulu w’Ekkanisa y’e Yerusaalemi, eyali omwesigwa mu kukuuma, nga bwe kisoboka, ebiragiro bya bajjajjaabe, yeeyongera okukuuma enkola y’Omwoyo Omutukuvu. Naffe tulina okukitwala, si ng’eddagala, wabula ng’omusingo gw’amaanyi amangi ag’Omwoyo Omutukuvu, ng’ekkubo ery’okunyweza okukkiriza, ng’ekifo omulwadde w’akwataganira era w’assiza ekimu n’ab’Ekkanisa abayitibwa okumusiiga amafuta.

“Nze Mukama, nze mbawonya endwadde zammwe” (Okuva 15:26).