Yesu Awonya Abalwadde

“era n’awonya n’abalala bonna abaali balwadde. Bwe kityo ekigambo ekyayogerebwa mu nnabbi Isaaya ne kituukirira bwe yagamba nti: ‘Yatuwonya endwadde zaffe, era n’atwala obunafu bwaffe’” (Matayo 8:16, 17).

Mu ssuula emu ey’emabega twayiga ebigambo bya nnabbi Isaaya. Omusomi bw’aba akyalina okubuusabuusa kwonna ku makulu agaaweereddwa ebigambo ebyo, tumujjukiza ekyo Omwoyo Omutukuvu kye yaleetera omuwandiisi w’Enjiri Matayo okuwandiika ku nsonga eyo. Kyogerwa lwatu ku balwadde bonna Yesu be yawonya nti: “Bwe kityo ekigambo ekyayogerebwa mu nnabbi Isaaya ne kituukirira.” Yesu yali asobola, era yali agwanidde, okuwonya endwadde zaffe kubanga yali azeetisse. Singa teyakikola, ekitundu ekimu eky’omulimu gwe ogw’okununula kyandisigadde nga tekirina maanyi era nga tekirina bibala.

Ekyawandiikibwa kino eky’Ekigambo kya Katonda tekitera kutegeerwa bwe kityo. Endowooza abantu abasinga gye bakkiriza eri nti okuwonya okw’ekyamagero Mukama Yesu kwe yakola kulina kutwalibwa ng’obukakafu bw’okusaasira kwe bwokka, oba ng’akabonero k’ebirabo eby’omwoyo. Tekulabibwa ng’ekiva mu kununulibwa awatali kubuusabuusa, wadde nga Bayibuli bw’etyo bw’egamba. Omubiri n’emmeeme byatondebwa okuweerera awamu ng’ekifo Katonda mw’abeera; embeera y’obulwadde mu mubiri, nga bwe kiri ku mmeeme, eva mu kibi, era ekyo Yesu kye yajja okwetikka, okutangirira n’okuwangula.

Mukama Yesu bwe yali ku nsi, teyawonya balwadde mu kitiibwa kye eky’Omwana wa Katonda, wabula ng’Omutabaganya eyali yeetisse obulwadde n’abusitula; era kino kituyamba okutegeera lwaki Yesu yawaayo ebiseera bingi bwe bityo eri omulimu gwe ogw’okuwonya, era lwaki n’abawandiisi b’Enjiri bakyogerako mu bujjuvu bwe butyo. Soma, okugeza, Matayo ky’agamba ku nsonga eyo: “Yesu n’abuna wonna mu Ggaliraaya ng’ayigiriza mu makuŋŋaaniro g’Abayudaaya ng’abuulira Enjiri ey’obwakabaka obw’omu ggulu, era ng’awonya buli ndwadde yonna n’obuyongobevu bwonna mu bantu. Amawulire ag’ebyamagero bye yakolanga ne gatuuka mu Siriya yonna. Ne bamuleetera abayongobevu, n’abalina ebibabonyaabonya, n’ab’ensimbu n’abo abaaliko baddayimooni, abakoozimbye n’ab’endwadde endala ezitali zimu, bonna n’abawonya.” (Matayo 4:23, 24). “Yesu n’agenda ng’ayita mu bibuga byonna eby’omu kitundu ekyo, ne mu byalo ng’ayigiriza mu makuŋŋaaniro gaabwe, era ng’abuulira Enjiri ey’obwakabaka. Era buli we yatuukanga n’awonya abalwadde n’abakoozimbye bonna.” (Matayo 9:35). “Awo Yesu n’ayita abayigirizwa be ekkumi n’ababiri, ne bajja gy’ali n’abawa obuyinza okugobanga baddayimooni, n’okuwonyanga buli ndwadde n’okukozimba ebya buli ngeri.” (10:1). Abayigirizwa ba Yokaana Omubatiza bwe bajja okubuuza Yesu oba nga ye Masiya, alyoke abakakase, yabaddamu nti: “Abazibe b’amaaso balaba, n’abalema batambula. Abagenge balongoosebwa ne bakiggala bawulira, n’abafu bazuukizibwa n’abaavu babuulirwa Enjiri.” (11:5). Oluvannyuma lw’okuwonya omukono ogwali gukaze, n’Abafalisaayo ne bamuziyiza nga banoonya okumuzikiriza, tusoma nti “abantu bangi nnyo ne bamugoberera, n’awonya abaali abalwadde bonna” (12:15). Oluvannyuma, ekibiina bwe kyamugoberera mu kifo ekyesudde, kigambibwa nti: “Yesu bwe yava eyo n’alaba, abantu bangi n’abasaasira n’awonya abalwadde baabwe.” (14:14). Ate mu maaso: “Abantu b’omu kitundu ekyo bwe baamutegeera ne batumya abalwadde bonna ne babamuleetera. Ne bamwegayirira waakiri bakomeko bukomi ku lukugiro lw’ekyambalo kye, era buli eyakomako n’awonyezebwa.” (14:35, 36). Era kyogerwa ku balwadde abaali mu bibiina nti “ne babassa we yali n’abawonya..” Matayo n’ayongerako nti: “Abantu bangi ne beewuunya, nga balaba ababadde batayogera nga boogera, n’ababadde bakoozimbye nga bawonye, n’ababadde abalema nga batambula, n’ababadde abazibe b’amaaso nga balaba. Ne bagulumiza Katonda wa Isirayiri.” (15:30, 31). Era ku nkomerero, bwe yatuuka mu bitundu bya Buyudaaya emitala wa Yoludaani, “Ekibiina kinene ne bamugoberera era n’awonya abalwadde baabwe.” (19:2).

Ka twongere ku byawandiikibwa bino ebingi ebyo ebitunyumiza mu bujjuvu okuwonya Yesu kwe yakola, tulyoke twebuuze: okuwonya kuno kutuwa bukakafu bwokka obw’amaanyi ge mu kiseera kye yamala ku nsi kuno, oba si kye kisingawo — ekiva mu mulimu gwe ogw’okusaasira n’okwagala ekitabuusibwabuusibwa era ekitakoma, okulabisibwa kw’amaanyi ge ag’okununula agalokola emmeeme n’omubiri okuva mu buyinza bw’ekibi? Weewaawo; ekyo ddala kye kyali ekigendererwa kya Katonda. Kale, Yesu bwe yeetikka endwadde zaffe ng’ekitundu ekitayawulwa ku kununulibwa, bwe yawonya abalwadde “ekigambo ekyayogerebwa mu nnabbi Isaaya ne kituukirira,” era omutima gwe ogw’Omulokozi bwe gujjudde bulijjo okusaasira n’okwagala, tusobola okukkiriza awatali kubuusabuusa nti n’okutuusa leero Yesu ayagala okuwonya abalwadde ng’addamu okusaba kw’okukkiriza.