Mukama Akuwonya

“sigenda kubaleetako ndwadde n’emu, ng’ezo ze naleetera Abamisiri, kubanga nze Mukama, nze mbawonya endwadde zammwe” (Okuva 15:26).

Emirundi emeka gye tusomye ebigambo bino, naye nga tetwetantala kubyetwalira, era nga tetusuubira nti Mukama yandibituukirizza gye tuli! Twalaba mu byo nti abantu ba Katonda baali balina okuba nga tebakwatibwa ndwadde ezaaleetebwa ku Bamisiri, naye ne tukkiriza nti ekisuubizo kino kyali kya Ndagaano Enkadde yokka, era nti ffe abali mu nteekateeka y’Endagaano Empya tetusobola kusuubira kukuumibwa oba kuwonyezebwa ndwadde nga Mukama ayingidde butereevu! Kyokka, olw’okuba twali tuwalirizibwa okukkiriza nti Endagaano Empya esinga, twatuuka, mu butamanya bwaffe, ku kugamba nti obulwadde butera okuleeta emikisa eminene, era nti n’olwekyo Katonda yakola bulungi okuggyawo ekyo kye yali yasuubiza edda, n’obutaba nate gye tuli nga bwe yali eri Isirayiri, “Mukama Akuwonya.”

Naye mu biseera byaffe tulaba Ekkanisa ng’ezuukuka era ng’ekkiriza ensobi yaayo. Erabye nti wansi w’Endagaano Empya Mukama Yesu mwe yawa abayigirizwa be obuyinza bwe obw’okuwonya. Etandise okulaba nti bwe yalagira Ekkanisa ye okubuulira Enjiri eri buli kitonde, yasuubiza okubeera nayo “bulijjo n’okutuukira ddala ensi lw’eriggwaawo” (Matayo 28:20), era ng’akabonero k’okubeerawo kwe, abayigirizwa be bandibadde n’obuyinza okussa emikono ku balwadde, ne bawona (Makko 16:15-18). Ate era erabye nti mu nnaku ezaddirira Pentekooti, okufukibwa okw’ekyamagero okw’Omwoyo Omutukuvu kwagenda wamu n’okuwonya okw’ebyamagero, okwali obukakafu obweyoleka obw’emikisa egyaleetebwa amaanyi agava waggulu (Ebikolwa by’Abatume 3:16; 5:12; 9:40). Tewali kintu mu Bayibuli ekiyinza okugikkirizisa nti ekisuubizo ekyaweebwa Isirayiri kyaggibwawo oluvannyuma, era ewulira okuva mu kamwa k’Omutume Yakobo ekisuubizo kino ekipya: “okusaba kwabwe nga kuweereddwayo n’okukkiriza, kugenda kumuwonya [oba kumulokola]” (Yakobo 5:15). Emanyi nti mu biseera byonna obutakkiriza bwe bwakugira (oba bwe bwateekera ensalo) Omutukuvu wa Isirayiri (Zabbuli 78:41), era yeebuuza obanga si butakkiriza obulemesa mu biseera bino okweyoleka kuno okw’amaanyi ga Katonda. Ani ayinza okukibuusabuusa? Si Katonda oba Ekigambo kye abalina omusango wano; bwe butakkiriza bwaffe obulemesa amaanyi ga Mukama ag’ebyamagero, era obumuziyiza okuwonya nga mu biseera eby’edda. Okukkiriza kwaffe kuzuukuke, kutegeere era kusinze mu Kristo obuyinza bwonna obw’oyo agamba nti, “nze Mukama, nze mbawonya endwadde zammwe.” Mu bikolwa bya Katonda mwe tusinga okutegeerera ekyo Ekigambo kye kye kitugamba; okuwonya okuddamu okubaawo ng’okuddibwamu kw’okusaba kw’okukkiriza kukakasa, nga kukyoleka mu kitiibwa, amazima g’ekisuubizo kye.

Tuyige okulaba mu Yesu eyazuukira Omuwonya ow’obwakatonda, era tumwanirize bw’atyo. Nsobole okutegeera nti Yesu kwe kuweebwa obutuukirivu kwange, amaanyi gange n’amagezi gange, nnina okukwata mu kukkiriza nti ddala ye byonna ebyo gye ndi; era mu ngeri y’emu Bayibuli bw’embuulira nti Yesu ye Muwonya asinga byonna, nnina nze kennyini okwetwalira amazima gano, ne ŋŋamba nti, “Ye, Mukama, ggwe Muwonya wange.” Era lwaki nsobola okumutwala bw’atyo? Kubanga yeewa gye ndi, nti “twasimbibwa wamu naye” (Abaruumi 6:5, enkyusa y’Olufalansa), era nti, bwe neegatta naye mu ngeri etayawukana, bwe ntyo nfuna amaanyi ge ag’okuwonya; kubanga okwagala kwe kusanyukira okutikka abaagalwa be ebirabo bye, okwewaayo n’omutima gwe gwonna eri bonna abaagala okumwaniriza. Tukkirize nti mwetegefu okugaba eky’obugagga eky’emikisa ekiri mu linnya lino, “Mukama Akuwonya,” eri bonna abamanyi era abasobola okwesiga erinnya lino ery’obwakatonda. Eno ye nzijanjaba y’abalwadde etegeezebwa etteeka ly’obwakabaka bwe. Bwe ndeeta obulwadde bwange eri Mukama, sesigama ku bye ndaba, ku bye mpulira oba ku bye ndowooza, wabula ku by’ayogera. Ne bwe kiba nti buli kimu kirabika nga kikontana n’okuwonyezebwa kwe nsuubira, ne bwe kitandibaddewo mu kiseera oba mu ngeri gye nnali ndowooza nti nkufuna, ne bwe kiba nti obubonero bw’obulwadde bulabika ng’obweyongedde amaanyi, okukkiriza kwange, okunywezeddwa okulindirira okwo kwennyini, kulina okunywerera awatali kunyeenya ku kigambo kino ekyava mu kamwa ka Katonda, nti “nze Mukama, nze mbawonya endwadde zammwe.” Katonda bulijjo anoonya okutufuula abakkiriza aba ddala. Okuwonyezebwa n’obulamu obulungi tebigasa nnyo bwe biba nga tebigulumiza Katonda, era nga tebituyamba kwegatta naye kusingawo; n’olwekyo ku nsonga y’okuwonyezebwa okukkiriza kwaffe kulina bulijjo okugezesebwa. Oyo yenna eyeesiga erinnya lya Katonda we, ayinza okuwulira Yesu ng’amugamba nti, “Saakugambye nti bw’onokkiriza onoolaba ekitiibwa kya Katonda?” (Yokaana 11:40), alifuna essanyu ery’okufuna okuva eri Katonda yennyini okuwonyezebwa kw’omubiri, n’okukulaba nga kubaawo mu ngeri esaanira Katonda, era nga kukwatagana n’ebisuubizo bye. Bwe tusoma ebigambo bino, “nze Mukama, nze mbawonya endwadde zammwe,” tuleme kutya kuddamu mu bunyiikivu nti, “Ye, Mukama, ggwe Mukama anwonya.”