Yesu Yeetikka Endwadde Zaffe

“Mazima ddala yeetikka endwadde zaffe, n’atwala ennaku yaffe.... omuweereza wange omutuukirivu alireetera bangi okubalirwa obutuukirivu; era alyetikka obutali butuukirivu bwabwe... . aligabira bangi omunyago kubanga. . . yeetikka ebibi by’abangi” (Isaaya 53:4, 11, 12, R.V.).

Omanyi essuula eno ennungi, ey’amakumi ataano mu ssatu mu Isaaya, eyayitibwa Enjiri ey’okutaano? Mu kitangaala ky’Omwoyo wa Katonda, Isaaya annyonnyola nga bukyali okubonaabona kw’Omwana gw’Endiga owa Katonda, awamu n’ebirabo by’ekisa kya Katonda ebyandivudde mu kubonaabona okwo.

Ekigambo “okwetikka” tekyandisobodde kubulwa mu bunnabbi buno. Mazima ddala, kye kigambo ekiteekwa okugenda awamu n’okwogera ku kibi, oba nga kyakolebwa omwonoonyi yennyini, oba nga kyateekebwa ku mulala amusigire mu kifo. Omusobya, kabona, n’ekiweebwayo ekitangirira, bonna bateekwa okwetikka ekibi. Mu ngeri y’emu, olw’okuba Omwana gw’Endiga owa Katonda yeetikka ebibi byaffe, Katonda kyeyava amukuba olw’obutali butuukirivu bwaffe ffenna. Ekibi tekyasangibwa mu ye, wabula kyateekebwa ku ye; yakyetikka ku bubwe nga bw’ayagadde. Era olw’okuba yakyetikka — era nti mu kukyetikka n’akikomya — kyava abeera n’obuyinza okutulokola. “Omuweereza wange omutuukirivu alireetera bangi okubalirwa obutuukirivu; era alyetikka obutali butuukirivu bwabwe. . . aligabira bangi omunyago kubanga . . . yeetikka ebibi by’abangi” (Isaaya 53:11, 12). N’olwekyo, olw’okuba ebibi byaffe byetikkibwa Yesu Kristo, tubisumululwako amangu ddala nga tukkirizza amazima gano; bwe kityo tetukyetaaga kubyetikka ffe ffennyini.

Mu ssuula eno yennyini (Isaaya 53) ekigambo “okwetikka” kirabikamu emirundi ebiri, naye nga kikwata ku bintu bibiri ebyawukana. Tekyogerwa kyokka nti Omuweereza wa Mukama omutuukirivu yeetikka ebibi byaffe (olunyiriri 12), naye era nti yeetikka endwadde zaffe (olunyiriri 4, R.V., margin). Bwe kityo okwetikka endwadde zaffe kitundu ekitayawukana ku mulimu gw’Omununuzi, nga bwe kiri okwetikka ebibi byaffe. Wadde ye yennyini teyalina kibi, yeetikka ebibi byaffe, era bw’atyo bwe yakola ne ku ndwadde zaffe. Obuntu bwa Yesu tebwasobola kukwatibwako bulwadde kubanga bwasigala nga butukuvu. Mu bigambo ebyawandiikibwa ku bulamu bwe tetusangamu wonna woogerwako bulwadde. Wadde yagabana ku bunafu bwonna obw’obuntu bwaffe — enjala, ennyonta, okukoowa n’otulo, kubanga ebyo byonna tebiva mu kibi — teyalina kabonero na kamu ak’obulwadde. Olw’okuba teyalina kibi, obulwadde tebwalina buyinza ku ye, era yali asobola okufa okufa okw’obukambwe kwokka, nakwo nga y’akkirizza ku bubwe. Bwe kityo obulwadde, awamu n’ekibi, tetubulaba mu ye wabula ku ye; yabyetikka era n’abisitula ku bubwe nga bw’ayagadde. Mu kubisitula n’okubyetikka, mu ekyo kyennyini yabiwangula, era n’afuna obuyinza okubisumululako abaana be.

Ekibi kyali kirumbye era kyonoonye emmeeme n’omubiri kyenkanyi. Yesu yajja okulokola byombi. Olw’okuba yeetikka obulwadde awamu n’ekibi, asobola okutusumulula ku kimu ne ku kirala, era okusobola okutuukiriza okununulibwa kuno okw’emirundi ebiri, atusuubiramu ekintu kimu kyokka: okukkiriza kwaffe.

Omukkiriza omulwadde bw’ategeera amakulu g’ebigambo bino, “Yesu yeetikka ebibi byange,” tatya kwongerako okugamba nti: “Sikyetaaga kwetikka bibi byange; tebikyali ku nze.” Mu ngeri y’emu, bw’amala okutegeera obulungi n’akkiriza ku lulwe nti Yesu yeetikka endwadde zaffe, tatya kugamba nti: “Sikyetaaga kwetikka bulwadde bwange; Yesu bwe yeetikka ekibi, yeetikka n’obulwadde obuva mu kyo; byombi yabitangirira, era ansumulula ku byombi.”

Nze kennyini nnalaba omukisa amazima gano gwe gaaleetera omukazi omulwadde olunaku lumu. Okumala emyaka musanvu yali kumpi bulijjo agalamidde ku kitanda. Yali alwadde akafuba, ensimbu, n’endwadde endala, era baali bamukakasizza nti tewakyali ssuubi lya kuwona. Baamusitula ne bamuyingiza mu kisenge omugenzi Omwami W. E. Boardman mwe yali akulembera okusinza okw’akawungeezi ka Ssande okw’abalwadde, ne bamugalamiza ku ntebe empanvu ng’abulako katono okuzirika. Yali tamanyi bulungi ebiriwo, ne kiba nti teyajjukira kintu kyonna ku ebyo ebyaliwo okutuusa lwe yawulira ebigambo, “Ye yennyini yatwala obunafu bwaffe, ne yeetikka endwadde zaffe” (Matayo 8:17), awo n’alowooza ng’awulira ebigambo, “Obanga yeetikka endwadde zo, kale lwaki ozeetikka ggwe kennyini? Golokoka.” Naye n’alowooza nti — bwe nnaagezaako okugolokoka ne ngwa wansi, banandowoozezza ki? Naye eddoboozi ery’omunda ne litandika nate: “Obanga yeetikka ebibi byange, lwaki nze nnina okubyetikka?” Bonna abaaliwo ne beewuunya bwe yagolokoka, era wadde yali akyali munafu, n’atuula ku ntebe okumpi n’emmeeza. Okuva olwo okuwona kwe ne kweyongera mangu. Wiiki ntono bwe zaayitawo, yali takyalabika ng’omulwadde, era oluvannyuma amaanyi ge ne gaba mangi n’asobola okumala essaawa nnyingi buli lunaku ng’alambula abaavu. Nga yali asobola okwogera n’essanyu n’okwagala ku oyo eyali “amaanyi ag’obulamu bwe” (Zabbuli 27:1)! Yali akkirizza nti Yesu yeetikka endwadde ze awamu n’ebibi bye, era okukkiriza kwe tekwaswazibwa. Bw’atyo Yesu bwe yeebikkula ng’Omulokozi atuukiridde eri bonna abeewaayo gy’ali awatali kwekuumirako kantu.