Omwoyo Omutukuvu, Omwoyo w’Okuwonya

1 Abakkolinso 12:4, 9, 11 Kiki ekyawula abaana ba Katonda? Kitiibwa ki kye balina? Kwe kuba nti Katonda abeera wakati mu bo era yeebikkulira gye bali mu maanyi (Okuva 33:16; 34:9, 10). Wansi w’Endagaano Empya, okubeera kuno kwa Katonda mu mukkiriza kweyoleka nnyo okusinga mu biseera eby’edda. Katonda aweereza Omwoyo Omutukuvu eri Ekkanisa ye, nga ye Mubiri gwa Kristo, akolere mu yo n’amaanyi, era obulamu bwayo n’okukulaakulana kwayo byesigamye ku ye. Omwoyo ateekwa okusanga mu yo eddembe ejjuvu eritaliiko kye limukugira, Ekkanisa eryoke etegeerebwe ng’Ekkanisa ya Kristo, Omubiri gwa Mukama. Mu buli mulembe Ekkanisa esobola okusuubira okweyoleka kw’Omwoyo, kubanga kwe kukola obumu bwaffe obutayinza kwawulwamu; “Omubiri nga bwe guli ogumu, n’Omwoyo omu” (Abaefeso 4:4).

Omwoyo akola mu ngeri ez’enjawulo mu kitundu kino oba kiri eky’Ekkanisa. Kisoboka omuntu okujjuzibwa Omwoyo olw’omulimu ogumu ogw’enjawulo so si olw’omulala. Era waliwo ebiseera mu byafaayo by’Ekkanisa ebirabo ebimu eby’Omwoyo lwe biweebwa n’amaanyi, ate mu kiseera kye kimu obutamanya oba obutakkiriza ne biremesa ebirabo ebirala. Wonna obulamu bw’Omwoyo obusukkiridde we busangibwa, tuyinza okusuubira nti alyolesa ebirabo bye byonna.

Ekirabo eky’okuwonya kye kimu ku ngeri ezisinga obulungi Omwoyo mw’ayolesebwa. Kyawandiikibwa ku Yesu nti: “Yesu Omunnazaaleesi nga Katonda bwe yamufukako amafuta... eyatambula ng’agenda akola ebirungi, ng’awonya abaanyigirizibwanga Setaani” (Ebikolwa by’Abatume 10:38). Omwoyo Omutukuvu mu ye yali Mwoyo awonya, era yali bw’atyo ne mu bayigirizwa oluvannyuma lwa Pentekoote. Bwe kityo ebigambo by’ekyawandiikibwa kyaffe biraga ekyo Ekkanisa eyasooka kye yalabanga obutayosa (geraageranya n’obwegendereza Ebikolwa by’Abatume 3:7; 4:30; 5:12, 15, 16; 6:8; 8:7; 9:41; 14:9, 10; 16:18, 19; 19:12; 28:8, 9). Okufukibwa kw’Omwoyo mu bungi kwaleeta okuwonyezebwa kungi. Nga lino ssomo ddene eri Ekkanisa ey’omu nnaku zaffe!

Okuwonya kwa Katonda gwe mulimu gw’Omwoyo Omutukuvu. Okununula kwa Kristo kutuusa okukola kwakwo okw’amaanyi ne ku mubiri, era Omwoyo Omutukuvu y’avunaanyizibwa okukutuusa mu ffe n’okukukuumira mu ffe. Omubiri gwaffe gugabana ku birungi by’okununulibwa, era ne kaakano gusobola okufuna omusingo gwakwo nga guyita mu kuwonya kwa Katonda. Yesu y’awonya, Yesu y’afuka amafuta era y’abatiza n’Omwoyo Omutukuvu. Yesu, eyabatiza abayigirizwa be n’Omwoyo oyo yennyini, y’oyo atuweereza Omwoyo Omutukuvu wano ku nsi— oba okutukuuma obulwadde ne butatutuukako, oba okutuzzaamu obulamu ng’obulwadde butukutte.

Okuwonya kwa Katonda kutambulira wamu n’okutukuzibwa okuva eri Omwoyo. Omwoyo Omutukuvu atufuula abagabana ku kununula kwa Kristo alyoke atufuule abatukuvu. Kyova ayitibwa erinnya “Omutukuvu.” N’olwekyo okuwonya kw’akola kitundu ekitayawulwa ku mulimu gwe ogw’obwakatonda, era akuwa oba okukulembera omulwadde okukyuka n’okukkiriza (Ebikolwa by’Abatume 4:29, 30; 5:12, 14; 6:7, 8; 8:6—8), oba okunyweza okukkiriza kwe bw’aba nga yakyuka dda. Bw’atyo amuwaliriza okuleka ekibi, n’okwewaayo ddala eri Katonda n’eri obuweereza bwe (1 Abakkolinso 10:31; Yakobo 5:15, 16; Abaebbulaniya 12:10).

Okuwonya kwa Katonda kugenderera okugulumiza Yesu. Katonda ayagala Omwana we agulumizibwe, era Omwoyo Omutukuvu akola kino bw’ajja okutulaga okununula kwa Kristo kye kutukolera. Okununulibwa kw’omubiri ogufa kulabika kumpi nga kwa kitalo okusinga okw’emmeeme etafa. Mu ngeri zino zombi Katonda ayagala okubeera mu ffe ng’ayita mu Kristo, era bw’atyo awangule omubiri. Amangu ddala ng’omubiri gwaffe gufuuse yeekaalu ya Katonda okuyita mu Mwoyo, Yesu agulumizibwa.

Okuwonya kwa Katonda kubaawo wonna Omwoyo wa Katonda w’akolera mu maanyi. Obukakafu bw’ekyo busangibwa mu bulamu bw’abakulembeze b’Enkyukakyuka y’Ekkanisa (Reformers), ne mu bw’Abamoraviya abamu mu biseera byabwe ebisingayo obulungi. Naye waliwo n’ebisuubizo ebirala ebikwata ku kufukibwa kw’Omwoyo Omutukuvu ebitannatuukirira okutuusa kaakano. Tubeerenga mu kulindirira okutukuvu, nga tusaba Mukama abituukirize mu ffe.