Tolowooza ku Mubiri Gwo

Abaruumi 4:19—21 Katonda bwe yasuubiza okuwa Ibulayimu omwana ow’obulenzi, jjajja ono teyandisobodde kukkiriza kisuubizo ekyo singa yatunuulira omubiri gwe ye, ogwali gukaddiye era nga gukooye dda. Naye teyalaba kirala kyonna wabula Katonda n’ekisuubizo kye, amaanyi n’obwesigwa bwa Katonda eyamukakasa nti ekisuubizo kye kirituukirizibwa.

Kino kitusobozesa okutegeera enjawulo yonna eriwo wakati w’okuwonya okusuubirwa okuva mu ddagala ery’ensi n’okuwonya okunoonyezebwa okuva eri Katonda yekka. Bwe tweyambisa eddagala okuwona, omulwadde assa omwoyo gwe gwonna ku mubiri, ng’alowooza ku mubiri, so ng’ate okuwonya kwa Katonda kutuyita okuggya amaaso gaffe ku mubiri, ne twewaayo ddala, emmeeme n’omubiri, eri Mukama atulabirire, nga tufaayo ku ye yekka.

Amazima gano era gatusobozesa okulaba enjawulo eriwo wakati w’obulwadde obusigazibwawo olw’omukisa n’okuwonya okufunibwa okuva eri Mukama. Abamu batya okutwala ekisuubizo ekiri mu Yakobo 5 nga bwe kyogera ddala, kubanga bagamba nti obulwadde bugasa emmeeme okusinga obulamu obulungi. Kya mazima nti mu kuwonya okufunibwa mu ddagala ery’ensi, abantu bangi bandifunye omukisa ogusingawo nga basigala nga balwadde okusinga okuwona, naye kiba kirala ddala okuwonya bwe kujja butereevu okuva mu mukono gwa Katonda. Okusobola okufuna okuwonya kwa Katonda, ekibi kirina okwatulwa n’okulekebwa mu mazima ddala, omuntu alina okwewaayo ddala eri Mukama, alina okwerekera ddala mu mikono gye, era okwagala kwa Yesu okulabirira omubiri kulina okwesigibwa n’obunywevu, ne kiba nti okuwonya kufuuka entandikwa y’obulamu obuggya obw’okussa ekimu ne Mukama ku lusegere.

Bwe tutyo tuyiga okumukwasa ddala okulabirira obulamu bwaffe, era akabonero akatono ennyo akalaga nti obulwadde buddamu tukatwala ng’okulabula obutalowooza ku mubiri gwaffe, wabula okufaayo ku Mukama yekka.

Nga kino kya njawulo nnyo ku balwadde abasinga obungi abanoonya okuwonya mu ddagala! Newaakubadde ng’abatono ku bo obulwadde bwabatukuza, ne bayiga obuteerowoozaako, naye bameka abalala obulwadde bwennyini bwe buleetera okwemalira bulijjo ku bo bennyini ne ku mbeera y’omubiri gwabwe! Nga beegendereza nnyo okwetegereza buli kabonero akatono, akalungi oba akabi! Nga beeraliikirira bulijjo bye balya ne bye banywa, n’okwewala kino oba kiri! Nga beemalira ku ebyo bye balowooza nti abalala babibabanja, oba babafaako ekimala, oba babajjanjaba bulungi ekimala, oba babakyalira emirundi egimala! Obudde bungi nnyo bwe butyo bumalibwa nga balowooza ku mubiri ne bye gwetaaga, mu kifo ky’okulowooza ku Mukama n’enkolagana gy’ayagala okussaawo n’emmeeme zaabwe! Ayi, nga bangi abo abeemalira kumpi ku bo bokka olw’obulwadde!

Bino byonna biba bya njawulo ddala okuwonya bwe kunoonyezebwa mu kukkiriza okuva eri Katonda ow’okwagala. Olwo ekintu ekisooka okuyiga kye kino: Lekera awo okweraliikirira embeera y’omubiri gwo; ogukwasizza Mukama, era akkirizza okuguvunaanyizibwa. Bw’otolaba nkyukakyuka ya mangu mangu ago, wabula obubonero ne bulabika ng’obweyongedde obubi, jjukira nti oyingidde mu kkubo ery’okukkiriza, n’olwekyo tosaanidde kulowooza ku mubiri, wabula weekwate ku Katonda omulamu yekka. Ekiragiro kya Kristo, “Temweraliikiriranga . . . olw’omubiri gwammwe” (Matayo 6:25, R.V.), wano kirabika mu kitangaala ekiggya. Katonda bwe yayita Ibulayimu aleme kulowooza ku mubiri gwe ye, yali amuyita mu kukozesa okukkiriza mu ngeri esingira ddala, alyoke ayige okulaba Katonda yekka n’ekisuubizo kye. Ng’anywezebwa okukkiriza kwe, n’agulumiza Katonda, ng’akakasizza ddala nti Katonda yandikoze kye yasuubiza. Okuwonya kwa Katonda kwe kusiba okw’ekitalo okutusiba ku Mukama. Mu kusooka omuntu ayinza okutya okukkiriza nti Mukama aligolola omukono gwe ogw’amaanyi n’akwata ku mubiri; naye ng’emmeeme esoma Ekigambo kya Katonda, efuna obuvumu n’obwesige. Ku nkomerero omuntu asalawo, ng’agamba nti, Nkwasa omubiri gwange mu mikono gya Katonda, era nkirekera ye okugulabirira. Olwo omubiri n’ebyo bye guwulira tebikyalabibwa, era Mukama n’ekisuubizo kye bye byokka ebirabibwa.

Omusomi omwagalwa, naawe onooyingira mu kkubo lino ery’okukkiriza, erisinga ennyo eryo abantu lye bamanyidde okuyita ery’obutonde? Tambulira mu kisinde kya Ibulayimu. Yiga okuva gy’ali obutalowooza ku mubiri gwo ggwe, n’obutabuusabuusa mu butakkiriza. Okulowooza ku mubiri kuzaala okubuusabuusa, so ng’okwekwata ku kisuubizo kya Katonda n’okufaayo ku ye yekka kuyingiza omuntu mu kkubo ery’okukkiriza, ekkubo ery’okuwonya kwa Katonda, eriweesa Katonda ekitiibwa.