በነፍስ ውስጥ የሃይማኖት መነሣትና ዕድገት
ከእግዚአብሔር ጋር የማያቋርጥ ኅብረት ለመጠበቅ የሚረዱ መመሪያዎች

ምዕራፍ 20 · 18 ደቂቃ ንባብ · 23 ደቂቃ ማዳመጥ

ከእግዚአብሔር ጋር የማያቋርጥ ኅብረት ለመጠበቅ የሚረዱ መመሪያዎች

1. ስለዚህ ጉዳይ ለአንድ ለእግዚአብሔር ያደረ ወዳጅ የተጻፈ ደብዳቤ እዚህ ይቀርባል።—2. የመመሪያዎቹ አጠቃላይ ዕቅድ።—3. ለቀኑ መጀመሪያ።—4. መጀመሪያ ስንነቃ ልባችንን ወደ እግዚአብሔር ማንሣት።—5፣ 10. ራሳችንን ለጠዋቱ የግል አምልኮ መስጠት፤ ስለዚህም የተለየ ምክር ይሰጣል።—11. ለቀኑ ሂደት።—12. በአምልኮ ስለ ጥሞና መመሪያዎች ይሰጣሉ።—13. በሥራ ትጋት።—14. በመዝናኛዎች ብልህነት።—15. መግቦትን መመልከት።—16. ከፈተናዎች መጠበቅ።—17. በመለኮታዊ ርዳታ መደገፍ።—18. ብቻችንን ስንሆን ሐሳባችንን መግዛት።—19. ከሰዎች ጋር ስንሆን ንግግራችንን መምራት።—20. ለቀኑ መዝጊያ።—21. በምሽቱ የግል አምልኮ።—22፣ 23. ራስን ስለ መመርመር በሰፊው የተሰጡ መመሪያዎች።—24. በተገቢ መንፈስ መተኛት።—25. የደብዳቤው መደምደሚያ።—26. የምዕራፉም መደምደሚያ፤ በቀኑ መጨረሻ ሊደረግ ከሚገባው ስለ ሞት የሚደረግ የጥሞና ማሰላሰል ጋር።

1. አንባቢው በጥሞና በማሰብ፣ ራሱን በመመርመርና በመጸለይ ራሱን ለእግዚአብሔር እንደ ሰጠ፣ አሁንም የሚያሳስበው በላዩ ባለው የእግዚአብሔር ስእለት መሠረት እንዴት ሊኖር እንደሚችል መጠየቅ እንደ ሆነ ተስፋ አደርጋለሁ። እንግዲህ በዚህ ረገድ ይበልጥ እንዲረዳው፣ ስለ ክርስቲያናዊ ጠባይና ማንነት አስቀድሜ ከሰጠሁት አጠቃላይ ምስል በተጨማሪ፣ በመጽሐፍ ቅዱስ አነጋገር «በየዕለቱ ከእግዚአብሔር ጋር መሄድ፣ ወይም ቀኑን ሁሉ እግዚአብሔርን በመፍራት መኖር» (ምሳሌ 23:17) ተብሎ ሊጠራ የሚችለውን ያንን ለእግዚአብሔር ያደረ፣ መንፈሳዊና ሰማያዊ ጠባይ ስለ መጠበቅ አንዳንድ ዝርዝር መመሪያዎችን አቀርባለሁ። ስለዚህም የያዝሁትን ሐሳብና ዕቅድ ከብዙ ዓመታት በፊት [በ1727] ያን ጊዜ የቅርብ ወዳጅነት ለነበረኝ፣ እግዚአብሔርን በመፍራቱ ለታወቀ ለአንድ ወጣት ከጻፍሁት ደብዳቤ ይበልጥ በግልጽና በጥራት እንዴት ልገልጠው እንደምችል አላውቅም፤ እርሱም ደብዳቤውን ከተቀበለ ከጥቂት ወራት በኋላ የሚያውቁትን ሁሉ በታላቅ ኀዘን ላይ ጥሎ ሞተ። ቢሆንም መመሪያዎቹን በተግባር ለማዋል የሚበቃ ያህል እንደ ኖረ ተስፋ አደርጋለሁ፤ ይህንንም እያንዳንዱ አንባቢ፣ ለአቅሙና በሕይወቱ ላለበት ሁኔታ በሚገባ እስከሚስማማ ድረስ፣ ደብዳቤው ለራሱ እንደ ተጻፈ አድርጎ እንዲያደርገው እመኛለሁ፤ እጸልያለሁም። አንባቢዬ እነዚህን መመሪያዎች ለአቅሙና በሕይወቱ ላለበት ሁኔታ በሚገባ እስከሚስማሙ ድረስ እንዲፈጽማቸው እመኛለሁ እላለሁ፤ ይህም እንዲታወቅ እፈልጋለሁ፤ የሚከተሉትን ዝርዝሮች ለሁሉ ወይም በዓለም ላለ ለማንኛውም ሰው በሁሉም ጊዜ እንደሚሠሩ አጠቃላይ ሕጎች አድርጌ ለማቅረብ ፈጽሞ አላስብምና። የሚችሉት፣ ጊዜም ሲያገኙ ይፈጽሟቸው፤ ሁሉንም ልትደርስባቸው ባትችል ደግሞ እጅግ አስፈላጊ ወደ ሆኑት በተቻለህ መጠን ቅረብ። በዚህ ጥንቃቄ ወደ ደብዳቤው እሄዳለሁ፤ እንዳይሳሳቱበት ለመጠበቅ ይህን ጥንቃቄ አስቀድሜ ካደረግሁ በኋላ እጅግ ደካማ የሆነውን ክርስቲያን እንኳ ተስፋ እንደማያስቈርጥ ተስፋ አደርጋለሁ። ድካማችንን ሁሉ የሚያውቅ እንዲህ ያለ ቸር አባት፣ የእውነተኛ ግዴታና ፍቅር እጅግ ደካማ ጥረቶችን እንኳ በእግዚአብሔር ዘንድ ተቀባይነት እንዲያገኙ የሚያቀርብልን እንዲህ ያለ ርኅሩኅ ሊቀ ካህናትም ስላለን የቻልነውን በትሕትናና በደስታ እናድርግ፤ ደስም ይበለን!

ውድ ወዳጄ፣

በቅርቡ ስለ ተነጋገርነው ጉዳይ፣ ይኸውም፦ «በዕለት ተዕለት አካሄዳችን በምን ዓይነት ልዩ መንገዶች ለእግዚአብሔር ማደርና ለሌሎች መጥቀም በተሻለ ሁኔታ ሊጠበቁና ሊጸኑ ይችላሉ?» በሚለው ላይ ያለኝን ሐሳብ በጽሑፍና በሰፊው እንድሰጥህ ስለ ፈለግህ፣ ያን ጊዜ የሰጠሁህን ፍንጮች በደስታ አስታውሼ ለማደራጀት ተነሣሁ፤ ይህም እጅግ አስፈላጊ በሆኑት ጥቅሞችህ ጥቂት እንዲጠቅምህ፣ ደግሞም ለሌሎች በማቀርባቸው ሕጎች የገዛ ሕይወቴን የመምራት ግዴታዬን በልቤ ይበልጥ እንዲያጸናልኝ ተስፋ አደርጋለሁ። እንዲህ ያሉትን ሙከራዎች ከወዳጅነት እጅግ ደስ ከሚያሰኙ ፍሬዎችና እጅግ እርግጠኛ ከሆኑ ማጣበቂያዎቹ እንደ አንዱ እቈጥራቸዋለሁ፤ የእኛም ወዳጅነት ለዘላለም እንደሚኖር ተስፋ ስለማደርግ፣ እንዲህ ያሉትን ስሜቶች ለመንከባከብ እርስ በርስ የምናደርገው ጥንቃቄ ለወዳጅነታችን የዘላለም ፍቅር እንደሚጨምርለት እርግጠኛ ነኝ።

2. በዚህ ጊዜ ከእኔ የምትጠብቃቸው መመሪያዎች በተፈጥሮ በሦስት ክፍሎች ይከፈላሉ፤ ይኸውም በቀኑ መጀመሪያ፣ በሂደቱና በመዝጊያው እግዚአብሔርን እንዴት ልናስብ እንደሚገባን ነው። ስለ እያንዳንዳቸው ልቤን በነጻነት እከፍትልሃለሁ፤ እነዚህ ፍንጮች ለሁኔታህ ምን ያህል እንደሚስማሙ እንድትፈርድ እተውልሃለሁ፤ ቢያንስ በጥቃቅን ነገሮች ላይ ካለ አጉል ጥብቅነትና፣ በትንንሽ ነገሮች ቢፈቀድ ወደ በደለኛ ቸልተኝነት፣ በመጨረሻም ይበልጥ ወደ በደለኛ ልቅነት ሊጐትት ከሚችል ስንፍና የተሞላ መላላት፣ በእነዚህ በሁለቱ ጽንፎች መካከል ለመሄድ እጥራለሁ።

3. በቀኑ መጀመሪያ፦ ልክ እንደ ነቃንና ስንነሣም ልባችንን ወደ እግዚአብሔር ለማንሣት፣ ከዚያም በጥሞናና ወዲያውኑ ለጠዋቱ የግል አምልኮ ራሳችንን ለመስጠት በእርግጥ ልንጠነቀቅ ይገባናል።

4. ለመጀመሪያው ነገር ይህ እጅግ ተፈጥሮአዊ ይመስላል። ብዙ ዓይነት ለእግዚአብሔር ያደሩ ሐሳቦችንና አጫጭር ጸሎቶችን ሊያስታውሱን የሚችሉ እጅግ ግልጽ የሆኑ ብዙ ነገሮች ስላሉ ጥሞና ያለው አእምሮ ሊስታቸው አይችልም ብሎ ሰው ያስባል። መጀመሪያ ስንነቃ የአእምሮአችን ዕረፍትና ደስታ፤ ከእንቅልፍ የምናገኘው መታደስ፤ ራሳችንን መከላከል በማንችልበት በዚያ ሁኔታ ያገኘነው ደኅንነት፤ ሞቃትና ጨዋ ልብስ መዘጋጀቱ፤ የተመለሰው ፀሐይ ደስ የሚያሰኝ ብርሃን፤ ወይም ደግሞ (ለአንተ መጥቀሱ የማይገባ አይደለም) ፀሐይ በሌለበት ጊዜ ብዙ ጠቃሚ የሕይወት ሰዓታትን እንዲሰጡን የምቾታችን ሁሉ ታላቅ ምንጭ ያስተማራቸውና ያዘጋጃቸው የጥበብ ፈጠራዎች፤ ወደ ውድ ወዳጆቻችን ኅብረት የመመለስ ተስፋ፤ ሌላ ቀን በእግዚአብሔር አገልግሎትና አእምሮአችንን በማሻሻል የማሳለፍ ተስፋ፤ ከሁሉም በላይ ደግሞ ወደ ዘላለማዊ የደስታና የክብር ቀን በደስታ የመነሣት ሕያው ተስፋ፤ ከእነዚህ ዝርዝሮች ማናቸውም፣ እኔ ያልጠቀስኋቸው ሌሎች ብዙዎችም፣ ስንነሣ ደስ የሚያሰኝ ማሰላሰልንና ደስተኛ ምስጋናን ሊሰጡን ይችላሉ። ይበልጥ ለመረዳትም፣ በዚያ ጊዜ ብቻችንን ስንሆን፣ አንዳንድ ጊዜ ለራሳችን፣ አንዳንድ ጊዜ ደግሞ ለሰማያዊ አባታችን በተፈጥሮአዊ የደስታና የምስጋና አነጋገር መናገር ተገቢ ያልሆነ ላይሆን ይችላል። ወዳጄ፣ ልጨምርልህ ፍቀድልኝ፤ መጀመሪያ ስንነቃ ልባችንን በእንዲህ ያለ ሁኔታ ብናገኘው፣ ያም ራሱ ለምስጋና ተገቢ ምክንያት ነው፤ ምናልባትም ስንተኛ ለጸለይነው ጸሎት መልስ ስለ ሆነ ይበልጥ እንዲሁ ነው።

5. ብዙውን ጊዜ የመጀመሪያ ሥራችን እንደሚሆን ተስፋ የማደርገውን የጠዋቱን የግል አምልኮ በተመለከተ፣ ለሌላ ሰው ትክክለኛ ሥርዓት ልደነግግ አልችልም። ውድ ወዳጄ፣ በተወሰነ መጠን የገዛ ምርጫህን ማማከር አለብህ። የዚህ አገልግሎት ክፍሎች በአጠቃላይ ግልጽ ናቸው። በብልሃት ከተመሩ አብዛኞቹ ሰዎች ሊያገኙት ይችላሉ ብዬ የማስበው ግማሽ ወይም ሦስት አራተኛ ሰዓት ላላቸው አንድ ልዩ ምሳሌ ባቀርብ፣ ይህ ይሆን ነበር፦

6. የቀኑን የተወሰነ አምልኮ በጉልበታችን ተንበርክከን፣ ብዙውን ጊዜ ዝቅ ባለ ነገር ግን ግልጽ በሆነ ድምፅ ለእግዚአብሔር በምናቀርበው የክብር ምስጋና መጀመር፤ ስንነሣ ያሰላሰልናቸውን ምሕረቶች እየተቀበልን፣ ክርስቶስ የደስታችንና የተስፋችን ሁሉ ታላቅ መሠረት መሆኑን መጥቀስ ፈጽሞ ሳንረሳ፣ ልባችንን ወደ እግዚአብሔር ስለ መሩት ወይም አሁን እርሱን እንድንፈልግ ስለሚያነሣሡን ስለ ቡሩኩ መንፈስ አሠራር ማመስገንንም ሳንረሳ። ይህም፣ ከዚህ በኋላ እንደሚጠቀሱት ሌሎች የአምልኮ ተግባራት ሁሉ፣ በትኩረትና በቅንነት መደረግ አለበት፤ ምስጋናችንን ከልብ አለማቅረብ በእግዚአብሔር ፊት ፈጽሞ አለማመስገን ነውና። ይህ የምስጋና ጸሎት ራሳችንን ለእግዚአብሔር መቀደሳችንን በግልጽ በማደስ፣ ለእርሱ ተለይተን ለመኖር፣ በተለይም በሚመጣው ቀን ለክብሩ ለመኖር ያለንን የቀጠለና የተደጋገመ ቍርጥ ውሳኔ በማወጅ በተገቢ ሁኔታ ሊደመደም ይችላል።

7. ከዚህ በኋላ፣ በአጠቃላይ ቀኑ የትና እንዴት ሊያልፍ እንደሚችል አስቀድመን እስከምንገምተው ድረስ፣ ከፊታችን ያለውን ቀን መመልከትና እንዲህ ብሎ በጥሞና ማሰብ ተገቢ ሊሆን ይችላል፦ «ዛሬ ለእግዚአብሔር እንዴት ልሥራ? ምን ሥራ መሠራት አለበት? በምን ቅደም ተከተልስ? መልካም ለማድረግ ወይም መልካም ለመቀበል ምን ዕድሎችን ልጠብቅ እችላለሁ? ሊያጋጥሙኝ በሚችሉ በማናቸውም ስፍራ፣ ሰዎች ወይም ሁኔታዎች ምን ዓይነት ፈተናዎች ሊያጠቁኝ ይችላሉ? በቅርቡ በምን ነገር ወደቅሁ? አሁንስ እንዴት ብሆን ይበልጥ ደኅና እሆናለሁ?»

8. ከዚህ ቅኝት በኋላ፣ እግዚአብሔር አስቀድመን ለገመትናቸው ለእነዚህ ግዴታዎች እያንዳንዳቸው እንዲያነቃቃን፣ ከፈራናቸው ከእነዚህ አደጋዎች እያንዳንዳቸው እንዲያጸናን፣ ለክብሩ በምንጀምረው በዚህ ወይም በዚያ ሥራ ስኬትን እንዲሰጠን፣ ደግሞም ያልጠበቅናቸውን ዕድሎች እንድናገኝና እንድንጠቀምባቸው፣ ያልጠበቅናቸውን ፈተናዎች እንድንቋቋም፣ በምንገባበትም ቀን ድንገት ሊደርሱብን የሚችሉ መከራዎችን በትዕግሥትና በሃይማኖታዊ መንፈስ እንድንሸከም እንዲረዳን በመለመን አጭር ጸሎት ማቅረብ ተገቢ ይሆናል።

9. ከዚህ በኋላ ከመጽሐፍ ቅዱስ የተወሰነ ክፍል እንድታነብ እመክርሃለሁ፤ ብዙ አይደለም፤ መላውን መጽሐፍ ቅዱስ በቅደም ተከተል ሳይሆን፣ ይልቁንም ከእጅግ ጠቃሚ ክፍሎቹ የተመረጡ ክፍሎችን፣ ምናልባትም አሥር ወይም አሥራ ሁለት ቍጥሮችን አንብብ፤ ስለ ትክክለኛው ትስስር ወይም ሊያጋጥሙ ስለሚችሉ ሌሎች የትችት ጥቃቅን ጉዳዮች ብዙ አትጨነቅ — በሌላ ጊዜ ግን አቅምና ዕድል ሲኖርህ እንድትመረምራቸው እመክርሃለሁ — ይልቁንም ለአምልኮና ለተግባር ብቻ አስባቸው። በዚህ ጊዜ በቀላሉ ወደ ሐሳብህ የሚመጡትን ትምህርቶች ውሰድ፣ ለሕሊናህ ደጋግመህ ንገራቸው፣ ከእነርሱም ጋር ያለውን መለኮታዊ ሥልጣን እያሰብህ በሃይማኖታዊ መንፈስ እንዲጠብቃቸውና በእነርሱ እንዲሠራ ልብህን እዘዘው። የዚህን የመጽሐፍ ቅዱስ ክፍል ፍሬ ነገር መጽሐፍ ቅዱስህን በፊትህ ከፍተህ ብትጸልይበት፣ በትውስታህና በልብህ ላይ ይበልጥ ጠልቆ ሊታተም ይችላል፤ በጸሎትም በሐሳብም በአነጋገርም ብዛትንና ልዩነትን እንድታገኝ ሊቀርጽህ ይችላል።

10. እነዚህን የአምልኮ ጊዜያት በመዝሙር ወይም በዝማሬ መዝጋት ተገቢ ሊሆን ይችላል፤ ከቅዱሳን ገጣሚዎቻችን ለእግዚአብሔር ካደረ ጥንቃቄ የተነሣ ለመቅደሱ አገልግሎት ብቻ ሳይሆን በእንዲህ ያሉ ጊዜያት ለግል ጸሎት ክፍልና ለቤተ ሰብ የሚረዱ እንዲህ ያሉ ብዙ ዓይነት መዝሙሮች ስለ ተዘጋጁልን ከአንተ ጋር ደስ ይለኛል።

11. የቀኑን ሂደት በተመለከተ ወደ አእምሮዬ የመጡት እጅግ ዋና ዋና መመሪያዎች እነዚህ ናቸው፦ በቀኑ አምልኮ በጥሞና እንድንሆን፤ በቀኑ ሥራ፣ ማለትም በዓለማዊ ሙያችን ውስጥ ትጉዎች እንድንሆን፤ በቀኑ መዝናኛዎች ልከኞችና ብልሆች እንድንሆን፤ የቀኑን መግቦቶች በጥንቃቄ እንድንመለከት፤ ከቀኑ ፈተናዎች በጥንቃቄ እንድንጠበቅ፤ ለቀኑ ድንገተኛ ሁኔታዎች ሁሉ የሚስማማ ሕያውና ትሑት በመለኮታዊ ርዳታ መደገፍን እንድንጠብቅ፤ በቀኑ ብቸኝነት ሐሳባችንን፣ በቀኑ ጭውውቶችም ንግግራችንን በሚገባ እንድንገዛ። ወዳጄ፣ እነዚህ በቅርቡ ስሰብክ የሰማኸው የስብከት አርእስቶች ነበሩ፤ አሁን ልመልስለት በምጥረው ጥያቄህም እነርሱን እንደ ጠቀስህ አውቃለሁ። ስለዚህ በእያንዳንዳቸው ሥር የሚወድቁትን እጅግ ዋና ዋና ፍንጮች እጠቅሳለሁ።

12. በሕዝብም ይሁን በቤተ ሰብ አምልኮ በጥሞና ለመሆን፣ ወደ እንዲህ ያሉ የተቀደሱ ተግባራት ከመግባታችን በፊት ጥቂት ደቂቃዎች ቆም ብለን፣ የምንናገረውን የእግዚአብሔርን ፍጽምና፣ ልናደርገው የምንመጣውን ጉዳይ አስፈላጊነት፣ በሥርዓትና እግዚአብሔርን በመፍራት የመገኘትን ደስታና ጥቅም፣ የግብዝነት ልማድንም በደልና ሞኝነት እናስብ። በተግባሩ ውስጥ ስንሆን በገዛ መንፈሳችን ላይ ጥብቅ ጥንቃቄ እናድርግ፤ የሐሳብንም የመጀመሪያ መባዘን እንግታ። ተግባሩም ካለቀ በኋላ ወዲያውኑ እንዴት እንደ ተፈጸመ እናስብ፤ በእርሱም እግዚአብሔር እንደ ተቀበለን ለመደምደም ምክንያት እንዳለን ሕሊናችንን እንጠይቅ። የገዛ ልባችን ወዲያውኑ «እግዚአብሔር ሊቀበለው የማይቻል» እንደ ሆነ የሚነግረን እነዚህን ተግባራት የምናከናውንበት አንድ ዓይነት መንገድ አለና፤ ሳናስተውል በዚያ ውስጥ ወድቀን ከሆነ፣ «ጸሎታችን ራሱ ኃጢአት እንዳይሆን» (መዝሙር 109:7) በእግዚአብሔር ፊት በጥልቅ ልንዋረድ ይገባናል።

13. የዓለማዊ ሥራ ሰዓታትን በተመለከተ፣ የእጅ ሥራም ይሁን በቀጥታ ከሃይማኖት ጉዳዮች ጋር ያልተያያዘ የትምህርት ሕይወት ድካም፣ የእግዚአብሔርን ሥልጣን እያሰብንና ለክብሩም እያሰብን ወደ ሥራው እንግባ። ሥራው ላይ የሚያንጐላጅ፣ የአንድን ሰዓት ሥራ በሁለት ወይም በሦስት ሰዓት የሚሠራ ሕልመኛ፣ ዳተኛና ሰነፍ ጠባይን እናስወግድ። ፈጽሞ ሥራ ፈቶች እንዳልሆኑ እያሰቡ በአንዳንድ ሰዎች ሕይወት ውስጥ የሚታየውን ይህን ጠባይ በመቃወም፣ በአጠቃላይ ያለን ጊዜ ጥቂት ብቻ መሆኑን እያሰብን፣ በጥቂት ጊዜ የቻልነውን ያህል ለመፈጸም እንጣር። ድካማችን እንዲሳካ መለኮታዊ በረከት እንደሚያስፈልገን ሁልጊዜ እንገንዘብ።

14. የመዝናኛ ጊዜያትን በተመለከተ፣ መዝናኛዎቻችን በሚገባ የተመረጡ እንዲሆኑ፣ ለሕይወት ድካም እንደ ገና እንድንበረታ ለማድረግ በመልካም ዓላማ እንዲደረጉ፣ በዚህም የሥራችን ሁሉ ታላቅ ፍጻሜ ለሆነው ለእግዚአብሔር ክብር ተገዥ ሆነው ብቻ እንዲውሉ እንጠንቀቅ። ልባችን በእነርሱ ምክንያት ከእግዚአብሔር እንዳይርቅ፣ ብዙ ጊዜያችንንም እንዳይወስዱ እንጠንቀቅ፤ የሰው ተፈጥሮ ችሎታዎችና የክርስቲያናዊ መገለጥ ጥቅሞች በከንቱ እንዳልተሰጡን፣ ይልቁንም ሁልጊዜ አንድን ታላቅና የተከበረ ዓላማ መከተል እንዳለብን፣ ለመዝናኛዎችና ለጨዋታዎች ራሳችንን የምንሰጠውም የአስተዋይና የጨዋ፣ የበጎ አድራጊና ለእግዚአብሔር ያደረ ኑሮ ዕቅድ አካል እስከሆኑ ድረስ ብቻ እንደ ሆነ ሁልጊዜ እናስብ።

15. መግቦትን ለመመልከት፣ በምቾቶቻችንና በመከራዎቻችን ውስጥ የእግዚአብሔርን ጣልቃ ገብነት ማስተዋል ጠቃሚ ይሆናል። በምቾቶቻችን ውስጥ፣ የተለመዱም ይሁኑ ያልተለመዱ፦ ጤንነታችን እንደ ቀጠለ፣ ለሕይወትና ለደስታ የሚሆን ምግብ እንደ ተሰጠን፣ ጊዜያችንን የምናሳልፍባቸው ብዙ ደስ የሚያሰኙ መንገዶች እንዳሉን፣ ብዙ ወዳጆች፣ ደግሞም እጅግ መልካምና ደስተኞች የሆኑ ወዳጆች እንዳሉን፣ ሥራችን በብልጽግና እንደሚሄድ፣ በደኅና እንደምንወጣና እንደምንገባ፣ ያለ እርሱ ሌላ ምንም ሊያስደስተን የማይችለውን የመንፈስ ጸጥታና ደስታ እንደምናገኝ፦ እነዚህ ሁሉ እንደ መግቦት ስጦታዎች ሊታዩ ይገባቸዋል፤ በእንዲህ ያሉ ደስ የሚያሰኙ ሁኔታዎች ውስጥ ስናልፍም ስለ እነርሱ ለእግዚአብሔር ተገቢው ምስጋና ሊቀርብ ይገባዋል። በሌላ በኩል ደግሞ መግቦት በእያንዳንዱ ተስፋ መቍረጥ፣ በእያንዳንዱ ኪሳራ፣ በእያንዳንዱ ሕመም፣ ወዳጅነት እንዳላቸው ከተናገሩ ሰዎች በሚደርስ በእያንዳንዱ ደግነት የጐደለው ድርጊት ውስጥ ሊታይ ይገባዋል፤ የእግዚአብሔር እጅ በቀጥታ ባይሆንም በተዘዋዋሪ ሁልጊዜ በእያንዳንዳቸው ውስጥ እንዳለ፣ በትክክል የመግቦት ሥራ ባይሆኑ እንኳ ቢያንስ በእርሱ አመራር ሥር እንዳሉ በማሰብ ራሳችንን በትዕግሥት ወደ መገዛት ለማሳመን ልንጥር ይገባናል። ይህ በተለይ (እኛ እንደምንጠራቸው) ስለ እነዚያ ጥቃቅን የሚያበሳጩ አጋጣሚዎችና በቅርብ ወዳጆቻችን ጠባይና አካሄድ ውስጥ ስላሉ፣ ያለበለዚያ ሊያውኩን ስለሚችሉ ድካሞችና ሞኝነቶች ልናደርገው የሚገባ ማሰላሰል ነው። በዚህም ረገድ አእምሮአችንን መጠበቅ ይበልጥ አስፈላጊ ነው፤ ምክንያቱም ጥበበኞችና መልካም ሰዎች፣ ማስተዋልንና ሃይማኖትን ለርዳታቸው በመጥራት የታላላቅ መከራዎችን ድንጋጤ በብርታትና በጽናት የሚቋቋሙት፣ ብዙ ጊዜ በእነዚህ በንጽጽር ጥቃቅን በሆኑ አጋጣሚዎች ራሳቸውን የመግዛት ኃይል ያጣሉ።

16. ከፈተናዎች ለመጠበቅ፣ ስፍራችንን ወይም ሥራችንን ስንለውጥ፦ «በዚህ ምን ወጥመዶች ገጥመውኛል?» ብሎ ማሰብ አስፈላጊ ነው። ይህ የዘወትር ጥንቃቄያችን ሊሆን እንደሚገባው ሁሉ፣ በተለይም በጠዋት አስቀድመን ካየናቸው ወጥመዶች ልንጠበቅ ይገባናል። ጥቃቱ ይመጣል ብለን ወደ ጠበቅንባቸው ሁኔታዎች ስንገባም፣ በተለይ ጉዳዩ እጅግ አስፈላጊ ከሆነ፣ እንዲህ ብለን ልናስብ ይገባናል፦ «አሁን ውጊያው ሊጀመር ነው፤ አሁን እግዚአብሔርና ቡሩካን መላእክት በነፍሴ ውስጥ ምን ያህል ጽናትና ብርታት እንዳለ፣ ፈተናው ሲደርስ መለኮታዊው ሥልጣንና የገዛ ጸሎቶቼና ውሳኔዎቼ ትዝታ በእኔ ዘንድ ምን ያህል ክብደት እንዳላቸው እየተመለከቱ ነው።»

17. በመለኮታዊ ጸጋና ርዳታ መደገፍን በተመለከተ፣ ሁሉን አቀፍ መሆን አለበት፤ ሁልጊዜም ስለሚያስፈልገን ያንን ፍላጎት ፈጽሞ መርሳት የለብንም። መለኮታዊ ርዳታ እንዲሰጠን በትሕትናና በጋለ ልብ በመቃተት የምናሳልፋት አንዲት ቅጽበት በተራ አመክንዮ ብቻ ከምናሳልፋቸው ብዙ ደቂቃዎች ይበልጥ መልካም ልታደርግ ትችላለች፤ የማስተዋል ብርሃን አንድ ዓይነት መለኮታዊ ብርሃን ስለ ሆነ ይህ በእርግጥ ቸል ሊባል ባይገባውም፣ በብርሃናት አባት ላይ እንደምንደገፍ በተገቢ ሁኔታ እያወቅን ልንከተለው ይገባል፤ ያለበለዚያ ራሳችንን እጅግ ጥበበኞች አድርገን በምናስብበት ቦታ «በአሳባችን ከንቱ» ልንሆን እንችላለን (ሮሜ 1:21-22)። ስለዚህ ሁልጊዜ እግዚአብሔርን እንጥራ፤ ለምሳሌ ልንጸልይ ስንል፦ «ጌታ ሆይ፣ ትኩረቴን አጽናው! ቅዱስ ስሜቶቼን አነቃቃ፤ የጸጋንና የልመናንም መንፈስ በእኔ ላይ አፍስስ!» (ዘካርያስ 12:10)፤ መጽሐፍ ቅዱስን ወይም ሌላ መልካም መጽሐፍ ስናነሣ፦ «ከሕግህ ተአምራትን እንዳይ ዓይኖቼን ክፈት! (መዝሙር 119:18) ማስተዋሌን አብራ! ልቤን አሙቀው! መልካም ውሳኔዎቼ ይጽኑ፤ የሕይወቴም አካሄድ ሁሉ በተገቢ ሁኔታ ይመራ!»፤ ወደ ማንኛውም ዓለማዊ ሥራ ስንሄድ፦ «ጌታ ሆይ፣ የእጄን ሥራ አቅናልኝ (መዝሙር 90:17)፤ ለቅን ጥረቶቼም በረከትህን ስጥ!»፤ ወደ ማንኛውም ዓይነት መዝናኛ ስንሄድ፦ «ጌታ ሆይ፣ መዝናኛዎቼን ባርክ! በእነርሱ ውስጥ አልርሳህ፤ ይልቁንም ክብርህን ሁልጊዜ በፊቴ ላድርግ!»፤ ከሰዎች ጋር ስንገናኝ፦ «ጌታ ሆይ፣ መልካም ላድርግ፤ መልካምም ልቀበል! ለሚሰሙት ጸጋን ይሰጥ ዘንድ፥ እንደሚያስፈልግ ለማነጽ የሚጠቅም ማናቸውም በጎ ቃል እንጂ ክፉ ቃል ከአፌ ከቶ አይውጣ!» (ኤፌሶን 4:29)፤ ወደ ችግሮች ስንገባ፦ «ጌታ ሆይ፣ ለማቅናት የምትጠቅመውን ያንን ጥበብ ስጠኝ!» (መክብብ 10:10)፤ «አቤቱ፥ መንገድህን አስተምረኝ፥ በቀና መንገድም ምራኝ!» (መዝሙር 27:11)፤ ከፈተናዎች ጋር ስንጋጠም፦ «ቸር ቤዛ ሆይ፣ ኃይልህ በድካሜ ይፈጸም!» (2ኛ ቆሮንቶስ 12:9)። እነዚህ ምሳሌዎች የዚህን መመሪያ ዓላማ ሊያብራሩ ይችላሉ፤ ምንም እንኳ ሊታሰብባቸው የሚገቡትን ሁኔታዎች ሁሉ የሚዘረዝሩ ከመሆን እጅግ የራቁ ቢሆኑም።

18. ብቻችንን ስንሆን ሐሳባችንን ለመግዛት፦ በሁሉም አጋጣሚ በሐሳባችን ላይ ተገቢ ቍጥጥር እንድናደርግ ራሳችንን እናለማምድ። በእነርሱ ላይ ያለንን ኃይል ከሚያሳጡን የስሜት ጥልፍልፎች ወይም በፊታችን ካለ ማናቸውም ጥቅም ጋር ከሚያጣብቁን ነገሮች እንጠንቀቅ። የሚጠቅም የሐሳብ ርእስ በፊታችን እናድርግ፤ ለምሳሌ የቡሩኩ እግዚአብሔርን ፍጽምና፣ የክርስቶስን ፍቅር፣ የጊዜን ዋጋ፣ የሞትንና የፍርድን እርግጠኝነትና አስፈላጊነት፣ ከዚያም የሚከተለውን የደስታ ወይም የጐስቋላነት ዘላለማዊነት። በእንዲህ ያሉ ክፍት ጊዜያት ደግሞ የሃይማኖትን መሻሻል ወይም ማሽቆልቆል በተመለከተ ስለ ገዛ ነፍሳችን ሁኔታ ያስተዋልነውን፣ ወይም የሰማነውን የመጨረሻ ስብከት ወይም ያነበብነውን የመጨረሻ የመጽሐፍ ቅዱስ ክፍል እናሰላስል። ወዳጄ፣ በዚህ ረገድ በትክክል የማስታውስ ከሆነ በጭውውታችን ያቀረብሁልህን ልታስታውስ ትችላለህ፤ ይኸውም በጠዋት ያገኘነውን አንድ የመጽሐፍ ቅዱስ ቍጥር መርጠን በአእምሮአችን ማስቀመጥ፣ ለእግዚአብሔር ያደረ የማሰላሰያ ርእስ ባጣን ጊዜና ለማሰላሰል በሚያስችል ክፍት ጊዜ ሁሉ ያንን ለማሰብ መወሰን እጅግ ጠቃሚ ሊሆን እንደሚችል ነው። ይህ ብዙ ጊዜ ምናልባት ከዚህ በፊት በዚያ ትስስርና ኃይል ያላየናቸው ብዙ ጠቃሚና ደስ የሚያሰኙ ሐሳቦች የሚፈልቁበት ምንጭ ይሆናል። እንዲህ ባይሆን እንኳ፣ ያለበለዚያ ሊወሩን ለሚችሉ ለእነዚያ ልዩ ልዩ ከንቱ ነገሮች ሐሳባችንን ከመተው፣ በላዩ ላይ በተመሠረተ ለእግዚአብሔር ያደረ አጭር ጸሎት ያንኑ የመጽሐፍ ቅዱስ ክፍል በቀን መቶ ጊዜ በአእምሮአችን መደጋገም እጅግ የተሻለ እንደሚሆን እርግጠኛ ነኝ፤ የእነዚያ ነገሮች ብዛት ለከንቱነታቸው ካሳ ከመሆን እጅግ የራቀ ነውና።

19. በመጨረሻም፣ ከሰዎች ጋር ስንሆን ንግግራችንን ስለ መግዛት። እኛን ወይም ክርስቲያናዊ ምስክርነታችንን ለነቀፋና ለውርደት የሚያጋልጥ ምንም ነገር ከአፋችን እንዳያመልጥ ታላቅ ጥንቃቄ ልናደርግ ይገባናል፤ በሌሉትም ሆነ በተገኙት ላይ ጉዳት የሚያደርስ ምንም ነገር፣ ክፋት ያለበት ምንም ነገር፣ ቅንነት የጐደለው ምንም ነገር፣ በዙሪያችን ያሉትን ሊያበላሽ፣ ሊያስቈጣ ወይም ሊያሳስት የሚችል ምንም ነገር። የምንናገረው ጉዳት የሌለው መሆኑ ብቻ በምንም ዓይነት ሊያረካን አይገባም፤ ለራሳችንና ለሌሎች የሚያንጽ እንዲሆን መሻታችን ሊሆን ይገባል። በዚህ ዓላማ ሁልጊዜ የሚጠቅም የንግግር ርእስ ዝግጁ እንዲሆንልን ልንጥር ይገባናል፤ በዚህም ቀደም ሲል በነበረው ክፍል ስለ ሐሳብ ማከማቻ በተሰጡት ፍንጮች ልንረዳ እንችላለን። ጠቃሚ ሐሳቦችን የምናነሣበትን ተገቢ አጋጣሚ ልንጠባበቅ ይገባናል፤ ለእግዚአብሔር ያደረ ወዳጅ ይህን ለማድረግ ቢሞክርም ወዲያውኑ ልንደግፈው መጣር ይገባናል። ጭውውቱ በቀጥታ ወደ ሃይማኖታዊ ጉዳዮች ባይዞር፣ በሌላ መንገድ የሚያሻሽል እንዲሆን ልንጥር ይገባናል፤ በይበልጥ ስለሚያውቁት ነገር እንዲናገሩ ልንመራቸው አብረውን ያሉትን ሰዎች ጠባይና ችሎታ ልናስብ ይገባናል፤ በእነዚያ ጉዳዮች ላይ የሚናገሩት ለራሳቸው እጅግ ደስ የሚያሰኝ፣ ለእኛም እጅግ ጠቃሚ ሊሆን ይችላልና። በንግግር መካከል በሚኖሩ ዝምታዎችም፣ እርስ በርሳችን መልካም ለማድረግ በምናደርገው ጥረት ጸጋው እኛንና ወዳጆቻችንን እንዲረዳ፣ የምንናገረውና የምናደርገው ሁሉ ለአስተዋይ ፍጡራንና ለክርስቲያኖች ማንነት የሚገባ እንዲሆን ወደ እግዚአብሔር አጭር ቅዱስ ጸሎት ማንሣት ተገቢ ያልሆነ ላይሆን ይችላል።

20. ቀኑን በሃይማኖታዊ መንፈስ ለመዝጋት እዚህ የምጠቅሳቸው መመሪያዎች ሁለት ብቻ ናቸው፦ የምሽቱ የግል ተግባራት በሚገባ እንዲፈጸሙ እንጠንቀቅ፤ ለእግዚአብሔርም ባደረ መንፈስ በአልጋችን ላይ እንተኛ።

21. የምሽቱን የግል አምልኮ በተመለከተ፣ ከጠዋቱ ትንሽ ለየት ያለ ሥርዓት አቀርባለሁ፤ ቢሆንም እንደ ጠዋቱ ሁሉ ያልታሰቡ ለውጦችን ተገቢ ሊያደርጉ ለሚችሉ ሁኔታዎች ተገቢውን ቦታ እሰጣለሁ። በመጀመሪያ ከላይ እንደ ተገለጸው ተገቢ ከሆነ ማሰላሰልና ጸሎት ጋር የመጽሐፍ ቅዱስን ክፍል እንድታነብ እመክርሃለሁ፤ ከዚያም መዝሙር ወይም ዝማሬ ማንበብ፤ ከዚህ በኋላ ራስን ወደ መመርመር መግባት፣ ከዚያም ከንባቡ በኋላ ከተደረገው ጸሎት የሚረዝምና በዚህ የቀኑ ቅኝት ላይ የተመሠረተ ጸሎት መከተል አለበት። በዚህ ወደ ጸጋው ዙፋን በሚቀርብ ጸሎት፣ እግዚአብሔር የቀኑን ጕድለቶችና በደሎች ይቅር እንዲል መለመን፣ ስለ ሥጋዊና መንፈሳዊ ምሕረቶች ማመስገን፣ ለሚመጣው ሌሊት ራሳችንን ለጥበቃው አደራ መስጠት፣ በፊቱ በልባችን ልንሸከማቸው ስለሚገባን ስለ ሌሎች፣ በተለይም ባለፈው ቀን ስለ ተጨዋወትናቸው ወይም ስለ ተጻጻፍናቸው ወዳጆች ተገቢ ልመናዎችን ማቅረብ እጅግ ተገቢ ይሆናል። በጠዋትም በምሽትም ጸሎት እዚህ ያልጠቆምኋቸው ሌሎች ብዙ ጉዳዮች ይኖራሉ፤ ነገር ግን የእነዚህ ነገሮች ሙሉ ዝርዝር በምንም ዓይነት ለአሁኑ ዓላማችን የሚገባ መሆኑን አላሰብሁም።

22. ይህን ክፍል ከመተዌ በፊት ራስን መመርመር እጅግ አስፈላጊ ግዴታ ስለ ሆነ በእርሱ ላይ ጥቂት ቃላት ማሳለፍ ዋጋ እንዳለው ላሳስብህ ነጻነት እወስዳለሁ። ይህም የእርሱ ክፍል እጅግ ቀላል ስለ ሆነ ተገቢ ጥያቄዎች በፊታችን ሲኖሩ ተራ ማስተዋል ያለው ማንኛውም ሰው በመለኮታዊ በረከት በጥቅም ሊያልፍበት ተስፋ ሊያደርግ ይችላል። ስለዚህ የሚከተሉትን ጥያቄዎች አቀርብልሃለሁ፤ አስፈላጊ ናቸው ብለህ በምትፈርዳቸው ለውጦች ለዕለት ተዕለት ጥቅም በአጠገብህ እንደምታስቀምጣቸው ተስፋ አደርጋለሁ። «ዛሬ ጠዋት ከእግዚአብሔር ጋር ሆኜ ነቃሁን? ስለ ቸርነቱም በአመስጋኝ ልብ ተነሣሁን? የጠዋቱ የግል አምልኮ እንዴት ተፈጸመ? የክብር ምስጋናዬን አቀረብሁን? ራሴንም ለእግዚአብሔር መቀደሴን በሚገባ ትኩረትና በተገቢ ስሜት አደስሁን? የቀኑን ሥራ ዕቅድ በጥበብና በሚገባ አወጣሁን? መጽሐፍ ቅዱስን፣ ከዚያም በኋላ እንደ ገና ለማየት የተመቸኝን ሌላ የአምልኮ ወይም የተግባር ጽሑፍ እንዴት አነበብሁ? ልቤን ጠቀመውን ወይስ ተራ መዝናኛ ብቻ ነበር? በቤተ ሰብም ይሁን በሕዝብ መካከል የቀኑ ሌሎች የተወሰኑ የአምልኮ ጊዜያት እንዴት ተፈጸሙ? የቀኑን የተለመደ ሥራ ሁሉን በጊዜው፣ በተቻለ ፍጥነትና ‹ለጌታ› (ቆላስይስ 3:23) እንደማደርግ ሆኜ በትጋትና በመንፈሳዊነት ሠራሁን? ዛሬ በጠዋት ወይም ከቀትር በፊት፣ ከቀትር በኋላ ወይም በምሽት ምን ያህል ጊዜ አባከንሁ?» — እነዚህ ክፍሎች ለማስታወስ ይረዱሃልና — «የዚያስ ጊዜ መባከን ምክንያቱ ምን ነበር? የዛሬ መዝናኛዎች በምን ዓይነት መንፈስና በምን ዓይነት ሥርዓት ተደረጉ? በምሕረቶቼ፣ በጤንነቴ፣ በደስታዬ፣ በምግቤ፣ በልብሴ፣ በመጻሕፍቴ፣ በጉዞ በመጠበቄ፣ በሥራዬ መሳካት፣ በጭውውቴና በወዳጆቼ ደግነት፣ ወዘተ. የእግዚአብሔርን እጅ አየሁን? በመከራዎች ውስጥ፣ በተለይም ሊያበሳጩኝና ሊያውኩኝ በሚችሉ በጥቃቅን ነገሮች ውስጥ አየሁትን? ምቾቶቼን በምስጋና፣ መከራዎቼንም በመገዛት ተቀበልሁን? ከቀኑ ፈተናዎች፣ በተለይም በጠዋት አስቀድሜ ካየሁት ከዚህ ወይም ከዚያ ፈተና እንዴት ተጠበቅሁ? በመለኮታዊ ርዳታ መደገፌን ጠበቅሁን? ‹በእግዚአብሔር ልጅ ላይ ባለ እምነት› (ገላትያ 2:20) ኖርሁን? ዛሬ ክርስቶስን እንደ አስተማሪዬና ገዥዬ፣ እንደ ማስተስረያዬና አማላጄ፣ እንደ ምሳሌዬና ጠባቂዬ፣ እንደ ኃይሌና ቀዳሚዬ አየሁትን? ዛሬ ወደ ሞትና ወደ ዘላለም ተመለከትሁን? ራሴንም ለሰማይ እንደሚፈተን፣ በጸጋም ሰማይን እንደሚጠባበቅ አድርጌ ቈጠርሁን? ሐሳቤን በሚገባ ገዛሁን? በተለይም በዚህ ወይም በዚያ የብቸኝነት ጊዜ? የዛሬው የሐሳቤ ርእስ እንዴት ተመረጠ? እንዴትስ ተያዘ? በዚህና በዚያ ሰዎች መካከል ንግግሬን በሚገባ ገዛሁን? በቍጣ የተናገርሁት፣ ጉዳት የሚያደርስ፣ ስም የሚያጠፋ፣ ብልሃት የጐደለው ወይም አግባብ ያልሆነ ነገር አልተናገርሁምን? ዛሬ ልቤ ለእግዚአብሔርና ለሰው ልጆች ሁሉ ባለ ፍቅር የተሞላ ነበርን? መልካም ለማድረግና መልካም ለማግኘት ዕድሎችን ፈለግሁን? አገኘሁን? ተጠቀምሁባቸውን? ዛሬ ማታ መጽሐፍ ቅዱስን በምን ያህል ትኩረትና ጥቅም አነበብሁ? ትናንት ማታ ራስን መመርመር እንዴት ተፈጸመ? ያን ጊዜ ስለ ቀደሙት ቸልተኝነቶችና ስሕተቶች ባደረግኋቸው አስተያየቶች ዛሬ እንዴት ተጠቀምሁ? ያን ጊዜ በምን መንፈስ ተኛሁ? ራሴንስ ለእንቅልፍ በምን ሁኔታ አዘጋጀሁ?»

22. ወዳጄ፣ እነዚህ ጥያቄዎች በዚህ ደብዳቤ ከሰጠሁት እጅግ ዋና ምክር ማጠቃለያ እንዲሆኑ ተደርገው እንደ ተዘጋጁ በቀላሉ ታያለህ፤ እንደ አንተ ማስተዋል ላለው ሰው የእንዲህ ያሉ ጥያቄዎችን ጠቃሚነት በተመለከተ ምንም ማለት እንደማያስፈልገኝ አምናለሁ። ሕሊና በጥቂት ደቂቃዎች ይመልሳቸዋል፤ ነገር ግን እጅግ ሰፊና ዝርዝር እንደ ሆኑ ብታስብ ለዕለት ተዕለት ጥቅም ይበልጥ አጭር ማጠቃለያ ልታዘጋጅ ትችላለህ፤ እነዚህን ደግሞ ያን ጊዜ አስፈላጊ በሚሆኑ ግልጽ ለውጦች፣ ከወትሮው የበለጠ ጥንቃቄ ለሚደረግበት የቅኝት ጊዜ አስቀምጣቸው፤ ይህም ቢያንስ በሳምንት አንድ ጊዜ እንደሚሆን ተስፋ አደርጋለሁ። የግል አምልኮ እንቅልፍ ለእርሱ ብቁ እንዳንሆን ከማድረጉ በፊት በዚህ መንገድ ከተፈጸመ፣ በእርሱና በምንተኛበት ጊዜ መካከል ያለው ጊዜ በሚቀጥለው ክፍል በተጠቀሱት ሕጎች መመራት አለበት። እዚህ ሊታሰብበት የሚቀረው ምንም ነገር የለም፤ ከዚህ በቀር፦

24. ልንተኛና ራሳችንን ለእንቅልፍ ልናዘጋጅ ስንል ሊኖሩን የሚገቡ ሐሳቦች። እዚህ ላይ ለሕይወታችን ቀደምት ቀናትና ምሕረቶች ሌላ ቀንና ምሕረቶቹን በመጨመሩ የእግዚአብሔርን ቸርነት ማሰብ በግልጽ ተገቢ ነው፤ ምቹ መኖሪያዎችንና ምቹ አልጋዎችን በመስጠት፣ በእነርሱ ላይ በምቾት እንድንተኛ የሚያስችለንን የሰውነት ጤንነት፣ የሚያድስ እንቅልፍ ለማግኘት ተስፋ እንድናደርግ የሚያስችለንንም የአእምሮ ጸጥታ በመቀጠሉ የመግቦትን ቸርነት ማስተዋል ተገቢ ነው፤ ይህም መታደስ ለእንስሳዊ ተፈጥሮ እንደሚሰጥ ምቾት ብቻ ሳይሆን፣ ጥበበኛው ፈጣሪያችን በብዙ ድካሞች መካከል ትሑታን አድርጎ ሊጠብቀን አገልግሎቱን በታደሰ ትጋት እንድንከተል አስፈላጊ ሊያደርገው እንደ ወደደው ነገር ሊፈለግ ይገባዋል። በዚህ መንገድ የንቃታችን ብቻ ሳይሆን የእንቅልፋችን ሰዓታትም በአንድ መንገድ ለእግዚአብሔር የተቀደሱ ሊሆኑ ይችላሉ። ራሳችንን ለሞት ምስል፣ ከቀደሙት ሰዎች አንዱ በውበት «ታናናሽ ምሥጢራቱ» ብሎ ለሚጠራው ልንሰጥ ስንል ደግሞ፣ ስለዚያ የሕያዋን ሁሉ ፍጻሜ በጥሞና ማሰብና ዳግመኛ እዚህ ባንነቃ አስፈላጊ ናቸው ብለን የምንፈርዳቸውን የንስሐና የእምነት ተግባራት ማደስ በግልጽ ተገቢ ነው። ወዳጄ፣ እንዲህ ያለውን ማሰላሰል አንድ ጊዜ በእጄ አይተሃል፤ በደብዳቤው መጨረሻ በሚጨመረው ማስታወሻ እገለብጥልሃለሁ፤ ስለዚህ በዚህ ክፍል ላይ ምንም አልጨምርም፤ ይልቁንም የፈለግሃቸውን መመሪያዎች እዚህ እዘጋለሁ።

25. ከእነዚህ እጅግ አስፈላጊዎቹ በአንድ ወይም በሌላ መልክ ለረጅም ጊዜ በአንተ ዘንድ ታስበው የሕይወትህ መሪ መርሆች እንደ ሆኑ እርግጠኛ ነኝ። የእነዚህ መከለስና የቀሩትም መመርመርና መሞከር ከእግዚአብሔር ጋር ወደ ይበልጥ የቅርብ ኅብረት የሚመራህ፣ በዚህም ሕይወትህን ይበልጥ ደስ የሚያሰኝና ጠቃሚ፣ ዘላለማዊነትህንም፣ በሚጀምርበት ጊዜ ሁሉ፣ ይበልጥ የከበረ የሚያደርግ መንገድ ቢሆን እጅግ ደስ ይለኛል። በእነዚህ አስፈላጊ ጥቅሞች ላገለግለው የማልደሰትበት በምድር ላይ አንድም የሰው ፍጡር የለም፤ ነገር ግን በታማኝነት ላረጋግጥልህ እችላለሁ፤ በልዩ አክብሮት እኔ፣

ክቡር ወዳጄ፣

እጅግ የሚወድድህ ወዳጅህና አገልጋይህ ነኝ።

26. አንባቢ ሆይ፣ ይህ ጥቂት ቃላት ብቻ ተለውጠውበት ከአሥራ ስድስት ዓመት ገደማ በፊት ለአንድ ለተከበረ ወዳጄ (አሁን ከእግዚአብሔር ጋር እንዳለ አልጠራጠርም) የጻፍሁት ደብዳቤ ነው፤ የእነዚህ ዓመታት የእያንዳንዳቸው ልምድ በእነዚህ አመለካከቶች እንዳጸናኝ፣ እንዲህ የሚያልፍ አንድ ቀን በሥጋዊ ምኞትና ሃይማኖትን ቸል በማለት ከሚያልፉ ብዙ ዓመታት እጅግ እንደሚሻል በሚለው እምነት እንዳረጋገጠኝ በእርግጠኝነት መናገር እችላለሁ። ደብዳቤውን እንዳለ ለማስገባት የመረጥሁት በውስጡ የሰጠሁት ምክር ነጻነትና ዝርዝርነት በመጀመሪያው መልኩ ይበልጥ ተፈጥሮአዊ ሆኖ ይታያል ብዬ ስላሰብሁ ነው፤ እነዚህንም ምክሮች በሚቀጥለው ምዕራፍ አጥብቄ ለማቅረብ ስላሰብሁ፣ ይህን ምዕራፍ ለወዳጄ በደብዳቤው መጨረሻ ልጨምርለት ቃል በገባሁለት በዚያ ማሰላሰል እደመድመዋለሁ፤ ራስህን ለእንቅልፍ ባዘጋጀህ ቍጥር ፍሬ ነገሩን ማስታወስ እንድትችል ይህን ማሰላሰል ለራስህ የተለመደ እንድታደርገው እመኛለሁ።

በአልጋችን ላይ ስንተኛ ልናደርገው የሚገባ ስለ ሞት የሚደረግ የጥሞና ማሰላሰል

«ነፍሴ ሆይ! በጥሞናና በትኩረት ጥቂት ወደ ፊት ተመልከቺ፤ የኋለኛውን ፍጻሜሽንም በማሰብ ጥበብን ተማሪ (ዘዳግም 22:29)። ሌላዋ የሟች ዘመንሽ ቀን አሁን ተቈጥራ አለቀች፤ ልብሴን አውልቄ ለሌሊቱ ዕረፍት በአልጋዬ ላይ እንደ ተኛሁ፣ እንዲሁ የሕይወት ቀን ፈጥኖ ወደ ፍጻሜው ይደርሳል፤ እንዲሁ ሥጋው ራሱ ተወልቆ በአፈር አልጋ ውስጥ ለዕረፍቱ መጋደም አለበት። በዚያ ይረፍ፤ አሁን ካወለቅሁት ልብስ ይበልጥ አልጨነቅለትምና። ልጠነቀቅለት የሚገባኝ እጅግ የሚበልጥ ሌላ ጉዳይ አለኝ። ነፍሴ ሆይ፣ አስቢ! ሞት ሲመጣ ወደ ዘላለማዊው ዓለም ትገቢያለሽ፤ በሰማይ ወይም በሲኦል ለዘላለም ትጸኚያለሽ። የሕይወት ዕቅዶችና ጭንቀቶች፣ ተስፋዎችና ፍርሃቶች፣ ደስታዎችና ኀዘኖች ሁሉ ወደ ፍጻሜያቸው ይደርሳሉ፤ የመናፍስትም ዓለም በፊትሽ ይከፈታል። ወዮ! እንዴት ፈጥኖ ሊከፈት ይችላል! ምናልባትም የሚመለሰው ፀሐይ የሌላ ቀን ብርሃን ከማምጣቱ በፊት። የነገው ፀሐይ ዓይኖቼን ላያበራ፣ ይልቁንም በዚህ ሕያው ሰውነት ስፍራ ሊተኛ በሚችል ስሜት በሌለው ሬሳ ዙሪያ ብቻ ሊያበራ ይችላል። ቢያንስ በወጣትነታቸው አበባ የሞቱ ብዙዎች፣ በችሎታ፣ እግዚአብሔርን በመፍራትና በአገልግሎት ተስፋ ከእኔ የሚበልጡ ብዙዎች ሞት፣ በረጅም ዕድሜ እንዳልታመን በታላቅ ድምፅ ሊያስጠነቅቀኝ፣ በፍጥነት ብወሰድ ከመደነቅ ይልቅ እዚህ ይህን ያህል ዓመታት መቈየቴ እንዲያስደንቀኝ ሊያደርገኝ ይገባዋል።

«አሁንም ነፍሴ ሆይ! በእግዚአብሔር ፊት እንዳለሽ ሆነሽ መልሺ፤ ዝግጁ ነሽን? ዝግጁ ነሽን? በምሄድበት ጊዜ በጭንቀት የሚሞላኝ፣ በዘላለም አፋፍ ላይም የሚያንቀጠቅጠኝ ያልተተወና ስለዚህም ንስሐ ያልተገባበት ኃጢአት የለምን? በበደሉ ሥር መቈየትን ፍሪ፤ በዚህችም ቅጽበት ከእርሱ ለመዳን ወደ እግዚአብሔር ምሕረትና ወደ ቤዛው ደም እጅግ አጥብቀሽ የምታቀርቢውን ልመና አድሺ።

«ነገር ግን ታላቁ ሒሳብ አስቀድሞ ተስተካክሎ ከሆነ፣ ስለ ብዙ በደሎችሽ ከልብ ንስሐ ገብተሽ ከሆነ፣ በእምነት ራስሽን በቅንነት በቡሩኩ ኢየሱስ እጅ አደራ ሰጥተሽ ከሆነ፣ ኃጢአትን አውቆ ወደ መለማመድ በመመለስም ከእርሱ ጋር ያለሽን ቃል ኪዳን ካላፈረስሽ፣ መለያየትን በማሰብ አትደንግጪ፤ ለእግዚአብሔር የተሰጠችንና ከታላቁ ቤዛ ጋር የተባበረችን ነፍስ ለመጉዳት ሞት ኃይል የለውም። ዓለማዊ ምቾቶቼን ሊወስድብኝ፣ በምድር ላይ ለማገልገል ያወጣኋቸውን ዕቅዶች ሊያውክና ሊሰብር ይችላል፤ ነገር ግን ነፍሴ ሆይ፣ ይበልጥ መለኮታዊ ግብዣዎችና ይበልጥ ክቡር አገልግሎቶች ‹ከመቃብር ባሻገር ይጠብቁሻል!› ስለ እነዚህ የሚያረጋጉ፣ የሚያበረታቱና ደስ የሚያሰኙ አመለካከቶች የእግዚአብሔር ስምና የኢየሱስ ፍቅር ለዘላለም የተባረከ ይሁን! የዚህ ሌሊት መጨረሻ ምን እንደሚሆን፣ ሕይወት ወይም ሞት ቢወሰንልኝ፣ ከፍርሃት ነጻ ሆኜ አሁን በሰላም እተኛለሁ፥ አንቀላፋማለሁ (መዝሙር 4:8)። አባት ሆይ፥ ነፍሴን በእጅህ አደራ እሰጣለሁ (ሉቃስ 23:46)፤ የእውነት አምላክ ሆይ፥ ተቤዠኸኛልና! (መዝሙር 31:5) ስለዚህ በዚህ ዓለም ወይም በሌላው ልንቃ እንደ ሆነ ለምርጫህ በደስታ ልተወው እችላለሁ።»

ቀዳሚ ቀጣይ