በርሜሎች የሞሉባት ጀልባ

«እርሱ ስለ እናንተ ያስባልና የሚያስጨንቃችሁን ሁሉ በእርሱ ላይ ጣሉት።» — ከ1ኛ ጴጥሮስ 5

አንድ ቀን የገዳሙ መሪዎች ለወንድም ሎረንስ እጅግ የማይፈልገውን ሥራ ሰጡት። ወንድሞቹ የሚያስፈልጋቸውን የወይን ጠጅ እንዲገዛ ቡርጎኝ ወደተባለ ስፍራ ረጅም ጉዞ ላኩት።

ወንድም ሎረንስ በመግዛትና በመሸጥ ጎበዝ እንደ ሆነ አላሰበም። ሌላም ችግር ነበረ። አንድ እግሩ አንካሳ ስለ ነበረ መራመድ ይከብደው ነበር። በጀልባዋ ላይ ጭራሽ መራመድ አይችልም ነበር ማለት ይቻላል። መንቀሳቀስ የሚችለው በወይን ጠጅ በርሜሎቹ ላይ ራሱን እያንከባለለ ብቻ ነበር!

በዓይነ ሕሊናህ ልትመለከተው ትችላለህ? እግሩ የታመመ ትልቅ ሰው ከበርሜል ወደ በርሜል ሲንከባለል፦ ዱብ፣ ዱብ፣ ዱብ።

ወንድም ሎረንስ ግን አልተጨነቀም። የሚሠራው የእግዚአብሔርን ጉዳይ እንደ ሆነ ለእግዚአብሔር ነገረው። እግዚአብሔር እንዲጠብቀውም ታመነበት። በኋላም ሥራው ሁሉ እጅግ መልካም ሆኖ እንደ ተፈጸመ አገኘ።

ከዚያ በፊት በነበረው ዓመት ኦቨርኝ ወደተባለ ሌላ ስፍራ በዚሁ ዓይነት ጉዞ ተልኮ ነበር። እንዴት እንደ ተሳካ ሊያስረዳ እንኳ አልቻለም፤ ያን ጊዜም ግን መልካም ሆኖ ተፈጸመ።

አንዳንድ ጊዜ እንደ ፈተና፣ እንደ አዲስ ትምህርት ቤት ወይም እንደሚያስፈራ ነገር ያሉ ከአቅማችን በላይ የሚመስሉ ነገሮችን ማድረግ ይኖርብናል። ወንድም ሎረንስ ያደረገውን ልታደርግ ትችላለህ፦ ለእግዚአብሔር ንገረው፤ እንዲረዳህም ታመንበት።

ውድ እግዚአብሔር ሆይ፣ ከባድ ነገር ማድረግ ሲኖርብኝ ጭንቀቴን ለአንተ እንድሰጥና እንድትጠብቀኝ እንድታመንብህ እርዳኝ። አሜን።