በጫማው ውስጥ የተደበቀው ሳንቲም

«እኛ ሁላችን እንደ በጎች ተቅበዝብዘን ጠፋን» — ከኢሳይያስ 53

በሺዎች የሚቆጠሩ ወላጅ አልባ ሕፃናትን የተንከባከበው ሰው ትንሽ ልጅ ሳለ ሌባ እንደ ነበረ ታምናለህ? እውነት ነው። ስሙ ጆርጅ ሙለር ይባላል፤ በልጅነቱም ፈጽሞ ጥሩ ልጅ አልነበረም።

ጆርጅ የራሱ ያልሆነን ገንዘብ መውሰድ ይወድ ነበር። አንድ ቀን አባቱ ጆርጅ ይሰርቅ እንደ ሆነ ማወቅ ፈለገ። ስለዚህ ጥቂት ገንዘብ ቈጥሮ በክፍሉ ውስጥ ተወው፤ ከገንዘቡ የሚጐድል ነገር ይኖር እንደ ሆነ ለማየትም ወጥቶ ሄደ።

ጆርጅ ከገንዘቡ ጋር ብቻውን ቀረ። ታዲያ ምን አደረገ? ከገንዘቡ ጥቂት ወሰደ — አንዱንም ሳንቲም በጫማው ውስጥ ከእግሩ በታች ደበቀው! አባቱ ግን ተመልሶ ሲቈጥር ገንዘቡ ጐድሎ አገኘው። ጆርጅን ፈተሹት፤ እነሆም ሳንቲሙ በጫማው ውስጥ ተደብቆ ተገኘ።

ጆርጅ በዚህ ብቻ አላቆመም። እያደገ ሲሄድ ይዋሽ ነበር፤ የሌለውንም ገንዘብ ያባክን ነበር። በመጨረሻም አንድ ቀን፣ የአሥራ ስድስት ዓመት ልጅ ሳለ፣ ለጥቂት ጊዜ እስር ቤት እንኳ ገባ።

ታዲያ የእርሱ እውነተኛ ታሪክ ለምን ባደረጋቸው ክፉ ነገሮች ይጀምራል? ምክንያቱም ቀጥሎ የሚመጣውን ታሪክ ሁሉ እጅግ አስደናቂ ያደርገዋል። እግዚአብሔር በጆርጅ ላይ ሥራውን ገና አልጨረሰም ነበር። እግዚአብሔር የሚዋሽና የሚሰርቅ ልጅን ወስዶ ፈጽሞ ሊለውጠው ይችላል — አንድ ቀንም ጆርጅ ቈጥሮ ሊጨርሳቸው ከሚችለው በላይ ብዙ ሕፃናትን እንዲረዳ ሊጠቀምበት ይችላል።

ስለዚህ አንተ ክፉ ነገሮችን አድርገህ ከሆነ፣ ለእግዚአብሔር እጅግ መጥፎ እንደ ሆንህ ፈጽሞ አታስብ። እንዲህ ያለ ሰው የለም። እግዚአብሔር ልብን መለወጥ ይወዳል።

ውድ እግዚአብሔር ሆይ፣ ማንንም፣ እኔንም እንኳ፣ መለወጥ ስለምትችል አመሰግንሃለሁ። እባክህ ልቤን መልካምና ንጹሕ አድርገው። አሜን።