ምዕራፍ 16 · 10 ደቂቃ ንባብ · 13 ደቂቃ ማዳመጥ
3.2 የኃጢአት ደረጃዎች
የሕግ መተላለፎች ሁሉ እኩል ከባድ ናቸውን?
አንዳንድ ኃጢአቶች በራሳቸውም ሆነ በሚያከብዷቸው ልዩ ልዩ ሁኔታዎች ምክንያት በእግዚአብሔር ፊት ከሌሎች ይልቅ የከፉ ናቸው።
«ለአንተ አሳልፎ የሰጠኝ ኃጢአቱ የባሰ ነው።» ዮሐ 19፥11። የስቶይክ ፈላስፎች ኃጢአቶች ሁሉ እኩል ናቸው ብለው ያምኑ ነበር፤ ይህ ጥቅስ ግን በኃጢአት መካከል የደረጃ ልዩነት እንዳለ በግልጥ ያሳያል፤ አንዳንዶቹ ከሌሎቹ ይበልጣሉ፤ አንዳንዶቹ «ብርቱ ኃጢአቶች» ደግሞም «የሚጮኹ ኃጢአቶች» ናቸው። አሞ 5፥12፤ ዘፍ 18፥21። ኃጢአት ሁሉ የሚናገርበት ድምፅ አለው፤ አንዳንድ ኃጢአቶች ግን ይጮኻሉ። አንዳንድ በሽታዎች ከሌሎች እንደሚብሱ፥ አንዳንድ መርዞችም ይበልጥ እንደሚገድሉ፥ እንዲሁ አንዳንድ ኃጢአቶች ይበልጥ ከባድ ናቸው። «እናንተም ከአባቶቻችሁ ይልቅ ክፉ አድርጋችኋል፤ ኃጢአታችሁም ከእነርሱ በልጦአል።» ኤር 16፥12፤ ሕዝ 16፥47። አንዳንድ ኃጢአቶች ከሌሎቹ ይልቅ የጠቈረ መልክ አላቸው፤ የንጉሡን ገንዘብ መቀንጠስ የአገር ክህደት ነው፤ ንጉሡን ራሱን መምታት ግን የባሰ የክህደት ደረጃ ነው። ከንቱ ሐሳብ ኃጢአት ነው፤ የስድብ ቃል ግን የባሰ ኃጢአት ነው። አንዳንድ ኃጢአቶች ከሌሎች እንደሚበልጡ እንዲህ ይታያል፤ (1) በሕጉ ሥር በነበሩት መሥዋዕቶች መካከል ልዩነት ስለ ነበረ፤ የኃጢአት መሥዋዕት ከበደል መሥዋዕት ይበልጥ ነበር። (2) አንዳንድ ኃጢአቶች እንደ ሌሎቹ ይቅርታ ሊያገኙ ስለማይችሉ፥ ስለዚህ ይበልጥ ከባድ መሆናቸው የግድ ነው፤ ለምሳሌ መንፈስ ቅዱስን መሳደብ። ማቴ 12፥31። (3) አንዳንድ ኃጢአቶች ከሌሎቹ የበለጠ የቅጣት ደረጃ ስላላቸው። «የባሰ ፍርድ ትቀበላላችሁ።» ማቴ 23፥14። «የምድር ሁሉ ፈራጅ ቅን ፍርድን አያደርግምን?» ኃጢአቱ የበለጠ ባይሆን ኖሮ እግዚአብሔር አንዱን ከሌላው አብልጦ ባልቀጣ ነበር። እርግጥ ነው፥ ኃጢአት ከተሠራበት ከወሰን የሌለው አምላክ አንጻር ሲታይ «ኃጢአቶች ሁሉ እኩል ከባድ ናቸው»፤ በሌላ አንጻር ግን ኃጢአቶች ሁሉ እኩል ከባድ አይደሉም፤ አንዳንድ ኃጢአቶች በውስጣቸው የደም ቀለም ያላቸው ሁኔታዎች አሉ፤ እነርሱም ለሱፍ ጥልቅ ቀለም እንደሚሰጥ ማቅለሚያ ናቸው።
[1] ምንም ምክንያት ሳይኖር የሚሠሩ ኃጢአቶች ይበልጥ ከባድ ናቸው፤ ለምሳሌ ሰው ምንም ሳያስቈጣው ሲምል ወይም ሲቈጣ። የኃጢአቱ ምክንያት ባነሰ መጠን ኃጢአቱ ራሱ ይበልጣል።
[2] በድፍረት የሚሠሩ ኃጢአቶች ይበልጥ ከባድ ናቸው። በሕጉ ሥር በድፍረት ለተሠራ ኃጢአት መሥዋዕት አልነበረም። ዘኍ 15፥30።
ኃጢአትን የሚያገንነውና የሚያከብደው፥ ይበልጥም የከፋ የሚያደርገው የድፍረት ኃጢአት ምንድር ነው?
በድፍረት ኃጢአት መሥራት ማለት የኅሊናን ወቀሳና ብርሃን፥ ወይም የበራውን ኅሊና ተቃውሞ ኃጢአት መሥራት ነው። «እነዚህ በብርሃን ላይ ከሚያምፁ ናቸው።» ኢዮ 24፥13። ኅሊና እንደ ኪሩቤል የሚንበለበል ሰይፍ በእጁ ይዞ ኃጢአተኛውን ለመከልከል ይቆማል፤ እርሱ ግን ኃጢአትን ይሠራል። ጲላጦስ ክርስቶስን በኰነነ ጊዜ ኅሊናውን ተቃውሞና በትዕቢት እጅ ኃጢአት አልሠራምን? አይሁድ በቅንዓት አሳልፈው እንደ ሰጡት ያውቅ ነበር። ማቴ 27፥18። እርሱ ራሱ «አንድ በደል ስንኳ በዚህ ሰው አላገኘሁበትም» ብሎ መሰከረ። ሉቃ 23፥14። የገዛ ሚስቱም «በዚያ ጻድቅ ሰው ምንም አታድርግ» ብላ ላከችበት። ማቴ 27፥19። ይህ ሁሉ ሆኖ ሳለ በክርስቶስ ላይ የሞት ፍርድ ሰጠ። የበራውን ኅሊና ተቃውሞ በድፍረት ኃጢአት ሠራ። ባለማወቅ ኃጢአት መሥራት በደሉን በመጠኑ ያቃልላል፤ ይቀንሰዋልም። «እኔ መጥቼ ባልነገርኋቸውስ ኃጢአት ባልሆነባቸውም ነበር»፤ ይህም ኃጢአታቸው ባነሰ ነበር ማለት ነው። ዮሐ 15፥22። የኅሊናን ብርሃንና ወቀሳ ተቃውሞ ኃጢአት መሥራት ግን የሰዎችን ኃጢአት ያገዝፋል። እነዚህ ኃጢአቶች በነፍስ ላይ ጥልቅ ቍስል ያደርጋሉ፤ ሌሎች ኃጢአቶች ደም ያፈሳሉ፤ እነዚህ ግን ልብን የሚወጉ ናቸው።
ሰው የኅሊናውን ብርሃንና ወቀሳ ተቃውሞ በስንት መንገድ ኃጢአት ሊሠራ ይችላል?
(1) ተግባሩን ፈጽሞ ቸል ብሎ ሲኖር። ቃሉን ማንበብ ተግባር እንደ ሆነ አያጣውም፤ ነገር ግን መጽሐፍ ቅዱስን አልፎ አልፎ ብቻ እንደሚነካ እንደ ዛገ የጦር ዕቃ ተቀምጦ ይተወዋል። በቤተሰቡ መካከል መጸለይ ተግባር እንደ ሆነ ተረድቶአል፤ ነገር ግን ቀናትና ወራት ያልፋሉ፤ እግዚአብሔርም ስለ እርሱ ምንም አይሰማም፤ እግዚአብሔርን አባት ብሎ ይጠራዋል፤ በረከቱን ግን ፈጽሞ አይለምንም። የቤተሰብ ጸሎትን ቸል ማለት የሰዎችን ቤት ጣራ እንደሚገልጥ ያህል ነው፤ በማዕዳቸውም ላይ እርግማን እንዲዘንብ መንገድ ይከፍታል።
(2) ሰው በሌሎች ላይ በሚኰንነው በዚያው ኃጢአት ሲኖር። «አንተው ፈራጁ እነዚያን ታደርጋለህና።» ሮሜ 2፥1። አውግስጢኖስ ስለ ሴኔካ እንዳለው፥ «አጉል እምነትን በመቃወም ጻፈ፤ ነገር ግን የነቀፋቸውን ምስሎች ያመልክ ነበር።» አንድ ሰው ሌላውን በችኰላ በመንቀፍ ይኰንናል፤ ራሱ ግን በዚያው ኃጢአት ይኖራል፤ ጌታ ተለማማጁን ስለ መማሉ ይገሥጸዋል፤ ራሱ ግን ይምላል። የማደሪያው ድንኳን መኰስተሪያዎች ከንጹሕ ወርቅ የተሠሩ ነበሩ፤ የሌሎችን ክፋት የሚገሥጹና የሚኰሰትሩ ራሳቸው ከእነዚያ ኃጢአቶች ነጻ መሆን ያስፈልጋቸዋል። መኰስተሪያዎቹ ከወርቅ መሆን አለባቸው።
(3) ሰው ስእለት ከተሳለ በኋላ ኃጢአት ሲሠራ። «አቤቱ፥ ስእለትህ በእኔ ላይ ነው።» መዝ 56፥12። ስእለት ራሳችንን ለእግዚአብሔር ለመስጠት ለእርሱ የምንገባው ሃይማኖታዊ ቃል ነው። ስእለት ዓላማ ብቻ አይደለም፤ ቃል ኪዳን ነው። የሚሳል ሁሉ ራሱን ባለ ዕዳ ያደርጋል፤ በታላቅ ሥርዓት ራሱን ለእግዚአብሔር ያስራል። እንግዲህ ከስእለት በኋላ ኃጢአት መሥራት፥ ራስን ለእግዚአብሔር ተስሎ ነፍስን ለዲያብሎስ መስጠት፥ ከሁሉ የላቀውን የኅሊና ወቀሳ መቃወም መሆኑ የግድ ነው።
(4) ሰው ምክርን፥ ተግሣጽንና ማስጠንቀቂያን ከሰማ በኋላ ኃጢአት ሲሠራ፥ አላወቅሁም ብሎ ሊያመካኝ አይችልም። የወንጌል መለከት በጆሮው ተነፍቶአል፤ ከኃጢአቱም እንዲመለስ የማፈግፈጊያ ድምፅ ተሰምቶአል፤ ስለ ዓመፃው፥ በክፋት ስለ መኖሩ፥ ከክፉ ባልንጀሮች ጋር ስለ መዋሉ ተነግሮታል፤ እርሱ ግን በኃጢአት ላይ ይደፍራል። ይህ የኅሊናን ወቀሳ ተቃውሞ ኃጢአት መሥራት ነው፤ ኃጢአቱንም ያከብደዋል፤ ኃጢአቱ ይበልጥ እንዲመዝን በሚዛን ላይ እንደ ተጨመረ ክብደት ነው። በዚያ ስፍራ አሸዋማ ጥልቀትና አለት እንዳለ ለማስጠንቀቅ የባሕር ምልክት ቢቆምም መርከበኛው በዚያ ለመጓዝ ቢወድና መርከቡን ቢሰብር ይህ ድፍረት ነው፤ ቢጠፋስ ማን ያዝንለታል?
(5) ሰው ግልጥ የሆኑትን ዛቻዎችና ማስፈራሪያዎች ተቃውሞ ኃጢአት ሲሠራ። እግዚአብሔር በእንደዚህ ያሉ ኃጢአቶች ላይ ዛቻውን እንደ ነጐድጓድ አሰምቶአል። «እግዚአብሔር... በበደሉ እየሄደ ያለውን ሰው ጠጕራም አናት ይቀጠቅጣል።» መዝ 68፥21። እግዚአብሔር የሰይፉን ጫፍ በኃጢአተኛው ደረት ላይ ቢያኖርም እርሱ አሁንም ኃጢአት ይሠራል። የእግዚአብሔር ዛቻ ከሚያስፈራው ይልቅ የኃጢአት ተድላ ደስ ያሰኘዋል። እንደ ሌዋታን «በጦር መወዝወዝ ይሥቃል።» ኢዮ 41፥29። ይልቁንም በእግዚአብሔር ዛቻ ይዘብታል። «እናየው ዘንድ ይፍጠን፥ ሥራውንም ያቻኵል»፤ እግዚአብሔር ሊያደርግ ስላሰበውና ስለሚቀርበው ፍርድ ብዙ ሰምተናል፤ ልናየው እንወዳለን ይላሉ። ኢሳ 5፥19። ሰዎች የእግዚአብሔር ዛቻ የሚንበለበል ሰይፍ ሲወዘወዝ እያዩ በኃጢአታቸው መበርታታቸው የኅሊናን ብርሃንና ወቀሳ ተቃውሞ እጅግ በከፋ መንገድ ኃጢአት መሥራት ነው።
(6) ሰው በመከራ ውስጥ ሆኖ ኃጢአት ሲሠራ። እግዚአብሔር በዛቻ ብቻ አያንጐደጕድም፤ መብረቁንም ይጥላል። ሰው ኃጢአቱን በቅጣቱ ውስጥ እንዲያነብ በእርሱ ላይ ፍርድን ያመጣል፤ እርሱ ግን ኃጢአት ይሠራል። ኃጢአቱ ርኩሰት ነበር፤ በእርሱም ኃይሉንና ንብረቱን አባከነ። የሽባ በሽታ ይዞታል፤ ሆኖም የኃጢአትን ሕመም እየተሰማው የኃጢአትን ፍቅር አጥብቆ ይይዛል። ይህ የኅሊናን ወቀሳ ተቃውሞ ኃጢአት መሥራት ነው። «በተጨነቀም ጊዜ ደግሞ ይበልጥ በደለ፤ ይህ ንጉሡ አካዝ ነው።» 2ዜና 28፥22። የበራውን ኅሊና ተቃውሞ ኃጢአት መሥራት ኃጢአቱን ያበዛዋል። ሙሉ በሙሉ እልከኝነት ነው። ሰዎች ለኃጢአታቸው ምንም ምክንያት አይሰጡም፤ ምንም መከላከያ አያቀርቡም፤ ሆኖም በደልን አጥብቀው ለመያዝ ቈርጠዋል። Voluntas est regula et mensura actionis [ተግባር ውስጥ ባለው ፈቃድ ሊለካና ሊመዘን ይችላል]፤ በኃጢአት ውስጥ ያለው ፈቃድ በበዛ መጠን ኃጢአቱ ይበልጣል። «በገዛ አሳባችን እንሄዳለን።» ኤር 18፥12። በእያንዳንዱ እርምጃ ሞትና ሲኦል ቢኖሩም በሰይጣን ሰንደቅ ሥር እንዘምታለን ይላሉ። የወደቁትን መላእክት ኃጢአት እጅግ ታላቅ ያደረገው በፈቃዳቸው መሆኑ ነበር፤ በአእምሮአቸው ድንቁርና አልነበረም፤ የሚያነሣሣቸውም ስሜት አልነበረም፤ የሚያታልላቸው ፈታኝም አልነበረም፤ ነገር ግን በእልከኝነትና በምርጫ ኃጢአት ሠሩ። የኅሊናን ወቀሳና ብርሃን ተቃውሞ ኃጢአት መሥራት እግዚአብሔርን ከመናቅና ከማቃለል ጋር የተያያዘ ነው። ኃጢአተኛ እግዚአብሔርን መርሳቱ ክፉ ነው፤ እርሱን መናቁ ግን የባሰ ነው። «ኃጥእ እግዚአብሔርን ስለ ምን ያቃልላል?» መዝ 10፥13። የበራለት ኃጢአተኛ በኃጢአቱ እግዚአብሔርን እንደሚያሳዝንና እንደሚያስቈጣ ያውቃል፤ ነገር ግን እግዚአብሔር ደስ ቢለውም ባይለውም ግድ የለውም፤ ኃጢአቱን ይፈልጋል፤ ስለዚህ እንዲህ ያለው ሰው እግዚአብሔርን ይሰድባል ተብሎአል። «በትዕቢት የሚያደርግ ሰው ግን እርሱ እግዚአብሔርን ይሰድባል።» ዘኍ 15፥30። ኃጢአት ሁሉ እግዚአብሔርን ያሳዝናል፤ የበራውን ኅሊና የሚቃወሙ ኃጢአቶች ግን እግዚአብሔርን ይሰድባሉ። የንጉሥን ሥልጣን መናቅ በእርሱ ላይ የተደረገ ስድብ ነው። ከዚህም ጋር ኀፍረተ ቢስነት አብሮ ይሄዳል። ፍርሃትና እፍረት ይባረራሉ፤ የጨዋነት መጋረጃም ይወገዳል። «ዓመፀኛ ግን እፍረትን አያውቅም።» ሶፎ 3፥5። ይሁዳ ክርስቶስ መሲሕ እንደ ሆነ ያውቅ ነበር፤ ከሰማይ በመጣው ቃልና እርሱ ባደረጋቸው ተአምራት ተረድቶ ነበር፤ ሆኖም ክርስቶስ «ከእኔ ጋር እጁን በወጭቱ ያጠለቀ፥ እኔን አሳልፎ የሚሰጥ እርሱ ነው» ባለ ጊዜ እንኳ ያለ እፍረት በክህደቱ ገፋበት፤ ክርስቶስ ስለ እርሱ መናገሩንም ያውቅ ነበር። ክህደቱን ሊፈጽም ሲሄድ ክርስቶስ ወዮታን ቢናገርበትም፥ ይህ ሁሉ ሆኖ በክህደቱ ቀጠለ። ሉቃ 22፥22። እንዲህ የበራውን ኅሊና ተቃውሞ በድፍረት ኃጢአት መሥራት ኃጢአቱን በደማቅ ቀይ ቀለም ይነክረዋል፤ ከሌሎችም ኃጢአቶች ያበልጠዋል።
[3] ተከታታይ የሆኑ ኃጢአቶች ከሌሎች ይልቅ ይበልጥ ከባድ ናቸው። በኃጢአት መቀጠል ኃጢአትን ማገዘፍ ነው። ክህደትን የሚያሤር ራሱን የባሰ በደለኛ ያደርጋል። የአንዳንድ ሰዎች ራስ የዲያብሎስ ገንዘብ ማተሚያ ቤት ነው፤ የክፋት ማተሚያ ናቸው። «ክፋትን የሚፈላለጉ።» ሮሜ 1፥30። አንዳንዶቹ አዲስ መሐላ፥ ሌሎቹ አዲስ ወጥመድ ይፈጥራሉ። በዳንኤል ላይ ትእዛዝ አውጥተው ንጉሡን ያስፈረሙት አለቆች እንዲህ ያሉ ነበሩ። ዳን 6፥9።
[4] ከክፉ ጥላቻ መንፈስ የሚወጡ ኃጢአቶች ይበልጣሉ። ቅድስናን መጥላት ዲያብሎሳዊ ነው። ጸጋ ማጣት ኃጢአት ነው፤ እርሱን መጥላት ግን የባሰ ነው። በተፈጥሮ ውስጥ እንደ ወይንና እንደ በሶብላ ዛፍ ያሉ የማይስማሙ ነገሮች አሉ። አንዳንዶች ስለ ንጽሕናው እግዚአብሔርን ይጠላሉ። «የእስራኤልን ቅዱስ ከፊታችን አስወግዱልን።» ኢሳ 30፥11። ኃጢአተኞች በሥልጣናቸው ቢሆን እግዚአብሔርን ከዙፋኑ ማውረድ ብቻ ሳይሆን ፈጽሞ ማጥፋት በወደዱ ነበር፤ ቢችሉ እግዚአብሔር ከእንግዲህ እግዚአብሔር ባልሆነ ነበር። እንዲህ ኃጢአት ወደ ከፍተኛ ደረጃ ይፈላል።
[5] ከውለታ ቢስነት ጋር የተደባለቁ ኃጢአቶች መጠናቸው ይበልጣል። እግዚአብሔር ከሁሉ ይልቅ ቸርነቱ ሲናቅ ሊታገሥ አይችልም። ምሕረቱ ሰዎችን ለብዙ ዘመን ቅጣትን በማዘግየቱ፥ እንዲታረቁ በመንፈሱና በአገልጋዮቹ በመለመኑ፥ በብዙ ምድራዊ በረከቶችም በማክበሩ ይታያል፤ ይህን ሁሉ ፍቅር መበደል፥ እግዚአብሔር የምሕረቱን መስፈሪያ ሲሞላ ሰዎች የኃጢአታቸውን መስፈሪያ መሙላታቸው፥ ታላቅ ውለታ ቢስነት ነው፤ ኃጢአታቸውንም ይበልጥ ደማቅ ቀይ ያደርገዋል። አንዳንዶች በምሕረት ምክንያት ይባስባቸዋል። ኤሊያን «ጥንብ አንሣ ከሽቱ በሽታን ይወስዳል» ይላል። እንዲሁ ኃጢአተኛ ከእግዚአብሔር ምሕረት ጣፋጭ ሽቱ ክፋትን ይቀስማል። የእንግሊዝ ዜና መዋዕል ስለ ፓሪ የተባለ ሰው ይተርካል፤ ሞት ተፈርዶበት ሳለ ንግሥት ኤልሳቤጥ ይቅርታዋን ላከችለት፤ ይቅርታ ካገኘ በኋላም የንግሥቲቱን ሞት አሤረ፤ ዶለተም። አንዳንዶች ከእግዚአብሔር ጋር እንዲሁ ያደርጋሉ፤ እርሱ ምሕረትን ይሰጣቸዋል፤ እነርሱ ግን በእርሱ ላይ ክህደትን ያሤራሉ። «ልጆችን አሳደግሁ፥ አሳደግሁም፤ እነርሱም ዐመፁብኝ።» ኢሳ 1፥2። የአቴና ሰዎች ቴሚስቶክሊስ ላደረገላቸው መልካም አገልግሎት ውለታ ፋንታ ከከተማቸው አሳደዱት። በተረቱ ውስጥ ያለው እባብ በብርድ ደርቆ ሳለ ያሞቀውን ሰው ነደፈው። በምሕረት ላይ የሚሠሩ ኃጢአቶች በእርግጥ ይበልጥ ከባድ ናቸው።
[6] በደስታ የሚሠሩ ኃጢአቶች ከሌሎች ይልቅ ይበልጥ ከባድ ናቸው። የእግዚአብሔር ልጅ ሳያስበው ተይዞ ወይም ያለ ፈቃዱ ኃጢአት ሊሠራ ይችላል። «የማልወደውን ክፉን ነገር አደርጋለሁና።» ሮሜ 7፥19። እርሱ ሳይፈልግ በወንዝ ፈሳሽ እንደሚወሰድ ሰው ነው። በደስታ ኃጢአት መሥራት ግን ኃጢአቱን ያገንነዋል፤ ያበልጠዋልም። ልብ በኃጢአቱ ውስጥ እንዳለ ምልክት ነው። ሰው ትርፉን በደስታ እንደሚከተል፥ «ልባቸውን ወደ በደላቸው አነሡ።» ሆሴ 4፥8። «ውሻዎች ... ውሸትንም የሚወዱና የሚያደርጉ ሁሉ በውጭ አሉ።» ራእ 22፥15። ውሸት መናገር ኃጢአት ነው፤ ውሸት መናገርን መውደድ ግን የባሰ ኃጢአት ነው።
[7] በሃይማኖት ሽፋን የሚሠሩ ኃጢአቶች ከሌሎች ይልቅ ይበልጥ ከባድ ናቸው። ማታለልና መቀማት ኃጢአት ነው፤ መጽሐፍ ቅዱስን በእጅ ይዞ ማድረግ ግን ድርብ ኃጢአት ነው። ንጽሕናን ማጣት ኃጢአት ነው፤ ለማመንዘር የሃይማኖትን ጭንብል መልበስ ግን ኃጢአቱን ያበልጠዋል። «የደኅንነት መሥዋዕት በእኔ ዘንድ አለ፤ ዛሬ ስእለቴን ፈጸምሁ፤ ኑ፥ በፍቅር እንርካ።» ምሳ 7፥14-15። ከቤተ ክርስቲያን የተመለሰችና ጸሎቷን ስታደርስ የነበረች ይመስል ትናገራለች፤ በአመንዝራነት ማን ይጠረጥራታል? ነገር ግን ግብዝነቷን ተመልከቱ፤ አምልኮዋን ለምንዝር መቅድም ታደርገዋለች። «የመበለቶችን ቤት የሚበሉ ጸሎታቸውንም በማስረዘም የሚያመካኙ።» ሉቃ 20፥47። ኃጢአቱ ረጅም ጸሎት በማድረጋቸው አልነበረም፤ ክርስቶስ ራሱ ሌሊቱን ሙሉ በጸሎት አድሮአልና፤ ዓመፃን ለማድረግ ብለው ረጅም ጸሎት ማድረጋቸው ግን ኃጢአታቸውን ይበልጥ አስከፊ አደረገው።
[8] የክህደት ኃጢአቶች ከሌሎች ይልቅ ይበልጥ ከባድ ናቸው። ዶሮቴዎስ እንደሚለው ዴማስ እውነትን ትቶ በኋላ በጣዖት ቤተ መቅደስ ካህን ሆነ። 2ጢሞ 4፥10። መውደቅ ኃጢአት ነው፤ ፈጽሞ ወድቆ መራቅ ግን የባሰ ኃጢአት ነው። ከሓዲዎች በሃይማኖት ላይ ውርደትን ያመጣሉ። ጠርጡሊያኖስ «ከሓዲው እግዚአብሔርንና ሰይጣንን በሚዛን ላይ የሚያኖር ይመስላል፤ የሁለቱንም አገልግሎት መዝኖ የዲያብሎስን ይመርጣል፤ እርሱም ከሁሉ የሚሻል ጌታ እንደ ሆነ ያውጃል» ይላል። በዚህም ረገድ ከሓዲው ክርስቶስን «ያዋርዱታል» እንደ ተባለው በግልጥ ያዋርደዋል። ዕብ 6፥6። ይህ ኃጢአትን ጠልቆ ያቀልመዋል፤ ያበልጠዋልም። ክርስቶስን አለመመስከር ኃጢአት ነው፤ እርሱን መካድ ግን የባሰ ነው። የክርስቶስን ሰንደቅ አለመልበስ ኃጢአት ነው፤ ከሰንደቁ መሸሽ ግን የባሰ ኃጢአት ነው። አረማዊ ከተጠመቀ ከሓዲ ያነሰ ኃጢአት ይሠራል።
[9] ሃይማኖትን ማሳደድ ኃጢአትን ያበልጣል። ሐዋ 7፥52። ሃይማኖት አለመኖር ኃጢአት ነው፤ ሃይማኖትን ለማጥፋት መጣር ግን የባሰ ነው። አንጥዮኩስ ኤጲፋንስ ከእርሱ በፊት የነበሩት ሁሉ ድል ለማግኘት ካደረጉት ይልቅ አይሁድን ለማስጨነቅና ለመቃወም አድካሚ ጕዞዎችን ተጓዘ፤ ብዙ አደጋንም ተጋፈጠ። ሄሮድስ «ይህን ደግሞ ከሁሉ በላይ ጨምሮ ዮሐንስን በወኅኒ አገባው።» ሉቃ 3፥20። ከዚያ በፊት በዘመድ ርኩሰት ኃጢአት ሠርቶ ነበር፤ ነቢዩን በማሰር ግን በኃጢአቱ ላይ ጨመረ፤ አበለጠውም። ማሳደድ የኃጢአትን መስፈሪያ ይሞላል። «እናንተ ደግሞ የአባቶቻችሁን መስፈሪያ ሙሉ።» ማቴ 23፥32። በጕድጓድ ውኃ ማጠራቀሚያ ውስጥ አንድ ሳሕን ውኃ ብታፈስ በጥቂቱ ይጨምራል፤ አንድ ወይም ሁለት ባልዲ ብታፈስ ግን የማጠራቀሚያውን መስፈሪያ ይሞላል፤ እንዲሁ ማሳደድ የኃጢአትን መስፈሪያ ይሞላል፤ ያበልጠዋልም።
[10] በክፋት ኃጢአት መሥራት ኃጢአትን ያበልጣል። አኩይናስና ሌሎች የመካከለኛው ዘመን ሊቃውንት መንፈስ ቅዱስን የመሳደብን ኃጢአት በክፋት ውስጥ ያኖሩታል። ኃጢአተኛው እግዚአብሔርን ለማስቈጣት የሚችለውን ሁሉ ያደርጋል፤ የጸጋውንም መንፈስ ያክፋፋል። ዕብ 10፥29። ዩልያኖስ በእግዚአብሔር ላይ የሚበቀል ይመስል ጩቤውን ወደ ሰማይ ወረወረ። ይህ ኃጢአትን እስከ ሙሉ መጠኑ ያሳብጠዋል፤ ከዚህ ሊበልጥ አይችልም። ሰው መንፈስን በስድብ እስከ ማክፋፋት ሲደርስ፥ ሊወርድበት የሚችል አንድ ደረጃ ብቻ ይቀራል፤ እርሱም ሲኦል ነው።
[11] ሰው ራሱ ኃጢአት መሥራቱ ብቻ ሳይሆን ሌሎችንም ኃጢአት ለማሠራት ሲጥር ኃጢአቱን ያከብደዋል፤ ያበልጠዋልም። (1) የክርስቶስን አምላክነት የሚያቃልሉ ወይም ኃይሉን የሚክዱ፥ ሕይወትን የሚሰጥ ራስ ሳይሆን የፖለቲካ ራስ ብቻ የሚያደርጉት፥ ለሕዝቡ ስሕተትን የሚያስተምሩ፤ የሰንበትን የሥነ ምግባር ግዴታ ወይም የነፍስን አትሞትነት የሚቃወሙ ሰባኪዎች፤ የእነዚህ ሰዎች ኃጢአት ከሌሎቹ ይበልጣል። የእግዚአብሔርን ሕግ የሚተላለፉ ኃጢአት ከሠሩ፥ ሰዎችን እንዲተላለፉት የሚያስተምሩማ እንዴት ይሆናሉ? ማቴ 5፥19። (2) በክፉ ምሳሌያቸው ሌሎችን የሚያጠፉ። የሚምል አባት ልጁን መማልን ያስተምረዋል፤ በምሳሌውም ያስኰንነዋል። የእንደዚህ ያሉ ሰዎች ኃጢአት ከሌሎች ይበልጣል፤ በሲኦልም የበለጠ የሚያቃጥል ስፍራ ይኖራቸዋል።
ትግበራ። ኃጢአቶች ሁሉ እኩል እንዳልሆኑ ታያላችሁ፤ አንዳንዶቹ ከሌሎቹ ይልቅ ከባድ ናቸው፤ የበለጠ ቍጣንም ያመጣሉ፤ ስለዚህ በተለይ ከእነዚህ ኃጢአቶች ተጠበቁ። «ባሪያህን ደግሞ ከትዕቢት ኃጢአት ጠብቀው።» መዝ 19፥13። ከሁሉ የምታንሰው ኃጢአት እንኳ በቂ ክፉ ናት፤ ኃጢአታችሁን ማክበድና ይበልጥ አስከፊ ማድረግ አያስፈልጋችሁም። ትንሽ ቍስል ያለበት ሰው ቍስሉን አያጠልቀውም። ወዮ፥ ኃጢአታችሁን የሚያበዙትንና ይበልጥ ከባድ የሚያደርጉትን ሁኔታዎች ተጠንቀቁ! ሰው በኃጢአት ከፍ ባለ መጠን በሥቃይ ውስጥ ይበልጥ ዝቅ ብሎ ይተኛል።