«የሚገባኝ አይደለሁም»

«ድሆችን ከአፈር ያነሣል፥ … ከአለቆች ጋር ያስቀምጣቸው ዘንድ» — ከ1ኛ ሳሙኤል 2

በለንደን የነበሩት ሚስዮናውያን በኒጀር ዳርቻ ያሉት አብያተ ክርስቲያናት ጳጳስ እንደሚያስፈልጋቸው ወሰኑ፤ ጳጳስ ማለት የአብያተ ክርስቲያናትና የአገልጋዮች ሁሉ መሪ ማለት ነው። ጳጳሱም አፍሪካዊ መሆን እንዳለበት ወሰኑ። ሳሙኤልንም መረጡት።

ሳሙኤል ጳጳስ መሆን ፈጽሞ እንዳልፈለገ ቤተሰቦቹ ያስታውሳሉ። «የሚገባኝ አይደለሁም» አለ። ትሑት አገልጋይ ሆኖ መቀጠል ፈለገ። በመጨረሻ ግን «እርሱ እግዚአብሔር ነው፤ በፊቱ ደስ የሚያሰኘውን ያድርግ።» ብሎ ተስማማ።

ጁን 29 ቀን 1864፣ በእንግሊዝ አገር በካንተርበሪ በሚገኘው ታላቅ ካቴድራል፣ ሳሙኤል አጃዪ ክራውዘር የአንግሊካን ቤተ ክርስቲያን የመጀመሪያው አፍሪካዊ ጳጳስ ሆነ። በባርነት ተሸጦ የነበረው ልጅ አሁን ጳጳስ ሆነ!

አንዲት አረጋዊት ሴት ወደ አገልግሎቱ መጣች። ታሪኩ እንደሚለው፣ በወንበሯ ላይ ሌላ ሰው ተቀምጦ ባገኘች ጊዜ ከቦታዋ አልነሣም አለች። አዲሱን ጳጳስ ፊደል ያስተማረችው እርሷ ስለ ሆነች ያን ወንበር የማግኘት ሙሉ መብት እንዳላት ተናገረች! እርሷም በባተርስት ያስተማረችው መምህሩ ወይዘሮ ዴቪ ነበረች፤ አሁን ግን ወይዘሮ ዊክስ ተብላ ትጠራ ነበር።

ጳጳስ መሆኑ ሳሙኤልን ትዕቢተኛ አላደረገውም። ሰዎች «ጌታዬ» ብለው እንዳይጠሩት ጠየቀ። በአንድ ክፍል ውስጥ አንድ ወንበር ብቻ ቢኖርና አንድ የትምህርት ቤት መምህር ቢገባ፣ ጳጳሱ ተነሥቶ ወንበሩን ለመምህሩ ይሰጥ ነበር።

እግዚአብሔር ትሑታን ሰዎችን ከፍ ማድረግ ይወዳል። እግዚአብሔር እንዲጠቀምብህ ታላቅ ሰው መሆን አያስፈልግህም። የሚያስፈልግህ ለእርሱ እሺ ማለት ብቻ ነው።

ውድ እግዚአብሔር ሆይ፣ እባክህ እንደ ሳሙኤል ትሑት አድርገኝ። ሌሎችን እንዳስቀድም፣ የምትጠይቀኝንም ማንኛውንም ነገር እሺ እንድል እርዳኝ። አሜን።