ቀን 4 — ቀና ጎዳናዎች

«በፍጹም ልብህ በእግዚአብሔር ታመን፥ በራስህ ማስተዋል አትደገፍ፤ በመንገድህ ሁሉ እርሱን እወቅ፥ እርሱም ጎዳናህን ያቀናልሃል።»

— ምሳሌ 3:5-6

ከዚህ በፊት ሄደህበት በማታውቀው ጥቅጥቅ ያለ ጫካ ውስጥ በእግርህ እየተጓዝህ እንደ ሆነ አስብ። በየአቅጣጫው የሚሄዱ መንገዶች አሉ። አንዳንዶቹ ዳገት ይወጣሉ፤ አንዳንዶቹ ቍልቍለት ይወርዳሉ፤ አንዳንዶቹ ደግሞ ቍጥቋጦ ውስጥ ገብተው የሚጠፉ ይመስላሉ። የትኛውን መንገድ መያዝ አለብህ?

አሁን ደግሞ ከአንተ ጋር አንድ መንገድ መሪ እንዳለ አስብ፤ ይህን ጫካ ሺህ ጊዜ የተመላለሰበትና መንገዱን ሁሉ የሚያውቅ ሰው ነው። መሪውን ችላ ብለህ የራስህን መንገድ ትመርጣለህ? በጭራሽ! ወዴት መሄድ እንዳለበት የሚያውቀውን ሰው ትከተላለህ።

ሕይወት እንደዚያ ጫካ ነው። ብዙ ምርጫዎች ያጋጥሙሃል። ከየትኞቹ ጓደኞች ጋር ጊዜ እንደምታሳልፍ። ከትምህርት ቤት በኋላ ምን እንደምታደርግ። ምን እንደምታጠና፣ ምን ዓይነት ሥራ እንደምትሠራ፣ የት እንደምትኖርና ማንን እንደምታገባ። ከእነዚህ ምርጫዎች ብዙዎቹ ግራ የሚያጋቡ ይሆናሉ።

የምሳሌ መጽሐፍ ለሁሉም የሚሆን መሪ ይሰጠናል።

«በፍጹም ልብህ በእግዚአብሔር ታመን።» በትንሹ ብቻ አይደለም። በሙሉ ልብህ ነው። እንደሚችልህ እርግጠኛ በሆንክበት ወንበር ላይ ወደ ኋላ ተደግፈህ እንደምትቀመጥ፣ ክብደትህን ሁሉ በእርሱ ላይ ጣል።

«በራስህ ማስተዋል አትደገፍ።» የራስህ ማስተዋል ውስን ነው። የወደፊቱን ማየት አትችልም። ሁሉን አታውቅም። አንዳንድ ጊዜ ከሁሉ የተሻለ የሚመስለው መንገድ የተሻለ ሆኖ አይገኝም። ስለዚህ አንተ በምታስበው ነገር ብቻ አትደገፍ።

«በመንገድህ ሁሉ እርሱን እወቅ።» በሕይወትህ ክፍል ሁሉ እግዚአብሔርን አስታውስ። እንዲረዳህ ለምነው። በትልቁም በትንሹም ውሳኔህ ውስጥ አስገባው። «መንፈሳዊ» ስለሚባሉት ነገሮች ብቻ አትጸልይ። ስለ ጓደኝነትህ፣ ስለ ትምህርት ቤት ሥራህ፣ ስለምትወዳቸው የትርፍ ጊዜ ማሳለፊያዎችና ስለ ወደፊትህ ጸልይ።

«እርሱም ጎዳናህን ያቀናልሃል።» ተስፋው ይኸው ነው! በእግዚአብሔር ስትታመንና በሁሉ ነገር ውስጥ ስታስገባው ይመራሃል። መንገዱን ያቀናልሃል፤ መሄድ ወደሚገባህም ቦታ ይወስድሃል።

ይህ ማለት ግን ከፊትህ ያለውን መንገድ ሁልጊዜ ሙሉ በሙሉ ታያለህ ማለት አይደለም። ብዙ ጊዜ እግዚአብሔር በጨለማ ውስጥ እንዳለ የእጅ ባትሪ ቀጣዩን አንድ እርምጃ ብቻ ያሳይሃል። መንገዱ ወዴት እንደሚያደርስ እርሱ እንደሚያውቅ ግን ልትታመን ትችላለህ።

አስብበት፦ በእግዚአብሔር ከመታመን ይልቅ በራስህ ማስተዋል ስትደገፍበት የቆየኸው፣ አሁን ከፊትህ ያለ አንድ ውሳኔ አለ?

ሞክረው፦ ዛሬ ማንኛውንም ውሳኔ ከማድረግህ በፊት ቆም ብለህ «እግዚአብሔር ሆይ፣ እንዳደርግ የምትፈልገው ምንድን ነው?» ብለህ ጠይቅ።

ውድ እግዚአብሔር ሆይ፣ በፍጹም ልቤ በአንተ መታመን እፈልጋለሁ። በራሴ ማስተዋል እንዳልደገፍ እርዳኝ። በመንገዴ ሁሉ አንተን ላስታውስህና በሁሉ ነገር ውስጥ ላስገባህ እፈልጋለሁ። እባክህ ጎዳናዬን አቅናልኝ፤ ወደምትፈልገውም ቦታ ምራኝ። በኢየሱስ ስም፣ አሜን።