ቀን 25 — ፍትሐዊ አይደለም

«እናንተ ክፉ ነገርን አሰባችሁብኝ፤ እግዚአብሔር ግን ዛሬ እንደ ሆነው የብዙ ሕዝብን ነፍስ ያድን ዘንድ ለመልካም አሰበው።»

— ዘፍጥረት 50:20

«ፍትሐዊ አይደለም!» ብለህ ታውቃለህ? ሳትል አትቀርም! ምናልባት ወንድምህ ወይም እህትህ አንተ ያላገኘኸውን ነገር አግኝቶ ይሆናል። ምናልባት ባላደረግኸው ነገር ተወቅሰህ ይሆናል። ምናልባት አንድ መምህር፣ አሠልጣኝ ወይም ጓደኛ ያለ አግባብ አድርጎብህ ይሆናል።

ከማንም በላይ «ፍትሐዊ አይደለም!» ማለት ይችል የነበረው ዮሴፍ ነው።

ወንድሞቹ ቀንተውበት ስለ ነበር ወደ ጕድጓድ ጣሉት፤ ከዚያም ባሪያ አድርገው ሸጡት። ፍትሐዊ አይደለም። በግብፅ በትጋትና በታማኝነት ሠራ፤ ከዚያ በኋላ ግን በሐሰት ተከሶ ወደ እስር ቤት ተጣለ። ፍትሐዊ አይደለም። በእስር ቤት ሳለ የንጉሡን የጠጅ አሳላፊ ረዳው፤ እርሱም ከእስር ሲወጣ እንደሚያስታውሰው ቃል ገባለት። ጠጅ አሳላፊው ግን ሁለት ሙሉ ዓመት ረሳው። ፍትሐዊ አይደለም!

ዮሴፍ ባልተገባው ነገር ምክንያት አሥራ ሦስት ዓመት ያህል በባርነትና በእስር አሳለፈ።

እግዚአብሔር ግን ዮሴፍን አልረሳውም ነበር። ልክ በትክክለኛው ጊዜ ፈርዖን ማንም ሊተረጕመው ያልቻለውን ሕልም አለመ። ጠጅ አሳላፊውም በመጨረሻ ዮሴፍን አስታወሰ። እግዚአብሔር የሕልሙን ትርጕም ለዮሴፍ ገለጠለት፦ ሰባት የጥጋብ ዓመታት ይመጣሉ፤ ከእነርሱም በኋላ ሰባት የአስከፊ ረሃብ ዓመታት ይከተላሉ። ፈርዖን በዚህ እጅግ ከመደነቁ የተነሣ ወደፊት ለሚመጡት አስቸጋሪ ዓመታት እህል እንዲያከማች ዮሴፍን በግብፅ ሁሉ ላይ ሾመው።

ረሃቡ በመጣ ጊዜ ምግብ ለመለመን ማን የመጣ ይመስልሃል? የዮሴፍ ወንድሞች! አላወቁትም ነበር። ማን እንደ ሆነ ባወቁ ጊዜ እጅግ ደነገጡ። ይበቀለናል ብለው አሰቡ።

ዮሴፍ ግን የዛሬውን ጥቅስ ተናገረ፦ «እናንተ ክፉ ነገርን አሰባችሁብኝ፤ እግዚአብሔር ግን … ለመልካም አሰበው።» ዮሴፍ በግብፅ ስለ ነበረ፣ የራሱን ቤተሰብ ጨምሮ የብዙ ሰዎችን ሕይወት ማዳን ቻለ።

የዮሴፍ ታሪክ አንድ ጠቃሚ ነገር ያስተምረናል። ፍትሐዊ ያልሆኑ ነገሮች በእርግጥ ይደርሳሉ፤ በእርግጥም ያማሉ። እግዚአብሔር እነርሱ መልካም እንደ ሆኑ አያስመስልም። እግዚአብሔር ግን እጅግ ፍትሐዊ ያልሆኑትን ነገሮች እንኳ ወስዶ እንደ ሸማኔ አገጣጥሞ መልካም ነገር ሊሠራባቸው ይችላል።

ዮሴፍ ወንድሞቹን ይቅር ለማለትም መረጠ። ምናልባት ይህ የታሪኩ ከሁሉ የሚያስደንቀው ክፍል ሳይሆን አይቀርም። በእግዚአብሔር እጅግ ከመታመኑ የተነሣ በቀል አላስፈለገውም።

አስብበት፦ በአንተ ላይ የደረሰ ፍትሐዊ ያልሆነ ነገር ታስታውሳለህ? ይቅር ማለት ያለብህ ሰው አለ?

ሞክረው፦ የዮሴፍን ታሪክ መጨረሻ በዘፍጥረት 45:1-15 አንብብ። ዮሴፍ ወንድሞቹን እንዴት እንደሚይዛቸው ልብ በል።

ውድ እግዚአብሔር ሆይ፣ አንዳንድ ጊዜ ሕይወት ፍትሐዊ አይደለም፤ ያማልም። ለዮሴፍ እንዳደረግኸው፣ ፍትሐዊ ያልሆኑ ነገሮችን እንኳ ወስደህ ለመልካም ልትጠቀምባቸው ስለምትችል አመሰግንሃለሁ። ነገሮች ፍትሐዊ ሳይሆኑ ሲቀሩ በአንተ እንድታመን እርዳኝ፤ የጎዱኝን ሰዎችም ይቅር እንድል እርዳኝ። በኢየሱስ ስም፣ አሜን።