የሴቲቱ አምላክ

«የሚያስተራርቁ ብፁዓን ናቸው፥ የእግዚአብሔር ልጆች ይባላሉና።» — ከማቴዎስ 5

ሜሪ በኤኬንጌ መኖር እንደ ጀመረች፣ የስምንት ሰዓት የእግር መንገድ ርቆ ካለ መንደር መልእክት መጣ። አለቃቸው በጠና ታሞ ነበር፤ ቢሞት ደግሞ ከቤተሰቡ አንዳንዶቹ ይገደሉ ነበር። ነጪቱ ማ እንድትመጣ ለመኑ።

አለቃ ኤዴምና ማ ኤሜ መንገዱ በጣም ሩቅ ነው አሉ፤ ሜሪ ግን ከአንድ የሴቶች ቡድን ጋር ተነሣች። ዝናቡ ወረደ። መጀመሪያ ጫማዋ ጠፋ፤ ከዚያ ካልሲዎቿ፤ ከዚያም የተሰበረው ጃንጥላዋ! በዝናብ ርሳ ስለ ነበረ አብዛኛውን ልብሷን ደግሞ አወለቀች፤ ሴቶቹም ልብሱን በትልልቅ ሳህኖች አድርገው በራሳቸው ተሸከሙት። ሜሪ በጣም አፈረች። በኋላ ግን የኦኮዮንግን ሕዝብ ልብ እንደዚያ በዝናብ ውስጥ እንደ ተጓዘችው ጕዞ የማረከ ምንም ነገር እንዳላደረገች ተረዳች። አለቃውም ተሻለው፤ ስለዚህ ማንም አልተገደለም።

ከተወሰነ ጊዜ በኋላ ሜሪ ጎሕ ሲቀድ ጦርነት ሊጀመር እንደ ሆነ ሰማች። ታማ ነበር፤ ቢሆንም ተነሣች። ከፊቷ የሚሄድ ከበሮ መቺ እንዲሰጣት አንድ አለቃ ጠየቀች። እርሱም ወደ ጦርነት የምትገባ ሴት የምታውቀው ምን ያህል ጥቂት እንደ ሆነ ብቻ ታሳያለች ብሎ መልእክት ላከ። ሜሪም ይህን መልስ ላከች፦ «የሴቲቱን ኃይል ስትለኩ የሴቲቱን አምላክ መቍጠር እንደ ረሳችሁ ግልጽ ነው።»

በጠላት መንደር የታጠቁ ሰዎች እንደ ግድግዳ ተሰልፈው ዝም ብለው ይጠብቁ ነበር። ከዚያም አንድ ሽማግሌ ወጥቶ በሜሪ እግር ሥር ተንበረከከና ሰላም እንዲያደርጉ እንድትረዳቸው ለመናት። በዝናብ ውስጥ ተጉዛ ልትረዳው የሄደችለት ያው አለቃ ነበር! ቀኑን ሙሉ ወሰደ፤ በመጨረሻ ግን ከጦርነት ይልቅ በቅጣት ክፍያ ተስማሙ።

ከዚያ በኋላ ሰዎች ብዙ ጊዜ ጠባቸውን እንድትዳኝላቸው ማን ይጠይቋት ነበር። እርሷም በጩኸቱ ሁሉ መካከል ተቀምጣ በጸጥታ ሹራብ ትሠራ ነበር። ይህ መፍራቷን እንዳታሳይ ይረዳታል ትል ነበር፤ የሹራብ መሥሪያዎቹ ቅጭልጭል ድምፅም ሁሉንም ያረጋጋ ነበር።

ሰላም ማድረግ የእግዚአብሔር ሥራ ነው። ሰዎች መጣላታቸውን እንዲተዉና እንደገና ወዳጆች እንዲሆኑ ስትረዳ፣ ልክ ኢየሱስ እንደ ተናገረው ከእግዚአብሔር ልጆች አንዱ እየሆንህ ነው።

ውድ እግዚአብሔር ሆይ፣ እባክህ አስተራራቂ አድርገኝ። በዙሪያዬ ያሉ ሰዎች ሲቈጡ የተረጋጋሁና ደግ እንድሆን፣ እንደገና ወዳጆች እንዲሆኑም እንድረዳቸው እርዳኝ። አሜን።