የብሪስቶሉ ጆርጅ ሙለር
የተመረጠውን ዕቃ ማዘጋጀት

ምዕራፍ 5 · 13 ደቂቃ ንባብ · 17 ደቂቃ ማዳመጥ

የተመረጠውን ዕቃ ማዘጋጀት

የእግዚአብሔር ሠራተኛ የሚሠራውን ሥራና እርሱን የሚያገለግልበትን ስፍራ ለማወቅ በእርሱ ፊት መጠበቅ ያስፈልገዋል።

በሃሌ የነበሩ የበሰሉ ደቀ መዛሙርት ጆርጅ ሙለር ለጊዜው በዚህ መንገድ በጸጥታ የእግዚአብሔርን መሪነት እንዲጠብቅ፣ እስከዚያው ድረስም ወደ ሚስዮን መስክ ለመሄድ ሌላ እርምጃ እንዳይወስድ መከሩት። እርሱ ግን ጥያቄውን ከአእምሮው ማስወገድ አልቻለም፤ ጉዳዩን ለመቍረጥም እጅግ ስለ ቸኰለ፣ በሥጋዊ መንገድ ውሳኔ ላይ ለመድረስ በመሞከር ብዙዎች የሚወድቁበትን ስሕተት ሠራ። ወደ ዕጣ ዞረ፤ ይህም ብቻ ሳይሆን የዞረው ዕጣ በሎተሪ የሚጣል ዕጣ ነበር! በሌላ አነጋገር፣ በመጀመሪያ በግሉ ዕጣ አወጣ፤ ከዚያም ለእግዚአብሔር አገልግሎት መስክን የመምረጥ ያህል በከበረ ጉዳይ እርምጃው በ«ዕድል መንኰራኵር» ዙረት እንዲመራ ተስፋ አድርጎ የንጉሣዊ ሎተሪ ቲኬት ገዛ! ቲኬቱ ሽልማት ቢያስገኝ ይሄዳል፤ ካላስገኘ ግን በቤቱ ይቀመጣል። ጥቂት ገንዘብ ስለ ደረሰው ይህን እንደ «ምልክት» ተቀበለ፤ ወዲያውም ለበርሊን ሚስዮናውያን ማኅበር አመለከተ፤ ነገር ግን ማመልከቻው ከአባቱ ፈቃድ ጋር ስላልቀረበ ተቀባይነት አላገኘም።

በዚህም ሰው ሲያቅድ ከሰው በላይ የሆነ እጅ ወሰነ። እግዚአብሔር በዚህ ወቅት ለሥራው ፈጽሞ ያልተገባውን ሰው ከሚስዮን መስክ አራቀው፤ ይህ ሰው ከእግዚአብሔር ጋር ለመሥራት የሚሻ ሁሉ አስቀድሞ በእርሱ ፊት መጠበቅና እርሱንም መጠበቅ እንዳለበት፣ በእንዲህ ያለ ጉዳይም ያለ ልክ መቸኰል ሁሉ ከብክነት የከፋ መሆኑን የሚያስተምረውን የመጀመሪያውን ትምህርት እንኳ ገና አልተማረም ነበርና። ሙሴን ምርኮኛውን እስራኤል እንዲያወጣ ከመላኩ በፊት አርባ ዓመት ያስጠበቀው፣ የጠርሴሱን ሳውልን ለአሕዛብ ሐዋርያ አድርጎ ከመላኩ በፊት ሦስት ዓመት ወደ ዓረብ ያገለለው፣ የገዛ ልጁን እንኳ መሲሕ ሆኖ ከመገለጡ በፊት ሠላሳ ዓመት በስውር የተወው — ይህ አምላክ ሌሎች አገልጋዮቹን ወደ ሥራ ለማሰማራት አይቸኵልም። ትዕግሥት ለሌላቸው ነፍሳት ሁሉ እንዲህ ይላል፦ «ጊዜዬ ገና አልደረሰም፥ ጊዜያችሁ ግን ዘወትር የተመቸ ነው።»

ከዚህ በኋላ ጆርጅ ሙለር ወደ ዕጣ የዞረው ሁለት ጊዜ ብቻ ነው፤ አንድ ጊዜ በእውነተኛ መንታ መንገድ ላይ ሳለ ሲሆን፣ ዕጣውም የተሳሳተውን መንገድ እንዲይዝ መራው፤ በኋላም እጅግ በሚበልጥ ጉዳይ ነበር፤ ውጤቱ ግን ያው ነበር። በሁለቱም ጊዜያት እንደ ተሳሳተ ተረዳ፤ ከዚያን ጊዜ ጀምሮም የእግዚአብሔርን ፈቃድ ለማወቅ እንዲህ ባሉ የአጋጣሚ መንገዶች መጠቀምን ፈጽሞ ተወ። ሁለት ትምህርቶችን ተማረ፤ እግዚአብሔር ከእርሱ ጋር ያደረጋቸው አዳዲስ ነገሮችም እነዚህን ትምህርቶች ይበልጥ እየጠለቀ በልቡ አተሙአቸው፦

አንደኛ፣ በማናቸውም የጭንቅ ጊዜ አስተማማኝ መሪ ከእግዚአብሔር ቃል ጋር የተያያዘ የእምነት ጸሎት ነው።

ሁለተኛ፣ ሰው ስለሚሄድበት መንገድ ያለው ጥርጣሬ ከቀጠለ መጠበቁንም መቀጠል ይገባዋል።

እነዚህ ትምህርቶች እጅግ ውድ ናቸውና በቀላሉ ልናልፋቸው አይገባም። ሥጋ በውሳኔም ሆነ በተግባር ማንኛውንም መዘግየት አይታገሥም፤ ስለዚህ ሥጋዊ ምርጫዎች ሁሉ ያልበሰሉና ያለ ጊዜያቸው የሚደረጉ ናቸው፤ ሥጋዊ አካሄዶችም ሁሉ የተሳሳቱና መንፈሳዊ ያልሆኑ ናቸው። እንድንጸልይ ይመራን ዘንድ እግዚአብሔር ብዙ ጊዜ ያዘገያል፤ ተፈጥሯዊውና ሥጋዊው መንፈስ እንዲገታ፣ የራስ ፈቃድም ለእግዚአብሔር ፈቃድ እንዲሰግድ የጸሎት መልሶች እንኳ ይዘገያሉ።

ከብዙ ዓመታት በኋላ ጆርጅ ሙለር ያለፈበትን መንገድ በእርጋታ ሲመረምር፣ አጠራጣሪን ጉዳይ ለመቍረጥ እንደ አቋራጭ መንገድ «ወደ ዕጣ በችኰላ እንደ ሮጠ»፣ ይህም በተለይ የእግዚአብሔርን ወደ ሚስዮን መስክ ጥሪ በሚመለከት ጥያቄ እጅግ አስደንጋጭ የሆነ ያልተገባ ነገር እንደ ነበረ ተገነዘበ። በዚያን ጊዜ ለሚፈልገው ሥራ ምን ያህል ብቁ እንዳልነበረም አየ፤ ይልቁንም እንዲህ አላዋቂ የሆነና መማር እጅግ የሚያስፈልገው ሰው ሌሎችን ለማስተማር እንዴት ሊያስብ ይችላል ብሎ ራሱን መጠየቅ ይገባው ነበር! የእግዚአብሔር ልጅ ቢሆንም እንኳ፣ በዚያን ጊዜ የወንጌልን እጅግ መሠረታዊ እውነቶች ግልጽ አድርጎ መግለጽ ወይም ማብራራት አይችልም ነበር። ስለዚህ የሚያስፈልገው አንድ ነገር በብዙ ጸሎትና በመጽሐፍ ቅዱስ ጥናት ከሁሉ አስቀድሞ ስለ መለኮታዊ ነገሮች ጥልቅ ዕውቀትና ጥልቅ ልምምድ ለማግኘት መፈለግ ነበር። እንዲህ ያለውን ታላቅ ጉዳይ ለመቍረጥ መቸኰሉ ራሱ ለእውነተኛ አገልግሎት በግልጽ ብቁ እንደማያደርገው ታየው፤ ይህም እንደ ኢየሱስ ክርስቶስ በጎ ወታደር መከራን ለመቀበል አለመዘጋጀቱን ያሳይ ነበር። የሚስዮናዊ ፈተና፣ በተለይም የዘገየ መከር ፈተና አስፈላጊ ገጽታ የሆነው በትዕግሥት መጠበቅ ዘወትር ጫናና ድካም ያመጣል። በመጀመሪያው ውሳኔው መዘግየትን መታገሥ ያልቻለና እግዚአብሔር ፈቃዱን በራሱ መንገድና ጊዜ እስኪገልጥ መጠበቅ ያቃተው ሰው፣ በመስኩ ላይ የድካሙን የከበረ ፍሬ እንደሚጠብቅ ገበሬ ብዙ መታገሥ ወይም በአሕዛብ መካከል በሚደረገው ሥራ የሚገጥሙትን ሺህ አስጨናቂ ችግሮች በመንፈስ ጸጥታ መቀበል ባልቻለ ነበር!

ከዚህም በላይ ዕጣውን ተከትሎ ቢሆን ኖሮ ምርጫው የዕድሜ ልክ ስሕተት ይሆን እንደ ነበር የነበረው እምነት እያደገ ሄደ። በዚያን ጊዜ አእምሮው ምሥራቅ ህንድን የአገልግሎት መስክ አድርጎ ተመኝቶ ነበር። ነገር ግን ከዚያ በኋላ የተከሰቱት ነገሮች ሁሉ እግዚአብሔር ለእርሱ የመረጠው ፈጽሞ የተለየ መሆኑን በግልጽ አሳዩ። ደጋግሞ ያቀረባቸው ጥያቄዎች ደጋግመው ውድቅ ተደረጉ፤ በኋላ በነበሩት አጋጣሚዎችም እጅግ በጥንቃቄና በታላቅ አክብሮት ቢንቀሳቀስም፣ የተከፈተ በር አልተገኘም፤ ይልቁንም በእያንዳንዱ ጊዜ ቅን ዓላማውን ከመፈጸም ተከለከለ። ዕጣው ወደ ሚስዮን መስክ ለተደረገለት የመጨረሻ ጥሪ ምልክት ነው ተብሎም ሊጸድቅ አይችልም፤ የዕጣው ዓላማ የተወሰነ ነበርና፤ ይኸውም በሕይወቱ በሆነ ጊዜ ይሄድ እንደ ሆነ ሳይሆን በዚያን ጊዜ ይሂድ ወይስ ይቅር የሚለውን ለማረጋገጥ ነበር። የጆርጅ ሙለር የኋላ ሕይወት ሁሉ እግዚአብሔር ለእርሱ ፈጽሞ የተለየ ዕቅድ እንደ ነበረው አረጋገጠ፤ ያንንም ዕቅድ እግዚአብሔር ገና ሊገልጠው አልፈለገም ነበር፤ አገልጋዩም ገና ሊያየውም ሆነ ሊከተለው አልተዘጋጀም ነበር። የማንም ሰው ሕይወት የእግዚአብሔር ዕቅድ ሆኖ ከሆነ በእርግጥ ይህ ሕይወት ነበር፤ ጌታ ሲገልጠውም ግልጽና ጽኑ የሆነው መሪነቱ ወደዚህ አቅጣጫ አልነበረም። እግዚአብሔር ለጆርጅ ሙለር ከህንድ የሚሰፋ መስክ፣ ለአሕዛብ ሕዝቦች ከሚሰበከው የወንጌል መልእክት እንኳ የሚሰፋ ምስክርነት አዘጋጅቶለት ነበር። «መቄዶንያ» አገልግሎቱን ትጠብቅ ስለ ነበረች ወደ «ቢታንያ» እንዲሄድ አልተፈቀደለትም ነበር።

ጆርጅ ሙለር በአእምሮው ላይ ያሉትን ጉዳዮች ሁሉ እየበዛ በሚሄድ ድግግሞሽ፣ በትጋትና በዝርዝር በጸሎት ወደ እግዚአብሔር ፊት እንዲያቀርብ ተመራ። ይህ ሰው በተለይ አማላጅ በመሆን ለአማኞች ምሳሌ ሊሆን ነበረው፤ ስለዚህ እግዚአብሔር ከመጀመሪያው በእርሱ ዘንድ እጅግ ቀላልና የሕፃን የሚመስል ጠባይ ሰጠው። በብዙ ነገሮች በዕውቀትና በብርታት ሕፃንነትን አልፎ ጎልማሳ ሊሆን ነበረው፤ ባለማወቅ ስንሳሳትና በድካም ስንሸነፍ አለመብሰላችንን ያሳያልና። በእምነትና በልጅነት መንፈስ ግን ዘወትር ትንሽ ልጅ ሆኖ ኖረ። አቶ ጄ. ሀድሰን ቴይለር በተፈጥሮ የተለመደው የእድገት ሥርዓት ከሕፃንነት ወደ ጉልምስና ከዚያም ወደ ብስለት ቢሆንም፣ በጸጋ ግን እውነተኛው እድገት ሁልጊዜ ወደ ኋላ ወደ ሕፃን አልጋ እንደሆነ በሚገባ ያሳስበናል፤ የመንፈስን ሕፃንነት እያጣን ሳይሆን ይልቁን ይበልጥ እያገኘን ትንንሽ ልጆች መሆንና እንደዚያው መኖር ይገባናል። የደቀ መዝሙሩ እጅግ የበሰለ ጉልምስና የሕፃንነቱ ፍጹምነት ብቻ ነው። ጆርጅ ሙለር ከአባቱ ጋር ባለው ግንኙነት ሁሉ በእውነት፣ በእርግጥና በሙላት ትንሽ ልጅ የሆነበት ጊዜ በዘጠና ሦስተኛው የዕድሜ ዓመቱ እንደ ነበረው ያለ አልነበረም።

በዚህ ሁኔታ በእግዚአብሔር አሠራር ወደ ህንድ ከመሄድ ስለ ተከለከለ፣ ከእግዚአብሔር ጋር አብሮ የመሥራትን መለኮታዊ ጥበብ ገና በእውነት ብዙም ባያውቅም፣ በአገሩ የተወሰነ ሥራ ጀመረ። ለሌሎች ስለ ነፍሳቸው ደኅንነት ይናገር፣ በኃጢአት ለነበሩት የቀድሞ ባልንጀሮቹ ይጽፍ፣ ትራክቶችንና የሚስዮን ጽሑፎችን ያሰራጭ ነበር። ድካሙም ያለ ማበረታቻ አልቀረም፤ ምንም እንኳ አንዳንድ ጊዜ ዘዴዎቹ የማይመቹ አልፎ ተርፎም የሚያስቁ ቢሆኑም፤ ለምሳሌ በሜዳ ላይ ለአንድ ለማኝ መዳን እንደሚያስፈልገው ሲነግረው፣ በጆሮው መጮኽ ብቻውን የልቡን ድንዳኔ የሚያሸንፍ ይመስል፣ ግድ የለሽነቱን ለማሸነፍ ድምፁን ይበልጥ ከፍ እያደረገ ተናገረ!

በ1826 ለመጀመሪያ ጊዜ ለመስበክ ሞከረ። ከሃሌ ስድስት ማይል ያህል ርቆ የሚኖር ያልዳነ አንድ የትምህርት ቤት መምህር ወደ ጌታ እንዲመለስ ምክንያት ሆነ፤ ይህም መምህር በአጥቢያው የነበሩትን አንድ ያረጁና የደከሙ ካህን መጥቶ እንዲረዳ ለመነው። የሥነ መለኮት ተማሪ ስለ ነበረ መስበክ ይፈቀድለት ነበር፤ ነገር ግን እስከዚያ ድረስ አላዋቂ መሆኑን ማወቁ ከልክሎት ነበር። ሆኖም የሌላን ሰው ስብከት በቃሉ በማጥናት ሰሚዎቹን ሊጠቅም እንደሚችል አሰበ፤ ስለዚህ ይህን ለማድረግ ተነሣ። ማዘጋጀቱ የባርነት ሥራ ነበር፤ ስብከቱን በቃሉ ለመያዝ አብዛኛውን ሳምንት ወስዶበታልና፤ ማቅረቡም ደስታ የሌለው ሥራ ነበር፤ እግዚአብሔር የሰጠውን መልእክትና ምስክርነት የሚያቀርብን ሰው የሚከተለው ሕያው ኃይል በፍጹም አልነበረበትምና። የሌላውን ስብከት እንደ ራሱ አድርጎ በመስበኩ የሐሰት ሚና እየተጫወተ መሆኑን ለማየት ሕሊናው ገና በበቂ አልበራም ነበር፤ የራሱን ስብከት ለማዘጋጀት የሚያስችለውን ያህል የእግዚአብሔርን ቃልም ሆነ በውስጡ ያለውን የመንፈስን ሕይወት የማያውቅን ሰው ለስብከት ማቆም የእግዚአብሔር መንገድ እንዳልሆነ ለመረዳት የሚያስችል መንፈሳዊ ማስተዋልም አልነበረውም። ከሰባኪዎች መካከል እንኳ ስብከት ተራ ሰብዓዊ ሙያ ሳይሆን መለኮታዊ ጥሪ መሆኑን፣ የእውነት አገልግሎት የልምምድን ምስክርነት እንደሚጠይቅ፣ የሌላውን ሰው ስብከት መስበክም ቢበዛ ከተፈጥሮ ውጭ በረጃጅም እንጨቶች ላይ ቆሞ እንደ መራመድ መሆኑን የሚገነዘቡ ምንኛ ጥቂቶች ናቸው!

ጆርጅ ሙለር በኦገስት 27 ቀን 1826 ይህን በቃሉ የያዘውን ስብከት ጠዋት ስምንት ሰዓት ላይ በንዑስ ቤተ ጸሎቱ፣ ከሦስት ሰዓት በኋላም በአጥቢያው ቤተ ክርስቲያን በመደጋገም አሳማሚ ጥረቱን «እንደ ምንም ጨረሰ»። ከሰዓት በኋላ እንደ ገና እንዲሰብክ ተጠየቀ፤ ነገር ግን በቃሉ የያዘው ሁለተኛ ስብከት ስላልነበረው፣ ዝም ማለት አሊያም ለእርዳታ በጌታ ላይ መደገፍ ነበረበት። ቢያንስ የማቴዎስን አምስተኛ ምዕራፍ አንብቦ በቀላሉ ሊያብራራው እንደሚችል አሰበ። ነገር ግን የመጀመሪያውን ብፅዕና ገና እንደ ጀመረ እጅግ እንደ ተረዳ ተሰማው። ከንፈሮቹ ብቻ ሳይሆኑ ቅዱሳት መጻሕፍትም ተከፈቱለት፤ የገዛ ነፍሱም ሰፋች፤ በጠዋቱ ደካማና እንደ መሣሪያ የተደጋገመ ንግግሩ ፈጽሞ ያልታወቀ ሰላምና ኃይል የከሰዓቱን ቀላል ማብራሪያዎች ተከተለ፤ ከዚህም በተጨማሪ ከሕዝቡ አቅም በላይ ሳይሆን በደረጃቸው ይናገር ነበር፤ የዕለት ተዕለት አነጋገሩና ትጋቱም ትኵረታቸውን ሳበ።

ወደ ሃሌ ሲመለስ፣ «ይህ ነው እውነተኛው የስብከት መንገድ» ብሎ ለራሱ ተናገረ፤ ምንም እንኳ እንዲህ ያለው ቀላል የማብራሪያ ዘይቤ የተማረውንና የሠለጠነውን የከተማ ጉባኤ ያን ያህል ላይስማማ ይችላል ብሎ ቢሰጋም። የሰው ጥበብ የሚያባብል ቃል የክርስቶስን መስቀል እንዴት ከንቱ እንደሚያደርገው፣ ስብከትን ላልተማሩ ሰዎች ግልጽ የሚያደርገው ያው ቀላልነትም እጅግ የተማሩት ደግሞ እንዲረዱት እንደሚያረጋግጥ፣ ተቃራኒው ግን እውነት እንዳልሆነ ገና መማር ነበረበት።

ይህ ለኋላ አገልግሎቱ በዝግጅቱ ውስጥ ሌላ እጅግ አስፈላጊ እርምጃ ነበር። ዕድሜውን ሙሉ ከሰባኪዎች ሁሉ እጅግ ቀላልና መጽሐፍ ቅዱሳዊ ከሆኑት ጋር ሊቈጠር ነበረው። ይህ በመድረክ ላይ ያደረገው የመጀመሪያ ሙከራ ተደጋጋሚ ስብከቶችን አስከተለ፤ ንግግሩ በክርስቶስ ባለ ቅንነት በሆነ መጠን በሥራው ደስታን፣ ከእርሱም መከርን አገኘ። የአንድ ታላቅ ሰባኪ በቃል የተያዘ ስብከት የሰውን ምስጋና ሊያስገኝ ይችላል፤ ከእግዚአብሔር ምስጋና ያገኘው ግን የቃሉ ቀላል ምስክርነትና አማኙ ለቃሉ የሚሰጠው ምስክርነት ነበር። ያን ጊዜ ስብከቱን እግዚአብሔር በፍሬ ብዙም አልባረከውም ነበር። ጌታ ለማጨድ፣ ለመዝራትም እንኳ ገና እንዳልተዘጋጀ እንዳየ አያጠራጥርም፤ በዝግጅቱ ውስጥ ጸሎት፣ በአቀራረቡም ቅባት ገና እጅግ ጥቂት ነበረ፤ ስለዚህ ድካሙ በአንጻሩ ፍሬ አልባ ነበር።

በዚሁ ጊዜ ገደማ ሌላ እርምጃ ወሰደ — ምናልባትም ከስሙ ጋር እጅግ ከተቈራኘው የሥራ ዓይነት ጋር ባለው ግንኙነት እስከዚያ ጊዜ ከወሰዳቸው ሁሉ እጅግ ጉልህ የሆነው ነበር። ለሁለት ወር ያህል በታወቁት በኤ. ኤች. ፍራንከ በተሠሩት የወላጅ አልባ ሕፃናት ቤቶች ውስጥ ለድሀ የሥነ መለኮት ተማሪዎች በነጻ የሚሰጠውን ማደሪያ ተጠቀመ። በሃሌ የሥነ መለኮት ፕሮፌሰር የነበረውና ከመቶ ዓመት በፊት (1727) የሞተው ይህ ቅዱስ ሰው ፈጽሞ በእግዚአብሔር ላይ ተደግፎ የወላጅ አልባ ሕፃናት ማሳደጊያ እንዲመሠርት ተመርቶ ነበር። ጆርጅ ሙለር በብሪስቶል የሠራው የሕይወት ዘመን ሥራ ሁሉ፣ እርሱ ራሱ በግማሽ ሳያውቀው፣ ሐሳቡንም አብነቱንም ያገኘው በሃሌ ከነበረው ከፍራንከ የወላጅ አልባ ሕፃናት ማሳደጊያ ነበር። ይህ ወጣት ተማሪ ያረፈበት ሕንጻ ራሱ ለእርሱ በዓይን የሚታይ ትምህርት ነበር — ሕያው እግዚአብሔር ጸሎትን እንደሚሰማ፣ ለጸሎት መልስ ብቻ በመስጠትም ለወላጅ አልባ ሕፃናት ቤት ሊሠራ እንደሚችል የሚያሳይ የሚታይ፣ እውነተኛና የሚዳሰስ ማስረጃ ነበር። ያ ትምህርት ፈጽሞ አልጠፋበትም፤ ጆርጅ ሙለርም የእንዲህ ያለ ቅዱስ ድካም ሐዋርያዊ ተተኪ ሆነ! የራሱ የእምነት ሥራ ፍራንከ ባሳየው በጸሎት ላይ የመታመን ቀላል ምሳሌ ምን ያህል ባለ ዕዳ እንደ ሆነ ብዙ ጊዜ ጽፏል። ከሰባት ዓመት በኋላ የሕይወት ታሪኩን አነበበ፤ በዚህም እርሱ ክርስቶስን እንደ ተከተለ እርሱን ለመከተል ይበልጥ ተነሣሣ።

ጆርጅ ሙለር በእነዚያ የመጀመሪያ ቀኖች የነበረው መንፈሳዊ ሕይወት በሚያስገርም ሁኔታ ውጣ ውረድ የበዛበት ነበር። ለምሳሌ የሉተራን የሥነ መለኮት ተማሪ ሆኖ ለመስበክ ይሞክር የነበረው እርሱ፣ የክርስቶስን መከራ በአእምሮው ለመያዝና በዚህም በኃጢአት የሚወድቅበትን ጊዜ ለመቀነስ ተስፋ በማድረግ በፍሬም የተቀመጠ የስቅለት ምስል በክፍሉ ሰቀለ። እንዲህ ያሉት እርዳታዎች ግን ብዙም አልጠቀሙትም፤ በእንዲህ ያሉ ሰው ሠራሽ ድጋፎች ላይ በተደገፈ ቍጥር ይበልጥ ደጋግሞ የሚበድል ይመስል ነበርና።

በዚህ ጊዜ ከአቅሙ በላይ ይሠራ ነበር፤ አንዳንድ ጊዜ በቀን አሥራ አራት ሰዓት ይጽፍ ነበር፤ ይህም የነርቭ ድካምና ድባቴ አመጣበት፤ ለልዩ ልዩ ፈተናዎችም አጋለጠው። የወይን ጠጅና ቢራ ወደሚሸጥበት ወደ አንድ የጣፋጭ ምግብ ሱቅ ደፍሮ ገባ፤ ከዚያም ለአማኝ በማይገባ በእንዲህ ያለ ጠባይ ሕሊናው ወቀሰው፤ ደግሞም የሚገባውን ቅጣት በማምጣት ፋንታ ርኅራኄውን ያበዛለትን እግዚአብሔርን በተመለከተ ጸጋ የጎደለውና ምስጋና ቢስ የሆነ ሐሳብ ሲያስብ ራሱን አገኘው።

ባለጠጋ፣ ለጋስና የማዕረግ ባለቤት ለሆነች አንዲት ሴት ብድር እንድትሰጠው ጠይቆ ጻፈ፤ የጠየቀውንም ገንዘብ ልክ እንዳለ ከአንድ ደብዳቤ ጋር ተቀበለ፤ ደብዳቤው ግን ከእርስዋ ሳይሆን የእርሱ ደብዳቤ «በልዩ አሠራረ እግዚአብሔር» እጁ ከገባ ከሌላ ሰው ነበር፤ ያም ሰው «የአዳኙ የኢየሱስ ክርስቶስ ሰጋጅ አምላኪ» ብሎ ፈረመበት። ጸሐፊው የተጠየቀውን ገንዘብ እንዲልክ ተመርቶ ሳለ፣ የጥበብ የማስጠንቀቂያና የምክር ቃላትን አከለበት — እነዚህም ቃላት ለጆርጅ ሙለር ትክክለኛ ፍላጎት እጅግ የሚስማሙ ስለ ነበሩ፣ ስሙን ያልገለጸውን ጸሐፊ የመራውን ከሰው በላይ የሆነውን እጅ በግልጽ አየ። በዚያ ደብዳቤ «ከከንቱነትና በራስ ከመርካት ሁሉ ይድን ዘንድ በመትጋትና በጸሎት እንዲፈልግ»፣ «ዋና ዓላማውም ይበልጥ እየጨመረ ትሑት፣ ታማኝና ጸጥ ያለ መሆን» እንዲሆን፣ «‹ጌታ ሆይ፥ ጌታ ሆይ› እያሉ በልባቸው ግን እርሱን በጥልቅ ከማይዙት» ወገን እንዳይሆን ተመከረ። ደግሞም «ክርስትና በቃል ሳይሆን በኃይል እንደ ሆነ፣ በእኛም ውስጥ ሕይወት መኖር እንዳለበት» ተሳሰበ።

በማያውቀው ሰው በኩል ከእግዚአብሔር በመጣለት በዚህ መልእክት ልቡ እጅግ ተነካ፤ ይልቁንም መልእክቱ ከተላከው ገንዘብ ጋር የመጣው ለደቀ መዝሙር የማይገባ ጠባይ ብቻ ሳይሆን ስለ ሰማያዊ አባቱም ክፉ ሐሳብ ሲያስብ በነበረበት ጊዜ በመሆኑ ነበር። ብቻውን ለመንሸራሸር ወጣ፤ በእግዚአብሔር ቸርነትና በራሱ ምስጋና ቢስነት እጅግ ተነክቶ ከአንድ አጥር በስተ ጀርባ ተንበረከከ፤ አንድ ጫማ ጥልቀት ባለው በረዶ ውስጥ ቢሆንም፣ ለግማሽ ሰዓት በምስጋና፣ በጸሎትና ራሱን በማስገዛት ራሱን ረሳ።

ይሁን እንጂ የሰው ልብ እጅግ ተንኰለኛ ስለ ሆነ ከጥቂት ሳምንታት በኋላ እንደ ገና ወደ ኋላ ተመልሶ ነበር፤ ለጊዜውም እንደ ገና ግድ የለሽና ጸሎት የለሽ ሆነ፤ አንድ ቀንም የሕሊናውን ድምፅ በወይን ጽዋ ለማስጠም ሞከረ። መሐሪው አባት ግን ልጁን ለስንፍናና ለኃጢአት አሳልፎ አልሰጠውም። በአንድ ወቅት በስካርና በብልግና እጅግ ርቆ ሊሄድ ይችል የነበረው እርሱ አሁን ጥቂት ብርጭቆ ወይን ከበቂ በላይ ሆነበት፤ ለእንዲህ ያሉ ተድላዎች የነበረው ፍላጎት ጠፍቶ ነበር፤ ያንን የሕሊናንና የእግዚአብሔርን መንፈስ ዝግ ያለ ለስላሳ ድምፅ ዝም የማሰኘት ኃይሉም እንዲሁ ጠፍቶ ነበር።

በክርስቲያናዊ ልምምድ ውስጥ የነበሩት እንዲህ ያሉ መዋዠቆች በከፊል የቅዱስ ኅብረትና የአምልኮተኛ ባልንጀሮች እጦት ያስከተሏቸው ነበሩ። እያንዳንዱ ደቀ መዝሙር በቅድስና ለመኖር እርዳታ ያስፈልገዋል፤ ይህም ወጣት አማኝ የሚራሩለት የእምነት ወንድሞች የሚሰጡትን መንፈሳዊ ብርታት ይናፍቅ ነበር። በዕረፍት ጊዜያት ከአባቱ መኖሪያ ሦስት ማይል ያህል ርቆ በሚገኘው የሞራቪያውያን መንደር በግናዳው እንዲህ ያለ የነፍስ እረፍት አግኝቶ ነበር፤ ሃሌ ራሷ ግን የምትሰጠው እርዳታ ጥቂት ነበር። ብዙ ጊዜ ወደ ቤተ ክርስቲያን ይሄድ ነበር፤ ወንጌልን ግን የሚሰማው አልፎ አልፎ ነበር፤ ከ30,000 በላይ ሕዝብ በሚኖርባት በዚያች ከተማ ካሉት አገልጋዮች ሁሉ መካከል አንድ ብሩህ ካህን እንኳ አላገኘም። ስለዚህ እንደ ዶክተር ቶሉክ ያለውን ሰባኪ መስማት ሲችል፣ ይህን ዕድል ለማግኘት ዐሥር ወይም ዐሥራ አምስት ማይል በእግሩ ይሄድ ነበር። በአቶ ዋግነር ቤት ስብሰባዎቹ ቀጠሉ፤ በጌታ ቀን ምሽቶችም ስድስት ወይም ከዚያ በላይ የሆኑ አማኝ ተማሪዎች ይሰበሰቡ ነበር፤ ሁለቱም ጉባኤዎች የጸጋ መንገዶች ነበሩ። ከ1827 ፋሲካ ጀምሮ በሃሌ እስከ ቆየበት ጊዜ ድረስ ይህ የኋለኛው ስብሰባ በገዛ ክፍሉ ይደረግ ነበር፤ ይህም ስብሰባ ከመቶ ዓመት በፊት ዌስሊዎችንና ዋይትፊልድን ለታላቅ ሥራቸው ካዘጋጁት በኦክስፎርድ በሊንከን ኮሌጅ ከነበሩት የ«ቅዱስ ክበብ» ትንንሽ ስብሰባዎች ጋር ጎን ለጎን ሊቈጠር ይገባዋል። ጆርጅ ሙለር ሃሌን ከመልቀቁ በፊት በክፍሉ በሚደረገው በዚህ ሳምንታዊ ስብሰባ የሚገኙት ሰዎች ቍጥር ሃያ ደርሶ ነበር።

እነዚህ ጉባኤዎች ከመጀመሪያ እስከ መጨረሻ እጅግ ቀላልና እንደ ጥንቱ ዘመን ነበሩ። ከጸሎት፣ ከመዝሙርና ከእግዚአብሔር ቃል ንባብ በተጨማሪ አንድ ወይም ከዚያ በላይ የሆኑ ወንድሞች ይመክሩ ወይም ከመንፈሳዊ መጻሕፍት የተመረጡ ክፍሎችን ያነብቡ ነበር። በዚያም ወጣቱ ሙለር ልቡን ለሌሎች በነጻነት ከፈተ፤ በምክራቸውና በጸሎታቸውም ከብዙ ወጥመዶች ዳነ።

ገና ሊማረው የሚገባ አንድ ትምህርት የጥበብና የብርታት ሁሉ ብቸኛ ምንጭ ቅዱሳት መጻሕፍት መሆናቸው ነበር። ብዙ ደቀ መዛሙርት በተግባር ከእግዚአብሔር መጽሐፍ ይልቅ ሃይማኖታዊ መጻሕፍትን ይመርጣሉ። እርሱ በእርግጥ አማኞች ነን የሚሉ እጅግ ብዙ ሰዎች አእምሮአቸውን የሚያስጠምዱበት ንባብ አብዛኛው ከንቱ ገለባ እንደ ሆነ ተረድቶ ነበር — ለምሳሌ የፈረንሳይና የጀርመን ልብ ወለዶች፤ ነገር ግን በኋለኛው ሕይወቱ እንደ ነበረው፣ ሌሎች መጻሕፍትን ከሞላ ጎደል ትቶ የእግዚአብሔርን ቃል በየዕለቱና በሥርዓት የማንበብ ልማድ ገና አላዳበረም ነበር። በዘጠና ሁለተኛው የዕድሜ ዓመቱ ለዚህ መጽሐፍ ጸሐፊ፣ ከሌላ ከማንኛውም ንባብ ለአንድ ገጽ አሥር የመጽሐፍ ቅዱስ ገጾችን እንደሚያነብብ እርግጠኛ መሆኑን ነገረው። ነገር ግን በ1825 የሚጸልዩ ደቀ መዛሙርትን ቡድን ለመጀመሪያ ጊዜ እስካገኘባት እስከዚያች የኖቬምበር ቀን ድረስ፣ እንደሚያስታውሰው ከመጻሕፍት ሁሉ የሚበልጠውን መጽሐፍ አንድ ምዕራፍ እንኳ አንብቦ አያውቅም ነበር፤ በአዲሱ ሕይወቱ የመጀመሪያዎቹ አራት ዓመታትም በመንፈስ ያልተነሡ ሰዎች ለጻፏቸው ሥራዎች ሕይወት ካላቸው ቃላት ይልቅ በተግባር ቅድሚያ ሰጠ።

ለቅዱሳት መጻሕፍት እውነተኛ ፍቅር ከተፈጠረለት በኋላ፣ የእግዚአብሔርን መጽሐፍ እንዲህ ቸል እንዴት ሊል እንደ ቻለ ሊገባው አልቻለም። እግዚአብሔር ደራሲ ለመሆን ራሱን ዝቅ ካደረገ፣ ቅዱሳን ሰዎችንም ቅዱሳት መጻሕፍትን እንዲጽፉ በመንፈሱ ካነሣሣ፣ በእነርሱ እጅግ ወሳኝ የሆኑትን እውነቶች እንደሚያካፍል ግልጽ መሰለው፤ መልእክቱም የሰውን ደኅንነት የሚመለከቱትን ጉዳዮች ሁሉ ይሸፍናል፤ ስለዚህ በግዴታና በደስታ ድርብ ግፊት በተፈጥሮና በልማድ ወደ መጽሐፍ ቅዱስ መመለስ ይገባናል። ከዚህም በላይ ይህን የእግዚአብሔር መጽሐፍ ሲያነብብና ሲያጠና፣ ከደራሲው ጋር ይበልጥ እየጠለቀ ወደሚሄድ የቅርብ ትውውቅ እንደ ገባ ተሰማው። በሕይወቱ የመጨረሻዎቹ ሃያ ዓመታት በዓመት አራት ወይም አምስት ጊዜ በጥንቃቄ ከዳር እስከ ዳር አነበበው፤ በዚህም በእግዚአብሔር ዕውቀት በፍጥነት እያደገ መሆኑ ይበልጥ እየተሰማው ሄደ።

እንዲህ ያሉትን የመጽሐፍ ቅዱስ ጥናት ምክንያቶች ማንም እውነተኛ አማኝ ቸል ማለቱ እንግዳ ነገር ነው። ራስኪን «ስለ ንጉሡ ግምጃ ቤቶች» ብሎ ሲጽፍ፣ የሁሉን ሰው «በሕይወት የመሻሻል» ምኞት ይጠቅሳል፤ ይህም «መልካም ማኅበረሰብ ውስጥ መግባት» ማለት ነው። ሰው ከዚህ ዓለም ታላላቅና ደጋግ ሰዎች ጋር ለመተዋወቅ፣ ከዚያም በኋላ እንኳ ወደ እነርሱ ለመቅረብ፣ ከሰው ማኅበረሰብ ነገሥታትና ንግሥታት ጋር ለመገናኘት ምን ያህል መሰናክሎች ይገጥሙታል! ይሁን እንጂ አላዋቂነታችን፣ ድህነታችን ወይም ዝቅተኛ ደረጃችን ምንም ይሁን ምን፣ የፈለግነውን ያህል ጊዜ የሚገናኙንና የሚያነጋግሩን ከፍተኛ ደረጃ ያላቸው ሰዎች ማኅበረሰብ ተከፍቶልናል — ይኸውም የደራሲዎች ማኅበረሰብ ነው፤ ወደ ግል የእንግዳ መቀበያ ክፍላቸው የሚያስገባው ቍልፍም መጻሕፍቶቻቸው ናቸው።

ራስኪን እንዲህ ይጽፋል፤ ይህም ሁሉ በሚያምር ሁኔታ እውነት ነው፤ ነገር ግን በቃሉ በኩል ወደ ታላቁ የዓለማት ደራሲ የመቅረብን መብት የሚያደንቁ፣ ከአማኞች መካከል እንኳ፣ ምንኛ ጥቂቶች ናቸው! ድሀና ባለጠጋ፣ ከፍተኛና ዝቅተኛ፣ አላዋቂና ምሁር፣ ወጣትና ሽማግሌ፣ ሁሉም በአንድነት ወደ ነገሥታት ንጉሥ የእንግዳ መቀበያ ክፍል በደስታ ይቀበላሉ። ስለ እግዚአብሔር እጅግ የቀረበ ዕውቀት በአንድ ቅድመ ሁኔታ ይገኛል — ቅዱሳት መጻሕፍቱን በጸሎትና በልማድ መመርመርና በዚያ ያገኘነውን ወደ መታዘዝ መተርጐም ነው። የእግዚአብሔርን ሕግ ቀንና ሌሊት እንዲህ ለሚያሰላስል፣ ወደዚህ ፍጹም የነጻነት ሕግ ለሚመለከትና መመልከቱን ለሚቀጥል ሰው የተሰጠው ተስፋ ልዩ ነው፤ በሁለቱም ኪዳናትም ይገኛል፦ «የሚሠራውም ሁሉ ይከናወንለታል»፤ ያም ሰው «በሥራው የተባረከ ይሆናል»። (መዝሙር 1:3፤ ኢያሱ 1:8፤ ያዕቆብ 1:25 አወዳድሩ።)

ጆርጅ ሙለር ይህን የደስታና የስኬት ምንጭ እንዳገኘ ወዲያው ከዚህ የሕይወት ውኃ ምንጭ በልማድ ይጠጣ ጀመር። በኋለኛው ሕይወቱ፣ ቀደም ብሎ ይህን የመለኮታዊ ጥበብና ብርታት ምንጭ ቸል በማለቱ ምክንያት ከአላዋቂነቱና ከአቅመ ቢስነቱ ጋር ለረጅም ጊዜ በመንፈሳዊ ሕፃንነት እንደ ቆየ አዘነ። በእግዚአብሔር ዕውቀት ማደጉ በዚህ ሁኔታ በተገታበት ጊዜና መጠን ሁሉ በጸጋ ማደጉም እንዲሁ ተሰናከለ። ከእግዚአብሔር ጋር የነበረው የቅርብ ጉዞ የጀመረው፣ እንዲህ ያለው ጉዞ ሁልጊዜ ለታዛዥ ነፍስ «ለእግር መብራት ለመንገድም ብርሃን» እንደ ሆነ በመለኮት በተነገረለት በዚያ በመንፈስ በተነሣው ቃል ብርሃን ውስጥ እንደ ሆነ በተማረበት ነጥብ ላይ ነበር። ከጌታ ጋር የቅርብ ኅብረትን ለመጠበቅ የሚሻ ሁሉ የዚህን ባልንጀርነት አውራ ጎዳና በቅዱሳት መጻሕፍት ውስጥ ዘወትር ማግኘት አለበት። የእግዚአብሔር መኳንንት፣ ባላባቶቹ፣ የመንግሥቱ ልዑላን የምድር ጠቢባን፣ ኃያላንና ከፍ ባለ ዘር የተወለዱ አይደሉም፤ ይልቁንም ብዙ ጊዜ በሰዎች ዘንድ ድሆች፣ ደካሞችና የተናቁ ሆነው በፊቱ የሚኖሩና በመንፈስ በተነሣው ቃሉ በኩል ከእርሱ ጋር በአምልኮ የሚነጋገሩ ናቸው።

የንጉሡ ግምጃ ቤቶች ብቻ ሳይሆን ወደ ንጉሡ ራሱ በነጻ የሚያስገባውን ቍልፍ መጠቀምን እንዲህ የተማሩ ብፁዓን ናቸው!

ቀዳሚ ቀጣይ