ማጠቃለያ፦ ደፋር ሴት ልጅ

ሌላ 30 ቀናትን ፈጸምሽ! አንቺ ደፋር የንጉሡ ሴት ልጅ ሆይ፣ ጎበዝ!

በመጽሐፍ 1 ውስጥ ማን እንደ ሆንሽ ተማርሽ፦ በእግዚአብሔር የተወደድሽ፣ የተመረጥሽና ሆን ተብለሽ የተፈጠርሽ መሆንሽን። በዚህ መጽሐፍ ውስጥ ደግሞ ይህ ለአኗኗርሽ ምን ትርጉም እንዳለው ተማርሽ። የእግዚአብሔር ስለ ሆንሽ ደፋር መሆን ትችያለሽ።

ደፋር መሆን ማለት ፈጽሞ አለመፍራት ማለት እንዳልሆነ ተማርሽ። ጭንቀቶችሽን ወደ እግዚአብሔርና ወደሚወዱሽ ሰዎች ማምጣት፣ ሌሊት በእርሱ ጥበቃ ማረፍ፣ ስለ መልክሽ ብዙ አለመጨነቅ፣ በየቀኑ አንድ ቀንን ብቻ መኖርና ፍጹም ፍቅሩ ፍርሃትን አውጥቶ እንደሚጥል ማስታወስ ማለት ነው።

እንደ አምስቱ የሰለጰዓድ ሴቶች ልጆች ድምፅሽን መጠቀምን ተማርሽ፦ በትክክለኛው ጊዜ መናገርን፣ ስሕተት ለሆነው ነገር እንቢ ማለትን፣ የሚጎዱ ምስጢሮችን ፈጽሞ አለመደበቅን፣ እርዳታ መጠየቅንና እውነትን በፍቅር መናገርን።

ያገለገሉ ሴቶችን አገኘሽ፦ ፌቤንን፣ ጵርስቅላን፣ ዶርቃን፣ የጴጥሮስን አማትና የሰራፕታዋን መበለት። በደስታ ማገልገልንም ተማርሽ።

እንደ ሙሴ እኅት ማርያምና እንደ ሳባ ንግሥት መምራትን ተማርሽ፦ በጥበብ ቃላት፣ ጸንቶ በመቆም፣ ሌሎችን በማገልገልና እንደ ሎይድና እንደ ኤውንቄ እምነትን ለሌሎች በማስተላለፍ።

ኢየሱስን ከተከተሉት ደፋር ሴቶች ጋርም አብረሽ ተጓዝሽ፦ ከመግደላዊት ማርያም፣ ከዮሐና፣ ከሶስና፣ የልብሱን ጫፍ ከነካችው ሴት፣ እምነቷ ተስፋ ካልቆረጠው እናት፣ እንዲሁም በመስቀሉና በመቃብሩ አጠገብ ከነበሩት ሴቶች ጋር።

በድፍረት በእግዚአብሔር የታመኑ አምስት ተጨማሪ እውነተኛ ሴቶችንም አገኘሽ፦ ሄለን ሮዝቪርን፣ ፓንዲታ ራማባይን፣ አይዳ ስከደርን፣ ኤልሳቤት ኤሊየትንና ሊሊያስ ትሮተርን።

ስንት ደፋር ሴቶች ናቸው! አሁን ደግሞ አንቺም ከእነርሱ አንዷ ነሽ።

ገና በኢየሱስ ካልታመንሽ

ልታደርጊው የምትችዪው ከሁሉ የሚበልጠው ደፋር ነገር በሕይወትሽ ሁሉ በኢየሱስ መታመን ነው። ስለ ኃጢአትሽ የሚገባውን ቅጣት ለመቀበል በመስቀል ላይ ሞተ፤ መግደላዊት ማርያም እንዳየችውም ከሙታን ተነሣ። ይቅርታንና በእግዚአብሔር ቤተ ሰብ ውስጥ የዘላለም ስፍራን ያቀርብልሻል። እንደሚከተለው ያለ ጸሎት መጸለይ ትችያለሽ፦

ውድ ኢየሱስ ሆይ፣ አንተ የእግዚአብሔር ልጅ እንደ ሆንህ አምናለሁ። ስለ ኃጢአቴ በመስቀል ላይ እንደ ሞትህና ከሙታን እንደ ተነሣህ አምናለሁ። ስለ ሠራሁት ክፉ ነገር አዝናለሁ። አዳኜ አድርጌ በአንተ እታመናለሁ፤ አንተን እንደ ተከተሉት ደፋር ሴቶችም እስከ መጨረሻው ልከተልህ እፈልጋለሁ። የንጉሡ ሴት ልጅ ስላደረግኸኝ አመሰግንሃለሁ። አሜን።

ያንን ጸሎት ከጸለይሽ ለአንድ ሰው ንገሪ፦ ለእናትሽ ወይም ለአባትሽ፣ ለመጋቢ፣ ለአንድ መሪ ወይም ለአንዲት ክርስቲያን ጓደኛሽ!

ቀጥሎ የሚመጣው

በሚቀጥለው የንጉሡ ሴት ልጆች መጽሐፍ 3 ውስጥ ስለ ማደግ ትማሪያለሽ፦ ስለ ስሜቶችሽ፣ እግዚአብሔር ሰውነትሽን እንዴት እንደ ቀረጸውና ስታድጊ ስለሚመጡት ለውጦች፣ ጥበብ ያለበት ምርጫ ስለ ማድረግ፣ እግዚአብሔር እንድታደርጊው የሚጠራሽ ምን ሊሆን እንደሚችል ስለ ማወቅ፣ እንዲሁም እንድታድጊ ሊረዱሽ የሚችሉ ሴቶችን ስለ ማግኘት።

እስከዚያው ድረስ ደፋር ሁኚ። አንቺ የንጉሡ ሴት ልጅ ነሽ።

«እግዚአብሔር የኃይልና የፍቅር ራስንም የመግዛት መንፈስ እንጂ የፍርሃት መንፈስ አልሰጠንምና።»

— 2ኛ ጢሞቴዎስ 1:7