ቀን 8 — ማንም ያላስተዋላት እኅት

«ልያ እንዳልተወደደች እግዚአብሔር ባየ ጊዜ ማኅፀንዋን ከፈተ፤ ራሔል ግን መካን ነበረች።»

— ዘፍጥረት 29:31

«ደግሞም ፀነሰች፤ ወንድ ልጅንም ወለደች፤ እርስዋም፦ ‹በዚህ ጊዜ እግዚአብሔርን አመሰግናለሁ› አለች። ስለዚህም ስሙን ይሁዳ ብላ ጠራችው።»

— ዘፍጥረት 29:35

ልያና ራሔል እኅትማማቾች ነበሩ። መጽሐፍ ቅዱስ ራሔል «መልከ መልካምና ውብ» እንደ ነበረች ይነግረናል። ስለ ልያ ግን የሚለው «ዓይኖችዋ ደካሞች» እንደ ነበሩ ብቻ ነው። ሁሉም ሰው የሚያስተውላት ራሔልን ነበር። ልያ ግን ሰዎች ልብ የማይሏት ነበረች።

ያዕቆብ የሚባል ሰው ከቤተሰባቸው ጋር ሊኖር በመጣ ጊዜ ወዲያውኑ ራሔልን ወደዳት። የልጃገረዶቹ አባት በሠራው ተንኰል ምክንያት ያዕቆብ ሁለቱንም እኅትማማቾች አገባ። ሁሉም ግን ያዕቆብ ራሔልን አብልጦ እንደሚወዳት ያውቅ ነበር።

ልያ ምን ተሰምቷት እንደሚሆን መገመት ትችያለሽ? ሁልጊዜ ሁለተኛ። ሁልጊዜ ከቆንጆዋ እኅቷ ጋር ትነጻጸራለች። ሁልጊዜም ሰዎች ራሔልን እንደሚወዷት እርስዋንም የሚወዳት አንድ ሰው እንዲኖር ትመኛለች።

መጽሐፍ ቅዱስ ግን አንድ ውብ ነገር ይናገራል፦ «ልያ እንዳልተወደደች እግዚአብሔር ባየ ጊዜ…»። የልያን ሕመም ሌላ ማንም ያስተዋለ አይመስልም ነበር። እግዚአብሔር ግን አስተዋለ። እርስዋን አያት።

ልያ ልጆችን ወለደች፤ እያንዳንዱም ሲወለድ በልቧ ያለውን የሚያሳይ ስም አወጣችለት። የመጀመሪያ ልጅዋን ስትወልድ «እግዚአብሔር መከራዬን አይቶአል፤ አሁንስ ባሌ ይወድደኛል» አለች። ሁለተኛውንና ሦስተኛውን ስትወልድም ባሏ በመጨረሻ ይወዳት ይሆናል ብላ አሁንም ተስፋ ታደርግ ነበር።

አራተኛው ልጅዋ ሲወለድ ግን አንድ ነገር ተለውጦ ነበር። በዚያን ጊዜ እንዲህ አለች፦ «በዚህ ጊዜ እግዚአብሔርን አመሰግናለሁ»። ስሙንም ይሁዳ ብላ ጠራችው፤ ይህም ስም በዕብራይስጥ «ምስጋና» ከሚለው ቃል ጋር ይመሳሰላል።

ልያ የሌላትን ፍቅር ለማግኘት እንዲያ መጣጣሯን ተወች፤ ላላት ፍቅር ግን እግዚአብሔርን ማመስገን ጀመረች።

ከሁሉ የሚያስደንቀው ደግሞ ይህ ነው፦ እግዚአብሔር በልያ ልጅ በይሁዳ በኩል አንድ ድንቅ ነገር አደረገ። ከብዙ ዓመታት በኋላ ንጉሥ ዳዊት ከይሁዳ ቤተሰብ ተወለደ። ከዚያም ከብዙ ዓመታት በኋላ ኢየሱስ ራሱ ከዚያው ቤተሰብ ተወለደ! ማንም ያላስተዋላት እኅት ከእግዚአብሔር ታላቅ ታሪክ ውስጥ የአንዱ ክፍል ባለቤት ሆነች።

ምናልባት አንቺም እንደ ልያ ተሰምቶሽ ያውቅ ይሆናል። ምናልባት ሁልጊዜ ከአንቺ የበለጠ ትኩረት የምታገኝ እኅት፣ የዘመድ ልጅ ወይም ጓደኛ ይኖርሽ ይሆናል። ምናልባት ማንም ልብ እንደማይልሽ ይሰማሽ ይሆናል። እግዚአብሔር ያይሻል። በእርሱ ዘንድ ሁለተኛ አይደለሽም።

አስቢበት፦ እንደ ልያ ማንም ልብ እንዳላለሽ ወይም ከሌላ ሰው ጋር እንደ ተነጻጸርሽ ተሰምቶሽ ያውቃል? እግዚአብሔር እርስዋን እንዳያት፣ አንቺንም እንደሚያይሽ ማወቅሽ እንዴት ይረዳሻል?

ሞክሪው፦ ልያ «በዚህ ጊዜ እግዚአብሔርን አመሰግናለሁ» አለች። በሕይወትሽ ውስጥ አንድ ነገር ፍትሕ የጎደለው ቢመስልሽ እንኳ፣ ዛሬ እግዚአብሔርን የምታመሰግኚባቸውን ሦስት ነገሮች ጻፊ።

ውድ እግዚአብሔር ሆይ፣ ማንም ሳያያት ልያን ስላየሃት፣ እኔንም ስለምታየኝ አመሰግንሃለሁ። ማንም ልብ እንደማይለኝ ሲሰማኝ ወይም ከሌሎች ጋር ስነጻጸር፣ ልቤን አንተን ወደ ማመስገን እንድመልስ እርዳኝ። በአንተ ዘንድ ፈጽሞ ሁለተኛ ስላልሆንኩ አመሰግንሃለሁ። በኢየሱስ ስም፣ አሜን።