ቀን 12 — የሚያስፈልግሽ ሁሉ

«አምላኬም እንደ ባለ ጠግነቱ መጠን በክብር በክርስቶስ ኢየሱስ የሚያስፈልጋችሁን ሁሉ ይሞላባችኋል።»

— ፊልጵስዩስ 4:19

«እነዚያ ጫማዎች ያስፈልጉኛል።» «ያ ስልክ ያስፈልገኛል።» «ወደዚያ ግብዣ መጋበዝ ያስፈልገኛል።» «እንደ እርሷ መምሰል ያስፈልገኛል።»

«ያስፈልገኛል» የሚለውን ቃል ብዙ ጊዜ እንጠቀምበታለን። ብዙውን ጊዜ ግን በእርግጥ ማለት የምንፈልገው «እፈልገዋለሁ» ነው። በሁለቱ መካከል ትልቅ ልዩነት አለ!

አንድ አስፈላጊ ነገር ያለ እርሱ በእውነት መኖር የማትችዪበት ነገር ነው፤ ለምሳሌ ምግብ፣ ውኃ፣ መጠለያ፣ ፍቅር፣ ደህንነትና እግዚአብሔር። ምኞት ግን ቢኖርሽ ደስ የሚል፣ ባይኖርሽም ምንም የማትሆኚበት ነገር ነው።

የማወዳደር ወጥመድ እነዚህን ሁለት ነገሮች ያደበላልቃቸዋል። ሌላዋ ልጅ አንድ ነገር ይዛ ስታዪ፣ በድንገት አንቺም ያ ነገር የሚያስፈልግሽ ይመስልሻል። ጃኬቱን የምትፈልጊው ብቻ አይደለም፤ ያስፈልግሻል፤ አለዚያ ከሌሎች የተገለልሽ ሆኖ ይሰማሻል። በተወሰነ መልክ ለመታየት የምትፈልጊ ብቻ አይደለሽም፤ የግድ እንደዚያ መሆን አለብሽ፤ አለዚያ በቂ አትሆኚም።

ጳውሎስ ግን ውብ የሆነ ተስፋ ይሰጣል፦ «አምላኬም … የሚያስፈልጋችሁን ሁሉ ይሞላባችኋል።» የምትመኚውን ሁሉ ሳይሆን የሚያስፈልግሽን ሁሉ ነው። ይህንንም የሚያደርገው «እንደ ባለ ጠግነቱ መጠን በክብር በክርስቶስ ኢየሱስ» ነው። እግዚአብሔር ድሀ አይደለም! ወሰን የሌለው ባለ ጠግነት አለው፤ ለልጆቹም ለጋስ ነው።

ጳውሎስ ይህን የጻፈው ከእስር ቤት ሆኖ ነው። ብዙ ነገር አልነበረውም። ነገር ግን በእውነት የሚያስፈልገውን እግዚአብሔር ሁልጊዜ እንደሚሰጠው ተምሮ ነበር። ጳውሎስ ከሁሉ አብልጦ የሚያስፈልገው ነገር ደግሞ አስቀድሞ በእጁ ነበር፦ ኢየሱስ።

ከማወዳደር ወጥመድ የሚያወጣሽ እውነት ይህ ነው፦ በክርስቶስ፣ በእውነት የሚያስፈልግሽ ነገር ሁሉ አስቀድሞ አለሽ። የእግዚአብሔር ፍቅር አለሽ። ይቅርታ አለሽ። በቤተሰቡ ውስጥ ስፍራ አለሽ። እርሱ ራሱ በየቀኑ ከአንቺ ጋር ነው። በሰማይ የዘላለም ቤት አለሽ።

ከዚህ የበለጠ ሊሰጥሽ የሚችል ማንም የለም። አዲስ ልብስ አይችልም፤ ሺህ ተከታዮች አይችሉም፤ እንከን የሌለበት ቁመናም አይችልም። ይህን ደግሞ ማንም ሊወስድብሽ አይችልም።

ስለዚህ በሚቀጥለው ጊዜ ያ ያስፈልገኛል ብለሽ ስታስቢ፣ ቆም በዪና ይህ የግድ የሚያስፈልገኝ ነው ወይስ የምመኘው ብቻ? ብለሽ ራስሽን ጠይቂ። ከዚያም አስታውሺ፦ ምን እንደሚያስፈልግሽ አባትሽ አስቀድሞ ያውቃል፤ ሊሰጥሽም ቃል ገብቷል።

እውነተኛ ታሪክ፦ ግላዲስ ኤልዋርድ በለንደን የሌሎችን ሰዎች ቤት የምታጸዳ የቤት ሠራተኛ ነበረች። እግዚአብሔር ወደ ቻይና እንድትሄድ እንደሚፈልግ አመነች። አንድን የሚስዮን ድርጅት እንዲልካት በጠየቀች ጊዜ ግን እምቢ አሏት። በቂ ብልህ እንዳልሆነችና ቋንቋውን ለመማር ዕድሜዋ እንደ ገፋ ነገሯት። ግላዲስ ራሷን ከብልሆቹ ሰዎች ጋር አላወዳደረችም። ደመወዟን ሳንቲም በሳንቲም አጠራቀመች፤ ያም ሆኖ ሄደች። በቻይናም፣ አትችዪም ተብላ የነበረውን ቋንቋ ተማረች፤ የሚንከባከባቸው ሰው የሌላቸውን ልጆች ተቀብላ አሳደገች፤ በኋላም በጦርነት ጊዜ መቶ የሚጠጉ ልጆችን ተራሮችን አሻግራ ወደ ደህንነት መራች። ሰዎች በቂ እንዳልሆነች ተናገሩ። እግዚአብሔር ግን የእርሱ እንደ ሆነች ተናገረ። ሙሉ ታሪኳን ለእግዚአብሔር ደፋር በተባለው መጽሐፍ ውስጥ ማንበብ ትችያለሽ።

አስቢበት፦ «ያስፈልገኛል» ያልሽው፣ ግን በእርግጥ ምኞት የሆነ ነገር ምንድን ነው? በእውነት የሚያስፈልጉሽ ነገሮች ምንድን ናቸው?

ሞክሪው፦ በማስታወሻ ደብተርሽ ላይ «አስፈላጊ ነገሮች» እና «ምኞቶች» የሚሉ ሁለት ዓምዶች አዘጋጂ። አንዳንድ ነገሮችን በየዓምዳቸው ለዪ። ከዚያም የሚያስፈልግሽን ሁሉ ስለሚሰጥሽ እግዚአብሔርን አመስግኚ።

ውድ እግዚአብሔር ሆይ፣ ከክብራማ ባለ ጠግነትህ የሚያስፈልገኝን ሁሉ ስለምትሞላልኝ አመሰግንሃለሁ። በሚያስፈልገኝና በምመኘው መካከል ያለውን ልዩነት እንዳውቅ እርዳኝ። በኢየሱስ በእውነት የሚያስፈልገኝ ሁሉ አስቀድሞ ስላለኝ አመሰግንሃለሁ። በኢየሱስ ስም፣ አሜን።