የጥልፉ ጀርባ

«በውኃ ውስጥ ባለፍህ ጊዜ ከአንተ ጋር እሆናለሁ።» — ከኢሳይያስ 43

ኮሪና ቤትሲ በኔዘርላንድስ ደቡብ ወደሚገኝ፣ ቩኽት ወደሚባል የእስረኞች ካምፕ ተወሰዱ። በዚያ የነበሩት ሴቶች ቀኑን ሙሉ ምንም የሚሠሩት ነገር ሳይኖራቸው ይቀመጡ ነበር፤ ብዙም ሳይቆዩ ማጉረምረምና መጣላት ጀመሩ። ስለዚህ ቤትሲ አንድ ማኅበር ጀመረች! አባላቱ ላለማጉረምረም፣ ስለ ማንም ክፉ ነገር ላለመናገር፣ ለሌሎችም የሚያበረታታ ቃል ለመናገር እንደሚሞክሩ ቃል ገቡ።

ከጊዜ በኋላ ኮሪ በአንድ የሥራ ጠረጴዛ ላይ ለሬዲዮ የሚሆኑ ትንንሽ ማብሪያ ማጥፊያዎችን እየፈተሸች በቀን አሥራ አንድ ሰዓት እንድትሠራ ተመደበች። ሥራው ሰዓት እንደ መጠገን ደስ የሚያሰኝ አልነበረም፤ እርሷ ግን ጎበዝ ነበረችበት። ቤትሲ በልብስ ስፌት ክፍል ትሠራ ነበር። እሑድ ከሰዓት በኋላ ሴቶቹ እግዚአብሔርን ለማምለክ በጎጆዎቹ መካከል ባለች ትንሽ የሣር ቦታ ላይ ይሰበሰቡ ነበር፤ ብዙም ሳይቆይ አምልኮውን የምትመራው ኮሪ ሆነች።

ቩኽት አሁንም ከባድና አስፈሪ ስፍራ ነበር። አንድ ቀን፣ ናዚዎችን የሚዋጉት ሠራዊቶች እየቀረቡ ሲመጡ፣ ጠባቂዎቹ ከወንድ እስረኞች ብዙዎቹን ወስደው ገደሏቸው። ኮሪ ራሷን በቤትሲ ትከሻ ላይ አስደግፋ ይህ እንዲሆን ለምን እንደ ፈቀደ እግዚአብሔርን ጠየቀች።

ከዚያም ኮሪ የዓለምን ሐዘን ሁሉ ብቻዋን መሸከም እንደሌለባት እግዚአብሔር እያሳያት እንደ ሆነ ተሰማት። ሐዘኑን ወደ እርሱ አምጥታ በዚያው ልትተወው ትችል ነበር። እርሷም ስለ አንድ ጥልፍ አሰበች። ጥልፉ ከጀርባው ሲታይ የተዘበራረቀ የክር ጥልፍልፍ ይመስላል። ገልብጠህ ስታየው ግን ውብ ሥዕል ታያለህ! አንድ ቀን የሕይወታችንን ትክክለኛ ገጽታ አይተን እንደምንረዳ አመነች።

በሴፕቴምበር እኅትማማቾቹ ከሌሎች ሰማንያ ያህል ሴቶች ጋር በአንድ የዕቃ ማጓጓዣ ፉርጎ ውስጥ ታጨቁ። ለሦስት ቀንና ለሦስት ሌሊት ባቡሩ እየተንገጫገጨ ወደ ጀርመን ሄደ። በመጨረሻም በአንድ ሐይቅ አጠገብ ቆመ፤ ሴቶቹም ራቨንስብሩክ ወደሚባል ትልቅ ካምፕ በሮች በእግራቸው ሄዱ።

አሁን ብዙ ጊዜ የምናየው የጥልፉን የተዘበራረቀ ጀርባ ብቻ ነው። እግዚአብሔር ግን ሥዕሉን በሙሉ ያያል፤ እርሱም መልካም ነገርን እየሸመነ ነው። አንተም ያሳዘነህንና ያስጨነቀህን ስሜት ወደ እርሱ አምጥተህ በእጁ ልትተወው ትችላለህ።

ውድ እግዚአብሔር ሆይ፣ የሚሆነውን ነገር ሳልረዳ ስቀር፣ በአንተ እንድታመን እርዳኝ። ጭንቀቶቼን አሁን ለአንተ እሰጥሃለሁ፤ ከአንተም ጋር እተዋቸዋለሁ። አሜን።