በመኝታ ሰዓት ያለች ልጅ

«ምናልባት ለእንደዚህ ያለ ጊዜ ወደ መንግሥት እንደ ደረስሽ ማን ያውቃል?» — ከአስቴር 4

በሜይ 10 ቀን 1940፣ ኮሪ አርባ ስምንት ዓመት ሲሆናት፣ የጀርመን ሠራዊት ወደ ኔዘርላንድስ ዘምቶ ገባ። ለአምስት ቀናት ከተዋጉ በኋላ የሆላንድ ሠራዊት እጁን መስጠት ግድ ሆነበት፤ የጀርመን ወታደሮችም በሃርለም መንገዶች ላይ ይመላለሱ ጀመር።

ጀርመንን ይገዙ የነበሩት አይሁዳውያንን የሚጠሉት ናዚዎች ነበሩ። ቀስ በቀስ አዳዲስ ጨካኝ ሕጎችን አወጡ። አይሁዳውያን ወደ መናፈሻዎች፣ ወደ ሲኒማ ቤቶች፣ ወይም ወደ ተራ ትምህርት ቤቶች እንዳይገቡ ተከለከሉ። በ1942 በልብሳቸው ላይ ቢጫ ኮከብ ማድረግ ግድ ሆነባቸው። ዕድሜው ከሰማንያ በላይ የነበረው ፓፓ ከአይሁዳውያን ጎረቤቶቹ ጎን ለመቆም ብሎ፣ ሄዶ ኮከብ ወስዶ ራሱም ሊያደርገው ፈለገ። ቤተሰቡ ይህን ሐሳብ እንዲተው ብዙ መለመን ነበረባቸው! ከዚያም ናዚዎች የአይሁዳውያንን ቤተሰቦች በባቡር እየጫኑ መውሰድ ጀመሩ፤ እነርሱም ተመልሰው አልመጡም።

አንድ ምሽት ኮሪ አንድን አይሁዳዊ ሐኪም በቤቱ ልትጠይቀው ሄዳ ነበር። እያወሩ ሳሉ፣ ትንሿ ልጁ ከደረጃው ላይ ሆና ጠራችው። አባዬ መጥቶ አልጋዋ ላይ አስተኝቶ ብርድ ልብሷን ማልበስ ረስቶ ነበር! ሐኪሙ ቶሎ ብሎ ወደ ላይ ወጣ፤ ኮሪም ልጆቹ ከመተኛታቸው በፊት ከእነርሱ ጋር ሲጫወት ሰማችው።

ኮሪ ተቀምጣ ስትጠብቅ እንዲህ ብላ አሰበች፦ ምስጢራዊ ፖሊሶች በማንኛውም ሌሊት ይህን ቤተሰብ ሊወስዱት ይመጡ ይሆናል። እናም ቍርጥ ውሳኔ አደረገች። በምትችለው መንገድ ሁሉ አይሁዳውያንን ትረዳለች።

ብዙም ሳይቆይ የፈሩ ሰዎች የቤዬን በር ማንኳኳት ጀመሩ። የሰዓት ሠሪው ቤተሰብ እንደሚረዳቸው ሰምተው ነበር። የቴን ቡም ቤተሰብ ለአንድ ወይም ለሁለት ሌሊት ተቀብለው ይመግቧቸው ነበር፤ በዚያው ጊዜ ደግሞ የሚቆዩበትን ይበልጥ አስተማማኝ ስፍራ ይፈልጉላቸው ነበር። ፓፓ የፈሩ ሰዎችን በማጽናናት በጣም ጎበዝ ነበር።

እግዚአብሔር ሕዝቡን ለማዳን የቴን ቡም ቤተሰብ አያስፈልገውም ነበር። ነገር ግን በዚያ ቤት፣ በዚያ ከተማ፣ በዚያ ጊዜ አስቀምጧቸው ነበር። እግዚአብሔር አንተንም ባለህበት ስፍራ አስቀምጦሃል፤ እርዳታ የሚያስፈልገውን ሰው እንድትረዳ ሊጠቀምብህ ይችላል።

ውድ እግዚአብሔር ሆይ፣ ባለሁበት ስፍራ ስላስቀመጥኸኝ አመሰግንሃለሁ። እርዳታ የሚያስፈልገውን ሰው እንዳይ ዓይኖቼን ክፈት፤ እንድረዳውም ድፍረትን ስጠኝ። አሜን።