የተዘረጋ እጅ

«ጠላቶቻችሁን ውደዱ፥ ስለሚያሳድዱአችሁም ጸልዩ።» — ከማቴዎስ 5

ጦርነቱ በሜይ 1945 ሲያበቃ፣ ኔዘርላንድስ በመጨረሻ ነጻ ወጣች። ከጥቂት ሳምንታት በኋላ ብቻ ኮሪ በጣም የድፍረት ነገር አደረገች። ቤተሰቧን ለፖሊስ አሳልፎ የሰጠው እርሱ እንደ ሆነ ለተነገራት ሰው ደብዳቤ ጻፈች። ይቅር እንዳለችው፣ እንደምትጸልይለትና ኢየሱስ አዲስ ሊያደርገው እንደሚችል ነገረችው።

ኮሪ ከቤትሲ ጋር ያወጡትን ዕቅድ አስታወሰች። ከጦርነቱ ተጎድተው ለተመለሱና የሚሄዱበት ስፍራ ለሌላቸው ሰዎች ቤት ከፈተች። ከጥቂት ዓመታት በኋላም በጀርመን እንኳ ቤታቸውን ላጡ በዚያ ላሉ ሰዎች ቤት ከፈተች።

ኮሪ በ1947 በጀርመን አገር በሙኒክ ስለ ዋለ አንድ ቀን ታሪክ ተናገረች። ስለ እግዚአብሔር ይቅርታ ከተናገረች በኋላ አንድ ሰው ወደ እርሷ መጣ። ታውቀዋለች፤ በራቨንስብሩክ ጠባቂ ነበር። ክርስቲያን እንደ ሆነ ነገራት፤ እጁንም ዘረጋላት። ኮሪ ግን እጁን መያዝ አልቻለችም። ስለዚህ በልቧ በጸጥታ ጸለየች፤ ኢየሱስም እንዲረዳት ለመነች። ከዚያም እጇን ዘረጋች፤ ሲጨባበጡም የእግዚአብሔር ፍቅር ልቧን ሲሞላው ተሰማት። ይቅር ልትለው ቻለች።

ኮሪ ከሠላሳ ዓመት በላይ ዓለምን ዞረች፤ ከስድሳ በሚበልጡ አገሮች ተናገረች። ታሪኳ የታወቀ መጽሐፍና ፊልም ሆነ፤ በኢየሩሳሌምም ለክብሯ ዛፍ ተተከለ። በሄደችበት ሁሉ የእግዚአብሔር ፍቅር ከጨለማው ስፍራ ይበልጥ ብርቱ እንደ ሆነ ለሰዎች ትነግር ነበር።

ኮሪ በጣም ካረጀች በኋላ በካሊፎርኒያ ኖረች። ስትሮክ ገጥሟት ስለ ነበር በመጨረሻዎቹ አምስት ዓመታት መናገር እጅግ ያቅታት ነበር፤ ደጋግ ወዳጆችም ይንከባከቧት ነበር። በኤፕሪል 15 ቀን 1983 ሞተች። ያም ዘጠና አንደኛ የልደት ቀኗ ነበር።

የሚጎዱንን ሰዎች ይቅር ማለት በጣም ከባድ ሊሆን ይችላል። ኮሪ ይህን በራሷ ማድረግ እንደማትችል ተረዳች፤ እግዚአብሔር ግን የሚያስፈልጋትን ፍቅር ሰጣት። ብትለምነው አንተንም ይቅር እንድትል ይረዳሃል።

ውድ እግዚአብሔር ሆይ፣ ስለ ኮሪና ስለ ቤትሲ ቴን ቡም፣ በእነርሱም በኩል ስላደረግኸው ነገር ሁሉ አመሰግንሃለሁ። ይቅር ማለት ሲከብደኝ፣ እባክህ ፍቅርህን ስጠኝ። አሜን።