ቤትሲ ወደ ቤቷ ሄደች

«ወደ ሰማይ ብወጣ አንተ በዚያ አለህ፤ ወደ ሲኦልም ብወርድ በዚያ አለህ።» — ከመዝሙር 139

ቤትሲ በሰፈር ቤት ቍጥር 28 ውስጥ ከሁሉ ይበልጥ ገር ሰው ነበረች። ከኮሪ ይልቅ ደካማ ነበረች፤ በአንዳንድ መንገድ ግን ከሁለቱ ይበልጥ የበረታችው እርሷ ነበረች፤ እምነቷ እጅግ ጥልቅና የተረጋጋ ነበርና። በእነርሱ ላይ ጭካኔ ለሚያደርጉት ሰዎች እንኳ ታዝንላቸው ነበር።

ማታ ማታ እኅትማማቾቹ አብረው ዕቅድ ያወጡ ነበር። ወደ ቤት ሲመለሱ፣ ከካምፖቹ ለሚወጡና የሚሄዱበት ስፍራ ለሌላቸው ሰዎች ቤት ይከፍታሉ። ደግሞም ወደ አሜሪካ ሄደው እግዚአብሔር ያደረገላቸውን ለሁሉም ይነግራሉ።

ቤትሲ ግን እየደከመች፣ እየደከመች ሄደች። በከፍተኛ ትኩሳት በጣም ታመመች፤ በመጨረሻም መራመድ አቃታት። በቃሬዛ ተሸክመው ወደ ካምፑ ሆስፒታል ወሰዷት። ስትወሰድም አንዲት ፖላንዳዊት ሴት አጠገቧ ተንበርክካ ጸለየች። በዚያ ከሰዓት በኋላ ኮሪ አንድ ጊዜ ደግሞ ጎበኘቻት።

በማግሥቱ ጠዋት፣ በዲሴምበር 16 ቀን 1944፣ ኮሪ በሆስፒታሉ መስኮት ወደ ውስጥ ተመለከተች። ቤትሲ ሞታ ነበር። ዕድሜዋ ሃምሳ ዘጠኝ ዓመት ነበር። ኮሪ ልታያት በሄደች ጊዜ፣ የቤትሲ ፊት ሰላማዊና እንደ ገና ወጣት ሆኖ አገኘችው፤ እግዚአብሔር ሰማይን ጥቂት ያሳያት ይመስል ነበር።

ኮሪ ከብዙ ዓመታት በኋላ በጻፈችው መጽሐፍ፣ ቤትሲ የእግዚአብሔር ፍቅር ከጥልቁ ጕድጓድ እንኳ ይበልጥ ጥልቅ እንደ ሆነ ለሰዎች መንገር አለብን ማለቷን አስታወሰች። በዚያች ሌሊት አንዲት ሩሲያዊት ሴት የምትተኛበት ስፍራ አልነበራትም። ኮሪ ቤትሲ ትተኛበት በነበረው ቦታ ላይ ስፍራ አዘጋጀችላት፤ ሁለቱ ሴቶችም ተቃቀፉ።

የምንወደው ሰው ሲሞት በጣም ያሳዝናል። ነገር ግን የኢየሱስ ለሆኑት ሁሉ ሞት መጨረሻ አይደለም። እግዚአብሔር አስቀድሞ የሌለበት እጅግ ጥልቅ ወይም እጅግ ጨለማ የሆነ ስፍራ የለም፤ እርሱም እኛን መውደድ ፈጽሞ አያቆምም።

ውድ እግዚአብሔር ሆይ፣ ፍቅርህ ከጥልቁ ስፍራ ይበልጥ ጥልቅ ስለ ሆነ አመሰግንሃለሁ። የሚወዱትን ሰው የናፈቁትን ሁሉ እባክህ አጽናናቸው። አሜን።