በክርስቶስ ሥር መስደድ፦ እውነተኛ ማንነትሽ

«እግዚአብሔርም ሰውን በመልኩ ፈጠረ፤ በእግዚአብሔር መልክ ፈጠረው፤ ወንድና ሴት አድርጎ ፈጠራቸው።» ዘፍጥረት 1:27 አንዲት ክርስቲያን ሴት ምን እንደምትሠራ ከመነጋገራችን በፊት፥ አስቀድመን እርስዋ ማን እንደ ሆነች መረዳት አለብን። በሕይወታችን ያለው ብዙ ግራ መጋባት የሚመነጨው እውነተኛ ማንነታችንን ከመዘንጋት ነው። አንዲት ሴት በክርስቶስ ማን እንደ ሆነች ካላወቀች፥ ዋጋዋን በባልዋ፣ በልጆችዋ፣ በትምህርትዋ፣ በውበትዋ፣ በሥራዋ ወይም ሌሎች ሰዎች ስለ እርስዋ በሚናገሩት ነገር ውስጥ ለማግኘት ትሞክራለች። እነዚህ ሁሉ ነገሮች በአንድ ቅጽበት ሊወሰዱ ይችላሉ። እግዚአብሔር የሰጠሽ ማንነት ግን ፈጽሞ ሊወሰድብሽ አይችልም።

መጽሐፍ ቅዱስ ስለ ማንነትሽ ሦስት ታላላቅ እውነቶችን ያስተምረናል። በመጀመሪያ፥ አንቺ በእግዚአብሔር መልክ ተፈጥረሻል።

ሁለተኛ፥ በኢየሱስ ክርስቶስ ደም ተዋጅተሻል። ሦስተኛ፥ በመንፈስ ቅዱስ ተሞልተሽ እግዚአብሔር አስቀድሞ ያዘጋጀውን መልካሙን ሥራ ለማድረግ ተለይተሻል።

እስቲ የመጀመሪያውን እውነት እንመልከት። በዘፍጥረት 1 እግዚአብሔር ዓለምን ሲፈጥር፥ ከዋክብትን በቃሉ አስገኘ፤ ባሕሮችን በዓሣ፣ ሰማያትንም በወፎች ሞላ፤ የምድርንም አራዊት አበጀ። የሰውን ልጅ ለመፍጠር በመጣ ጊዜ ግን የተለየ ነገር አደረገ። «ሰውን በመልካችን እንደ ምሳሌአችን እንፍጠር» አለ። ከዚያም ቃሉ ወንድና ሴት አድርጎ፥ ሁለቱንም በመልኩ እንደ ፈጠራቸው በግልጥ ይናገራል። ይህ ማለት እንደ ሴት፥ አንቺ የእግዚአብሔር ያነሰ ነጸብራቅ አይደለሽም ማለት ነው። አንቺ የሕያው እግዚአብሔርን መልክ ሙሉ በሙሉ የተሸከምሽ ነሽ። አእምሮሽ፣ ስሜትሽ፣ ፈቃድሽ፣ የመውደድ፣ የመፍጠር፣ የማሰብና የማምለክ ችሎታሽ — እነዚህ ሁሉ ከእግዚአብሔር የመጡ ናቸው፤ ከባሕርዩም አንዳች ነገርን ያንጸባርቃሉ።

ሁለተኛው እውነት አንቺ የተዋጀሽ መሆንሽ ነው። የአዳምና የሔዋን ውድቀት ኃጢአትንና ሞትን ወደ ዓለም አመጣ፤ ሁላችንም ኃጢአትን ሠርተናል፤ የእግዚአብሔርም ክብር ጎድሎናል። እግዚአብሔር ግን በምሕረቱ አንድያ ልጁን ኢየሱስ ክርስቶስን ላከ፤ እርሱም ከሴት ተወለደ፤ ፍጹም ሕይወትን ኖረ፤ ስለ ኃጢአታችን በመስቀል ላይ ሞተ፤ በሦስተኛውም ቀን ተነሣ። በኢየሱስ ባመንሽ ጊዜ ኃጢአትሽ ታጥቦ ይወገዳል። ከእንግዲህ ወዲህ ኩነኔ የለብሽም። ወደ እግዚአብሔር ቤተሰብ በልጅነት ተወስደሻል። መጽሐፍ ቅዱስ ለተቀበሉት ሁሉ ግን፥ በስሙ ለሚያምኑት ለእነርሱ የእግዚአብሔር ልጆች ይሆኑ ዘንድ ሥልጣንን እንደ ሰጣቸው ይናገራል።

ይህ ምን ማለት እንደ ሆነ እስቲ አስቢ። አንቺ የነገሥታት ንጉሥ ልጅ ነሽ። ታላላቅ ተራሮችን ያቆመ፥ የሐይቁንና የባሕሩን ሁሉ ውኃ የዘረጋ፥ በሰማይ ያለውንም ኮከብ ሁሉ የሰቀለ ያው አምላክ — ይህ አምላክ «ልጄ» ብሎ ይጠራሻል። ሐዋርያው ጳውሎስ የእግዚአብሔር ወራሾች፥ ከክርስቶስም ጋር አብረን ወራሾች እንደ ሆንን ይጽፋል። በምድር ላይ ያለሽበት ሁኔታ ምንም ይሁን ምን፥ ጣሪያው በሚያፈስ ትንሽ ቤት ብትኖሪም ወይም በከተማ ባለ ትልቅ ቤት ብትኖሪ፥ እውነተኛ ርስትሽ በሰማይ ነው፤ ይህ ዓለም ሊሰጥ ከሚችለው ከማንኛውም ነገር እጅግ የሚበልጥ ነው።

ሦስተኛው እውነት መንፈስ ቅዱስ በውስጥሽ የሚኖር መሆኑ ነው። ወደ ክርስቶስ በመጣሽ ጊዜ እግዚአብሔር የክርስትናን ሕይወት በራስሽ ብርታት ለመኖር እንድትታገዪ አልተወሽም። መንፈሱን ሰጠሽ፤ እርሱም ያጽናናሻል፣ ያስተምርሻል፣ ስለ ኃጢአት ይወቅስሻል፣ የቅድስናንም ሕይወት እንድትኖሪ ኃይልን ይሰጥሻል። ኢየሱስን ከሙታን ያስነሣው የእርሱ መንፈስ በአንቺ ይኖራል። አንቺ ደካማ አይደለሽም። በእግዚአብሔር ታላቅ ኃይል ተሞልተሻል።

ይህን እውነት በመጽሐፍ ቅዱስ ውስጥ ባለች በአንዲት ሴት ሕይወት ላላሳይሽ። በዮሐንስ ወንጌል ምዕራፍ አራት ስለ አንዲት ሳምራዊት ሴት እናነባለን። ሌሎቹ ሴቶች በጠዋት ሲመጡ ለመምጣት ምናልባት ታፍር ስለ ነበር፥ በቀኑ ሐሩር ወደ ጕድጓዱ መጣች። አምስት ጊዜ አግብታ ነበር፤ አሁን አብሮአት ያለውም ሰው ባልዋ አልነበረም። ሕይወትዋ የተሰበረ ነበር።

ማንነትዋ የተገነባው ደጋግመው በከዱአት ግንኙነቶች ላይ ነበር። ኢየሱስ ግን በጕድጓዱ አጠገብ አገኛት። ስለ እርስዋ ሁሉን ያውቅ ነበር፤ ሆኖም አልኰነናትም። የሕይወትን ውኃ አቀረበላት። እውነተኛው መሲሕ ማን እንደ ሆነ ነገራት። እርስዋም ወደ መንደርዋ እየሮጠች ተመልሳ ሁሉንም «ያደረግሁትን ሁሉ የነገረኝን ሰው ኑና እዩ» አለቻቸው። ከምስክርነትዋ የተነሣ ብዙዎች አመኑ። ከጎረቤቶችዋ በኀፍረት ትሸሸግ የነበረችው ያች ሴት ለመንደርዋ የመጀመሪያዋ ወንጌላዊት ሆነች። ኢየሱስ ማንነትዋን ለወጠው።

ወይም መግደላዊት ማርያምን ተመልከቺ። ኢየሱስ ሰባት አጋንንትን ከእርስዋ እንዳወጣ መጽሐፍ ይነግረናል። ኢየሱስን ከማግኘትዋ በፊት ትሠቃይ ነበር። ኢየሱስን ካገኘች በኋላ ግን ተከተለችው፤ አገልግሎቱንም ደገፈች፤ ከደቀ መዛሙርቱ አብዛኞቹ ሸሽተው በነበሩ ጊዜ በመስቀሉ አጠገብ ቆመች፤ በትንሣኤውም ማለዳ ከሙታን የተነሣውን ጌታ ያየች የመጀመሪያዋ ሰው ሆነች። ፈጽሞ ያወቃት እርሱ አዲስ ስምንና አዲስ ጥሪን የሰጣት እርሱ ነው።

በቤተ ክርስቲያን ታሪክም ይህ እውነት በውብ ሁኔታ ተኖሮ እናያለን። እ.ኤ.አ. በ200 ገደማ የኖረችውን ፔርፔቱዋ የምትባል የሰሜን አፍሪካ ወጣት ሴት ተመልከቺ። ክርስቲያን በመሆንዋ በታሰረች ጊዜ ገና የሃያ ሁለት ዓመት ወጣት፥ ጡት የሚጠባ ሕፃን ያላት አዲስ እናት ነበረች። አባትዋ እምነትዋን ክዳ ሕይወትዋን እንድታድን ተማጸናት። እርስዋ ግን እምቢ አለች።

በእስር ቤት ሆና እስከ ዛሬ ድረስ የሚገኝ ማስታወሻ ጻፈች። በዚያም ማን እንደ ሆነች — የኢየሱስ ክርስቶስ አገልጋይ እንደ ሆነች — እንደምታውቅ መዘገበች። ያ ማንነት ከአባትዋ እንባ ይልቅ፣ ለገዛ ልጅዋ ካላት ፍቅር ይልቅ፣ ከሞት ፍርሃትም ይልቅ የበረታ ነበር። መዝሙረ ዳዊትን እየዘመረች ወደ መጫወቻው ስፍራ ሄደች፤ ስለ ጌታዋም ሞተች። የጥንቲቱ ቤተ ክርስቲያን ስምዋን ለብዙ መቶ ዓመታት ስታስታውስ ኖረች። በክርስቶስ ያላት ማንነት ምንም ሊወስድባት የማይችለውን ብርታት ሰጣት።

እኅቴ ሆይ፥ ዛሬ ማንነትሽ የተገነባው በምን ላይ ነው? በመልክሽ ላይ ከተገነባ ይጠወልጋል። ባልሽ ስለ አንቺ በሚናገረው ላይ ከተገነባ፥ እርሱ ሰው ብቻ ነውና ሊያሳዝንሽ ይችላል። ልጆችሽ በሚሳካላቸው ላይ ከተገነባ፥ እነርሱም ልብሽን ሊያሳዝኑ የሚችሉ ኃጢአተኞች ናቸው። ጎረቤቶችሽ በሚያስቡት ላይ ከተገነባ፥ በሚለዋወጥ መመዘኛ ይፈርዱብሻል። ዓለቱ ክርስቶስ ብቻ ነው።

ማንነትሽ የማይናወጠው በእርሱ ብቻ ነው።

በዚህ ሳምንት በክርስቶስ ማን እንደ ሆንሽ ለማሰላሰል ጊዜ ውሰጂ። እነዚህን እውነቶች ጻፊያቸው። ድምፅሽን ከፍ አድርገሽ ተናገሪያቸው። «እኔ የእግዚአብሔር ልጅ ነኝ። በመልኩ ተፈጥሬአለሁ። በኢየሱስ ደም ተዋጅቻለሁ። በመንፈስ ቅዱስ ተሞልቻለሁ። በዘላለም ፍቅር ተወድጃለሁ። በክርስቶስ ኢየሱስ በጌታዬ ካለ ከእግዚአብሔር ፍቅር ምንም ሊለየኝ አይችልም» ማለት ትችያለሽ። ጠላት በጆሮሽ ውሸትን ሲያንሾካሹክ፥ በእግዚአብሔር ቃል እውነት መልሺለት።

ጸሎት ሰማያዊ አባት ሆይ፥ በመልክህ ስለ ፈጠርከኝ አመሰግንሃለሁ። ስለ ኃጢአቴ እንዲሞትና ልጅህ እንድሆን ልጅህን ኢየሱስን ስለ ላክህ አመሰግንሃለሁ። መንፈስህ በውስጤ ስለሚኖር አመሰግንሃለሁ። ማንነቴን በማይጸኑ ነገሮች ላይ የገነባሁባቸውን ጊዜያት ይቅር በለኝ። በአንተ ማን እንደ ሆንሁ ዛሬ እንዳውቅ አስተምረኝ። በምሠራው ሁሉ አንተን አከብርህ ዘንድ በዚያ እውነት ለመመላለስ ድፍረትን ስጠኝ። በጌታዬና በመድኃኒቴ በኢየሱስ ክርስቶስ ስም፥ አሜን።