ምዕራፍ 4 · 27 ደቂቃ ንባብ · 34 ደቂቃ ማዳመጥ
የቤዛነትና የቃል ኪዳን በረከት የሆነውን የሥጋ ፈውስ እንዴት የራስ ማድረግ እንደሚቻል
(ማስታወሻ—ይህ አንድ ስብከት ብቻውን ለእምነት የተሟላ መሠረት የሚጥል በቂ ነገር እንዲይዝ ብለን፣ በቀደሙት ገጾች ከተናገርናቸው ቃሎች ጥቂቶቹን በዚህ ስብከት ውስጥ እንደግማለን። ይህም የተደረገው መጽሐፉን በሙሉ ለማንበብ ጊዜ ከማግኘታቸው በፊት ለፈውሳቸው የእምነት ጸሎት ለሚያስፈልጋቸው አንዳንድ ሰዎች ሲባል ነው።)
የመጀመሪያው እርምጃ
ወደ ፈውስ የሚወስደው የመጀመሪያው እርምጃ ወደ መዳን ወይም እግዚአብሔር ተስፋ ወደሚሰጠው ወደ ማንኛውም ሌላ በረከት ከሚወስደው የመጀመሪያ እርምጃ ጋር አንድ ነው፤ ይኸውም ሕመምተኛው መጽሐፍ ቅዱስ በግልጽ የሚያስተምረውን፣ ማለትም ሰው የተመደበለትን የዕድሜ ዘመን እስኪፈጽም ድረስ መፈወስ የእግዚአብሔር ፈቃድ መሆኑን ማወቁ ነው። እያንዳንዱ ሕመምተኛ የእርሱ ወይም የእርሷ ፈውስ የእግዚአብሔር ፈቃድ መሆኑን በእግዚአብሔር ቃል ሊረዳ ይገባዋል፤ ምክንያቱም የእግዚአብሔር ፈቃድ ስለ መሆኑ ትንሽ ጥርጣሬ እንኳ እስካለ ድረስ ለፈውስ እውነተኛ እምነት ሊኖር አይቻልም።
እግዚአብሔር እንደሚሰጠው እርግጠኞች ያልሆንበትን በረከት በእምነት በድፍረት መጠየቅ አይቻልም፤ ምክንያቱም የእግዚአብሔር ኃይል ሊጠየቅ የሚችለው የእግዚአብሔር ፈቃድ በታወቀበት ስፍራ ብቻ ነው። ለምሳሌ፣ አንድን ኃጢአተኛ እግዚአብሔር ሊያድነው እንደሚፈቅድ አስቀድመህ ፈጽመህ ሳታሳምነው «ሰው በልቡ ያምናልና፣ ይህም ወደ ጽድቅ ያደርሳል» በሚለው ቃል መሠረት እንዲያምን ማድረግ ከሞላ ጎደል የማይቻል ነው። እምነት የሚጀምረው የእግዚአብሔር ፈቃድ በታወቀበት ነው። እምነት በእኛ ምኞትና ፍላጎት ላይ ሳይሆን በእግዚአብሔር ፈቃድ ላይ ብቻ መደገፍ አለበት። የሚቀበል እምነት እግዚአብሔር ይችላል ብሎ ማመን ሳይሆን ያደርጋል ብሎ ማመን ነው። በፈውስ እናምናለን እያሉ ለፈውስ አንድ ቃል ደግፈው አሥር ቃል የሚቃወሙ ሰዎች ለፈውስ እምነትን ሊያስገኙ አይችሉም።
እምነት እግዚአብሔር እንዲያደርግ መጠበቅ ነው
እግዚአብሔር ለሕመምተኞች እንድንጸልይ ሲያዝዘን በእምነት እንድንጸልይ ማለቱ ነው፤ በጉዳዩ ላይ ፈቃዱን ባናውቅ ኖሮ ይህን ልናደርግ አንችልም ነበር። አንድ ሰው የእግዚአብሔርን ፈቃድ እስኪያውቅ ድረስ ለእምነት መሠረት የለውም፤ ምክንያቱም እምነት እግዚአብሔር ፈቃዱ እንደ ሆነ የምናውቀውን ነገር እንዲያደርግ መጠበቅ ነው። እምነት ሲኖረን እግዚአብሔር ፈቃዱን እንዲያደርግ ማድረግ አስቸጋሪ አይደለም።
ፈቃዱ መሆኑን ስናውቅ፣ ሊያደርገው እንደሚፈልግ እርግጠኞች የሆንበትን ነገር እንደሚያደርገው ማመን አይከብደንም። የዳነ ሰው ሁሉ ከዚህም የሚበልጠውን የዳግም ልደትን ተአምር ያገኘው በዚህ መንገድ ነው። እግዚአብሔር ያዘጋጀልንን በወንጌል አማካይነት እንድናውቅ እስክንደረግ ድረስ በእምነት መቀበል ሊኖር አይችልም።
በክርስቶስ ማስተስረያ አማካይነት መዳንም የሥጋ ፈውስም እንደ ተዘጋጁ፣ እንዲሁም የገዛ ወገኖቹን ሕመም ማስወገድና እንደ ተስፋ ቃሉ የዘመናቸውን ቍጥር መፈጸም የእግዚአብሔር ፈቃድ እንደ ሆነ ከሚያስተምረው ትምህርት ይበልጥ በእግዚአብሔር ቃል ውስጥ ሁሉ አጽንዖት የተሰጠው ትምህርት የለም (ዘጸአት 23:25 እና 26)። በዘሌዋውያን 14 እና 15 ያሉት ምሳሌዎች በሙሴ ሕግ ሥር ሕመም ሁልጊዜ ይፈወስ የነበረው በማስተስረያ አማካይነት እንደ ነበረ እንደሚያሳዩ፣ እንዲሁ ማቴዎስ 8:17 ኢየሱስ በሽታን ሁሉ የፈወሰው በማስተስረያው መሠረት እንደ ሆነ በግልጽ ይናገራል። ይህ የመጽሐፍ ክፍል ክርስቶስ ያጨናንቁት የነበሩትን ሕመምተኞች ሲፈውስ አንድንም ያላስቀረበት ምክንያት ለአዳም ዘር ሁሉ፣ አንተንም ጨምሮ፣ ያደረገው ማስተስረያው እንደ ነበረ ያሳየናል። ሕዝብ በሕዝብ ላይ እየተከታተለ «ሊሰሙትና ከሕመማቸው ሊፈወሱ» ወደ እርሱ ሲጋፋ፣ በወንጌሎች ውስጥ ደጋግሞ «ሁሉንም ፈወሳቸው» ተብሎ ተጽፎአል። (ማቴዎስ 4:24፤ 12:15፤ 14:14፤ ሉቃስ 4:40፤ የሐዋርያት ሥራ 10:38ን አንብብ።) አንድንም ሊያስቀር አልቻለም። ለምን? ሊያደርገው ባለው ማስተስረያ «እርሱ ድካሞቻችንን ወሰደ» ወዘተ. ስለሚል ነው። የተሸከመው የ«እኛን» ድካሞች ስለ ሆነ፣ ይህ ትንቢት እንዲፈጸም የሁሉም መፈወስ ያስፈልጋል። እግዚአብሔር ይህን ቃል በጥንቃቄ ያስቀመጠው ራሳችንን ከእርሱ ለማውጣት ቃሉን አዛብተን መጥቀስ እስኪያስፈልገን ድረስ ነው።
ቀራንዮ ያዘጋጀው ለሁሉ ነው!
ነፍስን የማዳን፣ ሥጋን የመፈወስና ሊያደርገው የሚፈልገውን ሌላውንም ነገር ሁሉ የማድረግ የእግዚአብሔር መንገድ ቃሉን—የተስፋ ቃሉን—መላክ፣ ከዚያም ቃሉ እምነትን ባስገኘበት ስፍራ ሁሉ የተስፋ ቃሉን መፈጸም ነው። በፈውስ ረገድ መለኮታዊው አሠራር በዚህ ጥቅስ ተገልጦአል፦ «ቃሉን ልኮ ፈወሳቸው፤ ከሞት ጉድጓድም ጎትቶ አወጣቸው» (መዝሙር 107:20)።
«ይህም ቃል አሁን በእናንተ በምታምኑት ውስጥ እየሠራ ነው» የተባለለትና «ለመላ ሰውነታቸውም ጤና» የሆነው ይኸው የእግዚአብሔር ቃል ነው። (1ኛ ተሰሎንቄ 2:12፤ ምሳሌ 4:22 ተመልከት።)
አንዲት ትንሽ ልጅ ለአዲስ ቀሚስ ያላት እምነት እናቷ በሚቀጥለው ቅዳሜ ልትገዛላት የሰጠቻትን የተስፋ ቃል በመስማት እንደሚመጣ፣ እንዲሁ ለፈውስ ያለን እምነት እግዚአብሔር ሊያደርገው የሰጠውን ቃሉን ወይም የተስፋ ቃሉን በመስማት ይመጣል። የትንሿም ልጅ እምነት የእኛም እምነት «ከመስማት ይመጣል»። እንግዲህ ትንሿ ልጅ እናቷ ተስፋ እስክትሰጣት ድረስ ለአዲሱ ቀሚስ እምነት ሊኖራት አትችልም፣ እንዲኖራትም አይጠበቅባትም፤ እንዲሁ እኛም ያ እምነት እግዚአብሔር ሊያደርገው የሰጠውን ቃል (የተስፋ ቃል) በመስማት እስኪመጣ ድረስ ለፈውስ ወይም ለመዳን ወይም ለማንኛውም ሌላ በረከት እምነት ሊኖረን አንችልም፣ እንዲኖረንም አይጠበቅብንም።
አንድ ሰው «በእምነት መጽደቅ» እስኪሰበክለት ድረስ እንዴት ሊያገኘው ይችላል? እንዲሁም በእምነት የሚገኝ ፈውስ እስኪሰበክለት ድረስ አንድ ሰው እንዴት ፈውስን ሊያገኝ ይችላል? ሰዎችን ለመዳን ጥበበኞች ሊያደርጉ የሚችሉት ቅዱሳት መጻሕፍት ናቸው። ፈውስን ለመጠበቅ ምክንያት ከማግኘታችን በፊት፣ የሥጋ ፈጣሪና ቤዛ የሆነው እርሱ ሐኪሙም መሆኑን ማየት አለብን።
የእግዚአብሔር የቤዛነት ስሞች ዋጋ
እንግዲህ የሚፈውሰን ቃሉን በመላክ ከሆነ፣ በአዳም ዘር ላለው ለእያንዳንዱ ሰው በእነርሱ ላይ ያለውን የቤዛነት አቋሙን ለመግለጥ ለተለየ ዓላማ ከተሰጡት ከሰባቱም የቤዛነትና የቃል ኪዳን ስሞቹ ይበልጥ ቃሉ ሊሆን የሚችል ምን አለ?
ክርስቶስ «ወንጌልን ለፍጥረት ሁሉ አውጁ» ብሎ ሲያዝዘን፣ የቤዛነትን «የምሥራች» እንድንናገር ማለቱ ነው። ሰባቱ የቤዛነት ስሞቹ ቤዛነታችን ምን እንደሚያጠቃልል ይገልጣሉ። ሌሎች ብዙ ስሞች አሉት፤ የቤዛነት ስሞቹ ግን ሰባት ብቻ ናቸው፤ እነዚህም ሰባት ስሞች በቅዱሳት መጻሕፍት ከሰው ጋር ካለው ግንኙነት በቀር ፈጽሞ አይጠቀሱም። ስድስት ስሞች አይደሉም፣ ስምንትም አይደሉም፤ ፍጹም አዳኝ ስለ ሆነና ቤዛነቱ የሰውን ፍላጎት ሁሉ ስለሚሸፍን፣ ፍጹሙ ቍጥር ሰባት ናቸው። በእያንዳንዳቸው በእነዚህ ስሞች የተገለጡት በረከቶች ሁሉ በማስተስረያው ውስጥ ናቸው። ለምሳሌ ይሖዋ-ሻማ ማለት «እግዚአብሔር በዚያ አለ» ማለት ነው፤ ይኸውም «በመስቀሉ ደም የቀረበ» ማለት ነው።
ይሖዋ-ሻሎም «እግዚአብሔር ሰላም ነው» ተብሎ ይተረጐማል። ይህም በማስተስረያው ውስጥ ነው፤ ምክንያቱም «ሰላም ያስገኘልን ቅጣት በእርሱ ላይ ወደቀ»።
ይሖዋ-ራዓ «እግዚአብሔር እረኛዬ ነው» ተብሎ ይተረጐማል። እረኛችን የሆነው ስለ በጎቹ ነፍሱን በመስጠት ነው።
እንግዲህ አየህ፣ ይህም መብት በማስተስረያው ውስጥ ነው።
ይሖዋ-ይርኤ ማለት መሥዋዕትን «እግዚአብሔር ያዘጋጃል» ማለት ነው፤ በቀራንዮ የተዘጋጀው መሥዋዕት ክርስቶስ ራሱ ነው።
በመስቀል ላይ አለቅነትንና ሥልጣናትን በመግፈፍ ይሖዋ-ንሲ፣ «እግዚአብሔር ዓርማዬ ነው»፣ ማለትም ድል አድራጊ ሆነ።
ኃጢአታችንን ተሸከመ፤ ለኃጢአተኛም ሁሉ የጽድቅን ስጦታ የሚቀበልበትን መንገድ በመክፈት ይሖዋ-ጽድቅኑ፣ «እግዚአብሔር ጽድቃችን»፣ ሆነ።
ይሖዋ-ራፋ «እኔ የምፈውስህ እግዚአብሔር ነኝ» ወይም «ሐኪምህ እግዚአብሔር እኔ ነኝ» ተብሎ ይተረጐማል። ይህም ደግሞ በማስተስረያው ውስጥ ነው፤ ምክንያቱም «እርሱ ድካሞቻችንን ወሰደ፤ በሽታዎቻችንንም ተሸከመ»።
እነዚህ ሰባት ስሞች ዝርዝሩን ያሟላሉ፤ የተሰጡትም በእነዚህ በእያንዳንዳቸው በሰባቱ መጠሪያዎች እግዚአብሔር ከሁላችን ጋር ያለውን ግንኙነት ለመግለጥ ነው። እነዚህ ሰባቱም ስሞች ለዘለቄታው የክርስቶስ ናቸው፤ በእነዚህም በእያንዳንዳቸው በሰባቱ መጠሪያዎች «ትናንትም ዛሬም ያው ነው፤ ለዘመናት ሁሉም ያው ሆኖ ይኖራል»። ኢየሱስ ከእነዚህ ከሰባቱ በረከቶች ለአንዱም ቢሆን ወደ እርሱ ለሚመጡ ሁሉ፦ «ወደ እኔ የሚመጣውንም ማንንም ከቶ አላባርርም» ይላል።
እያንዳንዱ ፍጥረት «የክርስቶስን በረከት በሙላት» ተቀብሎ ደስ የመሰኘት መብት እንዲኖረው፣ እግዚአብሔር ለፍጥረት ሁሉ እንዲሰበክ የሚፈልገው የምሥራች ይህ ነው።
ደግሜ እላለሁ፤ ከቤዛነት ስሙ ከይሖዋ-ራፋ ይበልጥ «በሰማይ ጸንቶ ተተክሏል» የተባለለት የእግዚአብሔር ቃል የሆነ ምንም ነገር የለም። ማንም ሰው የእግዚአብሔርን «እኔ ነኝ» ይሖዋ-ራፋን ወደ «እኔ ነበርሁ» የመለወጥ መብት የለውም፤ ምክንያቱም «የጌታ ቃል ግን ለዘላለም ጸንቶ ይኖራል»።
ይሖዋ-ሻሎም፣ «እግዚአብሔር ሰላም ነው»፣ ከክርስቶስ የቤዛነት ስሞች አንዱ ስለ ሆነ፣ ሰው ሁሉ ከእርሱ ሰላምን ለማግኘት የቤዛነት መብት የለውምን? እንዲሁም ሰው ሁሉ ከይሖዋ-ንሲ ድልን ለማግኘት የቤዛነት መብት የለውምን? ሰው ሁሉ ከይሖዋ-ጽድቅኑ «የጽድቅን ስጦታ» ለማግኘት የቤዛነት መብት የለውምን? ወዘተ. እንዲህ ከሆነ፣ ሰው ሁሉ ከይሖዋ-ራፋ ፈውስን ለማግኘት የቤዛነት መብት የማይኖረው ስለ ምንድን ነው?
ይህ ቃል (ይሖዋ-ራፋ) መጀመሪያ በተላከላቸው ሰዎች ዘንድ እንዲህ ያለ ተቀባይነትና እምነት አግኝቶ ስለ ነበረ «ከነገዶቹም ሁሉ አንድ ሰው እንኳ አልተሰናከለም»፣ ማለትም አንድም ደካማ አልነበረም፤ ይህ የጤና ሁኔታ በመተላለፋቸው በተደናቀፈ ቍጥርም፣ ንስሐ እንደ ገቡ ወዲያው የምሳሌ ማስተስረያዎች ይደረጉ ነበር፤ እግዚአብሔርም ለአንዳንዶች ሳይሆን ለሁሉም አሁንም ፈዋሹ ይሖዋ-ራፋ ነበር። እግዚአብሔር ይህ ስም እንደ ሌሎቹ ስሞች ሁሉ «ሕመምተኞቹም ይሻላቸዋል» ከሚለው የተስፋ ቃል ጋር «ለፍጥረት ሁሉ» እንዲላክ ይፈልጋል፤ ምክንያቱም «ጌታም ያስነሣዋል»።
የናሱ እባብ የክርስቶስ ምሳሌ
እግዚአብሔር ለሚሞቱት እስራኤላውያን ተጨማሪውን ቃል በመላክ ይህን ቃል አጸናላቸው፦ «የተነደፈ ማንኛውም ሰው ቢያየው» (የቀራንዮን ምሳሌ) «በሕይወት ይኖራል።» የሥጋ ፈውስ በማስተስረያው ውስጥ ካልተዘጋጀ፣ እነዚህ የሚሞቱ እስራኤላውያን ለሥጋቸው ፈውስ ወደ ማስተስረያው ምሳሌ እንዲመለከቱ የተጠየቁት ስለ ምንድን ነው? እርግማናቸው የክርስቶስ ምሳሌ ከፍ ከፍ በማለቱ እንደ ተወገደ፣ እንዲሁ የእኛም እርግማን ምሳሌው ያመለከተው እውነተኛው አካል የሆነው ክርስቶስ ከፍ ከፍ በማለቱ ይወገዳል። መንፈስ ቅዱስ ክርስቶስን እውን እንዲያደርግልን ተሰጥቶናልና፣ እነርሱ ምሳሌውን በተመለከቱበት ያህል ተስፋ እኛ ክርስቶስን ራሱን የማንመለከተው ስለ ምንድን ነው?
የናሱን እባብና የሕመማቸውን ምልክቶች በአንድ ጊዜ ሊመለከቱ እንዳልቻሉ ማስተዋል መልካም ነው። አብርሃም የእግዚአብሔርን የተስፋ ቃል ሲመለከት እምነቱ በረታ፤ አንዳንድ ሰዎች ይህን ይገለብጡታል፤ የሕመማቸውን ምልክቶች ሲመለከቱ እምነታቸው ይደክማል፤ የተስፋ ቃሉንም ይረሳሉ። እግዚአብሔር የፈወሰው ለእምነታችን ብቸኛ መሠረት የሆነውን ቃሉን በመላክ ስለ ሆነ፣ የሕመም ምልክቶቻችን ቃሉ ተስፋ የሰጠውን ከመጠበቅ እንዲያግዱን ብንፈቅድ ፈውስን እናጣለን።
ሁለተኛው እርምጃ
ሁለተኛው እርምጃ ከእግዚአብሔር ጋር ትክክል መሆንህን ማረጋገጥ ነው፤ ምክንያቱም የቤዛነት በረከቶቻችን ቅድመ ሁኔታ አላቸው። ወንጌልን ከሰማንና የሚያቀርበውን ካወቅን በኋላ ኢየሱስ፦ «ንስሓ ግቡ፤ በወንጌልም እመኑ» ይላል። እነዚህን መመሪያዎች ሊከተሉ የሚችሉት ከእግዚአብሔር ጋር ትክክል የሆኑ ብቻ ናቸው። ለሥጋችን ፈውስን ስንሻ ከነፍሳችን ባላጋራ ጋር ምንም ዓይነት ድርድር ሊኖር አይገባም፤ ምክንያቱም የበሽታዎቻችን ምንጭ እርሱ ነው። በነፍሳችን ያለውን የዲያብሎስን ሥራ አጥብቀን ይዘን ሳለን ኢየሱስ በሥጋችን ያለውን የዲያብሎስን ሥራ ሊያፈርስ ይችላል፤ ነገር ግን እንደሚያደርገው ተስፋ አልሰጠም። ከዲያብሎስ ሥራ የከፋው ክፍል እንዲቀር እየፈቀድን አንዱ ክፍል እንዲወገድ እምነትን መለማመድ ከባድ ነው። አንድ ሰው ለእግዚአብሔር የመታዘዝን ጉዳይ ፊት ለፊት ተጋፍጦ እስካልፈታው ድረስ በእምነት ምድር ላይ አልቆመም። ያዕቆብ፦ «እንድትፈወሱ ኃጢአታችሁን አንዳችሁ ለሌላው መናዘዝንና አንዳችሁ ለሌላው መጸለይን ልማድ አድርጉት» ይላል። «ነፍስህ መልካም እንደ ሆነች ሁሉ፣ በሁሉም ነገር መልካም እንዲሆንልህና ጤናማ እንድትሆን» የእግዚአብሔር ፈቃድ ነው። «ጌታ ባልሰማኝ ነበር፤ በልቤ በደልን ይዤ ቢሆን ኖሮ።»
በእግዚአብሔር ፊት ድፍረት የሚኖረን ልባችን በማይፈርድብን ጊዜ ነው። ሕመምተኛው «የቤተ ክርስቲያንን ሽማግሌዎች ይጥራ» የሚለው ትእዛዝ በመጀመሪያ የተጻፈው በመንፈስ ለተሞሉ ክርስቲያኖች ነበር። አንድ ሰው በረከቱን እየፈለገ ባራኪውን ግን ካልፈለገ—ምሕረቱን እየፈለገ እርሱን ራሱን ግን ካልፈለገ—አንድ የተበላሸ ነገር አለ። ፈቃዱን እየገፉ ምሕረቱን መሻት ተገቢ አይደለም። ትልቁን በረከት እየገፋህ ትንሽ በረከት አትለምን። መለኮታዊ በረከቶችን በአንድ ጊዜ መቀበልና መግፋት አይቻልም።
እግዚአብሔር ለፈርዖን የተናገረውን፦ «እንዲያገለግሉኝ ሕዝቤን ልቀቅ» (ዘጸአት 7:16) የሚለውን ቃል ለሰይጣንና ለበሽታ ለመናገር ይጠባበቃል። «በነገር ሁሉ፣ የሥጋ ጤና እንዲመለስልን በምንለምንበት ጊዜ እንኳ፣ የመጀመሪያው ትኵረታችን የእግዚአብሔር ክብር ሊሆን ይገባዋል።» —ዳፊ።
ከእጁ ጤናን በምንሻበት ጊዜ ብቸኛው ተገቢ የመቅረቢያ መሠረት እግዚአብሔርን ለማገልገል የሚሆን ብርታት ነው። ለፈውስ በዘይት መቀባት ራሱ ራስን ለእግዚአብሔር የመቀደስ ምሳሌና ምልክት ነው።
ጤናችንን መሻት ያለብን ለእግዚአብሔር ክብር ነው።
«እንግዲያስ በዘይት መቀባት ምን ማለት ነው? ዘሌዋውያን 8:10-12ን ገልጠህ ተመልከት፤ ለጥያቄው የእግዚአብሔርን መልስ ታገኛለህ። ‹ሙሴ የቅብዓቱን ዘይት ወስዶ ማደሪያውንና በውስጡ ያለውን ሁሉ ቀባ፤ ቀደሳቸውም›፤ ይኸውም ለእግዚአብሔር ለያቸው። ‹በጌታም ስም ዘይት› መቀባት የመወሰንና ራስን የመቀደስ ሥርዓት ነበር፤ ይህም የተቀባው ሰው ለእርሱና ለእርሱ ብቻ እንዲሠሩ እጆቹን፣ ለእርሱና ለእርሱ ብቻ እንዲሄዱ እግሮቹን፣ ለእርሱና ለእርሱ ብቻ እንዲያዩ ዓይኖቹን፣ እንዲናገሩ ከንፈሮቹን፣ እንዲሰሙ ጆሮዎቹን፣ መላ ሰውነቱንም የመንፈስ ቅዱስ ቤተ መቅደስ እንዲሆን ፈጽሞ ለእግዚአብሔር መስጠቱን የሚያመለክት ነበር።»—ቄስ አር. ኤ. ቶሪ።
«ወዳጄ ሆይ፣ ነፍስህ መልካም እንደ ሆነች ሁሉ፣ በሁሉም ነገር መልካም እንዲሆንልህና ጤናማ እንድትሆን እጸልያለሁ።» (3ኛ ዮሐንስ 2።)
መንፈስ ቅዱስ «ዲያብሎስን ተቋቋሙት» ከማለቱ በፊት ለእግዚአብሔር እንድንገዛ ይነግረናል፤ ምክንያቱም ማንም ራሱን ለእግዚአብሔር እስካላስገዛ ድረስ ዲያብሎስን በድል ሊቃወም አይችልም። ዲያብሎስ በዚህ መንገድ ሲቃወም ዝም ብሎ ተራምዶ አይሄድም፤ በእውነት ይሮጣል—«ከእናንተም ይሸሻል!» (ያዕቆብ 4:7 ተመልከት።)
በዘዳግም 28ኛው ምዕራፍ የተዘረዘሩትን ልዩ ልዩ በሽታዎች ጨምሮ እርግማኑ በሕዝቡ ላይ የመጣው መታዘዛቸውና አገልግሎታቸው «በደስታና በሐሤት ልብ» ስላልነበረ ነው። በዚያ ምዕራፍ ለተጠቀሱት በሽታዎች መምጣት ምክንያት የሆነው የልብ ሁኔታ ለመወገዳቸው የሚያበቃ ሁኔታ አይደለም። በሌላ አነጋገር በዚያ ዘመን ለእርግማኑ ምክንያት የሆነው የልብ ሁኔታ፣ በእኛ ዘመን እርግማኑ እንዲወገድ ወደ እርሱ የምንመጣበት የልብ ሁኔታ አይደለም።
የእግዚአብሔር የተስፋ ቃሎች ለታዛዦች ብቻ ናቸው
የልባቸውን መሻት የሚሰጠው በእግዚአብሔር ደስ ለሚሰኙ ነው። (መዝሙር 37:4 ተመልከት።) እግዚአብሔር ለጸጋው ዘመን መመዘኛውን ዝቅ አላደረገም። «እግዚአብሔር ደዌን ሁሉ ከአንተ ያርቃል» የተባለው ለታዛዦች ብቻ—«የአምላክህን የእግዚአብሔርን ቃል በጥንቃቄ ብትሰማ»፣ «እርሱ ትክክል ነው የሚለውንም ብታደርግ» ለተባሉት—ነው። (ዘዳግም 7:15፤ ዘጸአት 15:26 ተመልከት።)
«እንግዲህ እምነት ልባችንና ፈቃዳችን ከእግዚአብሔር ፈቃድና ዓላማ ጋር መዋሐዱ ነው፤ ይህ አንድነት በጐደለበት ስፍራ ውጤት ማግኘት አይቻልም። ይህ እጅግ አስፈላጊ መንፈሳዊ ሕግ ነው፤ በእኛ ዘመን ግን ለእርሱ በሚያሳዝን ሁኔታ ዕውሮች ሆነናል።»—ቄስ ፒ. ጋቪን ዳፊ።
እግዚአብሔር እርሱን ስለ መፍራትና ከክፉ ስለ መራቅ እንዲህ ይላል፦ (ይህ ራሱ) «ለሰውነትህ መድኃኒት፣ ለአጥንቶችህም አዲስ ብርታት» (በዕብራይስጥ፣ ማርጠብ) «ይሆናል።» (ምሳሌ 3:7, 8።)
- እምነት ሁልጊዜ መታዘዝን ያመለክታል። ጳውሎስ ለኤፌሶን ሰዎች የመጀመሪያይቱን ትእዛዝ እንዲጠብቁ ጽፎላቸዋል፦ «መልካም እንዲሆንልህና በምድር ላይ ረጅም ዕድሜ እንድትኖር።» (ኤፌሶን 6:3።) ንዕማን ከመፈወሱ በፊት ለእግዚአብሔር ቃል መገዛቱና መታዘዙ ፍጹም ነበር።
የተስፋው ቃል የተሰጠው ያለ ነቀፋ ለሚሄዱ ነው፦ «ያለ ነቀፋ ከሚሄዱት አንዳች መልካም ነገር አይከለክልም» (መዝሙር 84:11)። ስለዚህ ከእግዚአብሔር አንዳች ነገር ከመፈለጋችን በፊት ራሳችንን «ይህ ትእዛዝ ታላቅ ነው፤ ከሁሉም የመጀመሪያው ነው» ለተባለላት ትእዛዝ ማስገዛት ይገባናል፤ እርሷም፦ «ጌታ አምላክህን በሙሉ ልብህ…» የምትል ናት፤ እግዚአብሔር፦ «በፍቅር የሚጣበቁብኝን አድናቸዋለሁ» ይላልና (መዝሙር 91:14)። እርሱ «ለሚወዱትና ትእዛዛቱን ለሚጠብቁ እስከ ሺህ ትውልድ ድረስ ቃል ኪዳኑንና ጽኑ ፍቅሩን ይጠብቃል» (ዘዳግም 7:9)። ስለዚህ ፈውስን በምንለምንበት ጊዜ እንደ ለምጻሙ ሰው እንምጣና እንስገድለት።
«ረጅም ዕድሜን በቀኝ እጇ» (በጥበብ ቀኝ እጅ) «ይዛለች፤ ሀብትንና ክብርንም በግራዋ» (ምሳሌ 3:16)። እርሷን (ጥበብን) አግባ፤ ያላትንም ሀብት ሁሉ ታገኛለህ። ጥበብ በዚህ ስፍራ ለመንግሥቷ ለሚገዙ ሁሉ በሁለት እጆቿ በረከትን የምትዘረጋ ለጋስ ንግሥት ሆና ተመስላለች።
«የእግዚአብሔር ዓይኖች ልባቸው ለእርሱ ያልተከፋፈለ ለሆኑት ብርታቱን ያሳይ ዘንድ በምድር ሁሉ ይዞራሉ» ተብሎ የተጻፈው ልባቸው ለእርሱ ፍጹም ለሆነ ሰዎች ነው (2ኛ ዜና መዋዕል 16:30 ተመልከት)።
«የተረጋጋ ልብ ለአካል ሕይወትን ይሰጣል፤ ቅንዓት ግን በአጥንት ውስጥ መበስበስ ነው» (ምሳሌ 14:30)። ያልተረጋጋና ጤናማ ያልሆነ ልብ ጤናማ ካልሆነ ሆድ ይከፋል፤ የታመመች ነፍስ ከታመመ ሥጋ ትከፋለች። የተዛባ ፈቃድ ከተዛባ ጉበት ይከፋል። ጳውሎስ «ጌታም ለአካል ነው» ከማለቱ በፊት «አካል ግን… ያለው ለጌታ ነው» አለ።
መጽሐፍ ቅዱስ ስለ ሰውነታችን እንዲህ ያስተምራል፦ «ተገዝታችኋል፤ ዋጋም ተከፍሎላችኋል። ስለዚህ በአካላችሁ እግዚአብሔርን አክብሩ» (1ኛ ቆሮንቶስ 6:20)። «ስለዚህ ወንድሞችና እኅቶች ሆይ፣ በእግዚአብሔር ርኅራኄ እማጸናችኋለሁ፤ አካላችሁን ሕያው፣ ቅዱስና እርሱን ደስ የሚያሰኝ መሥዋዕት አድርጋችሁ ለእግዚአብሔር አቅርቡ። ይህ ምክንያታዊ አምልኮአችሁ ነው» (ሮሜ 12:1)። ስለዚህ ሰውነትህ እንዲፈወስ ከፈለግህ ለእርሱ አቅርበው። እንደሚጠግነው ቃል የሚገባው ሰውነትህ ገንዘቡ ከሆነ በኋላ ብቻ ነው።
መጀመሪያ ለመንጻት ወደ መስቀል
«ለታመሙ እርግጠኛው መንገድ ይህ ነው፦ መጀመሪያ ለመንጻት ወደ መስቀል፣ ቀጥሎ የመንፈስን ስጦታ ለመቀበል ወደ ሰገነቱ አዳራሽ፣ ቀጥሎ የሕይወት ዘመን ተልእኮን ለመቀበል ወደ ተቀጠረው ተራራ፣ በመጨረሻም ለአገልግሎት የሚሆን ብርታትን ለማግኘት ወደ ታላቁ ሐኪም።» —ብራያንት።
«ኢየሱስን ከሙታን ያስነሣው የእርሱ መንፈስ በእናንተ ውስጥ መኖሪያውን ካደረገ፣ ክርስቶስ ኢየሱስን ከሙታን ያስነሣው እግዚአብሔር፣ መንፈሱ በእናንተ ውስጥ ስለሚኖር፣ ሟች አካላችሁንም ደግሞ ሕያው ያደርጋል» (ሮሜ 8:11)። እውነተኛው የወይን ግንድ በሆነው በክርስቶስ ለነፍሳችንም ለሥጋችንም የሚያስፈልገን ሕይወት ሁሉ አለ፤ ነገር ግን ከወይኑ ግንድ ጋር ባለን አንድነት ካልሆነ በቀር ይህን እንዴት ልንወርሰውና ልንደሰትበት እንችላለን? ከእርሱ ተለይተን አይደለም፤ ነገር ግን «እናንተም በእርሱ ሙሉዎች ሆናችኋል» ተብሎአል (ቆላስይስ 2:10)።
ምትክነት ያለ አንድነት የወይኑን ግንድ ሕይወት ለመውረስና ለመደሰት በቂ አይደለም። ተአምር ካስፈለገህ ከተአምር አድራጊው ጋር ተስማማ። የወይኑን ግንድ ሕይወት የምንደሰትበት ከወይኑ ግንድ ጋር ባለን ፍጹም አንድነት ነው። በመንፈስ ለመመራት እምቢ እያሉ ፈውስን መለመን፣ አናጢው ቤቱን እንዲጠግን እየለመኑ ወደ ቤቱ እንዳይገባ እንደ መከልከል ነው።
«የነኩትም ሁሉ ፍጹም ተፈወሱ» (ማቴዎስ 14:36)። በልብህ ገደብ አስቀምጠህ ልትዳስሰው አትችልም፤ ስለዚህ ሕዝቡን ገፍታ አልፋ እንደ ዳሰሰችው ሴት፣ አንተም ከመንገድህ «በክርንህ ገፍተህ» ማስወገድና አልፈህ መሄድ አለብህ፦ ራስ ወዳድነትን፣ አለመታዘዝን፣ ያልተናዘዝኸውን ኃጢአት፣ ለብ ማለትን፣ የሕዝብን አስተያየት፣ የሰዎችን ወግ፣ በመለኮታዊ ፈውስ ላይ የተጻፉ ጽሑፎችን፤ እንዲያውም ብዙ ጊዜ በዚህ የወንጌል ክፍል ብርሃን ያላገኘ ሊሆን የሚችለውን የገዛ መጋቢህን እንኳ አልፈህ ሂድ፤ ጥርጣሬን፣ ሁለት ልብነትን፣ የሕመም ምልክቶችን፣ ስሜቶችንና ሐሰተኛውን እባብ አልፈህ ሂድ።
የቤዛነትን በረከቶች ለእኛ እንዲፈጽም የተላከው መንፈስ ቅዱስ ጰራቅሊጦሳችን ወይም ረዳታችን ነው፤ ስለ ፍላጎታችን እርሱን ልንዳስሰው ወደምንችልበት ስፍራ እስክንደርስ ድረስ እነዚህን እንቅፋቶች ሁሉ ገፍተን አልፈን እንድንሄድ ሊረዳን ዝግጁ ነው። እግዚአብሔር መንፈስ ቅዱስን በሙላት በእኛ ላይ ሊያፈስስ ይጠብቃል፤ እርሱም በቀራንዮ የተዘጋጁትንና በሰባቱ የቤዛነትና የቃል ኪዳን ስሞቹ ለእኛ የተረጋገጡትን በረከቶች ሁሉ ለእኛ እንዲፈጽም የክርስቶስ ፈጻሚ ሆኖ ይመጣል።
የሚዳስሱት ሁሉ እንደሚድኑ ዛሬም እውነት ነው። እርሱን እንዴት እንዳስሰዋለን? የተስፋ ቃሉን በማመን ነው። ይህ ክርስቶስ ቃል ለገባው ለማንኛውም ነገር እርሱን የምንዳስስበት የማይሳሳት መንገድ ነው። እርሱን የምንዳስሰው በመለመንና ስንጸልይ ጸሎታችንን እንደሚሰማ በማመን ነው። ሴቲቱ በዳሰሰችው ጊዜ ያዳናት እምነቷ ነበር እንጂ የሥጋ መዳሰስ ብቻ አልነበረም፤ «ሕይወትን የሚሰጠው መንፈስ ነው፤ ሥጋ ምንም አይጠቅምም» ተብሎአልና። ሚሊዮኖች ኃጢአተኞች ከዚህም ለሚበልጠው ለዳግም ልደት ተአምር በዚህ መንገድ ዳስሰውታል።
ንክኪ ብቻ ሳይሆን አንድነት
ክርስቶስ በምድር ላይ ሲመላለስ ሕመምተኞች ዳስሰውት እንደ ዳኑ፣ እንዲሁ አሁንም እርሱን በእውነት መዳሰስ የሁሉም መብት ነው፤ የአሁኑም መዳሰስ በዚያን ጊዜ ከነበረው ይልቅ በቀረበ አንድነት ከክርስቶስ ጋር ያጣምረናል። ንክኪ ብቻ ሳይሆን እንደ ቅርንጫፉና እንደ ወይኑ ግንድ እውነተኛ የሆነ አንድነት ነው። መንፈሳዊውንም ሥጋዊውንም ሕይወት ጨምሮ በወይኑ ግንድ ያለው ሁሉ የእኛ — የቅርንጫፎቹ — ነው።
በእምነት የሚደረገው መዳሰስ አሁን ተአምር አድራጊ በሆነው በመንፈስ ቅዱስ ሙሉ ቍጥጥር ሥር ሊያደርገን ይችላል፤ ይህን በክርስቶስ የምድር አገልግሎት ዘመን ሊያደርግ አይችልም ነበር፤ ምክንያቱም «መንፈስ ገና አልተሰጠም ነበር»። ኢየሱስ ከከበረ ወዲህ አዳኝነቱና ፈዋሽነቱ አላነሰም፤ እንዲያውም በልጦአል። አሁን እርሱን የመዳሰስ መብት በአካል በዚህ በነበረበት ጊዜ ከነበረው እጅግ ይበልጣል፤ አሁን በመዳሰስ የበለጠ መቀበል ይቻላልና። ከእግዚአብሔር ቀኝ የሚሰጠው የበለጠ አለው፤ ስለዚህ፦ «መሄዴ ለእናንተ ይጠቅማል» አለ። መንፈስ የሚመጣው ክርስቶስ መንፈስን ለመላክ ከመሄዱ በፊት ሊገለጥ በማይችልበት መንገድ እርሱን ለመግለጥ ከሆነ፣ በዚያን ዘመን ያጨናንቁት ከነበሩት ሰዎች ቢያንስ እኩል በሆነ እምነት ለፈውስ ወደ እርሱ የማንቀርበው ስለ ምንድር ነው?
እስካሁን የተነገረው ፈውስን ከመለመን በፊት ከእግዚአብሔር ጋር መስተካከል ምን ያህል ታላቅ አስፈላጊነት እንዳለው ያሳያል። ከእግዚአብሔር ጋር የመስተካከል በረከት ከፈውሱ ራሱ ሺህ ጊዜ የሚመረጥና የሚያስደስት ነው። በሥጋቸው የተጨነቁ ሰዎች በደስታ ሲያበሩ አይቻለሁ፤ ፍጹም ጤንነት የነበራቸው ኃጢአተኞች ግን ራሳቸውን እስኪያጠፉ ድረስ ደስታ አጥተዋል።
ሦስተኛው እርምጃ
አሁን ፈውስን እንዴት የራሳችን ማድረግ እንደምንችል ግልጥ ለማድረግ እንሞክራለን። ከእግዚአብሔር ነገሮችን መቀበል ዳማ እንደ መጫወት ነው፤ በዳማ አንዱ ተጫዋች ጠጠሩን ካንቀሳቀሰ በኋላ ሌላው ተጫዋች እስኪጫወት ድረስ የሚያደርገው ነገር የለውም። እያንዳንዱ በተራው ይጫወታል። እንዲሁም እግዚአብሔር ፈውስን ወይም ሌላ ማንኛውንም በረከት ካዘጋጀና ቃሉን ከላከልን በኋላ፣ እርሱ እንደ ገና ከመጫወቱ በፊት ተራው የእኛ ነው። የእኛ ተራ ስንጸልይ እርሱ ቃል የገባውን መጠበቅ ነው፤ ይህም ፈውሱን ከማየታችን በፊት እምነታችንን በተግባር እንድንገልጥ ያደርገናል፤ ምክንያቱም ፈውሱ የሚመጣው በሚቀጥለው ተራ ነው፤ ያም የእግዚአብሔር ተራ ነው።
እግዚአብሔር ከተራው ውጭ ፈጽሞ አይጫወትም፤ ተራው ሲደርስ ግን ሁልጊዜ ይጫወታል። ኖኅ «ገና ስላልታዩ ነገሮች» ከእግዚአብሔር በተነገረው ጊዜ፣ የእርሱ ተራ የጥፋት ውኃ እንደሚመጣ ማመንና በደረቅ ምድር ላይ መርከብን በመሥራት እምነቱን በተግባር መግለጥ ነበር። እንዲሁም እግዚአብሔር «የታመመ ሰው አለን?» ብሎ፦ «በእምነት የቀረበ ጸሎት የታመመውን ያድናል፤ ጌታም ያስነሣዋል» ሲል፣ አንተም እንደ ኖኅ «ገና ስላልታዩ ነገሮች» ከእግዚአብሔር ተነግሮሃል፤ ተራህም እንደ ኖኅ ተራ ነው፤ ያም ማመንና በዚያው መሠረት መሥራት ነው። የወደቀው ተፈጥሮ በሚያየው፣ በስሜት ሕዋሳቱ ይመራል፤ እምነት ግን በንጹሑ የእግዚአብሔር ቃል ይመራል፤ ደግሞም እግዚአብሔር ቃል የገባውን እንዲያደርግ ከመጠበቅ — እንደ ታማኝ አካል ከመቍጠሩ — ያነሰ ምንም አይደለም።
መጠበቅ ስል ተስፋ ማድረግን ማለቴ አይደለም። አንድ ጸሐፊ በመልካም እንዲህ ብሏል፦ «ሊሆን ለሚችለው ነገር ተስፋ እናደርጋለን፤ መሆን ያለበትን ግን እንጠብቃለን… ጥርጣሬንና የመውደቅን ፍርሃት በሚዘጋ፣ የማይናወጥ መተማመንንም በሚያሳይ በዚያ መጠባበቅ።»
እምነት ከማመኑ በፊት ለማየት ፈጽሞ አይጠብቅም፤ ምክንያቱም «እምነት መልእክቱን ከመስማት ይመጣል»፤ የሚሰማውም «ገና ስላልታዩ ነገሮች» ነው፤ ደግሞም እምነት «የማናያቸውንም እውነታዎች የምናረጋግጥበት ነው»። የእምነት ሰው የሚያስፈልገው ሁሉ እግዚአብሔር እንደ ተናገረ ማወቅ ብቻ ነው። ይህ ለነፍስ ፍጹም እርግጠኝነትን ይሰጣል። «እግዚአብሔር እንዲህ ይላል» የሚለው ሁሉን ይወስናል። «ተብሎ ተጽፎአል» የሚለው እምነት የሚያስፈልገው ሁሉ ነው።
እምነት ቅጥሮቹ ከወደቁ በኋላ ሳይሆን ከመውደቃቸው በፊት የአውራ በግ ቀንደ መለከት ይነፋል። እምነት ዓይን እንደሚያየው ፈጽሞ አይፈርድም፤ ምክንያቱም ያልታየ ነገር ግን ተስፋ የተሰጠበት ነገር ማስረጃ ነው። እምነት ከስሜት ሕዋሳት ማስረጃ እጅግ በጸና መሠረት ላይ ያርፋል፤ ያም መሠረት «ጸንቶ በሚኖረው በእግዚአብሔር ቃል» ነው። ስሜቶቻችን ሊያታልሉን ይችላሉ፤ የእግዚአብሔር ቃል ግን ከቶ አያታልለንም!
ትንሿ ልጅ በሚቀጥለው ቅዳሜ አዲስ ቀሚስ እንደሚገዛላት ቃል ሲገባላት፣ እምነት ማለት ከአሁን ጀምሮ እስከ ቅዳሜ ድረስ በእርሷ ዘንድ ያለውና የምታሳየው እውነተኛ መጠባበቅ ነው። ቅዳሜ ደርሶ አዲሱን ቀሚስ ስታየው፣ ለአዲሱ ቀሚስ የነበራት እምነት ያበቃል። እንግዲህ እውነተኛ እምነት ሁልጊዜ የሚስማማው ተግባር አለው። ትንሿ ልጅ ከእምነቷ የተነሣ እጆቿን እያጨበጨበች፦ «እሰይ! እሰይ! በሚቀጥለው ቅዳሜ አዲስ ቀሚስ ሊገዛልኝ ነው!» ትላለች፤ ለልመናዋም መልስ እንዳገኘች ለጓደኞቿ ለመንገር ትሮጣለች።
እግዚአብሔር ሊዋሽ አይችልም
ኢየሱስ በአልዓዛር መቃብር አጠገብ፣ አልዓዛር ገና ሞቶ ሳለ፣ ዓይኖቹን ወደ ላይ አንሥቶ፦ «አባት ሆይ፣ ስለ ሰማኸኝ አመሰግንሃለሁ» አለ። ትንሿ ልጅ አዲስ ቀሚስ እንደሚኖራት አስቀድማ ለመመስከር አትፈራም፤ ጓደኞቿም፦ «እንደሚገዛልሽ በምን ታውቂያለሽ?» ሲሏት፣ በልበ ሙሉነት፦ «እንዴ! እማዬ ቃል ገብታልኛለች!» ብላ ትመልሳለች። እንግዲህ ትንሿ ልጅ አዲስ ቀሚስ ለመጠበቅ ካላት ምክንያት ይልቅ አንተ ፈውስን ለመጠበቅ የተሻለ ምክንያት አለህ፤ እናቲቱ ከቅዳሜ በፊት ልትሞት ትችላለችና፤ እግዚአብሔር ግን ሊሞት አይችልም። እናቲቱ ልትዋሽ ትችላለች፤ እግዚአብሔር ግን ሊዋሽ አይችልም። ቤቱ ከእናቲቱ ገንዘብ ጋር ሊቃጠል ይችላል። በታሪክ የታየው እያንዳንዱ የእምነት ታሪክ በእግዚአብሔር የተስፋ ቃል ብቻ የተገኘ፣ በጽኑ መሠረት ላይ የቆመ እርግጠኝነት ነበር፤ ያንንም እርግጠኝነት የሚያበረታታ አንዳች የሚታይ ነገር ከመኖሩ በፊት በእርሱ ላይ ተሠርቶበታል፤ ልክ እንደ ትንሿ ልጅ «ከአሁን እስከ ቅዳሜ»።
የእምነት መንገድ «የምንመለከተው በዓይን የሚታየውን ሳይሆን የማይታየውን ነው» የሚለው ነው። ኖኅ መርከቡን ሲሠራ የጥፋት ውኃ በዓይን አይታይም ነበር። የድንጋይ ቅጥሮች ከዚያ በፊት በአውራ በግ ቀንደ መለከት ድምፅና በእልልታ ፈርሰው አያውቁም ነበር። እነርሱ እግዚአብሔር የገባውን ቃል ብቻ ይጠብቁ ነበር፤ ቅጥሮቹ ገና ቆመው ሳሉ ቀንደ መለከቶችን በመንፋት እምነታቸውን በተግባር ሲገልጡ፣ ይህ የእነርሱ ተራ ነበር። ከዚያም እግዚአብሔር እንደሚጠበቀው በተራው ተጫወተ፤ ቅጥሮቹም ተንዱ!
የዕብራውያን መልእክት አሥራ አንደኛው ምዕራፍ በሙሉ የተጻፈው እምነት የነበረው እያንዳንዱ ሰው «ከአሁን እስከ ቅዳሜ» እንዴት እንደ ተመላለሰ ለማሳየት ነው።
እግዚአብሔር በእምነት ሥራዎች እጅግ ደስ ስለሚሰኝ፣ በዕብራውያን አሥራ አንደኛው ምዕራፍ እንደ ተመዘገበው ብዙ ታሪኮችን በዝርዝር አስፍሮአል።
«በእምነት ኖኅ» እንዲህና እንዲህ አደረገ። «በእምነት ያዕቆብ» እንዲህና እንዲህ አደረገ። «በእምነት ዮሴፍ» እንዲህና እንዲህ አደረገ። «በእምነት ሙሴ» እንዲህና እንዲህ አደረገ። «በእምነት የኢያሪኮ ግንቦች ወደቁ።» «በእምነት አብርሃም» ሁሉ ነገር እግዚአብሔር ከገባው ቃል ጋር የሚቃረን በሚመስልበት ጊዜ እንዲህና እንዲህ አደረገ። ሣራ ዕድሜዋ ካለፈ በኋላ እናት ለመሆን ኃይልን ያገኘችው (መካንነቷን ሳይሆን) የእግዚአብሔርን የተስፋ ቃል በማሰብ ነበር።
እነዚህ ሁሉ እግዚአብሔር ቃል የገባውን ነገር ለመጠበቅ ከእግዚአብሔር ቃል በቀር ሌላ ምክንያት ሳይኖራቸው በተግባር ተንቀሳቀሱ።
በታሪክ ውስጥ ባለ እያንዳንዱ የእምነት ታሪክም እንዲሁ ነው።
ዮናስ በዓሣው ሆድ ውስጥ በነበረ ጊዜ የሕመም ምልክቶቹ እጅግ እውነተኛ ነበሩ፤ እርሱም አልካዳቸውም፤ ነገር ግን የማይጠቅሙ ከንቱ ነገሮች ብሎ ቈጠራቸው — የእንግሊዝኛው መጽሐፍ ቅዱስ «የሐሰት ከንቱነት» ይላቸዋል። በሌላ አነጋገር «ወደ አንተ ለሚጣሩ ሁሉ በጽኑ ፍቅር የበለጸግህ ነህ» ተብሎ ለጌታ በተነገረው እውነት እንድንጠራጠር የሚያደርጉን ማናቸውም የሕመም ምልክቶች «የሐሰት ከንቱነት» ተብለው ሊቈጠሩ ይገባል። ዮናስ፦ «ለማይጠቅሙ ጣዖታት ራሳቸውን የሰጡ ጽኑ ፍቅራቸውን ይተዋሉ» አለ። ሰይጣንን ከማዳመጥና የሕመም ምልክቶቻችንን ከመመልከት ይልቅ፣ ቃሉን በመላክና በመጠበቅ ከሚፈውሰው ከእግዚአብሔር ጋር «አብረን የምንሠራ» መሆን አለብን! ዲያብሎስ በሚናገረው ሳይሆን ለፈውሳችን በላከው ቃል በመጠመድ ከእርሱ ጋር መተባበር አለብን።
የሕመም ምልክቶች ሊቈዩ ይችላሉ
እምነታችንን በተግባር ስንገልጥ እንኳ የሕመም ምልክቶች ሁልጊዜ ወዲያውኑ አይጠፉም። ሕዝቅያስ ከተፈወሰ በኋላ ወደ እግዚአብሔር ቤት ለመውጣት የሚያስችል ብርታት እስኪያገኝ ሦስት ቀን ፈጀ። በዮሐንስ 4:50-52 ሹሙ «ኢየሱስ የነገረውን አምኖ» ሄደ፤ ባሮቹንም ባገኛቸው ጊዜ ሊሞት ስለ ደረሰው ልጁ «መሻል የጀመረው በስንት ሰዓት እንደ ሆነ ጠየቃቸው»።
መጽሐፍ ቅዱስ «የፈውስ ስጦታዎች» እና «ተአምራትን የማድረግ ኃይል» በሚባሉት ስጦታዎች መካከል ልዩነት ያደርጋል። ክርስቶስ በናዝሬት ከአለማመናቸው የተነሣ ተአምር ሊያደርግ አልቻለም፤ ነገር ግን ጥቂት ድውዮችን ፈወሰ። ሁሉም ወዲያውኑ ፍጹም ጤነኛ የሚሆኑ ቢሆን ኖሮ ለፈውስ ስጦታዎች ስፍራ ባልኖረ ነበር፤ ሁሉም ተአምራት በሆነ ነበር። ብዙ ሰዎች እግዚአብሔርን በተአምራት ብቻ ለመወሰን በመሞከር ፈውስን ያጣሉ። የክርስቶስ የተስፋ ቃል «ሕመምተኞቹም ይሻላቸዋል» የሚል ነው፤ ነገር ግን «ወዲያውኑ» አላለም።
ዛፍ ከተቈረጠ በኋላ የሕይወት ምልክቶች በዛፉ ውስጥ ለጥቂት ጊዜ ይቈያሉ።
«እምነት ማለት ተስፋ በምናደርገው ነገር መተማመን፣ በማናየውም ነገር ማመን ማለት ነው» (ዕብራውያን 11:1—የሞፋት ትርጕም)። ያመንነውም ሊዋሽ የማይችለው እግዚአብሔር ስለ ተናገረ እንደ ሆነ የታወቀ ነው። ለማመን ይህ ምክንያት ምንኛ በቂ ነው! ስለዚህ እምነት እጅግ ምክንያታዊ ነው። ብዙ የማያስቡ ሰዎች እንደሚገምቱት ያለ ማስረጃ ማመን አይደለም፤ ይልቁንም ሊገኝ ከሚችለው ከሁሉ በላቀ ማስረጃ፣ «በሰማይ ጸንቶ ተተክሏል» በተባለለት በእግዚአብሔር ቃል ምክንያት ማመን ነው። ሐዋርያው ያዕቆብ፦ «እምነት ምን እንደ ሆነ በሥራዬ አሳይሃለሁ» ይላል (የሞፋት ትርጕም)። ስለዚህ እምነት በመጽሐፍ ቅዱስ በተመዘገቡት የእግዚአብሔር ቃሎች ፍጹም እውነትነት እስክንሠራባቸው ድረስ እርግጠኛ መሆን ነው።
እምነት ምክንያታዊም አስተማማኝም ነው
ከዚህ የበለጠ ምክንያታዊ፣ ከዚህስ የበለጠ አስተማማኝና እርግጠኛ ምን ሊኖር ይችላል?
እምነት የተጻፈውን የእግዚአብሔር የተስፋ ቃል በቀጥታ ለእኛ የተላከ መልእክቱ አድርጎ መቀበል ነው። የተስፋ ቃሉ እርሱ ራሱ ተገልጦ፦ «ጸሎታችሁን ሰምቻለሁ» እንዳለን ያህል ተመሳሳይ ትርጕም አለው። የእግዚአብሔር ቃል ለነፍሳችን ሕይወት በሚሆንበት በዚያው መንገድ ለሥጋችንም ሕይወት ይሆናል፤ ያም የተስፋ ቃሉን በማመን ነው።
ለ40 ዓመታት ያህል ስለ ፈውስ ሲጸልዩ ኖረው ሳይቀበሉ የቀሩ አንዳንድ ሰዎችን አውቃለሁ፤ ከዚያም እንዴት የራሳቸው ማድረግ እንዳለባቸው እንደ ተነገራቸው ፈውሱ አንዳንድ ጊዜ በቅጽበት መጥቶላቸዋል። ክርስቶስ ለመስጠት ለሚጓጓለት በረከት ለ40 ዓመት፣ ወይም ለአንድ ሳምንት እንኳ መጸለይ አያስፈልገንም። ርኅሩኁ ልቡ እኛ ልንመኘው ከምንችለው በላይ ሊፈውሰን ይናፍቃል፤ እኛ ግን «እምነት መልእክቱን ከመስማት ይመጣል» የተባለለትን እምነት እስክናገኝና ያንንም እምነት በተግባር እስክንገልጥ ድረስ እንዲጠብቅ እናደርገዋለን፤ ምክንያቱም እግዚአብሔር አያጭበረብርም፤ ከተራውም ውጭ አይጫወትም።
ኢየሱስ በመስቀል ላይ ኃጢአታችንን ብቻ ሳይሆን በሽታዎቻችንንም እንደ ተሸከመ፣ ስለዚህም እኛ ልንሸከማቸው እንደማያስፈልገን ካየን በኋላ፣ ቀጣዩ እርምጃችን በእምነት የራሳችን ማድረግ ነው፤ ይህም ብቸኛው መጽሐፍ ቅዱሳዊ መንገድ ነው። የነገሩ እውነት እግዚአብሔር ይህን የርስታችንን ክፍል ከ2,000 ዓመት ገደማ በፊት ሰጥቶናል፤ የሚጠብቀውም እርሱ ነው፤ በረከቱን በእምነት የራሳችን እስክናደርግ ድረስ እየጠበቀ ነው። ከሁለት ሺህ ዓመት በፊት «ኃጢአትን በመሥዋዕቱ ለማስወገድ አንድ ጊዜ ተገልጧል»፤ ከ2,000 ዓመት በፊት እግዚአብሔር «የሁላችንንም በደል በእርሱ ላይ እንዲወድቅ አደረገ»፤ ከ2,000 ዓመት በፊት «እርሱ ድካሞቻችንን ወሰደ፤ በሽታዎቻችንንም ተሸከመ»። እግዚአብሔር የሚጠብቀው ወገን ነው፤ አስቀድሞ የሰጠንን በረከት እንዴት የራሳችን ማድረግ እንዳለብን እስክንማር ድረስ ይጠብቀናል። 2ኛ ጴጥሮስ 3:9። «ጌታ የተስፋ ቃሉን አያዘገይም… ለእናንተ እየታገሠ ነው።» ወይም ዌይማውዝ እንደ ተረጐመው፦ «ጌታ የተስፋ ቃሎቹን በመፈጸም አይዘገይም፤ ነገር ግን በትዕግሥት ይታገሣችኋል።» በሌላ አነጋገር፣ እርሱ ስለ ተስፋ ቃሎቹ አይዘገይም፤ የምንዘገየው እኛ ነን፤ እርሱም በእኛ ይታገሣል።
ብዙዎቻችን ከዳንንበት ጊዜ አምስት ዓመት ቀደም ብለን ልንድን እንችል ነበር። እግዚአብሔር እንድንጠብቅ አላደረገንም፤ እኛ ግን እርሱን እያስጠበቅነው ነበር። በፈውሳችንም ነገር እንዲሁ ነው።
በምትጸልዩበት ጊዜ እንጂ ከዚያ በኋላ አይደለም
እንግዲህ ኢየሱስ በማርቆስ 11:24 ላይ በሞቱ የተገዙልንን በረከቶች ማናቸውንም እንዴት የራሳችን አድርገን እንደምንቀበል በትክክል ይነግረናል። የሚያስፈልገንን ሁሉ ቃል ከገባ በኋላ እንዲህ ይላል፦ «በጸሎት የምትለምኑትን ሁሉ» — ለ20 ዓመት ከጸለያችሁ በኋላ አይደለም፤ ከዳናችሁ በኋላም አይደለም፤ ነገር ግን ገና ታማችሁ ሳላችሁ፣ በምትጸልዩበት ጊዜ — «እንደ ተቀበላችሁት እመኑ፤ ታገኙታላችሁም።»
ከእግዚአብሔር የምንለምነውን ለመቀበል ያለው ቅድመ ሁኔታ፣ በጸለይን ጊዜ ጸሎታችንን እንደሚመልስ፣ እንዲሁም «ሕመምተኞቹም ይሻላቸዋል» በሚለው የተስፋ ቃሉ መሠረት እንደምንድን ማመን ነው።
በሌላ አነጋገር፣ ስለ ፈውስ በምትጸልይበት ጊዜ ክርስቶስ ጸሎትህ እንደ ተመለሰ አድርገህ እንድትቈጥር ሥልጣን ይሰጥሃል፤ ልክ እርሱ በአልዓዛር መቃብር አጠገብ ቆሞ አልዓዛር ከመቃብር ሲወጣ ገና ሳያይ፣ «አባት ሆይ፣ ስለ ሰማኸኝ አመሰግንሃለሁ» እንዳለው። ፈውስን በምንለምንበት ጊዜ ክርስቶስ፣ የጸሎታችንን መልስ ገና ሳናይ፣ በእምነት «አባት ሆይ፣ ስለ ሰማኸኝ አመሰግንሃለሁ» እንድንል ያዘናል።
ገና ሳናይና ሳይሰማን፣ ጸሎታችን እንደ ተመለሰ የምናምንበት ብቸኛ ምክንያታችን የእግዚአብሔር ቃል ሲሆን፣ ይህ እምነት ነው!
«ኢየሱስ፦ ‹እኔ የነገርኳችሁ ቃላት መንፈስ ናቸው፤ ሕይወትም ናቸው› ብሎ ተናገረ። ዮሐንስም፦ ‹ቃልም አምላክ ነበረ› ይላል። የክርስቶስን የተጻፉ ቃላት በቀጥታ ለእኛ እንደ ተላከ መልእክት አድርጎ መቀበል እምነት ነው። የእግዚአብሔር ቃል በፈውሳችንም በድነታችንም ሕይወት የሚሆንልን በዚህ መንገድ ነው። ለምሳሌ፣ በዮሐንስ 1:12 መሠረት ክርስቶስን የማመንና የመቀበል ተግባር፣ በኃይሉ አዲስ ልደትን ከሚሰጠን ከእግዚአብሔር ሥራ ጋር አንድ ነው። መለኮታዊ ፈውስም በዚሁ ሂደት ለሥጋችን ይሰጣል።» (ጸሐፊው አይታወቅም።)
ሌላ ሰው ደግሞ በአጭሩ እንዲህ ብሏል፦ ልብሱን እንደ ዳሰሰችው ሴት፣ እምነት፣ እውነታ፣ ስሜት — ይህ እግዚአብሔር ፈጽሞ የማይለቀው የፈውስ ቅደም ተከተል ነው። ከዚህ ቅደም ተከተል ብንወጣ እምነትም፣ እውነታም፣ ስሜትም እንደምንፈልገው አይሆኑም፤ ምክንያቱም እግዚአብሔር እንደሚፈልገው አይሆኑምና። 1ኛ ተሰሎንቄ 2:13 ስለ እግዚአብሔር ቃል «ይህም ቃል አሁን በእናንተ በምታምኑት ውስጥ እየሠራ ነው» ይላል። ቃሉ፣ መልሱን ገና ሳናይ፣ ጸሎታችን እንደ ተመለሰ ሲያሳምነን፣ ያን ጊዜ ቃሉ በእኛ ውስጥ በብርቱ መሥራት ይጀምራል።
«የእግዚአብሔር ቃል እንደዚያው አድርገው በሚቀበሉት ሰዎች ውስጥ ከመሥራት ፈጽሞ አይወድቅም፤ ምክንያቱም በራሳቸው ሕይወት ስለ መፈጸሙ ጥርጣሬን አያስተናግዱምና… እግዚአብሔር በረከቶቹን ሁሉ ለእምነት ሰጥቷል፤ ለአለማመን የሚሰጠው አንድም አልቀረውም።» — ሃሪየት ኤስ. ቤይንብሪጅ።
ሰዎች፦ «እግዚአብሔር ሊፈውሰኝ ፈቃዱ እንደ ሆነ አላውቅም» ሲሉኝ፣ «የተስፋ ቃሉን መጠበቅ የእግዚአብሔር ፈቃድ ነውን?» ብዬ እጠይቃቸዋለሁ። ከእግዚአብሔር ጋር የተስተካከልን ከሆንን፣ ሰዎች ቃል ሲገቡልን ከምናደርገው በላይ ራሳችንን ልንመለከት አይገባንም። ጥያቄው «በቂ እምነት አለኝን?» ሳይሆን «እርሱ ታማኝ ነውን?» የሚል ነው። ጉዳዩ ምን እንደሚሰማን ሳይሆን እውነታው ምን እንደ ሆነ ነው። ትንሿ ልጅ በማግሥቱ ብትታመምና ደኅና ባይሰማት፣ ያ እናቷ ቅዳሜ አዲሱን ቀሚስ ከምትገዛላት ነገር ጋር ምንም ግንኙነት የለውም። ቅዱሳት መጻሕፍት፦ «እንደ ፈቃዱ የሆነውን ነገር ብንለምን ይሰማናል» ይላሉ። ይህ እውነት ነው ወይስ አይደለም?
እግዚአብሔር ጸሎትን ይመልሳልን?
የጸሎታችሁን መልስ በተመለከተ «እንደ ተቀበላችሁት እመኑ» (ማርቆስ 11:24) የሚለውን ቃል ጸንታችሁ ብትጠብቁ፣ እምነታችሁንም በተግባር ብትገልጡ፣ ሁልጊዜ ወዲያውኑ ባይሆንም፣ እያንዳንዳችሁ ትፈወሳላችሁ፤ የተመደበላችሁ የሕይወት ዘመን ተፈጽሞ ካልሆነ በቀር።
እግዚአብሔር ሁልጊዜ የሚንቀሳቀሰው እኛ ከተንቀሳቀስን በኋላ ነው፤ የእኛ እንቅስቃሴም የጸሎታችንን መልስ ሳናይ በተስፋ ቃሉ ብቻ የተገኘውን «ሙሉ የእምነት እርግጠኝነት» በተግባር መግለጥ ነው። ፈውስ በእምነት ስለ ሆነ፣ «ሥራ የሌለው እምነትም የሞተ ነው» ስለ ተባለም፣ እግዚአብሔር መፈወስ የሚጀምረው እምነታችንን በተግባር መግለጥ ስንጀምር ነው።
እምነታችን እግዚአብሔርን ያሠራዋል
«እምነታችሁ የሚሠራውን ሥራ» ተብሎ የተጠራው የእኛ የእምነት ሥራ እግዚአብሔርን ወደ ሥራ ያስገባዋል።
እንግዲህ ሁላችንም እምነታችንን በአንድ ዓይነት መንገድ ልንገልጥ አንችልም። — አሥሩ ለምጻሞች ሲሄዱ ነጹ። ዮናስ በዓሣው ሆድ ውስጥ ሳለ «መሄድ» አልቻለም፤ ነገር ግን ገና በዓሣው ውስጥ ሳለ፣ «በምስጋና መዝሙር መሥዋዕት አቀርብልሃለሁ» በማለት እምነቱን በተግባር ገለጠ። ስለዚህ እግዚአብሔርን አስቀድመን በማመስገንና በማወደስ እምነታችንን መግለጥ፣ በታሪክ ዘመናት ሁሉ፣ በረከቶቹን ሁሉ የራሳችን አድርገን የምንቀበልበት የተወሰነው መንገዱ ሆኖ ኖሯል። ዕብራውያን 13:15 የምስጋና መባችን — «የውዳሴ መሥዋዕት» — እግዚአብሔር ቃል ለገባውና ስለዚህም ለምንጠብቀው በረከት አስቀድሞ መቅረብ እንዳለበት ያስተምረናል። መዝሙር 50:14, 15 እንዲህ ይላል፦ «ምስጋናን ለእግዚአብሔር መሥዋዕት አድርገህ አቅርብ፤ ለልዑልም የተሳልከውን ስእለት ፈጽም፤ መከራም ሲመጣ ወደ እኔ ጩኽ፤ ነጻ አወጣሃለሁ፤ አንተም ታከብረኛለህ።»
እዚህም እንደ ሌላው ስፍራ፣ እንደ ዮናስ ገና በመከራ ውስጥ ሳለን ምስጋናን እንድናቀርብ ታዝዘናል። ምናልባትም እርሱ የያዘው ይህንኑ የተስፋ ቃል ሊሆን ይችላል። «ድሆችና ችግረኞች ስምህን ያመስግኑ» — ይህም ማለት ገና በችግር ውስጥ ሳለህ እግዚአብሔርን አስቀድመህ አመስግን ማለት ነው። «በምስጋና ልንገናኘው እንውጣ» ማለት ተፈውሰን ከፊቱ እያመሰገንነው እንሂድ ማለት ሳይሆን፣ ገና ሳንፈወስ ስለ ፈውሱ በምስጋና ወደ እርሱ እንምጣ ማለት ነው። «እያመሰገናችሁ በደጆቹ ግቡ፤ እያወደሳችሁም ወደ አደባባዮቹ ግቡ።» እያመሰገንን መሄድ ይገባናል፤ ይህ ግን እምነት አይደለም።
እምነት ከመፈወሳችን በፊት የሚኖረን ነገር ነው። «እርሱን የሚሹ እግዚአብሔርን ያመሰግናሉ።» «ቅጥሮችሽን መዳን ብለሽ ትሰይሚያለሽ፤ በሮችሽንም ምስጋና ትያቸዋለሽ።» ምስጋና ከሌለ በር የሌለው ጠንካራ ቅጥር ፊት ለፊት ቆመናል፤ ማመስገንና የራሳችን አድርገን መቀበል ስንጀምር ግን የራሳችንን በር ገጥመን እናልፍበታለን። «ደስ ይበልሽ፤ ሐሤትም አድርጊ፤ እግዚአብሔር ታላላቅ ነገሮችን አድርጓልና»፤ በዚሁም መሠረት «ጊዜያቸውንም ሁሉ እግዚአብሔርን እየባረኩ በቤተ መቅደስ ያሳልፉ ነበር» — መንፈስ ቅዱስ ከሞላባቸው በኋላ ሳይሆን በፊት። «የእግዚአብሔር ቤተ መቅደስ በእግዚአብሔር ክብር ተሞልቶ» የተገኘው «ድምፃቸውን ከፍ አድርገው ‹እርሱ መልካም ነው፤ ጽኑ ፍቅሩም ለዘላለም ይኖራል› እያሉ እግዚአብሔርን ሲያወድሱ» ነበር። «በተስፋ ቃሉ ታመኑ (ምልክቶቻቸውን ሳይሆን፣ ‹የሐሰት አባት›ንም ሳይሆን)፥ የምስጋና መዝሙርም ዘመሩለት።»
ሰይጣን ምስጋናህን እንዲሰማ አድርገው
አንተ «የሐሰት አባት»ን ከምትሰማ ይልቅ፣ ስለ ተስፋ ቃሉ እግዚአብሔርን ስታመሰግን እርሱ እንዲሰማህ አድርገው!
«የሚተነፍስ ፍጥረት ሁሉ እግዚአብሔርን ያመስግን!» የታመመው ሰው እስትንፋስ አለው። በሌላ አነጋገር፣ ገና ታመህ ሳለህ፣ በተስፋ ቃሉ መሠረት ስለምትድን አመስግነው። «ልባችሁ አይረበሽ።» «ስለ ምንም ነገር አትጨነቁ» (አትባክኑ)። «ይልቁንም በሁሉ ነገር የምትፈልጉትን በጸሎትና በልመና ከምስጋና ጋር ለእግዚአብሔር አቅርቡ።» «ይህንም የሚያስጨንቃችሁን ሁሉ በእርሱ ላይ በመጣል አድርጉት፤ እርሱ ስለ እናንተ ግድ ይለዋልና።»
የታመመ እያንዳንዱ ክርስቲያን፣ ታሞ ሳለ እንኳ፣ ፍጹም ጤነኛ ከሆነው እጅግ ደስተኛ ኃጢአተኛ ይልቅ ደስ የሚሰኝበት ሺህ እጥፍ የሚበልጥ ነገር አለው።
«ሥራ የሌለው እምነትም የሞተ ነው» ስለ ሆነ እግዚአብሔርን አመስግን። «በማንኛውም ሁኔታ አመስግኑ፤ በክርስቶስ ኢየሱስ እግዚአብሔር ለእናንተ የሚፈልገው ይህ ነው።» «እግዚአብሔርን በየወቅቱ እባርካለሁ፤ ምስጋናው ከአፌ ፈጽሞ አይለይም።» እስትንፋስ ያለው ሁሉ እግዚአብሔርን እንዲያመሰግን ስለ ታዘዘ፣ እርሱን ላለማመስገን በቅዱሳት መጻሕፍት የሚገኘው ብቸኛ ምክንያት እስትንፋስ ማጣት ብቻ ነው። «ስለዚህ በእርሱ በኩል ሁልጊዜ የውዳሴ መሥዋዕት ለእግዚአብሔር እናቅርብ፤ ይህም ስሙን የሚያመሰግኑ ከንፈሮች ፍሬ ነው።» «ምስጋናን መሥዋዕት አድርጎ የሚያቀርብ ያከብረኛል።» «ጽኑ ፍቅርህ ከሕይወት ይበልጣል፤ ስለዚህ ከንፈሮቼ ምስጋናህን ይዘምራሉ።» «እግዚአብሔርን ማመስገን መልካም ነገር ነው» ስለ ተባለ አመስግነው። «ቅዱስ ስሙንም እያሰባችሁ አመስግኑ።» ምስጋናን መከልከል አለማመንን ወይም ውለታ ቢስነትን ስለሚያሳይ አመስግነው። «ቅኖችን ምስጋና ያምርባቸዋል» ስለ ተባለ አመስግነው። ለእግዚአብሔር «የእስራኤል ምስጋና የምትቀመጥበት ዙፋን ነው» ስለ ተባለ አመስግነው። ጳውሎስና ሲላስ ጀርባቸው እየደማ እግራቸውም በግንድ ታስሮ በእኩለ ሌሊት ምስጋና ዘመሩ፤ እግዚአብሔርም በምድር መናወጥ ወፍራሙን የዝማሬ ድምፅ አጀባቸው፤ ያም ነጻ አወጣቸው።
እውነተኛ እምነት ማዳኑን እንዳየና እየተደሰተበት እንዳለ ሆኖ በእግዚአብሔር የተስፋ ቃል ሐሴት ያደርጋል።
በኢዮሣፍጥ ላይ፣ በሰው አመለካከት ፈጽሞ መጥፋት ማለት የሆኑ ሦስት ታላላቅ ሠራዊቶች በተነሡበት ጊዜ፣ ጸሎታቸው እንደ ተመለሰ የሚያሳየው ብቸኛ ማስረጃ ራቁቱን ያለው የእግዚአብሔር ቃል ብቻ — ያውም በሰው ከንፈር የተነገረ — ሆኖ ሳለ፣ «እጅግ በታላቅ ድምፅ» እግዚአብሔርን አመሰገኑ። በማግሥቱም ወደ ሰልፍ በወጡ ጊዜ መዘመርና ማመስገን ሲጀምሩ፣ እግዚአብሔር በተራው ተንቀሳቅሶ በጠላት ላይ ድብቅ ጦር አኖረ፤ ድሉም ተገኘ። (2ኛ ዜና መዋዕል 20:18, 19።) «የነቢያት መልእክት ለእኛ ይበልጥ እርግጥ ሆኖልናል»፤ ምክንያቱም «ሰዎች መንፈስ ቅዱስ እየነዳቸው ከእግዚአብሔር ተናገሩ።» (2ኛ ጴጥሮስ 1:19-21)
«በዔድን ጠላት የተከለከለውን ፍሬ መብላት ስለሚያስከትለው ነገር የእግዚአብሔርን ምስክርነት ከንቱ በማድረግ እንደ ተሳካለት፣ አሁንም ወንጌልን ማመን ስለሚያስከትለው ነገር የእግዚአብሔርን ምስክርነት ከንቱ ሊያደርግ ይሻል። እግዚአብሔር፦ ‹ከእርሱ በምትበላበት ቀን በእርግጥ ትሞታለህ› ካለ በኋላ፣ እባቡ፦ ‹በእርግጥ አትሞቱም› አለ፤ አሁንም የእግዚአብሔር ቃል፦ ‹እጃቸውን በታመሙ ሰዎች ላይ ይጭናሉ፤ ሕመምተኞቹም ይሻላቸዋል› ብሎ በግልጽ ሲናገር፣ ያው እባብ እንደማይሻላቸው ሊያሳምናቸው ይሞክራል። ሥጋ ከለበሰው እውነት ከእግዚአብሔር ልጅ ይልቅ ‹የሐሰት አባት›ን ማመን ምክንያታዊ ነውን? ለድነትም ሆነ ለፈውስ ወደ እግዚአብሔር ስንመጣ፣ እያንዳንዱ ሰው የእባቡ ፉጨት ከእግዚአብሔር ድምፅ በላይ ከፍ እንዲል ይፈቅድ እንደ ሆነ መወሰን ግድ ነው።»
«የመለኮትን ሹክሹክታ ትርታ የሚሰሙና ለዓለም ብዙ ሹክሹክታ ጆሮ የማይሰጡ ጆሮዎች ብፁዓን ናቸው።» — ቶማስ አ ኬምፒስ።
ለፈውስ ዘይት ከተቀባህ በኋላ ሰይጣን እንደማትድን ሲነግርህ፣ እንደ ኢየሱስ፣ «ተጽፎአል»፤ «ሕመምተኞቹም ይሻላቸዋል»፤ «ጌታም ያስነሣዋል» (ያዕቆብ 5:14) በለው። ደግሞም በዚሁ ክፍል «በጌታም ስም» የሚለው ቃል ጌታ ራሱ እንደ ቀባህ ያህል ማለት ነው። የራሱን ሥርዓትና የራሱን የተስፋ ቃል እንዲያከብር ጠብቅ።
ዲያብሎስን ለምን ትሰማለህ?
ዲያብሎስ ክርስቶስን በፈተነው ጊዜ ከከንፈሩ የሰማው ሁሉ «ተጽፎአል!» «ተጽፎአል!» «ተጽፎአል!» የሚለው ብቻ ነበር። (ማቴዎስ 4:4, 7, 10።) «ከዚያም ዲያብሎስ ትቶት ሄደ» (ማቴዎስ 4:11።) እኛ ግን ከአንዳንድ ሰዎች የምንሰማው ሁሉ «ዲያብሎስ ይላል!» «ዲያብሎስ ይላል!» «ዲያብሎስ ይላል!» የሚለውን ብቻ ነው፤ የክርስቶስ ቃል ከዲያብሎስ ቃል ያነሰ ዋጋ ያለው ይመስል! የክርስቶስ መንገድ ይህ ነበር፤ ዲያብሎስን ለመቃወምም እጅግ የተሳካው መንገድ ይኸው ነው። ሌላ መንገድ አንሞክር! «ለዲያብሎስም ቀዳዳ አትስጡት።» (ኤፌሶን 4:27።) «ዲያብሎስን ተቋቋሙት፤ ከእናንተም ይሸሻል።» (ያዕቆብ 4:7)።
ዲያብሎስን የምንቃወምበት አንድ መንገድ ብቻ አለ፤ እርሱም የእግዚአብሔርን ቃል ጸንቶ በማመንና በእርሱ ላይ ተመሥርቶ በመሥራት ነው።
ከእግዚአብሔር ድምፅ ይልቅ በሌላ በማንኛውም ድምፅ በተነካን ጊዜ ሁሉ፣ ለፈውሳችን የተዘጋጀውን የጌታን መንገድ ትተናል።
ለመጠራጠር ምን ምክንያት አለህ? ኃጢአተኛው ንስሐ ገብቶ የኃጢአቱን ይቅርታ ሲለምን ካለው የበለጠ ለመጠራጠር ምክንያት የለህም። ለመዳን ለመጠበቅ የነበረህ ምክንያት ለመፈወስ ለመጠበቅም በትክክል ያው ምክንያት አለህ። «ለዚህ ቃሉ አለህ፤ ያንንም በእርሱ ላይ ተመሥርተህ እስክትሠራ ድረስ መቀበል ካልቻልህ፣ እምነትህ መሆን ካለበት ገና እጅግ የራቀ ነው።» — ዳፊ።
የጌታ ርኅራኄ ለእምነት መሠረት ነው
የጌታ ርኅራኄ ለእምነት እንዴት ያለ መሠረት ነው! ክርስቶስ ከሕመም ስለ ተቤዠን፣ በእርግጥ ፍቅሩና ታማኝነቱ ሊታመኑ ይገባቸዋል። መስቀሉ እምነትን ለመለማመድ የጸና መሠረትና ፍጹም ምክንያት ነው።
እንዲህ ያለው ማን እንደ ሆነ አላስታውስም፦ «ኃጢአትን እንደምናስወግድ ሕመማችንንም በእምነት እናስወግድ። ራሱን የቀደሰ ክርስቲያን ኃጢአትን አውቆ ለአንዲት አፍታ እንኳ አይታገሥም፤ ሆኖም አንዳንዶች ለሕመም ምን ያህል ታጋሾች ናቸው! ሕመማቸውንና ስቃያቸውን የዲያብሎስ ሥራዎች አድርገው ከመቃወም ይልቅ እንዲያውም ያቀማጥሉታል፣ ያንከባክቡታልም።»
ሃሪየት ኤስ. ቤይንብሪጅ በአጭሩ እንዲህ ትላለች፦ ጌታ ኢየሱስ ስለ አዳም ዘር ኃጢአት፣ ሐዘንና የሥጋ መከራ «ተፈጸመ» ብሎ ተናግሯል፤ የገዛልንንም ታላቅ መዳን እንድንረዳውና እንድንደሰትበት ለእያንዳንዳችን የመንፈስ ቅዱስን ስጦታ አቅርቦልናል። የክርስቶስ «ተፈጸመ» የሚለው ቃል የማይለወጥ እውነታ ቀጥተኛ መግለጫ መሆኑን ያለ ጥርጣሬ ማመን ሁልጊዜ ነጻነትን ያመጣል። እባቡ ሔዋን እግዚአብሔር በግልጽ የነገራትን ቃል እንድትረሳና ችላ እንድትል እንዳደረጋት፣ ዛሬም ይህን የክርስቶስን ታላቅ ቃል እየካደ እጅግ ያከስረናል። መንፈስ ቅዱስ ክርስቶስን እንደ ሐኪማችን በግል እንድንለማመደው የሚያደርገን፣ ከሕመም መቤዠታችን በተሰቀለው ጌታችን ሥጋ በእርግጥ እንደ ተፈጸመ በመረዳትና እግዚአብሔር በተጻፈው ቃሉ ስለዚህ ጉዳይ የሚናገረውን በሙሉ ልብ በማመንና በመቀበል ነው።
እግዚአብሔርን የማመን የዛሬ ውጤቶች
እነዚህን መመሪያዎች መከተል፣ ቀድሞ የተአምራት ዘመን አልፏል፣ እግዚአብሔርም ለክብሩ ሰዎች ታመው እንዲኖሩ ይፈልጋል ወዘተ.፣ ወዘተ. ተብለው ለተማሩ ለሺዎች ጤንነትን አምጥቷል። ዕውር ሆነው የተወለዱ አሁን ያያሉ፤ ከተወለዱ ጀምሮ ደንቆሮና ዲዳ የነበሩ አሁን ይሰማሉ ይናገራሉም፤ ከተወለዱ ጀምሮ አንካሶች የነበሩ አሁን ፍጹም ጤነኞች ሆነዋል፤ ለዓመታት የሚጥል በሽታ የነበረባቸው አሁን ነጻ ወጥተው ሐሴት ያደርጋሉ፤ በነቀርሳ ይሞቱ የነበሩ ብዙዎች አሁን ደኅና ሆነው ለሌሎች ፈውስ የእምነትን ጸሎት ይጸልያሉ፤ እግዚአብሔርም ለሰው ፊት አያደላም። «ራሳቸውን ከእንደዚህ ያሉ ነገሮች የሚያነጹ ሰዎች ለልዩ አገልግሎት የሚሆኑ፣ የተቀደሱ፣ ለጌታቸው የሚጠቅሙና ለበጎ ሥራ ሁሉ የተዘጋጁ ዕቃዎች ይሆናሉ።» በአልጋ ላይ ታመን ሳለን ይህ ፈጽሞ እውነት አይሆንም። የእግዚአብሔር አዲስ ኪዳን እያንዳንዳችንን «ፈቃዱን እንድታደርጉ በበጎ ነገር ሁሉ ብቁ ያድርጋችሁ» ይላል። ታመን ሳለን ይህ ሊሆን አይችልም፤ ይህም እኛን ለመፈወስ ያለውን ፈቃደኝነቱን፣ እንዲያውም ጉጉቱን ያሳያል።
በተስፋ ቃሉ መሠረት ሕመማችንን ሳያስወግድና የዘመናችንን ቍጥር ሳይፈጽም ከእኛ ጋር ያለውን ቃል ኪዳን ሊጠብቅ አይችልም።
«በሰንበሩም ፈውስ አገኘን» ስለ ተባለ፣ ፈውሳችን ምን እንዳስከፈለ አንርሳ፤ ይልቁንም በምስጋናና በፍቅር፣ ለእግዚአብሔርም በተቀደሰ አገልግሎት፣ በተስፋ ቃሉ ላይ እንቁም፤ የመከራችን ቅጥሮች ተንደው እስኪወድቁ ድረስ የእምነትንና የምስጋናን «የአውራ በግ ቀንደ መለከት» እንንፋ።
እምነት ቅጥሮቹ እስኪወድቁ አይጠብቅም፤ እምነት በእልልታ ያፈርሳቸዋል!