እግዚአብሔር አገኘው

«ከመንፈስህ ወዴት እሄዳለሁ? ከፊትህስ ወዴት እሸሻለሁ?» — ከመዝሙር 139

በኦክስፎርድ ጃክ ድንቅ ጓደኞችን አፈራ። ከእነርሱ አንዱ እንደ ጃክ የሰሜን አገሮችን ጥንታዊ ታሪኮች የሚወድ ጄ. አር. አር. ቶልኪን የሚባል ፕሮፌሰር ነበር። ቶልኪን ክርስቲያን ነበር። ሌሎች በርካታ ብልህ የጃክ ጓደኞችም እንዲሁ ክርስቲያኖች ነበሩ። ጃክ ይህን አስተዋለ፤ ነገሩም አስጨነቀው።

ጃክ በእግዚአብሔር አያምንም ነበር፤ ማመንም አይፈልግም ነበር። ነገር ግን ከሁሉ አብልጦ የሚወዳቸው መጻሕፍት በክርስቲያኖች የተጻፉ ሆነው ይገኙ ነበር። ቀስ በቀስ ላለማመን የነበሩት ምክንያቶቹ ሁሉ መፍረስ ጀመሩ። በኋላ እግዚአብሔር እያደነው እንደ ነበረና የሚደበቅበት ስፍራ እያለቀበት እንደ ነበረ ሆኖ ተሰምቶት እንደ ነበረ ተናገረ።

በ1929 የጃክ አባት በጠና ታመመ። ጃክ ወደ ቤልፋስት ተመልሶ ለሳምንታት ከአጠገቡ ተቀመጠ። አባቱ ትንሽ የተሻለው በመሰለ ጊዜ ወደ ኦክስፎርድ ተመለሰ፤ ብዙም ሳይቆይ ግን ቴሌግራም ወደ ቤት ጠራው። ፈጥኖ ተመለሰ፤ ነገር ግን ዘገየ። አባቱ ሞቶ ነበር። ጃክ በኀዘን ተሞላ፤ ብዙ ጊዜ አባቱን በደግነት ባለመያዙም ተጸጸተ።

ከዚያም አንድ ሌሊት፣ በማግደለን በክፍሉ ውስጥ ብቻውን ሳለ፣ ጃክ መሸሹን አቆመ። ተንበርክኮ ጸለየ፤ እግዚአብሔርም እግዚአብሔር እንደ ሆነ አመነ። ደስታ አልተሰማውም። ራሱን «በመላው እንግሊዝ እጅግ የተከፋውና እጅግ ሳይወድ የተመለሰው ሰው» ብሎ ጠራ። ይህም ማለት ወደ እግዚአብሔር ከመጡ ሰዎች ሁሉ እጅግ ያዘነውና እጅግ ፈቃደኛ ያልነበረው ሰው እርሱ ነበር ማለት ነው!

ጃክ ይህ የሆነው በ1929 እንደ ነበረ ያስታውስ ነበር። ደብዳቤዎቹን በጥንቃቄ ያጠኑ ሰዎች ግን ምናልባት በ1930 በጋ እንደ ነበረ ያስባሉ። ያም ሆነ ይህ፣ ጅማሬው ነበር። ጃክ ደስ ባይለውም እንኳ ትክክል እንደ ሆነ ስላመነ ወደ ቤተ ክርስቲያን መሄድ ጀመረ። ነገር ግን ገና በኢየሱስ አላመነም ነበር።

ጃክ ከእግዚአብሔር ለማምለጥ እጅግ ሞከረ። እግዚአብሔር ግን እርሱን መፈለጉን ፈጽሞ አላቆመም። እግዚአብሔር ሊያገኘው እስከማይችልበት ድረስ ርቆ መሸሽ የሚችል ማንም የለም። እግዚአብሔር አንተንም ይወድሃል፤ ፈጽሞም ከአንተ አይርቅም።

ውድ እግዚአብሔር ሆይ፣ እኛን መፈለግህን ፈጽሞ ስለማታቆም አመሰግንሃለሁ። ከፍቅርህ እጅግ ርቄ መሸሽ ፈጽሞ ስለማልችል አመሰግንሃለሁ። አሜን።