መስኮት ያላት ክፍል

«ጸጋዬ ይበቃሃል፥ ኃይሌ በድካም ይፈጸማልና።» — ከ2ኛ ቆሮንቶስ 12

በ1931 ኤሚ ስድሳ ሦስት ዓመቷ ነበር። በዶህናቩር ያለው ቤተሰብ የሕፃናት ማቆያዎች፣ ትምህርት ቤቶች፣ የወንዶች ልጆች ግቢና ሆስፒታል ያሉት፣ በመቶዎች የሚቆጠሩ ሰዎች ያሉበት ሆኖ አድጎ ነበር። ኤሚ አሁንም በየቀኑ ሥራ ይበዛባት ነበር፤ እየተዘዋወረች ልጆቹን ትጠይቅ፣ ታስተምርና ትጸልይ ነበር።

ኦክቶበር 24 ቀን 1931፣ እየጨለመ ሳለ፣ ኤሚ ለሥራው እየተዘጋጀ የነበረን አንድ ሕንፃ ለማየት ሄደች። ሠራተኞች በወለሉ ላይ ጉድጓድ ቈፍረው ሳይከድኑት ትተውት ነበር። በደብዛዛው ብርሃን ኤሚ አላየችውም፤ ወደ ውስጡም ወደቀች። እግሯ ተሰበረ፣ ቍርጭምጭሚቷ ተጐዳ፣ ጀርባዋም ቈሰለ።

ሁሉም በጥቂት ሳምንታት ውስጥ ትድናለች ብለው አሰቡ። እርሷ ግን ከዚያ በኋላ በትክክል መራመድ አልቻለችም። ለሃያ ዓመታት ያህል አብዛኛውን ጊዜ በአንድ ክፍል ውስጥ፣ ብዙ ጊዜም በሕመም ኖረች። በዶህናቩርና በዓለም ሁሉ ያሉ ሰዎች እንድትፈወስ ጸለዩላት፤ እርሷ ግን አልተፈወሰችም። ከረጅም ጊዜ በፊት በመስታወቱ ፊት እንደ ቆመችው ትንሽ ልጅ፣ ኤሚ አይሆንም ማለትም መልስ እንደ ሆነ እንደ ገና ተማረች።

ክፍሉ ግን የሚያስተክዝ ስፍራ አልነበረም። ወደ አትክልት ስፍራ የሚያሳይ መስኮት ነበረው፤ ከመስኮቱም ውጭ የወፎች መታጠቢያ ነበር፤ ኤሚም ወፎቹ ሊጠጡና ውኃ ሊረጫጩ ሲመጡ ትመለከት ነበር። ልጆቹ ሊጠይቋት ይመጡ ነበር። በየቀኑ ማለት ይቻላል ለዶህናቩር ሰዎች የመጽሐፍ ቅዱስ ጥቅስ ወይም የደግነት ቃል ያለበት ትናንሽ ማስታወሻዎችን ትጽፍ ነበር። መጻሕፍትንም ጻፈች፦ የዶህናቩርን ታሪክ የሚናገረውን «የወርቅ ገመድ» (Gold Cord)፣ ለታመሙ ወይም በሕመም ላሉ ሰዎች የተጻፈውን «ከእሾኽ የወጣች ጽጌረዳ» (Rose from Brier)፣ እንዲሁም ኢየሱስ እንደሚወደን ሌሎችን ስለ መውደድ የሚናገረውን «ቢሆን» (If) የተባለ ትንሽ መጽሐፍ። በዓለም ሁሉ ያሉ ሰዎች አነበቧቸው፤ ዛሬም ያነቧቸዋል።

በ1939 አሩላይ ከረጅም ሕመም በኋላ ሞተች፤ ኤሚም እጅግ አዘነች። ቢሆንም መጸለይንና መጻፍን ቀጠለች።

አንዳንድ ጊዜ ደካሞች እንደ ሆንን ወይም ተይዘን መንቀሳቀስ እንዳቃተን ይሰማናል። እግዚአብሔር ግን ደካሞች እንደ ሆኑ በሚሰማቸው ሰዎች በኩል አስደናቂ ነገሮችን ሊያደርግ ይችላል። አንተንም፣ ልክ እንዳለህ፣ ሊጠቀምብህ ይችላል።

ውድ እግዚአብሔር ሆይ፣ ደካማ ወይም ሕመምተኛ እንደ ሆንሁ፣ ወይም መንቀሳቀስ እንዳቃተኝ ሲሰማኝ፣ ጸጋህ እንደሚበቃኝ እንዳስታውስ እርዳኝ። እባክህ ልክ እንዳለሁ ተጠቀምብኝ። አሜን።