ከመቅድሙ የተወሰደ

ክርስቲያን አንባቢ ሆይ፣

ሁልጊዜ አስቸጋሪ አድርጌ የምመለከታቸው ሁለት ነገሮች አሉ። አንዱ ክፉዎችን ማሳዘን ነው፤ ሌላው ደግሞ እግዚአብሔርን የሚፈሩትን ደስ ማሰኘት ነው። እግዚአብሔርን በሚፈሩ ሰዎች ላይ የሚደርሰው የልብ መውደቅ ከሁለት ምንጭ ይፈልቃል፤ ወይ ውስጣዊ መጽናናታቸው ስለ ጨለመባቸው፣ ወይም ውጫዊ መጽናናታቸው ስለ ታወከባቸው ነው። እነዚህን ሁለቱንም ችግሮች ለመፈወስ ይህን ቀጥሎ ያለውን ጽሑፍ አቅርቤአለሁ፤ በእግዚአብሔር በረከት ተስፋ የቈረጠውን ልባቸውን ቀና እንደሚያደርግና ፊታቸውም ይበልጥ እንዲፈካ እንደሚያደርግ ተስፋ አደርጋለሁ። ከዚህ የልብ ማበርቻ አልፎ አልፎ ጥቂት ጥቂት እንዲወስዱ አዝዝላቸዋለሁ፤ ይኸውም፦ እግዚአብሔርን ለሚወዱት ነገር ሁሉ ለበጎ ይደረጋል። እግዚአብሔርን የሚፈሩትን ምንም እንደማይጐዳቸው ማወቅ የሚያጽናና ነገር ነው፤ ነገር ግን የሚደርስባቸው ነገር ሁሉ ለበጎአቸው አብሮ እንደሚሠራ፣ መስቀሎቻቸው ወደ በረከት እንደሚለወጡ፣ የመከራ ዝናብም የሚጠወልገውን የጸጋቸውን ሥር አጠጥቶ ይበልጥ እንዲያብብ እንደሚያደርገው እርግጠኛ መሆን፣ ይህ ልባቸውን ሞልቶ እስኪፈስ ድረስ በደስታ ሊያጥለቀልቀው ይችላል።