ምዕራፍ 10 · 19 ደቂቃ ንባብ · 24 ደቂቃ ማዳመጥ
ሁሉም ዓይነት ማዕረግና ደረጃ ያላቸው በየዕድሜያቸው ያሉ ወንዶችና ሴቶች ሁሉ ራሳቸውን ለእግዚአብሔር እንዲሰጡ እንደሚገደዱ የሚያሳይ
ባለፉት ምዕራፎች የክርስቲያናዊውን ለእግዚአብሔር መሰጠት ልዩ ልዩ ታላላቅ ገጽታዎች ዘርዝሬአለሁ፤ የዕለት ኑሮአችን ክፍሎች ሁሉ፥ ሥራዎቻችን፥ መክሊቶቻችንና የሀብት ስጦታዎቻችን ሁሉ ማንኛውንም ነገር በጥበብና በሃይማኖት በመጠቀምና ሥራዎቻችንንና ዓላማዎቻችንን ለእግዚአብሔር ክብርና ምስጋና ወደሚስማሙ ግቦች በማቅናት ቅዱሳንና በእግዚአብሔር ዘንድ ተቀባይነት ያላቸው መሆን እንደሚገባቸው አሳይቻለሁ።
አሁን ደግሞ ይህ በሥርዓት የሚኖር መሰጠት፥ ይህ የዕለት ኑሮ ቅድስና፥ ያለንን ነገር ሁሉ በሃይማኖት የመጠቀም ይህ መንገድ የክርስቲያን ወገኖች ሁሉ ግዴታ የሆነ መሰጠት መሆኑን አሳያለሁ።
ፉልቭዮስ የተማረ ሰው ነው፤ በዩኒቨርሲቲም ዲግሪዎቹን ወስዶአል፤ ከዚያ የወጣውም ከማንኛውም የሕይወት ደንብ ነጻ ለመሆን ብሎ ነው። ማንኛውም ሥራ ወይም ጉዳይ ሰዎችን ግዴታዎቹን በጥንቃቄ እንዲያከናውኑና በቅንነት እንዲፈጽሙ ይጠራል ብሎ ስለሚያስብ ምንም ሥራ አይይዝም፥ ወደ ምንም ጉዳይም አይገባም። በቁም ነገር ሲናገር፥ ክህነት ታላቅ የሕይወት ቅድስና የሚጠይቅ ሁኔታ እንደ ሆነ ስለሚቈጥርና ያን ያህል መልካም መሆን ከጠባዩ ጋር ስለማይስማማ ወደ ክህነት እንዳልገባ ይነግርሃል። ለቤተሰብ ራስ ለሆኑ ሰዎች ግዴታ ነው ብሎ የሚያስበውን ያን የሕይወት ሥርዓትና መልካም አካሄድ በራሱ ላይ ሊጭን ስለማይችል ፈጽሞ ለማግባት እንደማያስብ ይነግርሃል። ምንም ዓይነት አደራ ኃላፊነት ሊወስድበት ስለማይፈልግ ለወንድሙ ልጅ የክርስትና አባት ለመሆን እምቢ አለ።
ፉልቭዮስ በዚህ አካሄዱ ሕሊናውን የጠበቀ እንደ ሆነ ያስባል፤ ስለዚህም እጅግ ሥራ ፈትና ከንቱ በሆነ ግድ የለሽ ሕይወት ይረካል።
ሃይማኖት የለውም፤ ለእግዚአብሔር መሰጠት የለውም፤ መንፈሳዊነትንም አያስመስልም። በምንም ደንብ አይኖርም፤ ካህን ወይም አባት ወይም ሞግዚት ስላልሆነ፥ የሚጠብቀውም ሥራ ወይም ቤተሰብ ስለሌለው ሁሉ መልካም እንደ ሆነ ያስባል።
ነገር ግን ፉልቭዮስ ሆይ፥ አንተ አስተዋይ ፍጡር ነህ፤ እንደዚህም ካህን መሠዊያውን ሊያገለግል፥ ሞግዚትም ለአደራው ታማኝ ሊሆን እንደሚገደድ አንተም በምክንያትና በሥርዓት ልትኖር እንዲሁ ትገደዳለህ። ከምክንያት በተቃራኒ ብትኖር ትንሽ በደል አትፈጽምም፥ ትንሽ አደራም አታፈርስም፤ ነገር ግን የተፈጥሮህን ሕግ ትጥሳለህ፥ ያን ተፈጥሮ በሰጠህ በእግዚአብሔር ላይ ታምፃለህ፥ የምክንያትና የሥርዓት አምላክ እንደ ከሐዲዎችና እንደ ኰብላዮች ከሚቀጣቸው ጋርም ራስህን ትቈጥራለህ።
ሥራ ባይኖርህም፥ የክርስቶስን ሃይማኖት ለመመስከር ተጠምቀሃልና፥ ማንም ሰው በጥሪው ቅንና ታማኝ ሊሆን እንደሚገደድ አንተም በክርስቲያናዊ መንፈስ ቅድስና ልትኖርና በጥምቀትህ ጊዜ የተሰጡትን ተስፋዎች ሁሉ ልትፈጽም እንዲሁ ትገደዳለህ። ይህን ታላቅ ጥሪ ብታረክስ በትንሽ ነገር የምትዋሽ አይደለህም፤ ነገር ግን የክርስቶስን ክቡር ደም ታቃልላለህ፤ የእግዚአብሔርን ልጅ እንደገና ትሰቅላለህ፤ ከመለኮታዊ ቸርነት ታላላቅ ምልክቶች ቸል ትላለህ፤ የእግዚአብሔርን ቤተ ክርስቲያን ታዋርዳለህ፤ የክርስቶስን አካል ታጐድፋለህ፤ የጸጋን መንገዶችና የክብርን ተስፋዎች ታቃልላለህ፤ በፍርድ ቀንም ከአንተ ይልቅ ለጢሮስና ለሲዶና ይቀልላቸዋል።
ስለዚህ ማንም ሰው እንደ ሌሎች ሰዎች ባለ የሕይወት ሁኔታ ላይ ስላልሆነ እንደ ወደደ ለመኖር ነጻ እንደ ሆነ ቢያስብ ታላቅ ሞኝነት ነው፤ ማንኛውንም አደራ በማቃለል የሚያስፈራ ነገር ካለ፥ ማንኛውንም ጥሪ ቸል በማለት የሚያስደነግጥ ነገር ካለ፥ ምክንያታችንን ያለ አግባብ ከመጠቀም የበለጠ የሚያስፈራ፥ ክርስቲያናዊ ጥሪያችንንም ቸል ከማለት የበለጠ የሚያስደነግጥ ነገር የለምና፤ ይህ ጥሪ ለአጭር ሕይወት ጥቃቅን ጥቅሞች የሚያገለግል አይደለም፤ ነፍሳትን ለእግዚአብሔር ለመዋጀት፥ መንግሥተ ሰማያትን በቅዱሳን ለመሙላትና ለእግዚአብሔር የዘላለም ክብር መንግሥት ለመፈጸም ነው እንጂ።
ስለዚህ ማንም ሰው በዓለም ሥራ ፈትና ራሱን የቻለ ለመሆን ስለ መረጠ ከመንፈሳዊነትና ከግብረ ገብ ትክክለኛነት ነጻ እንደ ሆነ ሊያስብ አይገባውም፤ የአስተዋይና የቅዱስ ሕይወት አስፈላጊነት የተመሠረተው በዚህ ሕይወት ልዩ ልዩ ሁኔታዎችና ሥራዎች ላይ አይደለም፤ በማይለወጠው በእግዚአብሔር ባሕርይና በሰው ተፈጥሮ ላይ ነው እንጂ። ሰው አስተዋይና ቅዱስ መሆን ያለበት ካህን ወይም የቤተሰብ አባት ስለሆነ አይደለም፤ ነገር ግን መንፈሳዊነትና በጎነት የሰው ተፈጥሮ ሕጎች ስለ ሆኑ መንፈሳዊ ካህንና መልካም አባት ሊሆን ይገባዋል። ማንም ሰው በምክንያትና በሥርዓት ሳይኖር እግዚአብሔርን ደስ ሊያሰኝ ቢችል ኖሮ፥ በሥራ ፈት ካህን ወይም በተጣለ አባት ላይ እግዚአብሔርን የሚያስከፋ ነገር ባልተገኘ ነበር። ስለዚህ ምክንያቱን የሚያረክስ ክህነትን እንደሚያረክስ ሰው ነው፤ የክርስቲያንን ሕይወት ቅድስና ቸል የሚልም እጅግ አስፈላጊውን አደራ እንደሚንቅ ሰው ነው።
አንድ ሰው ብርሃንን ከማየትና የእግዚአብሔርን ሥራዎች ከመመልከት ይልቅ ዓይኖቹን ማውጣትን ቢመርጥ፥ ወይም ከመብላትና ከመጠጣት እምቢ ብሎ በፈቃዱ ራሱን ቢገድል፥ እንዲህ ያለው ሰው በእግዚአብሔር ላይ ያመፀና ታላቁን ቍጣውን በእውነት የሚገባው እንደ ሆነ ሁሉም ያምናል። ይህ ኃጢአት የሆነው በካህን ወይም በቤተሰብ ራስ ላይ ብቻ ነው አትልም፤ በማንኛውም ሰው ላይ እንጂ።
እንግዲህ የዚህ አካሄድ ኃጢአተኛነት በምን ላይ ነው? ተፈጥሮውን በማርከሱና እግዚአብሔር የፈጠረለትን ድርሻ ለመፈጸም እምቢ በማለቱ አይደለምን? ይህ እውነት ከሆነ ግን ምክንያታቸውን የሚያረክሱ፥ እግዚአብሔር ከፈጠራቸው ዓላማ የተለየ ድርሻ የሚጫወቱ ሰዎች ሁሉ እንደዚህ ሰው በእግዚአብሔር ላይ ያመፁ ናቸው፤ በዚያው ምክንያትም ለቍጣው የተጋለጡ ናቸው።
ይህ ሰው ዓይኖቹን ከማውጣት ይልቅ በሚያስቁ ነገሮች ላይ ብቻ ቢጠቀምባቸው ወይም በእንቅልፍ ቢከድናቸው፥ ጭራሹን ባለመብላት ራሱን በራብ ከመግደል ይልቅ እያንዳንዱን ማዕድ ግብዣ ቢያደርግና እንደ ሆዳም ቢበላና ቢጠጣ እንበል፤ ለእግዚአብሔር ክብር የበለጠ ኖሮአል ሊባል ይችላልን? ዓይኖቹን አውጥቶ ራሱን በራብ ከገደለበት ይልቅ እግዚአብሔር የፈጠረለትን ድርሻ ፈጽሞአል ሊባል ይችላልን?
እንግዲህ ያለ ምክንያት የሚሠራን ሰው አስብ፤ ዓይኖቹን ከማውጣት ይልቅ ምክንያቱን የሚያጠፋ፥ ራሱንም በራብ ከመግደል ይልቅ በሞኝነትና በከንቱነት መንገድ የሚኖር ሰውን አስብ፤ እንዲህ ብታደርግ በእግዚአብሔር ላይ ያን ያህል ታላቅ ዓመፀኛ አገኘህ።
ዓይኖቹን የሚያወጣ ወይም ራሱን የሚገድል ሰው በደሉ ይህ ብቻ ነውና፤ እግዚአብሔር የሰጠውን ኃይላት ያረክሳል፤ የተፈጠረበትን ድርሻ ለመፈጸም እምቢ ይላል፤ ራሱንም ከመለኮታዊ ፈቃድ በተቃራኒ ሁኔታ ውስጥ ያኖራል። በእርግጥም ያለ ምክንያት፥ ያለ ቅድስናና በሞኝነት የሚኖር ሰው ሁሉ በደል ይኸው ነው።
እንግዲህ ማንኛውም ልዩ ሁኔታ ወይም የግል ኑሮ ሰውነታችንን ለማርከስ ወይም ራስን ለመግደል ምክንያት እንደማይሆን፥ እንዲሁ ማንኛውም ልዩ ሁኔታ ወይም የግል ኑሮ ምክንያታችንን ለማርከስ ወይም የክርስትና ሃይማኖትን ቅድስና ቸል ለማለት ምክንያት አይሆንም። ዓይኖቻችንን እንድንጠቀም፥ ሕይወታችንንም ለመጠበቅ እንድንበላና እንድንጠጣ የእግዚአብሔር ፈቃድ እንደ ሆነ፥ አስተዋይ ኃይላችንን በተሻለ መንገድ እንድንጠቀምና የክርስትናን ንጽሕናና ቅድስና እንድንከተል እንዲሁ የእግዚአብሔር ፈቃድ ነውና።
ስለዚህ ሰው በእግዚአብሔር ፈቃድ ለመኖርና እግዚአብሔር የሚፈልግበትን ለመሆን በቅንነት እንደሚጥር እስኪያሳይ ድረስ፥ በክርስትና ሃይማኖት ቅድስና ለመኖር እንደሚታገል እስኪያሳይ ድረስ፥ ማንም ቢሆን፥ የትም ቢሆን፥ ለመኖር እምቢ የሚሉ፥ ታላላቅ አደራዎችን የሚያረክሱና በዓለም ያለውን ከፍተኛውን ጥሪ ቸል የሚሉ ሰዎች የሚጠየቁበትን ሁሉ ይጠየቅበታል።
የሰዎች ወገኖች ሁሉ በእኩልና በትክክል ቅኖችና ታማኞች መሆን እንዳለባቸው ሁሉም ያምናል፤ በእነዚህ ግዴታዎች ስለ ማንኛውም የግል ወይም ልዩ የሕይወት ሁኔታ የሚደረግ ልዩነት የለም። እንግዲህ የነገሮችን ምክንያትና ተፈጥሮ ብንመለከት፥ የእግዚአብሔርን ባሕርይና የሰውን ተፈጥሮ ብናስብ፥ ለሌላውም ትክክለኛ የምክንያት አጠቃቀም ሁሉ፥ ለማንኛውም ጸጋ ወይም ለክርስቲያን ሕይወት ሃይማኖታዊ ዝንባሌ ሁሉ ያው አስፈላጊነት እንዳለ እናገኛለን፤ አንዱ ሰው በቅንነት ትክክለኛ መሆን አለበት፥ ሌላው ግን አያስፈልገውም ብሎ ማሰብ የማይረባ እንደ ሆነ፥ አንዱ በመንፈሳዊነት ትክክለኛ መሆን አለበት፥ ሌላው ግን አያስፈልገውም ብሎ ማሰብም እንዲሁ የማይረባ ሆኖ እናገኘዋለን፤ ክርስቲያናዊ ትሕትና፥ ልከኝነት፥ ለእግዚአብሔር መሰጠትና መንፈሳዊነት እንደ ፍትሕና እንደ ቅንነት የአስተዋይ ሕይወት ታላላቅና አስፈላጊ ክፍሎች ናቸውና። በሌላ በኩልም ትዕቢት፥ ሥጋዊነትና ስግብግብነት እንደ ማታለልና እንደ ቅንነት ማጣት የነፍስ ታላላቅ ብልሽቶች ናቸው፤ ምክንያታችንን እንዲሁ ያረክሳሉ፤ እግዚአብሔርንም እንዲሁ ይቃወማሉ። ስርቆትና ቅንነት ማጣት በተራው ሰው ዓይን የበለጡ ኃጢአቶች ይመስላሉ፤ ለኅብረተሰብ እጅግ ጐጂዎች ስለ ሆኑና በሰው ሕግ በብርቱ ስለሚቀጡ ነው። ነገር ግን የሰውን ዘር በከፍ ያለ አመለካከት፥ ምክንያታቸውን በትክክል በመጠቀምና ከተፈጥሮአቸው ሥርዓት ጋር በሚስማማ መንገድ በመሥራት እርሱን እንዲያከብሩ የተሾሙ የእግዚአብሔር የአስተዋይ ፍጥረታት ሥርዓት ወይም ማኅበር አድርገን ብንመለከተው፥ ምክንያትንና ሥርዓትን እኩል የሚቃረን፥ የእግዚአብሔርን ግቦችና ዓላማዎች የሚቃወም፥ የአስተዋዩንም ዓለም ውበትና ክብር የሚያናጋ ዝንባሌ ሁሉ በሰው ዘንድ እኩል ኃጢአት፥ በእግዚአብሔርም ዘንድ እኩል የተጠላ እንደ ሆነ እናገኛለን።
ይህም የሥጋዊነት ኃጢአት እንደ ቅንነት ማጣት ኃጢአት እንደ ሆነና እንዲሁ ለመለኮታዊ ቍጣ ታላቅ ዒላማ እንደሚያደርገን ያሳየናል።
ደግሞም የሰውን ዘር በሌላ ጥልቅ አመለካከት ብንመለከተው፥ ከእግዚአብሔር ልጅ ጋር ወደ ኅብረት የተጠመቁ፥ የተዋጁ የወደቁ መናፍስት ማኅበር አድርገን፤ የመንፈስ ቅዱስ ቤተ መቅደሶች እንዲሆኑ፥ በቅዱስ መነሣሣቱ እንዲኖሩ፥ ትሑትና መንፈሳዊ የምስጋና ሕይወትን ለአእምሮ የሚመች መሥዋዕት አድርገው ለእግዚአብሔር እንዲያቀርቡ፥ ከውድቀታቸው ብልሽቶች ራሳቸውን እንዲያነጹ፥ የዘላለም ክብር ልጆች ይሆኑ ዘንድ የጸጋን መንገዶች በትክክል እንዲጠቀሙ የተጠሩ አድርገን፤ የሰውን ዘር በዚህ እውነተኛ ብርሃን ብንመለከተው፥ ይህን ቅዱስ ማኅበር የሚቃረኑ፥ ይህን ወሰን የሌለውን ምሕረት የሚያረክሱ ዝንባሌዎች ሁሉ፥ ክርስቶስን እንዳንመስል የሚያደርጉን፥ አካሉን የሚያዋርዱ፥ የጸጋን መንገዶች የሚያረክሱና የክብር ተስፋችንን የሚቃወሙ ሥራዎች ሁሉ ለዘላለም በእግዚአብሔር ዘንድ የተጠላን ሊያደርጉን የሚችሉትን ሁሉ በውስጣቸው እንደ ያዙ እናገኛለን። ስለዚህ ትዕቢትና ሥጋዊነት፥ እንዲህ ያሉ ሌሎች ክፋቶችም ማታለልና ቅንነት ማጣት እንደሚጐዱት ኅብረተሰብን ባይጐዱም፥ በእግዚአብሔር ዓይን ከዚህ ዓለም ማኅበራት ሁሉ የሚበልጠውንና እጅግ የከበረውን ያን ማኅበር ይጐዳሉ፥ እነዚያንም ግቦች ይቃወማሉ።
ስለዚህ ምንም ኃላፊነት ወይም የሕይወት ሥራ ያልያዝን የግል ሰዎች ስለ ሆንን ልቅ ሆነን ልንኖር፥ ምኞቶቻችንን ልናረካና ስለ መንፈሳዊነትና ስለ ቅድስና ግዴታዎች ያነሰ ጥንቃቄ ልናደርግ እንችላለን ብሎ ከማሰብ የበለጠ ሐሰት የለም፤ ይህ ለማታለልና ለቅንነት ማጣትም እንዲሁ ጥሩ ሰበብ ነውና። ምክንያቱን የሚያረክስ፥ በፍትወትና በሥጋዊነት ራሱን የሚያስደስት፥ የእውነተኛ ክርስቲያንን ጥበበኛና አስተዋይ ድርሻ ለመፈጸም ቸል የሚል ሰው በማታለልና በቅንነት ማጣት የሚገኘውን፥ በእግዚአብሔር ዘንድ የተጠላ የሚያደርገውን ሁሉ በሕይወቱ ይዞአልና።
ስለዚህ ታማኝነትን ከማጉደል ይልቅ ሥራ ፈት ሆዳም መሆንን ብትመርጥ፥ የባልንጀራህን ንብረት ከመጉዳት ይልቅ በፍትወትና በሥጋዊነት መኖርን ብትመርጥ፥ ቤተ ክርስቲያንን ከመዝረፍ ይልቅ ቤትን መዝረፍ ከሚመርጥ ሰው የተሻለ ለእግዚአብሔር ሞገስ አልተዘጋጀህም።
የራሳችንን ተፈጥሮ ማርከስ ባልንጀራችንን እንደ መጉዳት በእግዚአብሔር ላይ ታላቅ አለመታዘዝ ነውና፤ በእግዚአብሔር ፊት መንፈሳዊነት የጐደለው ሰውም በሰዎች ፊት ቅንነት እንደ ጐደለው ሰው ራሱን ለመኰነን ያን ያህል አድርጎአል። ስለዚህ በማንኛውም የሕይወት ደረጃ ያሉ ሰዎች ሁሉ በእውነት ቅኖች መሆን እንዳለባቸው የሚያስረዳ ማስረጃ ሁሉ፥ በማንኛውም የሕይወት ደረጃ ያሉ ሰዎች ሁሉ በእውነት ቅዱሳንና መንፈሳውያን መሆን፥ ሁሉንም ነገር ለእግዚአብሔር ክብር በሚስማማ መንገድ ማድረግ እንዳለባቸው በእኩል ያስረዳል።
ደግሞም የሰዎች ወገኖች ሁሉ በዕለት ኑሮአቸው አካሄድና በሚደሰቱበት ነገር ሁሉ አጠቃቀም እንዲሁ ቅዱሳንና ለእግዚአብሔር የተሰጡ ሊሆኑ እንደሚገደዱ የሚያስረዳ ሌላ ማስረጃ ከጸሎት ግዴታችን ሊወሰድ ይችላል።
ጸሎት ለሰዎች ሁኔታዎችና ኑሮዎች ሁሉ የሚገባ ግዴታ እንደ ሆነ የታመነ ነው፤ እንግዲህ ማንኛውም የሕይወት ሁኔታ ከጸሎት ነጻ የማይሆንበትን ምክንያት ብንመረምር፥ እያንዳንዱ የሕይወት ሁኔታ በክፍሎቹ ሁሉ የመንፈሳዊነትና የቅድስና ሁኔታ ሊሆን የሚገባበት እኩል ጥሩ ምክንያት ሆኖ እናገኘዋለን።
ወደ እግዚአብሔር የምንጸልይበትና በመዝሙርና በምስጋና መዝሙራት የምናከብርበት ምክንያት ይህ ነውና፤ ፈጽመን ለእግዚአብሔር ልንኖርና በተቻለው መንገድ ሁሉ ልናከብረው ስለሚገባን ነው። የቃላት ውዳሴ ወይም የምስጋና ሥርዓቶች ከሌሎች ነገሮች ይበልጥ የመንፈሳዊነት ክፍሎች ወይም የእግዚአብሔር አምልኮ ስለ ሆኑ አይደለም፤ ነገር ግን በእግዚአብሔር መታመናችንን፥ መታዘዛችንንና ለእርሱ መሰጠታችንን የምንገልጽባቸው መንገዶች ስለ ሆኑ ነው። እንግዲህ በቃል የሚቀርብ ውዳሴና ምስጋና ምክንያቱ በተቻለው መንገድ ሁሉ ለእግዚአብሔር ልንኖር ስለሚገባን ከሆነ፥ ወደ መንፈሳዊነትና ለእርሱ ወደ መታዘዝ ሊለወጡ በሚችሉ በሌሎች ሥራዎች ሁሉ እግዚአብሔርን ልናመልክና ልናከብር በእኩል እንደምንገደድ በግልጥ ይከተላል። ሥራ ከቃል እጅግ የበለጠ ትርጉም ስላለው፥ በልዩ ጊዜያት በአንዳች ትንሽ የቃላት ሥርዓት ከማክበር ይልቅ በዕለት ኑሮአችን ሥራዎች ሁሉ እግዚአብሔርን ማክበር እጅግ የበለጠ ተቀባይነት ያለው አምልኮ መሆን አለበት።
እንዲሁም እግዚአብሔር በምስጋና ሥርዓቶች የሚመለክ ከሆነ፥ ከእግዚአብሔር ስለሚመጣ በሕይወቱ ክፍልና አጋጣሚ ሁሉ ረክቶ ማመስገንን ደንብ ያደረገ ሰው መዝሙራትን ለመዘመር የተወሰነ ጊዜ ካለው ሰው እጅግ በላቀ መንገድ እግዚአብሔርን ያመሰግናል። እግዚአብሔርን በየስፍራው እንዳለ ስለሚያስብ አንዲት ክፉ ቃል ለመናገር ወይም ያለ ምክንያት አንዳች ለማድረግ የማይደፍር ሰው ቤተ ክርስቲያን ለመቅረት ከማይደፍር ሰው የተሻለ መሰጠትን ይፈጽማል። በዓለም እንደ እንግዳና እንደ መጻተኛ መኖር፥ ደስታዎቹን ሁሉ እንደማንጠቀምባቸው ሆነን መጠቀም፥ ሥራዎቻችንንም ሁሉ ወደ ተሻለ ሕይወት የሚወስዱ እርምጃዎች ማድረግ ከማንኛውም የቅዱስና የሰማያዊ ጸሎት ሥርዓት የተሻለ መሥዋዕት ለእግዚአብሔር ማቅረብ ነው።
ብሩክ መድኃኒታችንን በመምሰል በሥራዎቻችን ሁሉ ትሑታን መሆን፥ የትዕቢትንና የከንቱነትን መልክ ሁሉ መራቅ፥ በቃላችን፥ በሥራችን፥ በአለባበሳችን፥ በጠባያችንና በዓላማዎቻችን የዋሆችና ዝቅተኞች መሆን፥ በጸሎት ለመንበርከክ የተወሰኑ ጊዜያት ብቻ ካሏቸው ሰዎች በላቀ መንገድ እግዚአብሔርን ማምለክ ነው። ቀሪውን ለተቸገሩ ይሰጥ ዘንድ በአስፈላጊ ነገሮች የሚረካ፥ ገንዘብ በፈቃዱ መጠቀም ያለበት ከእግዚአብሔር የተሰጠ መክሊት እንደ ሆነ ስለሚያስብ ገንዘብን በሞኝነት ለማውጣት የማይደፍር ሰው ከውዳሴ መዝሙራት በሚበልጥ ክቡር ነገር እግዚአብሔርን ያመሰግናል።
ለጥበበኛና ለመንፈሳዊ ጸሎት የተወሰኑ ጊዜያት ያሉት ሰው ተገቢ የሆነ የመሰጠት ሥራ ይፈጽማል፤ ነገር ግን ከጥበብና ከቅድስና ጋር ፈጽሞ የሚስማሙትን እንጂ ሌላ ጊዜም ሆነ ስፍራ ወይም ሥራ ለራሱ የማይፈቅድ ሰው መለኮታዊውን ባሕርይ እጅግ በእውነተኛና በጠንካራ መሰጠት ያመልካል። ስለ ንጽሕናና ስለ ቅድስና ከመናገር ንጹሕና ቅዱስ መሆን እንደሚሻል የማያውቅ ማን ነው? እንዲያውም ሰው ንጹሕ ወይም ቅዱስ ወይም ጻድቅ ሊቈጠር የሚገባው በዕለት ኑሮው አካሄድ ንጹሕ፥ ቅዱስና ጻድቅ እስከ ሆነ ድረስ ብቻ እንደ ሆነ የማያውቅ ማን ነው? ይህ ግልጥ ከሆነ ግን ቅዱስ ጸሎት ከመያዝ ቅዱስ መሆን እንደሚሻል ደግሞ ግልጥ ነው።
ስለዚህ ጸሎቶች በቂ መሰጠት ከመሆን እጅግ የራቁ ናቸው፤ እንዲያውም የመሰጠት እጅግ ትናንሽ ክፍሎች ናቸው። በቃልና በጸሎት እግዚአብሔርን ልናመሰግን ይገባናል፤ እንዲህ ሊጠቀሙባቸው የሚችሉ ኃይላትን የሰጠንን እግዚአብሔርን የምናከብርበት አንድ መንገድ ነውና። ነገር ግን ቃላት በራሳቸው ትናንሽ ነገሮች እንደ ሆኑ፥ የጸሎት ጊዜያትም ከቀረው ሕይወታችን ጋር ሲነጻጸሩ ጥቂቶች እንደ ሆኑ፥ እንዲሁ በጸሎት ጊዜያትና ሥርዓቶች ብቻ ያለ መሰጠት በሌላው የሕይወታችን ክፍልና ሁኔታ ሁሉ ሊገለጥ ከሚገባው መሰጠት ጋር ሲነጻጸር እጅግ ትንሽ ነገር ነው።
ደግሞም እግዚአብሔርን በቃላት ሥርዓት ማምለክና እነርሱን ለእርሱ የምናቀርብበትን ጊዜ መጠበቅ ቀላል ነገር እንደ ሆነ፥ እንዲሁ እጅግ ትንሹ የመንፈሳዊነት ዓይነት ነው። በሌላ በኩል ግን እግዚአብሔርን በንብረታችን ማምለክ፥ ጊዜያችንን በትክክል በመጠቀም እርሱን ማክበር፥ የማያቋርጥ ራስን የመካድና ሥጋን የመግደል መሥዋዕት ለእርሱ ማቅረብ የበለጠ አስቸጋሪ እንደ ሆነ፥ እግዚአብሔርን ሊያከብሩ ለሚችሉ ግቦች ብቻ መብላትና መጠጣት፥ በእግዚአብሔር ስም ልንሠራ በምንችልበት ካልሆነ በቀር ምንም ድካም አለመያዝና ምንም መዝናኛ አለመፍቀድ የበለጠ መንፈሳዊነት እንደሚጠይቅ፥ የረከሱ ዝንባሌዎቻችንን ሁሉ መሠዋት፥ ስሜቶቻችንን ሁሉ ማረምና ለእግዚአብሔር ያለንን መንፈሳዊነት የዕለት ኑሮአችን ሥራዎች ሁሉ ደንብና መለኪያ ማድረግ የበለጠ አስቸጋሪ እንደ ሆነ፥ እንዲሁ እንዲህ ያለው መሰጠት በቤተ ክርስቲያንም ሆነ በእልፍኛችን ውስጥ ከምናቀርብለት የመሰጠት ቃላት ይልቅ በእግዚአብሔር ዘንድ እጅግ የበለጠ ተቀባይነት ያለው አገልግሎት ነው።
ማንኛውም ልባም አንባቢ በሕዝብም ሆነ በግል የሚቀርቡ ጸሎቶችን እውነተኛና ታላቅ ዋጋ ለማሳነስ እንዳላሰብሁ በቀላሉ ይረዳል፤ ሐሳቤ ለእግዚአብሔር ከተሰጠ ሕይወት ጋር ሲነጻጸሩ በእርግጥ እጅግ ጥቂት የመሰጠት ክፍል እንደ ሆኑ ማሳየት ብቻ ነው።
ይህን በይበልጥ ግልጥ አድርገን እንድናየው፥ አንድ ሰው እግዚአብሔርን በመዝሙራትና በምስጋና መዝሙሮች የሚያመሰግንበት የተወሰኑ ጊዜያት እንዳሉትና እነርሱንም በጥብቅ እንደሚጠብቅ እናስብ፤ ደግሞም በዕለት ኑሮው ዕረፍት የሌለውና የማይመቸው፥ በሁሉ ነገር በማጉረምረምና በማማረር የተሞላ፥ ጠባዩ እንደ መራው በአጋጣሚ ካልሆነ በቀር ፈጽሞ የማይደሰት፥ በወቅቶች እንኳ የሚያጉረመርምና የሚያዝን፥ በሚደርስበት ነገር ሁሉ የሚጠላው ነገር የማያጣ እንደ ሆነ እናስብ።
እንግዲህ ከእንዲህ ያለ ጠባይ የበለጠ የማይረባና ያለ ምክንያት የሆነ ነገር ልታስብ ትችላለህን? እንዲህ ያለው ሰው ለእርሱ የሚያቀርበው የምስጋና ሥርዓት ስላለው ለእግዚአብሔር አመስጋኝ ተብሎ ሊቈጠር ይገባዋልን? እንዲያውም እንዲህ ያሉት የምስጋና ሥርዓቶች በእግዚአብሔር ዘንድ ተቀባይነት ያለው መሰጠት ከመሆን እጅግ ርቀው እንደ ርኵሰት ሊጠሉ እንደሚገባቸው የተረጋገጠ አይደለምን? በዚህ ምሳሌ የምታየው የማይረባነት በሌላውም የሕይወታችን ክፍል ሁሉ ያው ነው፤ የዕለት ኑሮአችን ጸሎታችንን የሚቃረን ከሆነ በአጉረምራሚዎች አፍ እንዳለ የምስጋና መዝሙር ያው ርኵሰት ነው።
በትዕቢት ተጐናጽፈህ ሳለ የተንበረከኩ ጉልበቶች፥ በምድር ላይ መዝገብ ስትሰበስብ ሳለ ሰማያዊ ልመናዎች፥ በዓለም ሞኝነት ስትኖር ሳለ ቅዱስ መሰጠት፥ ልብህ የትዕቢትና የቂም መቀመጫ ሆኖ ሳለ የየዋህነትና የፍቅር ጸሎቶች፥ ቀናትንና ዓመታትን ለከንቱ መዝናኛዎች፥ ለማይረቡ ጉብኝቶችና ለሞኝ ተድላዎች አሳልፈህ ስትሰጥ ሳለ የጸሎት ሰዓታት፥ እነዚህ ሁሉ በማዘንና በቅሬታ ከሚኖር ሰው እንደሚቀርቡ የምስጋና ሥርዓቶች የማይረቡና በእግዚአብሔር ዘንድ ተቀባይነት የሌላቸው አገልግሎቶች ናቸው።
ስለዚህ የዕለት ኑሮአችን አካሄድ በጸሎታችን የጋራ መንፈስ ካልሆነ፥ ጸሎታችን እውነተኛ ወይም በቂ የመሰጠት ደረጃ ከመሆን እጅግ ርቆ ባዶ የከንፈር ድካም፥ ወይም ከዚያ የከፋ፥ የታወቀ ግብዝነት ይሆናል።
እንግዲህ የጸሎታችንን መንፈስና ዝንባሌ የሕይወታችን የዘወትር መንፈስና ዝንባሌ ልናደርግ ስለሚገባን፥ ይህ የሰዎች ወገኖች ሁሉ ያንኑ የክርስቲያን ሕይወት ከፍተኛ ፍጹምነት ለማግኘት ሊደክሙና ሊናፍቁ እንደሚገባቸው ሊያሳምነን ይችላል። ክርስቲያኖች ሁሉ ያንኑ ቅዱስና ሰማያዊ መሰጠት ሊጠቀሙ፥ ሁሉም በዚያው ትጋት ስለ እግዚአብሔር መንፈስ ሊጸልዩ እንደሚገባቸው፥ እንዲሁ የሰዎች ወገኖች ሁሉ በሚችሉት መጠን ሕይወታቸውን ሁሉም ስለ እርሱ ሊጸልዩለት ከሚገባው ከዚያ ከአንዱ መንፈስ ጋር የሚስማማ ሊያደርጉ እንደሚገባቸው በቂ ማስረጃ ነው።
ስለዚህ ያው የጸሎት ቅድስና ያንኑ የሕይወት ቅድስና እንደሚጠይቅ እርግጥ እንደ ሆነ፥ እንዲሁ ክርስቲያኖች ሁሉ ወደዚያው የሕይወት ቅድስና እንደ ተጠሩ እርግጥ ነው።
ወታደር ወይም ነጋዴ በመሠዊያው ለማገልገል ወይም ወንጌልን ለመስበክ አልተጠራም፤ ነገር ግን ካህን በሙያው ክፍሎች ሁሉ ቀናተኛ፥ ታማኝና ታታሪ ሊሆን እንደሚገደድ፥ እንዲሁ ማንኛውም ወታደር ወይም ነጋዴ በዕለት ኑሮው ክፍሎች ሁሉ ለእግዚአብሔር የተሰጠ፥ ትሑት፥ ቅዱስና ሰማያዊ አሳብ ያለው ሊሆን ይገደዳል።
ይህ ሁሉ ደግሞ በዚህ በአንድ ግልጥ ምክንያት ነው፤ ሰዎች ሁሉ ስለዚያው ቅድስና፥ ጥበብና መለኮታዊ ዝንባሌዎች ሊጸልዩ፥ ለዚያውም መንግሥተ ሰማያት በሚችሉት መጠን ራሳቸውን ሊያዘጋጁ ይገባቸዋልና።
ስለዚህ ሰዎች ሁሉ እንደ ሰዎች አንድና ያው አስፈላጊ ጉዳይ አላቸው፤ ይኸውም ለአስተዋይ ተፈጥሮአቸው ልዕልና የሚገባውን ማድረግና ምክንያትንና ሥርዓትን የዓላማዎቻቸውና የሥራዎቻቸው ሁሉ ሕግ ማድረግ ነው። ክርስቲያኖች ሁሉ እንደ ክርስቲያኖች አንድና ያው ጥሪ አላቸው፤ ይኸውም በክርስቲያናዊ መንፈስ ልዕልና መኖርና የወንጌልን ከፍ ያሉ ትእዛዛት በዕለት ኑሮአቸው የዝንባሌዎቻቸው ሁሉ ደንብና መለኪያ ማድረግ ነው። ለአንዱ የሚያስፈልገው አንድ ነገር ለሁሉም የሚያስፈልገው አንድ ነገር ነው።
ነጋዴው ከእንግዲህ ወዲህ በምድር ላይ መዝገብ ሊሰበስብ አይገባውም፤ ወታደሩ ከእንግዲህ ስለ ክብር ሊዋጋ አይገባውም፤ ታላቁ ምሁር ከእንግዲህ በዕውቀት ጥልቀት ሊመካ አይገባውም፤ ነገር ግን ሁሉም በአንድ መንፈስ «ክርስቶስ ኢየሱስን ከማወቅ የሚበልጥ ስለ ሆነ ሁሉን እንደ ጉዳት» ሊቈጥሩ ይገባቸዋል። [ፊልጵስዩስ 3፥8]
ባለ ማዕረጊቱ ሴት ዓይኖችዋ እንዲያለቅሱ ልታስተምር፥ ትሕትናንም ልትለብስ ይገባታል። ጨዋው ሰው የቀልድና የሐሳብ ፈንጠዝያ አሳቦችን በተሰበረና በተዋረደ ልብ ሊለውጥ ይገባዋል። ባለ ክብሩ ሰው ዳግመኛ እስኪወለድ ድረስ ራሱን ጐስቋላ አድርጎ እስኪቈጥር ድረስ የትውልዱን ክብር ሊክድ ይገባዋል። አገልጋዮች አገልግሎታቸውን ለእግዚአብሔር እንደሚደረግ ሊቈጥሩት ይገባቸዋል። ጌቶች አገልጋዮቻቸውን በክርስቶስ ወንድሞቻቸው፥ የክርስቶስ ምሥጢራዊ አካል አብረዋቸው ብልቶች እንደ ሆኑ ሊይዙአቸው ይገባቸዋል።
ወጣት ሴቶች ወይ በድንግልና ሕይወት ራሳቸውን ለመንፈሳዊነት፥ ለጸሎት፥ ራስን ለመካድና ለበጎ ሥራ ሁሉ ሊሰጡ፥ ወይም አግብተው በቤተሰብ እንክብካቤ ቅዱሳን፥ ልከኞችና አስተዋዮች ሊሆኑ፥ ልጆቻቸውን በመንፈሳዊነት፥ በትሕትናና በመሰጠት እያሳደጉ በሁኔታቸውና በችሎታቸው መጠን በሌላውም በጎ ሥራ ሁሉ ሊበዙ ይገባቸዋል። ከዚህ ሌላ ምርጫ የላቸውም፤ ነገር ግን ከእነዚህ ሁኔታዎች በአንዱ ራሳቸውን ለእግዚአብሔር ሊሰጡ ይገባቸዋል። ጋብቻን ወይም ብቸኝነትን ሊመርጡ ይችላሉ፤ ነገር ግን ከሁለቱ የትኛውንም ሁኔታ የቅድስና፥ የትሕትና፥ የመሰጠትና የክርስቲያን ሕይወት ግዴታዎች ሁሉ ሁኔታ ያደርጉት እንደ ሆነ ለምርጫቸው አልተተወም። አንዳንድ ጊዜ ንጹሓትና ጨዋዎች፥ አንዳንድ ጊዜ ደግሞ እንዲህ ያልሆኑ መሆን እንደማይፈቀድላቸው፥ እንዲሁ ሀብት ስላላቸው ወይም ከባለ ጠጎች ወላጆች ስለ ተወለዱ ራሳቸውን በእግዚአብሔርና በዓለም መካከል መክፈል ወይም ሀብታቸው የሚፈቅድላቸውን ተድላ መውሰድ በሥልጣናቸው አልተተወም።
ሃይማኖት ምን ያህል መልካም ስም እንደሚያስገኝላቸው፥ ወይም ከንቱና ቀላል በሆነ ፈንጠዝያ ሕይወት ላይ መሰጠትን እንዴት እንደሚጨምሩ ሊያስቡ አይገባቸውም፤ ነገር ግን የጸሎታቸውን መንፈስና ዝንባሌ፥ የክርስትናን ተፈጥሮና ግብ ሊመረምሩ ይገባቸዋል፤ ያን ጊዜም ያገቡም ይሁኑ ያላገቡ በእጃቸው ያለው አንድ ጉዳይ ብቻ እንደ ሆነ ያገኛሉ፤ ይኸውም በትንንሽ የአምልኮ ልማዶችና ሥርዓቶች ሳይሆን በአእምሮአቸው አዝማሚያ ሁሉ፥ በአካሄዳቸው መልክ ሁሉና በዕለት ኑሮአቸው አካሄድ ጥበበኞች፥ መንፈሳውያንና ቅዱሳን መሆን ነው።
ወጣት ጨዋ ሰዎች ብሩክ መድኃኒታችን በወንጌል ውስጥ ለዚያ ወጣት ጨዋ ሰው የተናገረውን ሊያስቡ ይገባቸዋል፤ ያለውን ሁሉ ሸጦ ለድሆች እንዲሰጥ አዘዘው። ይህ ቃል ሰዎችን ሁሉ ሁሉንም እንዲሸጡ ባያስገድድም፥ ያላቸው ሁሉ ለእግዚአብሔር የተሰጠ እንደ ሆነ፥ ከእርሱም አንዳች ክፍል ለማያስፈልግ፥ ለከንቱና ለሞኝ ወጪ ሊውል ከድሆች እንዳልተከለከለ በበቂ ሁኔታ በሚያሳይ በጥበብ፥ በምክንያትና በምጽዋት መንገድ ሀብታቸውን ሁሉ እንዲጠቀሙ ሁሉንም ዓይነት ሰዎች በእርግጥ ያስገድዳል።
ስለዚህ ወጣት ጨዋ ሰዎች የተድላና የቅንጦት ሕይወትን ለራሳቸው ቢያቅዱ፥ ሀብታቸውን በተንደላቀቀ ኑሮ፥ በቅንጦትና ባለመገደብ፥ በግርማና በሠረገላ፥ በተድላና በመዝናኛ፥ በጨዋታና በቁማር፥ እንዲህ ባሉ ሌሎች የሞኝ ስሜቶቻቸው ልቅ እርካታዎች ቢያባክኑ፥ ራሳቸውን የክርስቶስ ደቀ መዛሙርት አድርገው ለመቍጠር ያላቸው ምክንያት ራሳቸውን መላእክት አድርገው ለመቍጠር ያላቸውን ያህል ብቻ ነው።
ይህን ይረዱ፤ የክርስቲያን ጨዋ ሰው አንድ ብቸኛ ጉዳይ በበጎ ሥራ ራሱን መለየት፥ በወንጌል እጅግ ከፍ ባሉ በጎ ምግባራት የላቀ መሆን፥ የተራውን ሕዝብ አለማወቅና ድካም መታገሥ፥ በዙሪያው ለሚኖሩ ሁሉ ወዳጅና ረዳት መሆን፥ በጥበብና በቅድስና እጅግ ከፍታ መኖርና በሕይወቱ አካሄድ ሁሉ እውነተኛ ሃይማኖታዊ የአእምሮ ታላቅነትን ማሳየት ነው። ብሩክ ኢየሱስን በማየት ሊማሩት የሚችሉትን ዓይነት ጨዋነት ሊናፍቁ፥ ከቅዱሳን ሐዋርያት ጋር በመኖር ሊያገኙት ከሚችሉት ሌላ የጨዋነት መንፈስ እንዳያሳዩ ይገባቸዋል። እግዚአብሔርን በፍጹም ልባቸው፥ በፍጹም ነፍሳቸውና በፍጹም ኃይላቸው፥ ባልንጀራቸውንም እንደ ራሳቸው መውደድን ሊማሩ ይገባቸዋል፤ ያን ጊዜ እዚህ ሊኖራቸው የሚችለው ታላቅነትና ክብር ሁሉ ይኖራቸዋል፥ ወደ ፊትም በመንግሥተ ሰማያት ለዘላለም ደስታ የተገቡ ይሆናሉ።
እንዲሁ በወንዶችም ሆነ በሴቶች ወገኖችና ሁኔታዎች ሁሉ፥ የክርስቲያኖች ሁሉ የጋራ ሕይወት ሊሆን የሚገባው አንዱ የጋራ ቅድስና ይህ ነው።
ነጋዴው መሰጠትን ለካህኑ ሊተው አይገባውም፤ ካህኑም ትሕትናን ለሠራተኛው ሊተው አይገባውም፤ ሀብታም ሴቶች ልባሞች፥ ንጹሓት፥ በቤት የሚሠሩ መሆንን፥ በሚገባ ልብስ፥ በእፍረትና በራስ መግዛት ራሳቸውን ማስጌጥን ለድሆች ሴቶች ሊተዉ አይገባቸውም፤ ድሆች ሴቶችም በእግዚአብሔር አምልኮና አገልግሎት መገኘትን ለሀብታሞች ሊተዉ አይገባቸውም። ታላላቅ ሰዎች በእውነተኛ የመንፈስ ድህነት የላቁ ሊሆኑ ይገባቸዋል፤ በዝቅተኛና በመከራ ሁኔታ ያሉ ሰዎችም በእግዚአብሔር እጅግ ደስ ሊላቸው ይገባል።
ብርቱና ባለ ሥልጣን ሰው ለጠላቶቹ ይቅር ሊልና ሊጸልይላቸው ይገባዋል፤ በወኅኒ በሰንሰለት የታሰረ በደል የሌለበት መከራ ተቀባይም እንደ ጳውሎስና እንደ ሲላስ በመንፈቀ ሌሊት እግዚአብሔርን በዜማ ሊያመሰግን ይገባዋል። እግዚአብሔር ሊከበር፥ ቅድስና ሊተገበር፥ የሃይማኖትም መንፈስ በማንኛውም የሕይወት ሁኔታና ኑሮ የእያንዳንዱ ክርስቲያን የዘወትር መንፈስ ሊሆን ይገባዋልና።
የእግዚአብሔር ልጅ ከላይ የመጣው በዓለም ላሉት ልዩ ልዩ የኑሮ መንገዶች ውጫዊ የአምልኮ ሥርዓት ሊጨምርና ሰዎችን እንደ ቀድሞው የዓለም ልማድና መንፈስ በሚፈቅደው ዝንባሌና ደስታ እንዲኖሩ ሊተዋቸው አይደለምና፤ ነገር ግን በራሱ ባሕርይ ፈጽሞ መለኮታዊና ሰማያዊ ሆኖ ከሰማይ እንደ ወረደ፥ እንዲሁ የሰውን ዘር ወደ መለኮታዊና ሰማያዊ ሕይወት ሊጠራ ነው፤ ወደ ተፈጥሮአቸውና ዝንባሌአቸው ታላቅ ለውጥ፥ ከመንፈስ ቅዱስ ዳግመኛ ወደ መወለድ፥ በእግዚአብሔር ጥበብና ብርሃንና ፍቅር ወደ መመላለስና በሚችሉት መጠን እርሱን ወደ መምሰል፥ ታላቅነትም ሆነ ሥራ ወይም ተድላ ቢሆን እጅግ የሚማርኩትን የዓለም መንገዶች ሁሉ ወደ መካድ፥ እጅግ ደስ የሚያሰኙአቸውን ስሜቶች ሁሉ ወደ መግደል፥ ለዘላለምም እግዚአብሔርን በመደሰት የከበሩ ሊያደርጋቸው በሚችል ጥበብ፥ ንጽሕናና ቅድስና ወደ መኖር ሊጠራ ነው።
ስለዚህ በክርስቲያን ሕይወት ውስጥ ሞኝ፥ አስቂኝ፥ ከንቱ፥ ምድራዊ ወይም ሥጋዊ የሆነ ማንኛውም ነገር በዚያ ሊኖር የማይገባው ነገር ነው፤ በንስሐ እንባ ሊታጠብ የሚገባው እድፍና ርኵሰት ነው። ከዚህ ዓይነት ያለ ነገር ግን በሕይወታችን አካሄድ ሁሉ ቢዘልቅ፥ ከንቱ፥ ሞኝ ወይም ሥጋዊ በሆኑ ነገሮች ራሳችንን ብንፈቅድ፥ የእምነት ቃላችንን እንክዳለን።
ኢየሱስ ክርስቶስ ጥበብና ቅድስና እንደ ነበረ እርግጥ እንደ ሆነ፥ እርሱን እንድንመስልና ወደ መንፈሱ እንድንጠመቅ እንደ መጣ እርግጥ እንደ ሆነ፥ እንዲሁ በሚችሉት መጠን ጥበበኛ፥ ቅዱስና ሰማያዊ ሕይወት ከሚኖሩ በቀር ማንም የክርስትና ቃል ኪዳኑን ይጠብቃል ሊባል እንደማይችል እርግጥ ነው። ክርስትና ይህ ነው፥ ይህ ብቻ ነው፤ በሕይወት ክፍል ሁሉ ያለ ሁሉን አቀፍ ቅድስና፥ በሥራችን ሁሉ ያለ ሰማያዊ ጥበብ፥ የዓለምን መንፈስና ዝንባሌ አለመምሰል፥ ነገር ግን ዓለማዊ ደስታዎችን ሁሉ ለእግዚአብሔር ወደ መንፈሳዊነትና ወደ መሰጠት መንገዶች መለወጥ ነው።
እንግዲህ ይህ ለእግዚአብሔር የተሰጠ የልብ ሁኔታ፥ እነዚህ የውስጥ ቅድስና ልማዶች እውነተኛ ሃይማኖት ከሆኑ፥ እውነተኛ ሃይማኖት ለሰዎች ወገኖች ሁሉ በእኩል ግዴታም ደስታም ነው፤ ለሰዎች ሁኔታዎች ሁሉ የማያመሰግነው ሆኖ ለአንዱ ብቻ የሚያመሰግነው ነገር የለምና።
በዚህ ለእግዚአብሔር በተሰጠ መንፈስ መኖር፥ በእነዚህ ቅዱሳን ዝንባሌዎች መሞላት፥ ሁሉን ለእግዚአብሔር እንደሚያደርግ ማድረግ የጳጳስ ደስታና ክብር ከሆነ፥ በዚያው መንፈስ መኖር ወጣቶችም ሆኑ ሽማግሌዎች የወንዶችና የሴቶች ሁሉ ክብርና ደስታ ነው። አንድ አረጋዊ ጳጳስ ሕይወቱን ሁሉ ወደ ከፍተኛ የመንፈሳዊነት፥ የጥበብና የመሰጠት ልምምድ እየለወጠ በመለኮታዊ ነገሮች ላይ ሊተጋ የሚገባበትን ምክንያት የሚያገኝ ማንም ቢሆን፥ እርሱ ራሱ በሚችለው መጠን እንዲሁ ሊያደርግ የሚገባበት ያህል ምክንያቶች ሆነው ያገኛቸዋል።
ጳጳስ ከከፍተኛና ከቅዱስ ጥሪው የተነሣ የክርስቲያናዊ ቅድስና የላቀ ምሳሌ ሊሆን ይገባዋል ብትል፥ ትክክል ብለሃል። ነገር ግን ምሳሌ መሆን ከአንተ ይልቅ ለእርሱ የበለጠ ጥቅም አለው ብትል፥ እጅግ ተሳስተሃል፤ ከፍተኛውን የቅድስና ደረጃ ለጳጳስ ተወዳጅ የሚያደርገው ነገር ሁሉ ለማንኛውም ቤተሰብ ወጣት ሁሉ በእኩል ተወዳጅ ያደርገዋልና።
ከፍ ያለ መንፈሳዊነት፥ ታላቅ መሰጠትና ሁሉን በሃይማኖት መጠቀም ለአንዱ የሕይወት ሁኔታ ክብርና ደስታ እንደ ሆነ ለሌላውም እንዲሁ ነውና።
በዓለም ካሉት ሁሉ በሚበልጠው ጳጳስ ውስጥ እንዲኖር የምትፈልገውን የመንፈሳዊነት መንፈስ፥ እግዚአብሔርን እንዴት እንዲወድ እንደምትፈልግ፥ የመድኃኒታችንንና የሐዋርያቱን ሕይወት እንዴት እንዲመስል እንደምትፈልግ፥ በሰማያዊ ሕይወት ምልክቶች ሁሉ እያበራ ከዓለም በላይ እንዴት እንዲኖር እንደምትፈልግ በአእምሮህ አስብ፤ ያን ጊዜ የራስህ ሕይወት መንፈስ ልታደርገው የሚገባህን መንፈስ አገኘህ።
እያንዳንዱ አንባቢ በዚህ አሳብ ላይ ጥቂት እንዲቆይ እለምናለሁ፤ ምናልባትም ከሚገምተው በላይ ከእርሱ ማሳመን ያገኝ ይሆናል። አንዳንድ ሰዎች ምን ያህል መልካምና መንፈሳውያን እንዲሆኑ እንደሚፈልግ ማንም ሊናገር ይችላል፤ ጳጳስ ፈጽሞ ከዓለም በላይ መሆኑና የክርስቲያናዊ ፍጹምነት የላቀ ምሳሌ መሆኑ እንዴት ጥበበኛና አስተዋይ ነገር እንደ ሆነ ሁሉም ያውቃል፤ ጥበበኛና አረጋዊ ጳጳስን እንዳሰብህ ወዲያው ከፍ ያለ የመንፈሳዊነት ደረጃን፥ በወንጌል ተገልጠው የምታገኛቸውን የእነዚያን ቅዱሳን ዝንባሌዎች ሁሉ ሕያው ምሳሌ ታስባለህ።
እንግዲህ ለወጣት ካህን ሊያደርገው የሚችለው እጅግ የሚያስደስተው ነገር ምንድር ነው? ብለህ ራስህን ብትጠይቅ፥ ያን የላቀ ቅዱስ ጳጳስ ከመምሰል የበለጠ ደስታና ክብር የሚሰጠው ነገር የለም ብለህ ለመመለስ ትገደዳለህ።
ቀጥለህም ለማንኛውም ወጣት ጨዋ ሰው ወይም ለእኅቶቹ ሊያደርጉት የሚችሉት እጅግ የሚያስደስተው ነገር ምንድር ነው? ብለህ ብትጠይቅ፥ መልሱ ያው ሊሆን ይገባዋል፤ ይህ መልካም አረጋዊ ጳጳስ በሚኖርበት በእንዲህ ያለ የመንፈሳዊነት ልማድና የመለኮታዊ ሕይወት ልምምድ ከመኖር የበለጠ ደስታ ወይም ክብር የሚሰጣቸው ነገር የለም። በሃይማኖት ታላቅና ክቡር የሆነው ነገር ሁሉ ለማንኛውም ጳጳስ ክብር እንደ ሆነ ለማንኛውም ወንድ ወይም ሴት እውነተኛ ክብር ነውና። ከፍ ያለ የመለኮታዊ ፍቅር ደረጃ፥ የጋለ ፍቅር፥ ነውር የሌለበት ንጽሕና፥ ሰማያዊ ስሜት፥ የማያቋርጥ ሥጋን መግደል፥ ተደጋጋሚ መሰጠት ለማንኛውም ክርስቲያን እጅግ የሚሻልና የሚያስደስት የሕይወት መንገድ ከሆነ፥ ለእያንዳንዱ ክርስቲያን እንዲሁ ነው።
ደግሞም አስብ፤ አንድ ጳጳስ በሕይወቱ አካሄድ ሁሉ ከማዕረጉ በታች ሲኖር፥ የዓለምን ሞኝ ዝንባሌዎች ሁሉ ሲከተል፥ ከንቱዎችንና ዓለማውያንን ሰዎች በሚገዙአቸው በዚያው ጭንቀትና ፍርሃት ሲገዛ ብታየው ስለ እርሱ ምን ታስባለህ? ትንሽ ስሕተት ብቻ የፈጸመ ይመስልሃልን? አይደለም፤ ከእርሱ ጋር በሚገናኘው ነገር እጅግ አስፈላጊ በሆነው ብቻ ሳይሆን ብቸኛው አስፈላጊ በሆነው ነገር የሳተ አድርገህ ትፈርድበታለህ። ጳጳስ ግድ የለሽ ዓለማዊ ሕይወት መኖሩ እንዴት የከፋ ስሕተት እንደ ሆነ አእምሮህ ፈጽሞ እስኪያምን ድረስ በዚህ አሳብ ላይ ጥቂት ቆይ።
እንዲህ እያሰብህ ሳለህ አሳብህን ወደ አንዳንድ ወዳጆችህ፥ ወደ ወንድምህ ወይም ወደ እኅትህ ወይም ወደ ማንኛውም ወጣት መልስ። እንግዲህ የሕይወታቸው አካሄድ በወንጌል ትምህርት እንዳልሆነ ብታይ፥ የኑሮአቸው መንገድ በጠበበው ደጅ ለመግባት የሚደረግ ቅን ጥረት ነው ሊባል እንደማይችል ብታይ፥ በዚያው መጠንና በዚያው ምክንያት ልትፈርድበት የሚገባህን ነገር ታያለህ። ትንሽ ስሕተት አይፈጽሙም፤ ነገር ግን የጥሪውን ከፍተኛ ግዴታዎች ቸል እንደሚል ያ ጳጳስ በዚያው መጠን ሁሉ ነገራቸው በሆነው ይሳሳታሉ፥ እውነተኛ ደስታቸውንም ይስታሉ። ይህን አመክንዮ በራስህ ላይ አድርገው፤ የክርስትናን ትምህርት ተከትለህ ከመኖርና የብሩክ ጌታችንን ግልጥ ትእዛዛት ከመፈጸም ይልቅ ስሜቶችህን ማርካትን መርጠህ ሥራ ፈት፥ ቅንጦተኛና ከንቱ ሕይወት እየኖርህ ራስህን ብታገኝ፥ በማንኛውም ሥርዓት በሌለው ጳጳስ ላይ ልታደርገው የምትችለውን ያን ዕውርነትና አለማስተዋል ሁሉ በራስህ ላይ ልታደርገው ትችላለህ።
የክርስቲያን ሕይወት በጎ ምግባራት ሁሉ፥ ፍጹም ንጽሕናውና ሰማያዊ ዝንባሌዎቹ የጳጳስ ሕይወት ብቸኛ ደንብ እንደ ሆኑ የአንተም ሕይወት ብቸኛ ደንብ ናቸውና። እነዚህን ቅዱሳን ዝንባሌዎች ቸል ብትል፥ በትጋት ባትናፍቃቸው፥ የሚታይ ምሳሌአቸውም ሆነህ ራስህን ባታሳይ፥ ሐዋርያን ከመምሰል ይልቅ ቤተሰቡን ማበልጸግ እንደሚመርጥ ጳጳስ ከእውነተኛ ደስታህ ወድቀሃል፥ ለራስህም ያን ያህል ጠላት ሆነሃል፥ ያን ያህልም ክፉ ምርጫ መርጠሃል። ከፍተኛውን ቅድስናና እጅግ ሰማያዊ ዝንባሌዎችን የጳጳስ ግዴታና ደስታ አድርገህ እንድታስብ የሚያደርግህ ምክንያት ሁሉ እነዚያኑ ዝንባሌዎች የክርስቲያኖች ሁሉ ግዴታና ደስታ አድርገህ እንድታስብ እኩል ጥሩ ምክንያት ነውና። በዓለም ካሉት ጳጳሳት ሁሉ እጅግ ጠቢቡ በታላቅ የቅድስና ከፍታ የሚኖርና በመለኮታዊ ሕይወት ልምምዶች ሁሉ እጅግ ምሳሌ የሆነው እንደ ሆነ፥ እንዲሁ እጅግ ጠቢቡ ወጣት፥ ያገባችም ሆነች ያላገባች እጅግ ጠቢቢቱ ሴት በከፍተኛው የክርስቲያናዊ ቅድስና ደረጃና በመለኮታዊና ሰማያዊ ሕይወት ልምምዶች ሁሉ የምትኖረው ናት።